ມີລາຍຮັບ 200 ລ້ານກວ່າກີບຕໍ່ປີຈາກການລ້ຽງງົວ

ທ່ານ ພັນທະບູນ ວົງໄຊ ຄອບຄົວຕົວແບບດ້ານການລ້ຽງງົວ, ປະຈຸບັນໃນຟາມຂອງເພີ່ນມີງົວ ທັງໝົດ 113 ໂຕ ເປັນງົວລູກປະສົມບາມັນ, ເຊິ່ງມີລາຍຮັບຈາກການລ້ຽງງົວ 200 ລ້ານກວ່າກີບຕໍ່ປີ.

ທ່ານ ພັນທະບູນ ວົງໄຊ ປະຈຸບັນຢູ່ບ້ານໂພນຫໍ, ເມືອງໂພນໂຮງ, ແຂວງວຽງຈັນ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງໂພນໂຮງຄັ້ງທີ VIII ທີ່ຈັດຂຶ້ນໃນລະຫວ່າງວັນທີ 10-11 ມີນາ 2025 ນີ້ວ່າ: ຟາມຂອງຕົນຕັ້ງຢູ່ບ້ານໂພນຫໍ, ເມືອງໂພນໂຮງ ເຊິ່ງໄດ້ເລີ່ມຕົ້ນລ້ຽງມີແຕ່ປີ 2018 ເຊິ່ງໄດ້ຊື້ພໍ່ ແລະ ແມ່ພັນນຳເຂົ້າມາຈາກປະເທດໄທ ເປັນງົວລູກປະສົມບາມັນ ຈໍານວນ 40 ໂຕ, ໃນນີ້ເປັນແມ່ພັນຈໍານວນ 20 ໂຕ ລູກງົວຕິດມາ ຈໍານວນ 19 ໂຕ, ພໍ່ພັນ ຈໍານວນ 1 ໂຕ. ຕົກມາໃນປີ 2020 ໄດ້ນໍາເຂົ້າມາອີກຈໍານວນ 05 ໂຕ ເຊິ່ງລວມຈໍານວນງົວນໍາເຂົ້າມາແມ່ນ 45 ໂຕ. ເນື້ອທີ່ຂອງຟາມໃນການລ້ຽງງົວມີເນື້ອທີ່ທັງໝົດແມ່ນ 35 ເຮັກຕາ ໃນນັ້ນໄດ້ແບ່ງອອກເປັນ 03 ສ່ວນ ຄື: ເນື້ອທີ່ຕັ້ງໂຮງເຮືອນ ແລະບ່ອນປ່ອຍງົວ 17 ເຮັກຕາ, ເນື້ອທີ່ປູກຫຍ້າເພື່ອຮອງຮັບໃນຟາມ 10 ເຮັກຕາ ແລະ ເນື້ອທີ່ປູກສະບຽງອາຫານ ແລະ ໄມ້ໃຫ້ໝາກ 8 ເຮັກຕາ. ສຳລັບຫຍ້າ ແລະ ສະບຽງອາຫານ ທີ່ໃຊ້ໃນຟາມ ທີ່ຜ່ານມາໄດ້ປູກຫຍ້າຢູ່ 03 ຊະນິດ ຄື: ຫຍ້າລູຊີ, ຫຍ້າເນເປຍ, ຫຍ້າແພງໂກລາ, ຢາມລະດູແລ້ງ ແມ່ນໄດ້ໃຊ້ເຟືອງເປັນອາຫານສ່ວນໃຫຍ່. ນອກນີ້ຍັງໄດ້ນຳໃຊ້ອາຫານເສີມຊ່ວຍເປັນຕົ້ນແມ່ນ ກາກນໍ້າຕານປະສົມກັບວິຕາມີນປະສົມນໍ້າຫົດເຟືອງ, ຂີ້ເບຍ ແລະ ຫົວອາຫານ. ຈາກເລີ່ມຕົ້ນລ້ຽງປີ 2018 ພາຍໃນຟາມມີພໍ່ ແລະແມ່ພັນ 45 ໂຕ ແຕ່ລະປີມີງົວນ້ອຍເກີດໃໝ່ປະມານ 15-20 ໂຕ ເຊິ່ງມາຮອດປັນຈຸບັນນີ້ໃນຟາມມີງົວທັງໝົດ ຈໍານວນ 113 ໂຕ ເຊິ່ງເປັນງົວລູກປະສົມບາມັນທັງໝົດ. ສຳລັບການຈໍາໜ່າຍງົວຂອງຟາມແມ່ນໄດ້ເຂົ້າກຸ່ມສະມາຄົມງົວບາມັນແຫ່ງປະເທດລາວ ເພື່ອຈໍາໜ່າຍແນວພັນໃຫ້ປະຊາຊົນ ແລະສະມາຊິກໃນກຸ່ມທີ່ຕ້ອງການລ້ຽງງົວສະເລ່ຍມີລາຍຮັບຈາກການຂາຍງົວ 150 ລ້ານກວ່າກີບ ແລະ ຂາຍຂີ້ງົວ ປະມານ 50 ລ້ານກວ່າກີບ ລວມລາຍຮັບໝົດປີ ມີລາຍຮັບສະເລ່ຍ 200 ລ້ານກວ່າກີບຕໍ່ປີ.

ທ່ານກ່ວອີກວ່າ: ກ່ອນທີ່ຕົນເອງຈະມີໂອກາດ ແລະເວລາສ້າງເສດຖະກິດຄອບຄົວໃຫ້ເຂັ້ມແຂງແບບນີ້ກໍ່ຍ້ອນການນໍາພາ-ຊີ້ນຳພາອັນສະຫລາດສ່ອງໃສຂອງພັກ ກໍ່ຄືອົງການຈັດຕັ້ງຕ່າງໆ ໄດ້ມີແຜນພັດທະນາເສດຖະກິດ-ສັງຄົມ ເຫັນໄດ້ວຽກງານພັດທະນາແກ້ໄຂ້ຄວາມທຸກຍາກຂອງປະຊາຊົນເປັນວຽກງານສຳຄັນຕົນເອງຕາງໜ້າໃຫ້ພໍ່ແມ່ປະຊາຊົນຊາວເມືອງໂພນໂຮງ ຂໍສະແດງຄວາມຮູ້ບຸນຄຸນອັນສູງສົ່ງຕໍ່ການນຳພັກ-ລັດ ທຸກຂັ້ນໃນທົ່ວເມືອງ, ທົ່ວແຂວງ ທີ່ໄດ້ຊຸກຍູ້ວຽກງານດັ່ງກ່າວໃຫ້ພໍ່ແມ່ປະຊາຊົນ, ຊາວກະສິກອນທີ່ໄດ້ມີຊີວິດການເປັນຢູ່ທີ່ດີຂຶ້ນເລື່ອຍໆ.
ໂດຍ: ແກ້ວອຸດົມ

แชร์