ເສດຖະກິດ ເມືອງທຸລະຄົມ ຂະຫຍາຍຕົວສະເລ່ຍ 5.85%

ທ່ານນາງ ຈັນທະມາໄລ ບຸນໄຊທິບ ຄະນະປະຈຳພັກເມືອງ ປະທານອົງການແນວລາວສ້າງຊາດເມືອງທຸລະຄົມ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດແຜນພັດທະນມາເສດຖະກິດ-ສັງຄົມ 5 ປີ ຄັ້ງທີ VII (2020-2024) ແລະ ທິດທາງແຜນການ 5 ປີ ຄັ້ງທີ VIII (2025-2029) ຂອງເມືອງຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງທຸລະຄົມ ຄັ້ງທີ VIII ທີ່ໄຂຂຶ້ນໃນວັນທີ 13-14 ມີນາ 2025, ທີ່ເມືອງດັ່ງກ່າວວ່າ: ຕະຫຼອດໄລຍະ 5 ປີຜ່ານມາພາຍໃຕ້ການນຳພາ-ຊີ້ນຳຂອງອົງຄະນະພັກເມືອງໄດ້ເຮັດໃຫ້ການພັດທະນາເສດຖະກິດຂອງເມືອງທຸລະຄົມແຂວງວຽງຈັນໄດ້ຫັນປ່ຽນໄປຕາມກົນໄກເສດຖະກິດຕະຫຼາດທີ່ມີການຄຸ້ມຄອງຂອງລັດ, ລວມຍອດລາຍຮັບພາຍໃນເມືອງ (GO) ຂະຫຍາຍຕົວສະເລ່ຍ 5.85%, ຄິດເປັນມູນຄ່າໃນປີປະຈຸບັນ 1,430.16 ຕື້ກີບ, ສະເລ່ຍລາຍໄດ້ຕໍ່ຫົວຄົນ 23.3 ລ້ານກີບຕໍ່ ໂດຍມີປັດໄຈຊຸກຍູ້ ຄື: ຂະແໜງກະສິກໍາ ຂະຫຍາຍຕົວ 3.8%, ກວມເອົາ 44.06% ຂອງ GO, ຜະລິດເຂົ້າໄດ້11,878 ເຮັກຕາ, ຜົນຜະລິດລວມໄດ້ 249,440 ໂຕນ, ສະເລ່ຍ 49,888 ໂຕນຕໍ່ປີ, ສະເລ່ຍເຂົ້າກິນ 809 ກິໂລຕໍ່ຄົນຕໍ່ປີ, ການລ້ຽງສັດເພີ່ມຂຶ້ນໂດຍສະເລ່ຍ 3% ຕໍ່ປີ, ສາມາດສະໜອງຊີ້ນ, ປາ ແລະໄຂ່ໄດ້ 2,900 ໂຕນຕໍ່ປີ, ສະເລ່ຍ 47 ກິໂລກຣາມຕໍ່ຄົນຕໍ່ປີ. ຜະລິດພືດຕ່າງໆ ໄດ້ 3,482 ເຮັກຕາ, ຜົນຜະລິດສະເລ່ຍ 299,828 ໂຕນຕໍ່ປີ, ຈໍາໜ່າຍເປັນສິນຄ້າອອກຕ່າງເມືອງ ແລະ ຕ່າງແຂວງ ໄດ້ 218,831 ໂຕນຕໍ່ປີ, ອັນທີ່ພົ້ນເດັ່ນແມ່ນການຜະລິດສາລີແຂງປ້ອນເຂົ້າໂຮງງານຫົວອາຫານສັດໄດ້ 35,505 ໂຕນຕໍ່ປີ, ສາລີຫວານປ້ອນເຂົ້າໂຮງຜະລິດນົມສາລີບ້ານເກິນໄດ້ 51,624 ໂຕນຕໍ່ປີ, ຜະລິດມັນຕົ້ນສົ່ງໂຮງງານແປ້ງມັນຕົ້ນໄດ້ 25,350 ໂຕນຕໍ່ປີ, ຜະລິດກ້ວຍຈໍາໜ່າຍໃນ ແລະ ສົ່ງອອກໄປ ສປ ຈີນ ໄດ້ 41,694 ໂຕນຕໍ່ປີ, ຜະລິດໝາກຖູລຽນໄດ້ 25 ໂຕນ, ຜະລິດຢາງພາລາໄດ້ 10,400 ໂຕນຕໍ່ປີ ແລະ ອື່ນໆ. ການລ້ຽງສັດເປັນສິນຄ້າ ເຊັ່ນ: ຄວາຍໄດ້ 129 ໂຕນຕໍ່ປີ, ງົວ 290 ໂຕນຕໍ່ປີ, ໝູ 739 ໂຕນຕໍ່ປີ, ສັດປີກ 130 ໂຕນຕໍ່ປີ, ແບ້ 39 ໂຕນຕໍ່ປີ, ປາ 800 ໂຕນຕໍ່ປີ ແລະ ໄຂ່ 1,270 ໂຕນຕໍ່ປີ. ຂະແໜງອຸດສາຫະກຳ ຂະຫຍາຍຕົວ 6.5%, ກວມເອົາ 27.24% ຂອງ GO, ການຜະລິດອຸດສາຫະກໍາ-ຫັດຖະກໍາໄດ້ 389.62 ຕື້ກີບ.

ດ້ານພະລັງງານ ແລະບໍ່ແຮ່ ການຜະລິດໄຟຟ້າຂອງເຂື່ອນໄຟຟ້ານໍ້າມັງ 3 ໄດ້ 919.18 ລ້ານກິໂລວັດໂມງ, ມູນຄ່າ 627.29 ຕື້ກີບ, ປະຈຸບັນທົ່ວເມືອງມີບ້ານທີ່ຊົມໃຊ້ໄຟຟ້າຖາວອນ ແລະ ຄອບຄົວນຳໃຊ້ໄຟຟ້າກວມ 100%. ຂະແໜງບໍລິການ ຂະຫຍາຍຕົວ 8.5%, ກວມເອົາ 28.69% ຂອງ GO, ທຽບໃສ່ປີ 2019 ເພີ່ມຂຶ້ນ 35.3%; ປະຈຸບັນມີຫົວໜ່ວຍວິສາຫະກິດທັງໝົດ 1,495 ຫົວໜ່ວຍ, ຂຶ້ນທະບຽນການຄ້າໄດ້ທັງໝົດ 426 ຫົວໜ່ວຍ, ມີທຶນຈົດທະບຽນທັງໝົດ 1,312.6 ຕື້ກີບ. ການຂາຍຍົກ-ຂາຍຍ່ອຍໄດ້ 410.38 ຕື້ກີບ, ຂະແໜງການບໍລິການທ່ອງທ່ຽວ ໃນ 5 ປີຜ່ານມາສາມາດດຶງດູດນັກທ່ອງທ່ຽວໄດ້ 254,375 ເທື່ອຄົນ, ສາມາດສ້າງລາຍຮັບທົ່ວສັງຄົມໄດ້ 109.38 ຕື້ກີບ, ການບໍລິການຂົນສົ່ງສີນຄ້າໄດ້ 17.38 ລ້ານໂຕນ ແລະ ການຂົນສົ່ງໂດຍສານໄດ້ 1.4 ລ້ານເທື່ອຄົນ. ດ້ານການເງິນງົບປະມານ ໄດ້ເອົາໃຈໃສ່ເກັບລາຍຮັບເຂົ້າງົບປະມານໄດ້ 35.08 ຕື້ກີບ, ປະຕິບັດລາຍຈ່າຍງົບປະມານໄດ້ 37.28 ຕື້ກີບ, ການລະດົມທຶນສາມາດດຶງດູດການລົງທຶນທົ່ວສັງຄົມໄດ້ 1,591.03 ຕື້ກີບ, ໃນນັ້ນການລົງທຶນຂອງລັດໄດ້ 91.82 ຕື້ກີບ, ການຊ່ວຍເຫຼືອລ້າທາງການເພື່ອການພັດທະນາໄດ້ 135.35 ຕື້ກີບ ແລະ ການລົງທຶນຂອງເອກະຊົນພາຍໃນ ແລະ ຕ່າງປະເທດໄດ້ 1,363.86 ຕື້ກີບ.

#ແຂວງວຽງຈັນໂພສ໌
#ຂ່າວເມືອງທຸລະຄົມ

แชร์