ສໍາມະນານິເວດວິທະຍາ ຕໍ່ການພັດທະນາເສດທະກິດ

  ສະຖາບັນນິເວດວິທະຍາ ແລະເຕັກໂນໂລຊີຊີວະພາບ, ກະຊວງວິທະຍາສາດ ແລະເຕັກໂນໂລຊີ (ກວຕ) ຈັດກອງປະຊຸມສຳມະນາວິທະຍາສາດກ່ຽວກັບວຽກງານນິເວດວິທະຍາຕໍ່ກັບການພັດທະນາເສດຖະກິດ-ສັງຄົມ ຂຶ້ນໃນວັນທີ 30 ເມສາ 2019 ຢູ່ຫ້ອງປະຊຸມຂອງສະຖາບັນດັ່ງກ່າວພາຍໃຕ້ການເປັນປະທານຂອງທ່ານ ບໍ່ວຽງຄຳ ວົງດາລາ, ລັດຖະມົນຕີ ກວຕ, ມີບັນດາທ່ານຮອງລັດຖະມົນຕີ, ບັນດາຫົວໜ້າຫ້ອງການ, ກົມ, ສະຖາບັນ ແລະແຂກຖືກເຊີນເຂົ້າ ຮ່ວມ.

  ກອງປະຊຸມດັ່ງກ່າວຈັດຂຶ້ນເພື່ອເຜີຍແຜ່ພາລະບົດບາດ, ຄວາມສຳຄັນ ແລະສະພາບບັນຫາຂອງການຄົ້ນຄວ້າ-ພັດທະນາໃນຂົງເຂດນິເວດວິທະຍາພ້ອມທັງເປັນເວທີການແລກປ່ຽນບົດຮຽນການຄົ້ນຄວ້າ ແລະ ການນຳໃຊ້ຜົນການຄົ້ນຄວ້າທາງດ້ານນິເວດວິທະຍາ ແລະເພື່ອເປັນການປຶກສາຫາລືທາງວິຊາການໃນການຄົ້ນຄວ້າ-ພັດທະນາວຽກງານນິເວດວິທະຍາ, ການອະນຸລັກຊີວະນາໆພັນເພື່ອຊຸກຍູ້ ແລະສົ່ງເສີມການພັດທະ ນາເສດຖະກິດ-ສັງຄົມ ໃຫ້ມີຄວາມຍືນຍົງ.

  ທ່ານ ນາງ ແກ້ວວິວອນ ອຸດທະຈັກ, ຫົວໜ້າສະຖາບັນນິເວດວິທະຍາ ແລະເຕັກໂນໂລຊີຊີວະພາບໃຫ້ຮູ້ວ່າ: ນິເວດວິທະຍາໝາຍເຖິງການພົວພັນເຊິ່ງກັນ ແລະກັນລະຫວ່າງສິ່ງທີ່ມີຊີວິດກັບສິ່ງທີມີຊີວິດ, ສິ່ງທີ່ມີຊີວິດກັບສິ່ງທີ່ບໍ່ມີຊີວິດ ແລະການຢູ່ຮ່ວມກັນຂອງສິ່ງທີ່ມີຊີວິດກັບສິ່ງແວດລ້ອມເພື່ອໃຫ້ການຢູ່ຮ່ວມກັບຂອງສິ່ງທີ່ມີຊີວິດມີຄວາມສົມດູນກັນທາງທຳມະຊາດ,ສິ່ງທີ່ມີຊີວິດມີຫຼາກຫຼາຍຊະນິດເຊັ່ນ: ຈຸລິນຊີ, ພືດ, ສັດ ແລະຄົນຊຶ່ງໄດ້ມີການແລກປ່ຽນທາດ, ແຮ່ທາດ, ພະລັງງານຜ່ານຕ່ອງໂສ້ອາຫານໃນສິ່ງແວດລ້ອມທີ່ມີຊີວິດ ແລະບໍ່ມີຊີວິດເປັນທີ່ຢູ່ອາໃສເຮັດໃຫ້ມີການໝູນວຽນເປັນລະບົບ ຫຼື ເອີ້ນວ່າ (ລະບົບນິເວດ ). ສະເພາະກຸ່ມທີ່ມີຊີວິດປະກອບມີ: ອາຕອມ,ໂມເລກຸນ,ຢີນ,ຈຸລັງ,ແພຈຸລັງ,ອະໄວຍະວະ ແລະ ອື່ນໆ... ລະບົບນິເວດມີຄວາມສຳຄັນຕໍ່ຄົນເຮົາຫຼາຍເພາະວ່າໃນສະພາບ ການຂອງໂລກແມ່ນຢູ່ໃນສະພາວະທາງວິທະຍາສາດ ທີ່ມະນຸດເຮົາເປັນຜູ້ ປະດິດຄິດຄົ້ນ, ສະແຫວງຫາຄວາມຮູ້ ແລະສ້າງເຕັກນິກອັນໃໝ່ເພື່ອຈະ ມານຳໃຊ້ເຂົ້າໃນຊີວິດປະຈຳວັນມະນຸດ ຫຼື ຄົນເຮົາເປັນສິ່ງທີ່ມີຊີວິດຊະນິດດຽວທີ່ມີອິດທິພົນຕໍ່ກັບການປ່ຽນແປງຂອງສິ່ງແວດລ້ອມເຊັ່ນ: ການຂຸດຄົ້ນຊັບ ພະຍາກອນທຳມະຊາດເພື່ອມາປຸງແຕ່ງຕອບສະໜອງຄວາມຮຽກຮ້ອງຕ້ອງການຂອງສັງຄົມ ແລະອື່ນໆ, ການເພີ່ມຂຶ້ນຂອງ ປະຊາກອນກໍເປັນບັນຫາໜຶ່ງທີ່ສາມາດເຮັດໃຫ້ສະພາບແວດລ້ອມມີການປ່ຽນແປງດັ່ງນັ້ນ, ການສຶກສາເຖິງລະບົບນິເວດວິທະຍາຈຶ່ງມີຄວາມສຳຄັນ ແລະຈຳເປັນຕໍ່ການຮັກສາສະພາບແວດ ລ້ອມໃຫ້ມີຄວາມສົມດູນ ແລະມີຄວາມສຳພັນຂອງສິ່ງທີ່ມີຊີວິດເປັນຕົ້ນແມ່ນຄວາມຫຼາກຫຼາຍດ້ານຊີວະນາໆພັນ,ຮັກສາແຫຼ່ງນໍ້າ,ການຜະລິດ,ການຫຼຸດຜ່ອນໄພພິບັດ ທາງທຳມະຊາດ ແລະການປ່ຽນແປງສະພາບຂອງດິນຟ້າອາກາດ.

ນອກຈາກນັ້ນຜູ້ເຂົ້າຮ່ວມຍັງໄດ້ຮັບຟັງການນໍາສະເໜີກ່ຽວກັບສະພາບລວມການຄົ້ນຄວ້າ-ພັດທະນາຂົງເຂດວຽກງານນິເວດວິທະຍາ, ການຄົ້ນຄວ້າຊະນິດພັນພືດເພື່ອເຂົ້າໃນການພັດທະນາແບບຍືນຍົງ, ການສຶກສາເຫັນ ແລະຄວາມສຳຄັນຂອງເຫັດໃນການນຳໃຊ້ຢູ່ ສປປ ລາວ, ຄວາມສຳຄັນຂອງພິພິທະພັນວິທະຍາສາດຕໍ່ກັບການເກັບຮັກສາ ວັດຖຸພັນຊີວະນາໆພັນ, ການນຳໃຊ້ເຕັກໂນໂລຊີໃນການລ້ຽງ ແລະ ການ ປຸງແຕ່ຜະລິດຕະພັນສັດ ແລະການຄົ້ນຄວ້າ-ພັດທະນາສວນສາທິດວິ ທະຍາສາດ-ເຕັກໂນໂລຊີການກະເສດທີ່ທັນສະໄໝ.

ພ່ບຂ່າວ:

ໂດຍ: ໜັງສືພິມເສດຖະກິດ-ສັງຄົມ

• 03/05/2019