ມີລາຍຮັບ 500 ລ້ານກວ່າກີບຕໍ່ປີ ຈາກການຂາຍໝາກຖົ່ວລຽນ

ທ່ານ ປັນຈາ ລາດສະວົງ ອາຍຸ 55 ປີ ຄອບຄົວຕົວແບບໃນ ການປູກຖົ່ວລຽນຂາຍເປັນສິນຄ້າ ເຊິ່ງປະຈຸບັນສວນຂອງທ່ານມີຕົ້ນຖົ່ວລຽນທັງໝົດ 2,500 ຕົ້ນ, ມີຕົ້ນຖົ່ວລຽນໃຫ້ຜົນຜະລິດ ຈຳນວນ 110 ຕົ້ນ ສາມາດເກັບຜົນຜະລິດໄດ້ປະມານ 5,500 ກິໂລ ແລະ ຂາຍໄດ້ເງິນປະມານ 500,000,000 ກີບຕໍ່ປີ.

ທ່ານ ປັນຈາ ລາດສະວົງ ຄອບຄົວຕົວແບບໃນການປູກຖົ່ວລຽນຢູ່ເມືອງທຸລະຄົມ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງທຸລະຄົມ ຄັ້ງທີ VIII ທີ່ໄຂຂຶ້ນໃນວັນທີ 13-14 ມີນາ 2025, ທີ່ສະໂມສອນຂອງເມືອງດັ່ງກ່າວ ເຊິ່ງບາງຕອນທ່ານໄດ້ກ່າວວ່າ: ຕົນເອງເກີດທີ່ບ້ານນາລ້າ ເມືອງທຸລະຄົມ ແຂວງວຽງຈັນ, ປະຈຸບັນຢູ່ ບ້ານໂຄກນິນ ເມືອງສີສັດຕະນາກ ນະຄອນຫຼວງວຽງຈັນ, ຄອບຄົວຂອງຕົນ ມີທັງໝົດ 4 ຄົນ, ຍິງ 3 ຄົນ, ມີລູກ 2 ຄົນ, ໃນນີ້ແຮງງານຕົ້ນຕໍໃນການເຮັດສວນ 4 ຄົນ. ໄລຍະຜ່ານມາ ໄດ້ປະກອບອາຊີບເຮັດວຽກນຳອົງການຈັດຕັ້ງຂອງສາກົນຫຼາຍໆ ອົງການໂດຍສະເພາະປະເທດຝຣັ່ງ.

ດ້ວຍຄວາມມັກຮັກໃນວຽກງານກະສິກຳ ດັ່ງນັ້ນ, ໃນປີ 2006 ຈິ່ງໄດ້ຕັດສິນໃຈມາຊື້ດິນຢູ່ເຂດບ້ານນາເພີຍ ເມືອງທຸລະຄົມ ແຂວງວຽງຈັນ ແລະ ຄ່ອຍໆບຸກເບີກໄປເທື່ອລະໜ້ອຍ ເບື້ອງຕົ້ນແມ່ນໄດ້ປູກໄມ້ເກດສະໜາ ຈຳນວນ 3,500 ຕົ້ນ, ຢາງພາລາ 2,400 ຕົ້ນ, ໄມ້ສັກ 4,000 ຕົ້ນ ແລະ ລ້ຽງງົວ 40 ໂຕ ແລະ ປູກຕົ້ນໄມ້ກິນຫມາກຈຳນວນຫນຶ່ງ ໃນນັ້ນມີຕົ້ນຖົ່ວລຽນ 3 ຕົ້ນ; ອີກ 7 ປີຕໍ່ມາ ຕົ້ນຖົ່ວລຽນດັ່ງກ່າວແມ່ນໃຫ້ຜົນຜະລິດ ແລະ ມີລົດຊາດແຊບບໍ່ແຕກຕ່າງຈາກຂອງປະເທດເພື່ອນບ້ານ.

ມາຮອດປີ 2017 ຈຶ່ງໄດ້ຕັດສີນໃຈລາອອກການ ມາປູກຫມາກຖົ່ວລຽນເປັນສິນຄ້າ ເຊິ່ງໄດ້ປູກ ຈຳນວນ 200 ຕົ້ນ ແລະ ໝາກພ້າວນ້ຳຫອມ 100 ຕົ້ນ ໃນເບື້ອງຕົ້ນການປູກ ແລະ ການບົວລະບັດຮັກສາຕົ້ນຖົ່ວລຽນແມ່ນພົບຄວາມຫຍຸ້ງຍາກຫລາຍເພາະບໍ່ທັນມີບົດຮຽນ ສະນັ້ນ ຈຶ່ງໄດ້ຊອກຮູ້ສຶກສາຮໍ່າຮຽນດ້ວຍຕົນເອງຜ່ານທາງຢູທູບ ( ອິນຕີເນັດ ) ຊອກເອົາບົດຮຽນ ແລະ ວິທີການຕ່າງໆ ພ້ອມທັງລົງມືເຮັດຕົວຈິງ, ການລົງທຶນໃນເບື້ອງຕົ້ນແມ່ນ 100,000,000 ກີບ ໂດຍນຳໃຊ້ທຶນສ່ວນຕົວ.

ມາຮອດທ້າຍ ປີ 2022 ຕົ້ນຖົ່ວລຽນ ເລີ່ມໃຫ້ຜົນຜະລິດ ຈຳນວນ 50 ຕົ້ນ, ສາມາດເກັບຜົນຜະລິດໄດ້ປະມານ 1,200 ກິໂລ ແລະຂາຍໄດ້ເງິນປະມານ 114,000,000 ກີບ; ໃນປີ 2023 ຕົ້ນຖົ່ວລຽນ ໃຫ້ຜົນຜະລິດ ຈຳນວນ 70 ຕົ້ນ ສາມາດເກັບຜົນຜະລິດໄດ້ປະມານ 3,500 ກິໂລ ແລະ ຂາຍໄດ້ເງິນປະມານ 290,000,000 ກີບ ແລະ 2024 ຕົ້ນຖົ່ວລຽນໃຫ້ຜົນຜະລີດຈຳນວນ 110 ຕົ້ນ ສາມາດເກັບຜົນຜະລິດໄດ້ປະມານ 5,500 ກິໂລ ແລະ ຂາຍໄດ້ເງິນປະມານ 500,000,000 ກີບ.

ມາຮອດປະຈຸບັນ ເຫັນວ່າຄວາມຕ້ອງການຫມາກຖົ່ວລຽນນັບມື້ນັບຫລາຍຂຶ້ນທັງຕະຫລາດພາຍໃນ ແລະຕ່າງປະເທດ. ຍ້ອນເງື່ອນໄຂ ແລະ ໂອກາດເອື້ອອຳນວຍ ທີ່ພັກ - ລັດ ໄດ້ມີແນວທາງນະໂຍບາຍທີ່ຖືກຕ້ອງ, ຖືເອົາວຽກງານສົ່ງເສີມກະສິກຳຜະລິດເປັນສິນຄ້າຫລຸດຜ່ອນການນໍາເຂົ້າ, ໃນຕົ້ນປີ 2023 ຕົນອງພ້ອມດວ້ຍຄອບຄົວຈິ່ງຕັດສິນໃຈລົງທຶນຂະຫຍາຍເນື້ອທີ່ປູກຖົ່ວລຽນຕື່ມອີກ 15 ເຮັກຕາ, ມີຕົ້ນຖົ່ວລຽນທັງໝົດ 2,500 ຕົ້ນດ້ວຍມູນຄ່າທັງໝົດ 3,000,000,000 ກີບ.

แชร์