ປິດສາກຢ່າງຈົບງາມ ງານມະຫາກຳ ກິລາແຫ່ງຊາດ ຄັ້ງທີ 12 ສົ່ງທຸງໄຊໃຫ້ຈຳປາສັກ ເປັນເຈົ້າພາບຄັ້ງທີ 13​

ງານມະຫາກຳ ກິລາແຫ່ງຊາດ ຄັ້ງທີ XII ຫຼື ນະຄອນວຽງຈັນເກມ ປີ 2025, ພາຍຫຼັງໄດ້ເປີດຂຶ້ນຢ່າງເປັນທາງການໃນວັນທີ 15 ພະຈິກ ແລະ ມາຮອດວັນທີ 25 ພະຈິກ 2025 ໄດ້ປິດລົງດ້ວຍຜົນສຳເລັດຢ່າງຈົບງາມ, ທີ່ສະໝາມກິລາ ແຫ່ງຊາດ(ຫຼັກ16) ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມ ຂອງ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ,ນາຍົກລັດຖະມົນຕີແຫ່ງ ສປປ ລາວ, ມີບັນດາຜູ້ນຳພັກ-ລັດ, ອະດີດການນຳພັກ - ລັດຂັ້ນສູນກາງ ແລະ ທ້ອງຖິ່ນ, ບັນດາແຂກ ທັງພາຍໃນ ແລະ ຕ່າງປະເທດ, ບັນດາຄະນະນຳນັກກິລາ, ຄູຝຶກ, ກຳມະການຕັດສິນ, ນັກກິລາ ແລະ ຊາວນະຄອນຫຼວງວຽງຈັນເຂົ້າຮ່ວມ.

 ພິທີ,ເລີ່ມດ້ວຍການສະແດງຮ້ອງເພັງດ່ຽວຊາຍ,ດ່ຽວຍິງ ແລະ ຮ້ອງເພງໝູ່ ຍິງ-ຊາຍ, ປະກອບມີເພັງພູມໃຈທີ່ເກີດເປັນລາວ,ນົກສັນຕິພາບ,ເກມກິລາ,ເຊີນທ່ຽວນະຄອນຫຼວງວຽງຈັນ,ເພງນໍເປເຈົ້າ(ບຸນປີໃໝ່ມົ້ງ), ສຽງເພັງລາວ,ລຳແຫຼ່ຢາຄິດຢາກລອງ,ເພງດອນຮິນກຶມມຸ,ເພງເຂີຍໃໝ່ ແລະ ເພງມ່ວນຊື່ນອຳລາ ແລະ ຕໍ່ດ້ວຍ ຂະບວນສະໜາມ ນຳໜ້າດ້ວຍກອງດຸລິຍາງ,ຂະບວນປ້າຍຄຳຂວັນງານມະຫາກຳກິລາແຫ່ງຊາດ ຄັ້ງທີ XII ,ຂະບວນເຄື່ອງໝາຍສັນຍາລັກງານມະຫາກຳກິລາແຫ່ງຊາດ ຄັ້ງທີ XII,ຂະບວນທຸງຊາດ,ທຸງກິລາ,ທຸງງານມະຫະກຳ ກິລາແຫ່ງຊາດຄັ້ງທີ XII,ກ້ອນກຳລັງກຳມະການຕັດສິນ,ກ້ອນກຳລັງນັກກິລາແຕ່ລະປະເພດ ,ກ້ອນກຳລັງເຍົາວະຊົນທັນວາ, ຂະບວນຕ້ານການໃຊ້ສານຕ້ອງຫ້າມໃນນັກກິລາແລະຂະ ບວນປອດຄັວນຢາສູບ,

ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ,ປະທານຈັດງານມະຫະກຳກິລາ ແຫ່ງຊາດຄັ້ງທີXII,ໄດ້ສະຫຼຸບລາຍງານຜົນສຳເລັດການແຂ່ງຂັນວ່າ:ການຈັດການແຂ່ງຂັນນະຄອນ ຫຼວງວຽງຈັນເກມ 2025 ຄັ້ງນີ້ ໄດ້ຈັດແຂ່ງຂັນໃນ 33 ປະເພດກິລາ, ຊີງຫຼຽນທັງໝົດ 1,563 ຫຼຽນ,ໃນນີ້ ຫຼຽນຄໍາ 424ຫຼຽນ, ຫຼຽນເງິນ 425 ຫຼຽນ ແລະ ຫຼຽນທອງ 631 ຫຼຽນ, ມີການເຂົ້າຮ່ວມ 21 ພາກສ່ວນ ຈາກ 3 ກະຊວງ, ນະຄອນຫຼວງວຽງຈັນ ແລະ 17 ແຂວງ ໃນທົ່ວປະເທດ ຊຶ່ງແຕ່ລະພາກສ່ວນກໍ່ ລ້ວນແລ້ວແຕ່ມີໄຊຊະນະ ສາມາດຍາດແຍ່ງໄດ້ຫຼຽນຄຳ ກໍຄື ຫຼຽນປະເພດຕ່າງໆ ຊຶ່ງສະແດງເຖິງການຍົກລະດັບພັດທະນາກິລາຂອງແຕ່ລະພາກສ່ວນ ແລະ ແມ່ນຜົນງານປະກອບສ່ວນໃຫ້ ການແຂ່ງຂັນກິລາ ພວກເຮົາໃນຄັ້ງນີ້ ເຕັມໄປດ້ວຍບັນຍາກາດ ທີ່ຮັບປະກັນໄດ້ ຕາມຄຳຂວັນທຸກປະການ, ໂດຍປະຕິບັດຕາມລະບຽບການແຂ່ງຂັນກິລາ,ຜົນການແຂ່ງຂັນ ໃນ 3 ອັນດັບ ຈາກ 21 ພາກສ່ວນດັ່ງນີ້:ອັນດັບທີ I ນະຄອນຫຼວງວຽງຈັນໄດ້109 ຫຼຽນຄໍາ, 91 ຫຼຽນເງິນ ແລະ 119 ຫຼຽນທອງ, ລວມທັງໝົດ  319 ຫຼຽນ,ອັນດັບທີ II  ກະຊວງປ້ອງກັນປະເທດ ໄດ້  68 ຫຼຽນຄໍາ, 43 ຫຼຽນເງິນ ແລະ 57 ຫຼຽນທອງ, ລວມທັງໝົດ 168 ຫຼຽນ,ອັນດັບທີ III  ແຂວງ ຄໍາມ່ວນ ໄດ້ 56 ຫຼຽນຄໍາ, 41 ຫຼຽນເງິນ ແລະ 77 ຫຼຽນທອງ,ລວມທັງໝົດ 174  ຫຼຽນ,ຜົນສໍາເລັດຂອງການຈັດງານຄັ້ງນີ້ແມ່ນຍ້ອນ ມີການຊິ້ນໍາ-ນໍາພາ ຢ່າງໃກ້ສິດ ຈາກ ສູນກາງພັກ ແລະ ລັດຖະບານ ໄດ້ຕົກລົງແຕ່ງຕັ້ງຄະນະຮັບຜິດຊອບລະດັບຊາດ ຈັດງານມະຫາກຳກິລາຄັ້ງທີ XII ນີ້ ເພື່ອ ຕິດຕາມ ຊຸກຍູ້ ແລະ ຊີ້ນຳຢ່າງເປັນປະຈຳ, ພ້ອມດຽວກັນນີ້ ຄະນະຮັບຜິດຊອບລະດັບຊາດທີ່ໄດ້ຮັບການແຕ່ງຕັ້ງ, ກໍ່ໄດ້ມີການແບ່ງງານ,ແບ່ງຄວາມຮັບຜິດຊອບ  ມີການນໍາພາ -ຊີ້ນໍາ ບັນຊາ ຕົວຈິງ ຂອງທຸກຂະແໜງການ  ແລະ ພາກສ່ວນ ທີ່ກ່ຽວຂ້ອງ, ໂດຍສະເພາະ ຄະນະພັກ-ຄະນະນຳກະຊວງສຶກສາທິການ ແລະ ກິລາ ຮ່ວມກັບ ຄະນະພັກ ອົງການປົກຄອງນະຄອນຫຼວງວຽງຈັນ ລວມທັງ ມີການປະກອບສ່ວນ ທຸມເທດ້ານເຫື່ອແຮງ, ສະຕິປັນຍາ ຫົວຄິດປະດິດສ້າງຂອງຊາວນະຄອນຫຼວງວຽງຈັນ,ງານມະຫາກຳກິລາຄັ້ງນີ້ ເປັນອີກຜົນສຳເລັດ ແຫ່ງການພັດທະນາກິລາ ກາຍຍະກຳລາວ ໃນຂອບເຂດທົ່ວປະເທດ,ຊຶ່ງຈະເປັນບາດກ້າວອັນສຳຄັນ ໃຫ້ແກ່ທຸກພາກສ່ວນ ເພື່ອສືບຕໍ່ພັດທະນາກິລາຂອງຕົນ ໃນຕ່ໜ້າ.

ທ່ານ ສອນໄຊ ສີພັນດອນ ໄດ້ຂຶ້ນກ່າວປິດງານມະຫາກຳກິລາແຫ່ງຊາດຄັ້ງທີ XII ຢ່າງເປັທາງການວ່າ:ຕາງໜ້າ ລັດຖະບານລາວ  ແລະ ໃນນາມສ່ວນຕົວ ຂໍສະແດງຄວາມຍ້ອງຍໍຊົມເຊີຍ,ຜົນງານຂອງຄະນະຮັບຜິດຊອບຈັດງານ,ຄະນະພັກ,ອຳນາດອົງການປົກຄອງ,ພີ່ນ້ອງ ປະຊາຊົນບັນດາເຜົ່າ ແລະ ຊາວນະຄອນຫຼວງວຽງຈັນ,ບັນດາທ່ານຄະນະນັກກິລາທຸກພາກສ່ວນ,ຄູຝຶກ,ກຳມະການຕັດສິນ,ນັກກິລາ,ຜູ້ປະກອບການ,ພີ່ນ້ອງປະຊາຊົນລາວທຸກຊັ້ນຄົນທີ່ໄດ້ໃຫ້ການປະກອບສ່ວນເຂົາຮ່ວມຈັດງານເຮັດໃຫ້ງານມະຫາກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນເປັນເຈົ້າພາບຄັ້ງນີ້ມີຜົນສຳເລັດຕາມຈຸດປະສົງລະດັບຄາດໝາຍຢ່າງຈົບງາມ ແລະ ຂໍສະແດງຄວາມຊົມເຊີຍຜົນສຳເລັດດັ່ງກ່າວຢ່າງສຸດອົກສຸດໃຈ,ມາຮອດນີ້ປະກາດປິດງານມະຫາກຳກິລາແຫ່ງຊາດຄັ້ງທີ XII ຢ່າງເປັນທາງການ.

 ພ້ອມນັ້ນ, ຍັງມີພິທີ ເຊີນທຸງຊາດ ແລະ ທຸງກິລາລົງຈາກຍອດເສົາ,ເຄົາລົບທຸງຊາດ, ພ້ອມດຽວກັນກັບໄຟອ່າງທວນໄຟຄ່ອຍມອດລົງ,ຈາກນັ້ນ, ທ່ານ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ,ລັດຖະມົນຕີກະຊວງສຶກສາທິການ ແລະ ກິລາ, ປະທານຮ່ວມຈັດງານມະຫະກຳກິລາ ແຫ່ງຊາດ ຄັ້ງທີ XII ແລະ ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ,ປະທານສະພາປະຊາຊົນນະຄອນຫຼວງວຽງຈັນ ຮ່ວມພິທີມອບ-ຮັບທຸງກິລາແຫ່ງຊາດໃຫ້ເຈົ້າພາບງານມະຫະກຳ ກິລາແຫ່ງຊາດ ຄັ້ງທີ XIII ໂດຍ ທ່ານ ອາລຸນໄຊ ສູນນະລາດ ເລຂາພັກແຂວງ ຈຳປາສັກ ໃຫ້ກຽດກ່າວຮັບວ່າ: ຕາງໜ້າໃຫ້ແຂວງຈໍາປາສັກຂໍຮັບເອົາທຸງກິລາແຫ່ງຊາດຊຶ່ງແມ່ນສັນຍາລັກຂອງ ການເປັນເຈົ້າພາບງານມະຫາກຳກິລາ ແຫ່ງຊາດ ຄັ້ງທີ XIII ແລະ ຂໍເຊີນຊວນບັນດາທ່ານການນໍາຂັ້ນສູນກາງ, ແຂວງ, ນະຄອນຫຼວງ ຈົ່ງໄດ້ກະກຽມນັກກິລາເພື່ອເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ XIII,ທີ່ແຂວງຈຳປາສັກ ດ້ວຍຄວາມຍິນດີຕ້ອນຮັບ." ຢ່າລືມເດີ້ ພົບກັນ 2028 ທີ່ແຂວງຈຳປາສັກ,ຈຳປາສັກແກມ 2028"

ຕອນທ້າຍ,ໄດ້ມີການສະແດງໂດຣນ,ລາຍການສະແດງຂອງຊາວໜຸ່ມລາວຜູ້ເຂັ້ມແຂງ(ມວຍປະເພດຕ່າງໆ), ລາວນ້ອຍພິກຂີ້ໜູ,ລາຍການ ສະແດງຈາກແຂວງ ເຈົ້າພາບງານມະຫາກຳ ກິລາແຫ່ງຊາດ ຄັ້ງທີ XIII  ແລະ ລາຍການສະແດງສາມັກຄີບັນດາເຜົ່າ.ພົບກັນທີ່ງານມະຫາກຳ ກິລາແຫ່ງຊາດ ຄັ້ງທີ XIII ທີ່ແຂວງ ຈຳປາສັກ ເປັນເຈົ້າພາບ.

ທີ່ມາ: ປະຊາຊົນ

แชร์