ໄຊທານີ ສະໜອງຊີ້ນໃຫ້ຕະຫຼາດແລ້ວ 4 ພັນກວ່າໂຕນ

ໄຊທານີ ແມ່ນໜຶ່ງໃນ 9 ຕົວເມືອງ ຂອງນະຄອນຫຼວງວຽງຈັນ ແລະຍັງເປັນເມືອງທີ່ມີທ່າແຮງສຳຄັນຫຼາຍດ້ານທີ່ໜ້າສົນໃຈໂດຍສະເພາະດ້ານເນື້ອທີ່ທີ່ກວ້າງ ຂວາງ, ເປັນເຂດທົ່ງພຽງ ແລະມີລະບົບຊົນລະປະທານທີ່ເອື້ອອຳນວຍຈຶ່ງເໝາະແກ່ການປູກຝັງ-ລ້ຽງສັດແລະການຜະລິດກະສິກຳເປັນສິນຄ້າ, ສະເພາະການຜະລິດ ແລະສະໜອງທາດຊີ້ນແກ່ຕະຫຼາດໃນ 3 ເດືອນຕົ້ນປີເມືອງສາມາດປະຕິບັດໄດ້ 4 ພັນກວ່າໂຕນ ເທົ່າກັບ 25,1% ຂອງແຜນການໝົດປີ.

 ທ່ານ ຈັນທະລາ ອິນທະລັງສີ ເຈົ້າເມືອງໄຊທານີ ໃຫ້ສຳພາດວ່າ: ໄຊທານີ ເປັນໜຶ່ງໃນ 9 ຕົວເມືອງຂອງນະຄອນຫຼວງວຽງຈັນ ແລະຍັງເປັນເມືອງທີ່ມີທ່າແຮ ງສຳຄັນຫຼາຍດ້ານທີ່ໜ້າສົນໃຈເປັນຕົ້ນດ້ານເນື້ອທີ່ເພາະທົ່ວເມືອງມີເນື້ອທີ່ທັງໝົດ 845,05 ກິໂລແມັດກາເລ, ປະຊາກອນ 2,02 ແສນຄົນ, ເນື້ອທີ່ສ່ວນຫຼາຍເປັນເຂດທົ່ງພຽງ, ມີລະບົບຊົນລະປະທານອຳນວຍຄວາມສະດວກແກ່ການປູກຝັງ-ລ້ຽງສັດ ແລະຜະລິດກະສິກຳເປັນສິນຄ້າ, ພ້ອມດຽວກັນນັ້ນປະຊາຊົນສ່ວນຫຼາຍແມ່ນຢືດຖືອາຊີບການເຮັດກະສິກຳ ແລະ ໃນເມື່ອເມືອງໄຊທານີມີທ່າແຮງເໝາະສົມດັ່ງທີ່ກ່າວມານັ້ນ, ນະຄອນຫຼວງຈຶ່ງໄດ້ມອບໃຫ້ເມືອງເປັນໜຶ່ງໃນທ່າແຮງສຳຄັນໃນການຜະລິດເພື່ອຄ້ຳປະກັນສະບຽງອາຫານ, ສະເພາະການຜະລິດເຂົ້ານາແຊງແມ່ນມອບໃຫ້ທັງໝົດ 4,71 ພັນເຮັກຕາສາມາດປະຕິບັດໄດ້ 4,33 ພັນເຮັກຕາ ເທົ່າກັບ 90% ຂອງແຜນການ, ພືດຜັກ 3,14 ພັນເຮັກຕາປະຕິບັດໄດ້ 1,56 ພັນເຮັກຕາ ເທົ່າ 70%, ໄມ້ກິນໜາກ 120 ເຮັກຕາ ປະຕິບັດໄດ້ 44,5 ເຮັກຕາ, ນອກຈາກນີ້ຍັງບັນດາກຸ່ມປູກພືດຜັກອິນຊີປະຕິບັດໄດ້ 65,84 ເຮັກຕາ ຈາກທັງໝົດ 4 ກຸ່ມ 82 ຄອບຄົວ.

 ສຳລັບວຽກການລ້ຽງສັດກໍແມ່ນວຽກໜຶ່ງທີ່ເມືອງໄດ້ເອົາໃຈໃສ່ເພື່ອເຮັດໃຫ້ການສະໜອງທາດຊີ້ນພຽງພໍກັບຄວາມຕ້ອງການຂອງຕະຫຼາດເປັນຕົ້ນງົວ, ຄວາ ຍ, ແບ້, ໝູ, ເປັດ, ໄກ່ ແລະ ປາ, ຊຶ່ງມາຮອດປະຈຸບັນທົ່ວເມືອງມີຟາມທັງໝົດ 173 ຟາມ ແລະຜ່ານການເກັບກຳໃນໄລຍະ 3 ເດືອນທຳອິດຂອງປີນີ້ເຫັນໄດ້ວ່າເມືອງໄຊທານີສາມາດສະໜອງທາດຊີ້ນໃຫ້ກັບຕະຫຼາດພາຍໃນໄດ້ທັງໝົດ 4,44 ພັນໂຕນ ເທົ່າກັບ 25,1% ຂອງແຜນການປີ (ແຜນການທັງໝົດແມ່ນ 17,75 ພັນໂຕນຕໍ່ປີ).

ພາບ ແລະຂ່າວ

ໂດຍ: ໜັງສືພິມເສດຖະກິດ-ສັງຄົມ

แชร์