ຜົນສະຫຼຸບ 2 ບ້ານທຸກມີທີ່ຢູ່ ແລະອາຊີບໝັ້ນຄົງຍ້ອນເຈົ້າຂອງໂຮງງານນ້ຳດື່ມ-ນ້ຳກ້ອນໂລມາຄຳ

  ເມື່ອອາທິດຜ່ານມາທີ່ແຂວງສະຫວັນນະເຂດ ໄດ້ມີການຈັດກອງປະຊຸມສະຫຼຸບການມີສ່ວນຮ່ວມຂອງໂຮງງານນໍ້າດື່ມ ແລະນໍ້າກ້ອນໂລມາຄໍາ ໃນການລຶບລ້າງຄວາມທຸກຍາກຢູ່ບ້ານຄໍາປ່າແໜ ແລະບ້ານປ່າກ້ວຍ ເມືອງຈຳພອນ ໂດຍພາຍໃຕ້ການເປັນປະທານຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມນີ້ກໍມີການນຳແຂວງ, ກະຊວງກະສິກຳ ແລະປ່າໄມ້ພ້ອມຕາງໜ້າຈາກປະຊາຊົນບ້ານຄຳປ່າແໜ ແລະບ້ານປ່າກ້ວຍເຂົ້າຮ່ວມ.

 ທ່ານ ຄໍາລຸຍ ຍາດຕິວົງ ຫົວໜ້າພະແນກກະສິກໍາ ແລະປ່າໄມ້ແຂວງກ່າວວ່າ: ໂຄງການຮ່ວມມືລຶບລ້າງຄວາມທຸກຍາກຢູ່ບ້ານຄໍາປ່າແໜ ແລະບ້ານປ່າກ້ວຍ ມີໄລຍະປະຕິບັດໂຄງການ 3 ປີ ແຕ່ປີ 2016-2018 ເປັນໂຄງການທຳອິດທີ່ໄດ້ຮັບການສະໜັບສະໜູນຈາກນັກທຸລະກິດທີ່ນໍາໃຊ້ທຶນຮ່ວມສ່ວນຕົວປະກອບສ່ວນສ້າງປະຖົມປັດໃຈໃນການຫັນປ່ຽນວິຖີຊີວິດຂອງຄອບຄົວທຸກຍາກຢູ່ 2 ບ້ານດັ່ງກ່າວທີ່ເຄີຍຢຶດຖືການໄປຂໍທານເພື່ອລ້ຽງຊີບຢ່າງເລື່ອນລອຍມາເປັນເວ ລາດົນນານ, ເຊີ່ງນັກທຸລະກິດຄົນດັ່ງກ່າວແມ່ນທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມ ແລະນໍ້າກ້ອນໂລມາຄໍາຢູ່ນະຄອນໄກສອນພົມວິຫານ ແຂວງສະຫວັນນະເຂດ ທີ່ໄດ້ປະກອບສ່ວນທືນເຂົ້າໃນໂຄງການດັ່ງກ່າວ 15 ຕື້ກວ່າກີບ ກວມເອົາ 70% ອີກ 30% ແມ່ນທຶນສົມທົບຂອງລັດຖະບານນອກນັ້ນຍັງມີທຶນຂອງອົງການຈັດຕັ້ງສາກົນຕື່ມອີກ.

 ໃນໄລຍະ 3 ປີ ຜ່ານການຈັດຕັ້ງປະຕິບັດຕົວຈິງຂອງທ່ານ ເກຍ ອູ໊ສິດທິເດດ ພ້ອມທີມງານ ແລະພະນັກງານລັດໄດ້ລົງເຮັດວຽກໃນການລົງເກັບກຳຂໍ້ມູນຕົວຈິງຂອງຈຳນວນຄອບຄົວທີ່ທຸກຍາກເຂົ້າມາໂຄງການຈາກເບື້ອງຕົ້ນ 35 ຄອບຄົວ ແລະໄດ້ຂະຫຍາຍເປັນ 77 ຄອບຄົວເປົ້າໝາຍຊຶ່ງບ້ານຄໍາປ່າແໝມີເນື້ອທີ່ 900ກວ່າເຮັກຕ້າ, ເນື້ອທີ່ນາ 300 ກວ່າເຮັກຕາ, ມີ 124 ຫຼັງຄາ, 139 ຄອບຄົວ ລວມພົນລະເມືອງ 816 ຄົນ ແລະບ້ານປ່າກ້ວຍມີເນື້ອທີ່ 1.400 ກວ່າເຮັກຕາ, ເນື້ອທີ່ນາ 280 ກວ່າເຮັກຕາ, ມີ 108 ຫຼັງຄາເຮືອນ, 122 ຄອບຄົວ.

ຜ່ານການຈັດຕັ້ງປະຕິບັດໂຄງການລຶບລ້າງຄວາມທຸກຍາກຂອງ 2 ບ້ານ ໂດຍທຽບໃສ່ 6 ມາດຕະຖານຄອບຄົວພົ້ນທຸກຕາມດໍາລັດ 348/ລບ ເຫັນວ່າປະຊາ ຊົນ ໃນ 77 ຄອບຄົວເປົ້າໝາຍສາມາດບັນລຸໄດ້ຈໍານວນໜຶ່ງຄື: ມີທີ່ຢູ່ອາໄສທີ່ຂ້ອນຂ້າງແໜ້ນໜາຖາວອນ ແລະມີຊັບສິນເປັນຂອງຕົນເອງ 77 ຄອບຄົວ, ໂດຍແມ່ນດິນປຸກສ້າງເຮືອນຢູ່, ດິນທຳການຜະລິດ, ໝອງສະ, ນໍ້າບາດານ, ພາຫະນະຮັບໃຊ້ ແລະອື່ນໆ, ປະຊາຊົນ 77 ຄອບຄົວມີອາຊີບເຮັດນາປູກເຂົ້າເປັນອາຊີບຕົ້ນຕໍ, ປູກພຶດ, ລ້ຽງສັດຊຶ່ງປະຈຸບັນລາຍຮັບຄອບຄົວຍັງຕໍ່າຍ້ອນສະມັດຕະພາບຜົນຜະລິດບໍ່ທັນສູງຕ້ອງໄດ້ສູ້ຊົນຍົກສະມັດຕະພາບເຂົ້ານາປີໃຫ້ສູງຂຶ້ນ,ເດັກນ້ອຍໃນເກນອາຍຸເຂົ້າຮຽນໄດ້ເຂົ້າໂຮງຮຽນເຖິງ 95% ໄດ້ຊົມໃຊ້ນໍ້າສະອາດແຕ່ການນຳໃຊ້ໄຟຟ້າມີພຽງ 18 ຄອບຄົວ ປະຊາຊົນສາມາດເຂົ້າເຖິງກອງທຶນປະກັນສຸຂະພາບ.

ໂອກາດນີ້ ທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມ ແລະນໍ້າກ້ອນໂລມາຄໍາ ໄດ້ມີຄຳເຫັນຕໍ່ທີ່ປະຊຸມວ່າ: ຕະຫຼອດ 3 ປີທີ່ຕົນເອງໄດ້ທຸ່ມເທທຶນຮອນ, ເຫື່ອແຮງ ແລະສະຕິປັນຍາສຸມໃສ່ການພັດທະນາເພື່ອຫວັງຢາກໃຫ້ຊິວິດການເປັນຢູ່ຂອງປະຊາຊົນຜູ້ທຸກຍາກ 77 ຄອບຄົວເປົ້າໝາຍໃຫ້ມີການປ່ຽນແປງ ຢ່າງຈະແຈ້ງຄື: ມີທີ່ຢູ່ອາໄສ, ມີອາຊີບໝັ້ນຄົງ ແລະ ມີຊີວິດການເປັນຢູ່ດີຂຶ້ນໂດຍໄດ້ເຮັດວຽກຕົວຈິງໄປພົບປະໂອ້ລົມກັບປະຊາຊົນວ່າເຂົາເຈົ້າຕ້ອງການຫຍັງ ແລະ ແກ້ໄຂບັນຫາມື້ຕໍ່ມື້.

 ໃນໂອກາດດັ່ງກ່າວນີ້ທ່ານເຈົ້າແຂວງ ສະຫວັນນະເຂດໄດ້ສະແດງຄວາມຍ້ອງຍໍ ແລະຕີລາຄາສູງຕໍ່ການຕັດສິນໃນຂອງ ທ່ານ ເກຍ ອູ໊ສິດທິເດດ ເຈົ້າຂອງໂຮງ ງານນໍ້າດື່ມ ແລະ ນໍ້າກ້ອນໂລມາຄໍາ ຊຶ່ງເປັນການປະກອບສ່ວນອັນສຳຄັນເຂົ້າໃນການລຶບລ້າງຄວາມທຸກຍາກຂອງປະຊາຊົນຢູ່ສອງບ້ານດັ່ງກ່າວໃຫ້ກາຍເປັນບ້ານພົ້ນທຸກ ແລະກ້າວໄປສູ່ບ້ານພັດທະນາເທື່ອລະກ້າວ.

  ເຖິງວ່າໂຄງການໄດ້ສີ້ນສຸດແລ້ວກໍ່ຕາມຄະນະຮັບຜິດຊອບຈຸດສຸມຈັດສັນພູມລຳເນົາ ແລະອາຊີບຂອງສອງບ້ານພາຍໃຕ້ການຊີ້ນຳນຳພາຂອງຄະນະພັກ-ອຳ ນາດການປົກຄອງເມືອງຈຳພອນ ແລະ ການສະໜັບສະໜູນດ້ານວິຊາການຈາກພະແນກກະສິກຳ ແລະປ່າໄມ້ແຂວງຍັງຈະໄດ້ສານຕໍ່ບັນດາກິດຈະກຳຕ່າງໆທີ່ດຳເນີນຜ່ານມາໃຫ້ເກີດດອກອອກຜົນຕາມເປົ້າໝາຍທີ່ຕັ້ງໄວ້ເທື່ອລະກ້າວ.

ພາບ ແລະຂ່າວ

ໂດຍ: ໜັງສືພິມເສດຖະກິດ-ສັງຄົມ

แชร์