ເມືອງພີນ ແຂວງສະຫວັນນະເຂດໄຂກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XII

ເມືອງພີນ ເປັນເມືອງທີ 13 ຂອງແຂວງສະຫວັນນະເຂດ, ທີ່ໄດ້ດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XII ຂຶ້ນຢ່າງເປັນທາງການໃນວັນທີ 25 ມີນາ 2025; ໂດຍໃຫ້ກຽດເຂົ້າຮ່ວມເປັນປະທານກິຕິມະສັກຂອງສະຫາຍ ບຸນໂຈມ ອຸບົນປະເສີດ ກຳມະການສູນກາງພັກເລຂາພັກແຂວງເຈົ້າແຂວງສະຫວັນນະເຂດ; ມີສະຫາຍ ລຳທອງ ຂອບສີລາວົງ ກຳມະການປະຈຳພັກແຂວງປະທານກວດກາພັກ-ລັດແຂວງ ແລະ ພາຍໃຕ້ການເປັນປະທານກອງປະຊຸມຂອງສະຫາຍ ພູລັດຕະນະ ພົມມະຫາໄຊ ວ່າການເລຂາພັກເມືອງວ່າການເຈົ້າເມືອງພີນ; ບັນດາສະຫາຍແຂກຖືກເຊີນ ແລະ ຜູ້ແທນສົມບູນທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງເຂົ້າ.

ໂອກາດນີ້, ສະຫາຍ ພູລັດຕະນະ ພົມມະຫາໄຊ ວ່າການເລຂາພັກເມືອງວ່າການເຈົ້າເມືອງພີນໄດ້ນຳພາດຳເນີນກອງປະຊຸມ ແລະ ກ່າວເປີດກອງປະຊຸມໃຫຍ່ຄັ້ງທີ XII ຜູ້ແທນອົງຄະນະພັກເມືອງພີນຢ່າງເປັນທາງການ. ຈາກນັ້ນ ສະຫາຍ ເກດສະໜາ ບຸດຕະວົງ ຮອງເລຂາພັກເມືອງ ໄດ້ຜ່ານຮ່າງລາຍງານການເມືອງຕໍ່ກອງປະຊຸມວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງພີນ ຄັ້ງທີ XII ໄດ້ດໍາເນີນພາຍໃຕ້ຄໍາຂວັນທີ່ວ່າ: “ສ້າງເມືອງພີນເປັນເມືອງເຂັ້ມແຂງ; ຍົກສູງລະບົບການເມືອງໃຫ້ໜັກແໜ້ນ; ຍູ້ແຮງການຜະລິດກະສິກຳ, ຫັດຖະກຳ ແລະ ອຸດສາຫະກຳເປັນສິນຄ້າ; ສົ່ງເສີມການທ່ອງທ່ຽວທາງດ້ານວັດທະນະທຳ, ທຳມະຊາດ, ປະຫວັດສາດ; ພັດທະນາຊັບພະຍາກອນມະນຸດ ແລະ ສ້າງວຽກເຮັດງານທຳໃຫ້ປະຊາຊົນມີລາຍໄດ້ໝັ້ນຄົງ”.

ຕະຫຼອດໄລຍະ 5 ປີຜ່ານມາຄະນະບໍລິຫານງານພັກເມືອງໄດ້ເອົາໃຈໃສ່ໃນການຜັນຂະຫຍາຍມະຕິກອງປະຊຸມໃຫຍ່ອົງຄະນະພັກເມືອງຄັ້ງທີ XI ໂດຍຖືເອົາວຽກງານສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານສະມາຊິກພັກທີ່ຢູ່ໃນຄວາມຮັບຜິດຊອບຂອງຕົນຢ່າງເປັນປົກກະຕິ, ໄດ້ນຳພາເຜີຍແຜ່ ແລະ ຜັນຂະຫາຍບັນດາເອກະສານມະຕິຄຳສັ່ງຕ່າງໆຂອງພັກ, ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ: ໄດ້ປະຕິບັດວິຊາສະເພາະຕິດພັນກັບການສ້າງພະລາທິການກັບທີ່, ຈັດຕັ້ງກຳລັງປະຈຳການກຽມສູ້ຮົບ, ປ້ອງກັນເວນຍາມ ແລະ ຕິດຕາມສະພາບຮອບດ້ານ, ສ້າງກຳລັງກອງຮ້ອຍ ໄດ້ 15 ກອງຮ້ອຍ, ປັບປຸງກຳລັງກອງຮ້ອຍໄດ້ 5 ກອງ, ປະກາດສ້າງບ້ານປ້ອງກັນຊາດເຂັ້ມແຂງໄດ້ 63 ບ້ານ, ຮັບຮອງບ້ານປ້ອງກັນຊາດເຂັ້ມແຂງໄດ້ 58 ບ້ານ,ມີ 8,000 ກວ່າຄອບຄົວເພີ່ມຂຶ້ນ 22 ບ້ານ, ຮັບຮອງບ້ານປ້ອງກັນຄວາມສະຫງົບດີໄດ້ 99 ບ້ານເພີ່ມຂຶ້ນ 62 ບ້ານ, ຮັບຮອງບ້ານປອດຢາເສບຕິດໄດ້ 70 ບ້ານ, ເພີ່ມຂຶ້ນ 59 ບ້ານ.

ດ້ານການພັດທະນາເສດຖະກິດ-ສັງຄົມການຂະຫຍາຍຕົວທາງດ້ານເສດຖະກິດສະເລ່ຍ 5,6%,ລວມຍອດຜະລິດຕະພັນ (GDP) ບັນລຸໄດ້ 764 ຕື້ກວ່າກີບ ຫຼື ຫຼາຍກວ່າ 97% ທຽບໃສ່ແຜນການ,ສະເລ່ຍໃສ່ພົນລະເມືອງໄດ້ 10 ລ້ານກວ່າກີບຕໍ່ຄົນຕໍ່ປີເທົ່າກັບ 461 ໂດລາສະຫະລັດ; ທົ່ວເມືອງມີເນື້ອທີ່ນາປີ 9,500 ເຮັກຕາ,ນາແຊງ 257 ເຮັກຕາ ດ້ວຍສະມັດຕະພາບ 3.3 ໂຕນຕໍ່ເຮັກຕາ, ບັນລຸໄດ້ 147,000 ກວ່າໂຕນເທົ່າກັບ 94%ຂອງແຜນການ, ສະເລ່ຍ 378 ກິໂລ/ຄົນ/ປີ,ນອກນັ້ນຍັງມີເຂົ້າເຫຼືອໄວ້ແຮ ແລະ ຂາຍເປັນສິນຄ້າຈຳນວນ 10,000 ກວ່າໂຕນ, ໄດ້ສົ່ງເສີມການຜະລິດຄອບຄົວໃຫ້ມີການປ່ຽນແປງໄປສູ່ອັນໃໝ່ເຊັ່ນ: ການປູກພືດລະດູແລ້ງໄດ້ 2,000 ກວ່າເຮັກຕາ, ຜົນຜະລິດລວມໄດ້ 108,000 ກວ່າໂຕນ, ລື່ນແຜນການ 2,6 ເທື່ອ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນ 8 ແຜນງານ 103 ໂຄງການປະຕິບັດໄດ້ 65 ໂຄງການ, ມູນຄ່າ 128 ຕື້ກວ່າກີບ ຫຼື ເທົ່າກັບ 63% ຂອງແຜນການ, ດ້ານພື້ນຖານໂຄງລ່າງທີ່ຈຳເປັນໄດ້ຮັບການພັດທະນາດີຂຶ້ນ, ທົ່ວເມືອງມີເສັ້ນທາງທັງໝົດ 70 ເສັ້ນ, ຍາວ 598 ກິໂລແມັດ, ສາມາດທຽວໄປ-ມາໄດ້ສອງລະດູ ມີ 70 ບ້ານ, ກວມເອົາ 69% ຂອງບ້ານ,ທົ່ວເມືອງມີຂົວ 63 ແຫ່ງ ເພີ່ມຂຶ້ນ 9 ແຫ່ງ, ຈັດເກັບລາຍຮັບເຂົ້າງົບປະມານປະຕິບັດໄດ້ 24 ຕື້ກວ່າກີບ, ລື່ນແຜນການ 24%, ລາຍຈ່າຍປະຕິບັດໄດ້ 13 ຕື້ກວ່າກີບ, ເທົ່າກັບ 97% ຂອງແຜນການ.

ວຽກວັດທະນະທຳ-ສັງຄົມໄດ້ເອົາໃຈໃສ່ປະຕິບັດແນວທາງການສຶກສາຂອງພັກໃຫ້ມີຄຸນະພາບ ແລະ ບັນລຸເປົ້າໝາຍພັດທະນາແບບຍືນຍົງ ເຊິ່ງສາມາດບັນລຸໄດ້ພຽງແຕ່ 3 ຄາດໝາຍເທົ່ານັ້ນ, ທົ່ວເມືອງມີໂຮງຮຽນທັງໝົດ 221 ແຫ່ງ, ການຂະຫຍາຍຕາໜ່າງສາທາລະນະສຸກລົງສູ່ຮາກຖານກຸ່ມບ້ານເຂດຫ່າງໄກສອກຫຼີກປົກຄຸມ 100% ພ້ອມທັງໄດ້ປັບປຸງການບໍລິການໄດ້ປະຕິບັດນະໂຍບາຍປິ່ນປົວໂດຍບໍ່ເສຍຄ່າ, ສູ້ຊົນແກ້ໄຂຄອບຄົວ, ບ້ານໃຫ້ສາມາດພົ້ນທຸກ ແລະ ແກ້ໄຂຄວາມທຸກຍາກຂອງປະຊາຊົນໃຫ້ສຳເລັດໂດຍພື້ນຖານໂດຍໄດ້ສຸມໃສ່ການສຶກສາອົບຮົມ ນຳເອົາບັນດາແນວທາງນະໂຍບາຍຂອງພັກ, ກົດໝາຍຂອງລັດ ແລະ ມະຕິຄຳສັ່ງຕ່າງໆລົງໄປຈັດຕັ້ງເຜີຍແຜ່ເຊື່ອມຊຶມໃຫ້ຖັນແຖວສະມາຊິກພັກ-ພະນັກງານ, ປະຊາຊົນຢ່າງເປັນປົກກະຕິ.

ພ້ອມນີ້ພາຍໃນກອງປະຊຸມຍັງໄດ້ຮັບຟັງການຜ່ານຮ່າງບົດສະຫຼຸບແຜນພັດທະນາເສດຖະກິດ-ສັງຄົມ 5 ປີຜ່ານມາ ແລະ ທິດທາງແຜນການໃນ 5 ປີຕໍ່ໜ້າຈາກສະຫາຍ ຄົມຄິດ ຍາດຕິວົງ ກຳມະການພັກເມືອງຮອງເຈົ້າເມືອງ ຜູ້ຊີ້ນຳວຽກເສດຖະກິດ, ຮັບຟັງການປະກອບຄຳຄິດຄຳເຫັນຈາກຜູ້ຕາງໜ້າຂົງເຂດວຽກງານຕ່າງໆພາຍໃນເມືອງພ້ອມນີ້, ບັນດາສະຫາຍຜູ້ແທນສົມບູນ ຍັງຈະໄດ້ມີການປ່ອນບັດຄັດເລືອກເອົາຄະນະບໍລິຫານງານພັກເມືອງພີນຊຸດໃໝ່ນຳອີກ. ກອງປະຊຸມດັ່ງກ່າວແມ່ນໄດ້ດຳເນີນນັບແຕ່ວັນທີ 25-26 ມີນາ 2025 ຈິ່ງສໍາເລັດ.

 

แชร์