ຫຼາຍພາກສ່ວນສືບຕໍ່ຊ່ວຍຊາວບ້ານນາພູຄຳ ຖືກກະທົບອັກຄີໄພ

  ຫຼາຍພາກສ່ວນທະຍອມນຳເຄື່ອງຊ່ວຍເຫຼືອປະຊາຊົນທີ່ຖືກກະທົບຈາກອັກຄີໄພຢູ່ບ້ານາພູຄຳ ເມືອງຊະນະສົມບູນ ແຂວງຈຳປາສັກຢ່າງຕໍ່ເນື່ອງ ແລະບໍ່ດົນ ມານີ້ໂຮງງານຜະລິດເຫລັກຕະປູແສງເດືອນກາຊ້າງຄູ່ ເມືອງບາຈຽງຈະເລີນສຸກ ແຂວງຈໍາປາສັກ ກໍໄດ້ໃຫ້ການຊ່ວຍເຫລືອຕະປູຕອກໄມ້ ແລະ ຕອກສັງກະສີ ແກ່ປະຊາຊົນທີ່ໄດ້ຮັບຜົນກະທົບດັ່ງກ່າວລວມມູນຄ່າ 15 ກວ່າລ້ານກີບ ໃນຂະນະທີ່ປະຈຸບັນປະຊາຊົນຍັງຄອງຄອຍການຊ່ວຍເຫລືອຈາກສັງຄົມກໍ່ຄືລັດຖະ ບານເລື່ອງທີ່ພັກອາໃສ.

  ພິທີມອບ-ຮັບເຄື່ອງຊ່ວຍເຫລືອດັ່ງກ່າວໄດ້ມີຂື້ນໃນວັນທີ 28 ເມສາ 2019 ຜ່ານມາ, ທີ່ບ້ານນາພູຄໍາ ເມືອງຊະນະສົມບູນ ແຂວງຈໍາປາສັກ, ເປັນກຽດກ່າວມອບເຄືອງຊ່ວຍເຫລືອໂດຍທ່ານ ຫົງທອງ ວັນນະລັດສະໝີ ຜູ້ອໍານວຍການໂຮງງານຜະລິດເຫລັກຕະປູແສງເດືອນກາຊ້າງຄູ່ ແລະກ່າວຮັບດ້ວຍອໍານາດການປົກຄອງບ້ານ, ມີບັນດາທ່ານຮອງຜູ້ອໍານວຍການໂຮງງານພ້ອມດ້ວຍຄະນະ, ມີພໍ່ແມ່ປະຊາຊົນພາຍໃນບ້ານ ແລະ ຜູ້ທີ່ໄດ້ຮັບຄວາມເສຍຫາຍເຂົ້າຮ່ວມ.

  ສໍາລັບເຄື່ອງຊ່ວຍເຫລືອທີ່ທາງໂຮງງານໄດ້ນໍາໄປມອບໃຫ້ແກ່ປະຊາຊົນທີ່ຖືກເຄາະຮ້າຍໄພໃໝ້ເຮືອນຈໍານວນ 22 ຄອບຄົວ ທີ່ບ້ານນາພູຄໍາ ເມືອງຊະນະ ສົມບູນ ແຂວງຈໍາປາສັກ ໃນຄັ້ງນີ້ປະກອບມີຄື: ຕະປູຕອກໄມ້ຈໍານວນ 100 ແກັດ ແລະ ຕະປູຕອກສັງກະສີຈໍານວນ 100 ແກັດ, ລວມເປັນມູນຄ່າທັງ ໝົດ 15 ກວ່າລ້ານກີບ, ພ້ອມດ້ວຍກັນນີ້ທາງຄະນະທີ່ເດີ່ນທາງໄປຮ້ວມໃນຄັ້ງນີ້ກໍ່ໄດ້ໃຫ້ການຊ່ວຍເຫລືອປະຊາຊົນທັງເງິນສົດຈໍານວນໜື່ງ, ເຂົ້າສານ, ເຄື່ ອງນຸ່ງ ແລະ ໜີ່ແກ່ປະຊາຊົນໂດຍໄດ້ມອບແກ່ປະຊາຊົນດ້ວຍຕົນເອງ.

  ຢ່າງໃດກໍ່ການຊ່ວຍເຫລືອຂອງສັງຄົມກໍ່ຄືການນໍາຂັ້ນເມືອງ ແລະ ຂັ້ນແຂວງ, ຈາກບັນດາບໍລິສັດ ແລະຮ້າງຮ້ານອື່ນທີ່ໄດ້ໃຫ້ການຊ່ວຍເຫລືອແກ່ຜູ້ທີ່ຖຶກອັກຄີໄພນັບແຕ່ວັນທີ 15 -21 ເມສາ 2019 ມີຈໍານວນເງິນສົດມອບໃຫ້ປະຊາ ຊົນມູນຄ່າ 97 ລ້ານກວ່າກີບ,ໃນນັ້ນຢູ່ບັນຊີທະນາຄານພັດທະນາລາວ 28 ລ້ານກວ່າກີບ, ຢູ່ນໍາຄັງບ້ານ 18 ລ້ານກວ່າກີບ, ປະຊາຊົນໄດ້ຮັບຈາກຜູ້ບໍລິຈາກເອງ 50 ລ້ານກວ່າກີບ, ນອກນີ້ມີເຄື່ອງບໍລິໂພກ ແລະອຸປະໂພກລວມມີມູນຄ່າ 450 ລ້ານ ກວ່າກີບ ແລະ ໃນປະຈຸບັນປະຊາຊົນກໍ່ຍັງຄອງຄອຍການຊ່ວຍເຫລືອຈາກສັງຄົມກໍ່ຄືພັກ-ລັດຖະບານ, ອໍານາດການປົກຄອງແຂວງ, ໂດຍສະເພາະທີ່ປະຊາຊົນຮຽກຮ້ອງ ແລະມີຄວາມປະສົງຄືສະຖານທີ່ອາໃສພັກເຊົາເພື່ອດໍາລົງຊີວິດຕໍ່ໄປ.

 ພາບຂ່າວ

ໂດຍ: ໜັງສືພິມເສດຖະກິດ-ສັງຄົມ

แชร์