ນວ ວາງຄາດໝາຍການຂະຫຍາຍຕົວຂອງເສດຖະກິດປີໜ້າ 9,5 ເປີເຊັນ

    ທ່ານສິນລະວົງຄຸດໄພທູນເຈົ້າຄອງນະຄອນຫຼວງວຽງຈັນໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນຊຸດທີ I ເມື່ອວັນທີ 25 ທັນວາ ໃຫ້ຮູ້ວ່າ: ນະຄອນຫຼວງວຽງຈັນເປັນເຂດທີ່ມີການລົງທຶນຄຶກຄື້ນ, ມີຕົວເລກອະນຸມັດການລົງທຶນບັນລຸເຖິງ 18 ພັນຕື້ກີບເຮັດໃຫ້ເສດຖະກິດມີການເຕີບໂຕໃນລະ ດັບ 9,3% ຂອງຈີດີພີ, ສະເລ່ຍລາຍຮັບໃສ່ຫົວຄົນບັນລຸ 5.300 ໂດລາ. ຊຶ່ງພົ້ນເດັ່ນແມ່ນຂະແໜງອຸດສາຫະກຳ, ການຄ້າແລະການລົງທຶນໄດ້ມີການເຕີບໃຫຍ່ຂະຫຍາຍຕົວແລະການຈັດເກັບລາຍຮັບເຂົ້າງົບປະມານບັນລຸຄາດໝາຍຂອງແຜນການປີ 1.222 ຕື້ກີບ. ໃນນັ້ນບັນດາຂະແໜງການຜະລິດແລະຫົວໜ່ວຍທຸລະກິດເຖິງວ່າຈະປະເຊີນກັບຜົນກະທົບຈາກໄພທຳມະຊາດ, ຈຳນວນໜຶ່ງຢຸດຈຶ້ງແຕ່ສ່ວນໃຫຍ່ກໍຄົງຕົວຢູ່ໄດ້ແລະມີຫຼາຍຫົວໜ່ວຍເກີດຂຶ້ນໃໝ່, ໂດຍນະຄອນຫຼວງວຽງຈັນໄດ້ປະຕິບັດນະໂຍບາຍຂອງລັດຖະບານໃນການສົ່ງເສີມສິນຄ້າໂອດັອບ, SMEs, ເສດຖະກິດຄອບຄົວ ແລະປະຕິບັດ 8 ມາດຕະການຊຸກ ຍູ້ເສດຖະກິດແຫ່ງຊາດເປັນຕົ້ນແມ່ນການອໍານວຍຄວາມສະດວກໃນການດໍາເນີນທຸລະກິດແບບປະຕູດຽວ, ວ່ອງໄວແລະໂປ່ງໃສຊຶ່ງເປັນທ່າແຮງປະກອບສ່ວນເຂົ້າໃນການພັດທະນາເສດຖະກິດຂອງນະຄອນຫຼວງວຽງຈັນ.

    ພິເສດໄປກວ່ານັ້ນນະຄອນຫຼວງວຽງຈັນຍັງໄດ້ເອົາໃຈໃສ່ຟື້ນຟູກະສິກຳ, ສ້ອມແປງເສັ້ນທາງພາຍຫຼັງນ້ຳຖ້ວມຢູ່ຫຼາຍເມືອງແລະໄດ້ເຂົ້າຮ່ວມຈັດຕັ້ງປະຕິບັໂຄງການໃຫຍ່ລະດັບຊາດຄື: ໂຄງການທາງລົດໄຟ, ໂຄງການກໍ່ສ້າງເສັ້ນທາງແລະປ້ອງກັນຕາຝັ່ງເຈື່ອນວຽງຈັນຕອນໃຕ້ສຳເລັດໂດຍພື້ນຖານແລະອື່ນໆ, ອັນເປັນທ່າແຮງພື້ນຖານໃນການພັດທະນາເສດຖະກິດຢູ່ນະຄອນຫຼວງວຽງຈັນ.

    ສະນັ້ນ, ໃນປີ 2019 ທີ່ຈະມາເຖິງນີ້ນະຄອນຫຼວງວຽງຈັນຈິ່ງໄດ້ມີການວາງແຜນພັດທະນາເສດຖະກິດຢ່າງມີຈຸດສຸມໂດຍຄາດວ່າຈະໃຫ້ GDP ເຕີບໂຕໃນລະດັບ 9,5% ໃນນັ້ນກະສິກຳໃຫ້ເພີ່ມຂຶ້ນ 4,2% ກວມເອົາ 14,5%, ອຸດສາຫະກຳເພີ່ມຂຶ້ນ 12,5% ກວມເອົາ 48%, ການບໍລິການໃຫ້ເພີ່ມຂຶ້ນ 9,5% ກວມເອົາ 37,5%. ເປົ້າໝາຍດັ່ງກ່າວນີ້ຮຽກຮ້ອງໃຫ້ບັນດາຂະແໜງເສດຖະກິດ, ກະສິກຳປ່າໄມ້, ອຸດສາຫະກຳ-ການຄ້າ, ພະລັງງານແລະບໍ່ແຮ່, ໂຍທາທິການ ແລະຂົນ ສົ່ງ, ຕ້ອງເຮັດສຳເລັດຄາດໝາຍແຜນການຂອງຕົນຍົກສູງສະຖານະການເງິນ, ການຈັດເກັບລາຍຮັບເຂົ້າງົບປະມານໃຫ້ບັນລຸ 4.800 ຕື້ກີບແລະແຕ່ລະຫົວໜ່ວຍວິສາຫະກິດ, ແຕ່ລະຄອບຄົວຄວນຫັນໜ້າເຂົ້າສູ່ການຜະລິດ, ການບໍລິການເຮັດໃຫ້ລາຍຮັບເພີ່ມຂຶ້ນຢ່າງບໍ່ຢຸດຢັ້ງ.

แชร์