ສະຫາຍ ບຸນຍັງ ວໍລະຈິດ ແລະສະຫາຍ ສີຈິ້ນຜິງ ຮ່ວມລົງນາມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ

  ວັນທີ 30 ເມສາ 2019, ໃນໂອກາດຢ້ຽມຢາມລັດຖະກິດ ສປ ຈີນ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກປະທານປະ ເທດແຫ່ງ ສປປ ລາວ ໄດ້ເຂົ້້າຮ່ວມພິທີຕ້ອນຮັບຢ່າງເປັນທາງການຈັດຂຶ້ນໃນລະດັບສູງສຸດ ແລະສົມກຽດທີ່ຫໍສະພາປະຊາຊົນຈີນໂດຍມີການນຳຂັ້ນສູງຂອງສອງພັກ, ສອງລັດເຂົ້າຮ່ວມ.

  ພາຍຫຼັງພິທີຕ້ອນຮັບຢ່າງເປັນທາງການແລ້ວ, ສະຫາຍ ບຸນຍັງ ວໍລະຈິດ ໄດ້ພົບປະກັບສະຫາຍເລຂາທິການໃຫຍ່, ປະທານປະເທດ ສີຈິ້ນຜິງ ໃນການພົບ ປະ, ສະຫາຍ ບຸນຍັງ ວໍລະຈິດ ໄດ້ສະແດງຄວາມຂອບໃຈຕໍ່ການເຊື້ອເຊີນ ແລະການຕ້ອນຮັບອັນອົບອຸ່ນສະໜິດສະໜົມຂອງ ສະຫາຍ ສີຈິ້ນຜິງ ແລະບັນດາການນໍາຂັ້ນສູງຂອງພັກ, ລັດຈີນພ້ອມສະແດງຄວາມຊົມເຊີຍຕໍ່ຜົນສໍາເລັດອັນຈົບງາມຂອງກອງປະຊຸມເວທີປາໄສການຮ່ວມມືສາກົນ“ໜຶ່ງແລວ ໜຶ່ງເສັ້ນ ທາງ”ຄັ້ງທີ 2 ທີ່ ສປ ຈີນ  ໂດຍພັກ-ລັດ ຢືນຢັນຄືນເຖິງທັດສະນະສະເໝີຕົ້ນສະເໝີປາຍໃນການເສີມຂະຫຍາຍມິດຕະພາບອັນເປັນມູນເຊື້ອລາວ-ຈີນ, ກາ ນຮ່ວມມືແບບຄູ່ຮ່ວມຍຸດທະສາດຮອບດ້ານຕາມທິດ 4 ດີທີ່ ພວມນໍາເອົາຜົນປະໂຫຍດມາໃຫ້ແກ່ປະຊາຊົນທັງສອງປະເທດ.

  ສະແດງຄວາມເປັນເອກະພາບຕໍ່ທິດທາງການຮ່ວມມືໃນຂະແໜງການຕ່າງໆໃນຕໍ່ໜ້າໃຫ້ນັບມື້ນັບມີປະສິດທິຜົນ, ພ້ອມກັນຈັດຕັ້ງປະຕິບັດເນື້ອໃນຈິດໃຈແຫ່ງການເປັນຄູ່ຮ່ວມຊາຕາກຳ ລາວ-ຈີນ ທີ່ສອງຝ່າຍໄດ້ລົງນາມກັນໃນຄັ້ງນີ້ໃຫ້ເປັນຮູບປະທໍາ, ສືບຕໍ່ປະຕິບັດບັນດາໂຄງການຮ່ວມມືສຳຄັນຂອງສອງຝ່າຍໃຫ້ບັນລຸຕາມຄາດໝາຍທີ່ວາງໄວ້; ຍິນດີຊຸກຍູ້ເຮັດໃຫ້ຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລເປັນປະເທດເຊື່ອມໂຍງເຊື່ອມຈອດ” ຂອງລາວເຊື່ອມຈອດເຂົ້າກັບຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ.

  ໃນການພົບປະດັ່ງກ່າວ, ສະຫາຍ ສີ ຈິ້ນຜິງ ຍັງໄດ້ສະແດງຄວາມຍິນດີຕ້ອນຮັບ ສະຫາຍ ບຸນຍັງ ວໍລະຈິດ ພ້ອມດ້ວຍຄະນະທີ່ຢ້ຽມຢາມລັດຖະກິດຢູ່ ສປ ຈີນ ແລະສະແດງຄວາມຂອບໃຈຕໍ່ການເຂົ້າຮ່ວມກອງປະຊຸມເວທີປາໄສການຮ່ວມມືສາກົນ“ໜຶ່ງແລວ ໜຶ່ງເສັ້ນທາງ” ຄັ້ງ ທີ 2;  ທັງນີ້ ສະຫາຍ ສີຈິ້ນຜິງ ກ່າວຕື່ມວ່າສອງປະເທດ ລາວ-ຈີນ ຕ້ອງຮ່ວມມືກັນໃຫ້ແໜ້ນແຟ້ນກວ່າເກົ່າ, ມີການແລກປ່ຽນບົດຮຽນໃນດ້ານທິດສະດີ, ວຽກງານກໍ່ສ້າງພັກ-ພະນັກງານ, ການປົກຄອງລັດ-ບໍລິຫານປະເທດ, ວຽກງານສຶກສາຄົນຮຸ່ນໜຸ່ມໃຫ້ເປັນຜູ້ສືບທອດມິດຕະພາບ ລາວ-ຈີນ ຕໍ່ໄປ.

 ພາຍຫຼັງການພົບປະ, ສະຫາຍເລຂາທິການໃຫຍ່ຂອງສອງພັກໄດ້ຮ່ວມກັນລົງນາມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ຊຶ່ງເປັນເອກະ ສານທີ່ເປັນທິດທາງໃຫ້ແກ່ການຮ່ວມມືສອງຝ່າຍໃນຕໍ່ໜ້ານອກນັ້ນ, ສອງເລຂາທິການໃຫຍ່ຍັງໄດ້ຮ່ວມເປັນສັກຂີພິຍານໃນພິທີເຊັນເອກະສານສັນຍາການຮ່ວມມືສອງຝ່າຍໃນຂະແໜງເສດຖະກິດ, ການຄ້າ, ການລົງທຶນ, ໄຟຟ້າ, ດ້ານກະສິກຳ ແລະອື່ນໆຈຳນວນ 10 ສະບັບ.

ພາບ ແລະຂ່າວ

ໂດຍ: ໜັງສືພິມເສດຖະກິດ-ສັງຄົມ

แชร์