ແຂວງຈໍາປາສັກ​ ເອົາໃຈໃສ່ແກ້ໄຂເສັ້ນທາງ ທີ່ເປ້ເພ

ລະດູຝົນ​ ປີ 2025​ ນີ້​ ເຫັນວ່າມີຝົນຕົກໜັກຫຼາຍ ເຮັດໃຫ້​ມີນໍ້າຖ້ວມອັ່ງ ແລະ​ ນໍ້າໄຫຼ​ແຮງ ສົ່ງຜົນກະທົບໃຫ້ເສັ້ນທາງຫຼາຍເສັ້ນ ມີນໍ້າຖ້ວມອັ່ງ,​ ເປັນບວກເປັນຂຸມ ແລະ​ ບາງເສັ້ນກໍເປ້ເພເສຍຫາຍໜັກ ເຮັດໃຫ້​ການສັນຈອນໄປມາພົບຄວາມຫຍຸ້ງຍາກ.​
ຕໍ່ກັບບັນຫາດັ່ງກ່າວນີ້,​ ທ່ານ​ ຈັນທະວີ​ສຸກ​ ວັນ​ສີລິ​ ຫົວໜ້າ​ພະແນກໂຍທາທິການ ແລະ ຂົນສົ່ງ​(ຍທຂ) ແຂວງຈໍາປາສັກ​ ໃຫ້ສໍາພາດ​ໃນວັນທີ​ 16​ ກໍລະກົດ​ 2025​ ນີ້ວ່າ: ວຽກງານພັດທະນາພື້ນຖານໂຄງລ່າງ​ໂດຍສະເພາະແມ່ນຂະແໜງການຂົວ​ - ທາງ​ ເປັນວຽກງານໜຶ່ງທີ່ສໍາຄັນ ຕໍ່ການພັດທະນາເສດຖະກິດ​ -​ ສັງຄົມ​ ແລະ​ ການຄົມມະນາຄົມຂົນສົ່ງ,​ ການສັນຈອນໄປມາ.​ ຍ້ອນເຫັນໄດ້ຄວາມຈໍາເປັນ ຂອງວຽກງານພື້ນຖານໂຄງລ່າງ,​ ການນໍາແຂວງ​ ຈິ່ງໄດ້ສຸມໃສ່ຕິດຕາມຢ່າງໃກ້ຊິດ​ ພ້ອມທັງຊີ້ນໍາ ໃຫ້ ພະແນກ​ ຍທຂ​ ແຂວງ​ ເອົາໃຈໃສ່ແກ້ໄຂຍົກລະດັບ, ປັບປຸງ ແລະ ສ້ອມແປງບັນດາເສັ້ນທາງ, ຂົວ ທີ່ເປ້ເພໜັກ ເພື່ອ​ໃຫ້ການສັນຈອນສະດວກສະບາຍ,​ ຮັບປະກັນຄວາມປອດໄພໃນການສັນຈອນ ທັງເປັນການສົ່ງເສີມໃຫ້ແກ່ການ ບໍລິການທາງດ້ານການຄ້າ, ການຂົນສົ່ງ ແລະ ການທ່ອງທ່ຽວ, ເຊິ່ງພະແນກ ຍທຂ ໄດ້ແກ້ເອົາໃຈໃນການກໍ່ສ້າງ, ຍົກລະດັບ, ປັບປຸງ ແລະ ສ້ອມແປງ.​ ສະເພາະເສັ້ນທາງໃນເທດສະບານນະຄອນປາກເຊ,​ ພະແນກ ຍທຂ ກໍໄດ້ສຳຫຼວດ​ - ຂຶ້ນແຜນປັບປຸງ​ -​ ສ້ອມແປງເສັ້ນທາງທີ່ເປ້ເພໜັກ ເພື່ອຍົກລະດັບເປັນທາງເບຕົງ, ສ້ອມແປງທາງປູຢາງ ນໍາສະເໜີແຂວງ ຈໍານວນ 15 ເສັ້ນ, ປັດຈຸບັນ ນີ້ ຍັງລໍຖ້າການອະນຸມັດ​ ແລະ​ ເພື່ອຮັບປະກັນການສັນຈອນໄປມາ ໃນໄລຍະລະດູຝົນ, ພະແນກ ຍທຂ ກໍໄດ້ແກ້ໄຂສ້ອມແປງເສັ້ນທາງ ທີ່ເປ້ເພ ຈໍານວນໜຶ່ງ ຄື: ແກ້ໄຂສ້ອມແປງທາງເຂົ້າບ້ານຄັນເກີງ ແລະ ເສັ້ນທາງສາລາຂຽວ​ -​ ດົງຈອງ.​ ນອກນີ້​ ກໍໄດ້ເອົາໃຈໃສ່ອະນາໄມຕະຄອງຮ່ອງນໍ້າ; ພ້ອມນັ້ນ ພໍ່ແມ່ປະຊາຊົນ ແລະ ຜູ້ປະກອບການ ກໍໄດ້ເປັນເຈົ້າການນໍາໃຊ້ທຶນເຂົ້າໃນກໍ່ສ້າງເສັ້ນທາງເບຕົງ ມີຈໍານວນ 7 ເສັ້ນ ຍາວ 2,​04​ ກິໂລແມັດ​ ຄື: ເສັ້ນທາງເຂົ້າບ້ານພູມ່ວງ,​ ຄວາມຍາວ 610 ແມັດ; ເສັ້ນທາງເຂົ້າບ້ານທ່າໄຮ,​ ຄວາມຍາວ 626 ແມັດ, ສໍາເລັດ 95%; ເສັ້ນທາງບ້ານໂພນບົກ​ -​ ບ້ານໂພນໃຊ້ ລວມຄວາມຍາວ 713 ແມັດ, ສໍາເລັດວຽກໜ້າທາງ 100%; ເສັ້ນທາງບ້ານແກ້ວສໍາພັນ ຍາວ 86 ແມັດ; ເສັ້ນທາງບ້ານໂພນສະຫວັນ ຍາວ 177 ແມັດ; ເສັ້ນທາງບ້ານສະພານໄຊ ຍາວ 120 ແມັດ ແລະ ເສັ້ນທາງບ້ານດອນເຂາະ 320 ແມັດ.
ທ່ານ​ ຈັນທະວີ​ສຸກ​ ວັນ​ສີລິ​ ກ່າວຕື່ມວ່າ: ຄຽງຄູ່ກັນນີ້ ຍັງໄດ້ເອົາໃຈໃນການກໍ່ສ້າງ, ຍົກລະດັບ, ປັບປຸງ ແລະ ສ້ອມແປງໃນທົ່ວແຂວງ ເຊິ່ງປັດຈຸບັນນີ້ ທົ່ວແຂວງມີຕາໜ່າງເສັ້ນທາງ, ຂົວ​ ຄື: ຕາໜ່າງເສັ້ນທາງ ທັງໝົດ 1,114 ເສັ້ນ, ຄວາມຍາວ 4,885, 11 ກິໂລແມັດ​, ໃນນີ້ ທາງຫຼວງແຫ່ງຊາດ ຈໍານວນ 7 ເສັ້ນ, ຄວາມຍາວ 631,45 ກິໂລແມັດ​; ສ່ວນທີ່ເຫຼືອແມ່ນທາງຫຼວງແຂວງ,​ ທາງຫຼວງເມືອງ,​ ທາງຕົວເມືອງ ແລະ ທາງຊົນລະບົດ. ໃນນັ້ນ, ທາງເບຕົງກວມເອົາ 4%; ທາງອັດສະຟານກວມເອົາ 2%; ທາງປູຢາງກວມເອົາ 17%,​ ນອກນັ້ນແມ່ນທາງປູດິນແດງ 77%. ຂົວຈໍານວນ 269 ແຫ່ງ, ໃນນີ້ ຂົວເບຕົງ 134 ແຫ່ງ, ຂົວເບເລ 79 ແຫ່ງ, ຂົວປະສົມ 10 ແຫ່ງ; ຂົວໄມ້ 37 ແຫ່ງ, ຂົວອູ່ 9 ແຫ່ງ, ຄວາມຍາວ 560 ແມັດ.​ ​ໃນນັ້ນ​ ເສັ້ນທາງຫຼວງແຫ່ງຊາດ​ ໄດ້ສຸມໃສ່ແກ້ໄຂຂຸມໜ້າທາງທີ່ເປ້ເພ ຕາມເສັ້ນທາງ 13 ໃຕ້ ຢູ່ເຂດເມືອງຊະນະສົມບູນ ແລະ ເຂດເມືອງໂຂງ, ທາງເລກ 20 ຢູ່ເຂດບ້ານແກ້ງເກຍ ເມືອງບາຈຽງ​ຈະເລີນ​ສຸກ​ ແລະ ທາງ 16 ຢູ່ໃນເຂດນະຄອນປາກເຊ ເພື່ອອໍານວຍຄວາມສະດວກໃນການສັນຈອນໄປມາຂອງພໍ່ແມ່ປະຊາຊົນ.​ ພາຍຫຼັງທີ່ດິນຟ້າອາກາດເອື້ອອໍານວຍ​ ກໍຈະໄດ້ແກ້ໄຂຈຸດທີ່ເປ້ເພໜັກ ໃຫ້ສໍາເລັດ​ຕາມແຜນ. ເສັ້ນທາງຫຼວງແຂວງ, ທາງຫຼວງເມືອງ, ທາງຕົວເມືອງ ກໍໄດ້ສໍາຫຼວດ​ - ຂຶ້ນແຜນຂຽນເປັນບົດສະເໜີໂຄງການຫຼາຍເສັ້ນ ເພື່ອຍົກລະດັບ, ປັບປຸງ ແລະ ສ້ອມແປງ ແຕ່ເນື່ອງຈາກງົບປະມານມີຈຳກັດ ແຂວງຈໍາປາສັກ​ໄດ້ຮັບການອະນຸມັດພຽງແຕ່ 16 ເສັ້ນ,​ ໃນນັ້ນ​ ທຶນປົກກະຕິິຂອງແຂວງ ຈຳນວນ 7 ເສັ້ນ ຄື: ເສັ້ນທາງເຂົ້າບ້ານດອນຊາດ​ - ບ້ານໜອງເມັກ ເມືອງໂພນທອງ ຍາວ 7,8 ກິໂລແມັດ​; ເສັ້ນທາງເຂົ້າບ້ານຜະລິງ ຍາວ 4,​8 ກິໂລແມັດ​; ເສັ້ນປູຢາງເຂົ້າບ້ານໂຕະໂໝະທ່າ ເມືອງປະທຸມພອນ ຍາວ 4,​8​ ກິໂລແມັດ​; ເສັ້ນທາງເຂົ້າບ້ານແຊງ ເມືອງປະທຸມພອນ ຍາວ 5,​2 ກິໂລແມັດ​; ເສັ້ນທາງເຂົ້າບ້ານທ່າກວ້າງ ເມືອງປະທຸມພອນ ຍາວ 8​ ກິໂລແມັດ​; ເສັ້ນທາງ ເຂົ້າບ້ານໜອງຜໍາ ເມືອງຈໍາສັກ ຍາວ 12​ ກິໂລແມັດ​ ແລະ ເສັ້ນທາງເຂົ້າບ້ານໂນນເອື້ອງ - ບ້ານໂນນພະເຈົ້າ ເມືອງສຸຂຸມາ ຍາວ 5,​7 ກິໂລແມັດ.​ ທຶນເກີນແຜນຂອງແຂວງ ຈຳນວນ 6 ເສັ້ນ​ ໃນນັ້ນ,​ ທາງເຂົ້າບ້ານທຸກຍາກ 5 ເສັ້ນ ຄື: ເສັ້ນທາງເຂົ້າບ້ານໜອງປີງ ເມືອງປະທຸມພອນ ຍາວ 6 ກິໂລແມັດ​; ເສັ້ນທາງເຂົ້າບ້ານເວີນ ເມືອງປະທຸມພອນ ຍາວ 7​ ກິໂລແມັດ​; ເສັ້ນທາງເຂົ້າບ້ານຄໍາບອນ ເມືອງຊະນະສົມບູນ ຍາວ 6,​2 ກິໂລແມັດ​; ເສັ້ນທາງເຂົ້າບ້ານໂພນວິໄຊ ເມືອງໂຂງ ຍາວ 7,​6 ກິໂລແມັດ​; ເສັ້ນທາງເຂົ້າບ້ານ ຫ້ວຍຊາຍ ເມືອງມູນລະປາໂມກ ຍາວ 10,​6 ກິໂລແມັດ​ ແລະ ສ້ອມແກ້ໄຂສຸກເສີນທາງເຂົ້າບ້ານກະຕຶບເມືອງຈຳປາສັກ.​ ກອງທຶນທາງ ຈໍານວນ 3 ເສັ້ນ ຄື: ເສັ້ນທາງດອນດູ່​ - ບ້ານໂນນສໍາລານ ເມືອງຈໍາປາສັກ ຍາວ 5,​8 ກິໂລແມັດ​; ເສັ້ນທາຄງພາຍໃນດອນລົບປາກດີ ເມືອງໂຂງ ຍາວ 16 ກິໂລແມັດ​; ເສັ້ນທາງບ້ານຫ້ວຍຍາງຄໍາ ແລະ ສ້ອມແປງ ຮ່ອງນໍ້າ ນະຄອນປາກເຊ.
ທ່ານ​ ຈັນທະວີ​ສຸກ​ ວັນ​ສີລິ​ ຫົວໜ້າ​ພະແນກ​ ຍທຂ​ ແຂວງ​ ກ່າວອີກວ່າ: ໃນຕົ້ນປີ 2025 ທີ່ພົ້ນເດັ່ນທີ່ສຸດ ການນໍາແຂວງ ຮ່ວມກັບ​ ພະແນກ ຍທຂ​ ໄດ້ບຸກລະດົມ,​ ນໍາພາ​ -​ ຊີ້ນໍາ​ ເຮັດໃຫ້​ ຄະນະພັກ​ -​ ອົງການປົກຄອງເມືອງ​ -​ ນະຄອນ​ ແລະ ພໍ່ແມ່ປະຊາຊົນ ໃນທົ່ວສັງຄົມ ມີຄວາມຮັບຮູ້​ -​ ເຂົ້າໃຈ ແລະ​ ເຫັນໄດ້ຄວາມສໍາຄັນວຽກງານຍົກລະດັບ,​ ປັບປຸງ​ -​ ສ້ອມແປງເສັ້ນທາງ, ທຸກພາກສ່ວນຈິ່ງໄດ້ເອົາໃຈໃສ່ເປັນເຈົ້າການ ເສຍສະຫຼະ,​ ທຸ້ມເທສະຕິປັນຍາ, ກໍາລັງເຮື່ອແຮງ ແລະ ກໍາລັງຊັບ ຕາມນະໂຍບາຍ ລັດ​ ແລະ​ ປະຊາຊົນ​ຮ່ວມກັນ​ ປະກອບສ່ວນເຂົ້າໃນການຍົກລະດັບເສັ້ນທາງ ທີ່ເປ້ເພໜັກ ແລ້ວກໍ່ສ້າງເປັນທາງປູ ເບຕົງ​ ໃນທົ່ງແຂວງ ຈໍາວນ 70 ໂຄງການ, ຄວາມຍາວ 48 ກມ; ໄດ້ຮັບການກໍ່ສ້າງຂົວເບຕົງ ທຶນທຸລະກິດ 1 ແຫ່ງ,​ ຍາວ 25 ແມັດ, ກວ້າງ 8 ແມັດ; ໄດ້ແກ້ໄຂສ້ອມແປງຂົວເບເລ ຈໍານວນໜຶ່ງ.​ ພ້ອມນັ້ນ, ໃນໄລຍະລະດູຝົນນີ້ ພະແນກ ຍທຂ ຈະໄດ້ຕິດຕາມ, ກວດກາ ເປັນປະຈຳ ເສັ້ນທາງ, ຂົວ ເພື່ອເອົາໃຈໃສ່ແກ້ໄຂໜ້າທາງເປັນຂຸມ, ເປັນບວກ ຕາມທາງຫຼວງແຫ່ງຊາດ ແລະ ທາງຫຼວງທ້ອງຖິ່ນ​ ເພື່ອອໍານວຍຄວາມສະດວີກແກ່ການສັນຈອນ.​ ນອກນີ້​ ກໍຈະເອົາໃຈໃສ່ ຕິດຕາມບັນດາເສັ້ນທາງ ທີ່ມີຄວາມສ່ຽງ ອາດຈະເກີດຕັດຂາດ ໃນໄລຍະລະດູຝົນ​ ເພື່ອຈະໄດ້ແກ້ໄຂໃຫ້ທັນເຫດການ ສະເພາະເສັ້ນທາງທີ່ນອນໃນສັນຍາຮັບເໝົາ; ສ່ວນເສັ້ນທາງບໍ່ທັນມີ
ສັນຍາຮັບເໝົາ ກໍຈະໄດ້ສົມທົບກັບຄະນະຄຸ້ມຄອງປ້ອງກັນໄພພິບັດຂັ້ນແຂວງ ເພື່ອໃຫ້ໄດ້ຮັບການແກ້ໄຂໂດຍໄວ.​ ແນວໃດກໍດີ,​ ການເດີນທາງໄປມາຂອງພໍ່ແມ່ປະຊາຊົນ ອາດຈະບໍ່ສະດວກ, ສະບາຍ ກໍຂໍໃຫ້ພໍ່ແມ່ນປະຊາຊົນ ທີ່ນໍາໃຊ້ຖະໜົນ​ ມີສະຕິລະມັດລະວັງ,​ ໃຊ້ລົດໃຫ້ລະວັງຄົນ,​ ຂ້າໃລມຖະໜົນໃຫ້ລະວັງລົດ.​ ນອກນີ້​ ກໍຂໍໃຫ້ທຸກພາກສ່ວນໃນສັງຄົມ ເປັນເຈົ້າການຊ່ວຍກັນອະນາໄມລະບົບຮ່ອງລະບາຍນໍ້າ ຕາມຂອບເຂບໍລິເວນທີ່ຢູ່ອາໄສ​ ແລະ​ ໃນຂອບເຂດຄວາມຮັບຜິດຊອບຂອງຕົນ.
ຂ່າວ​-ພາບ​: ທູນທອງໃຈ​

แชร์