ເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳລາວ ຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ

ວັນທີ 11 ມີນາ 2025, ທີ່ ຫ້ອງວ່າການແຂວງ, ທ່ານ ອາລຸນໄຊ ສຸນນະລາດ ກໍາມະການສູນກາງພັກ ເລຂາພັກແຂວງເຈົ້າແຂວງຈໍາປາສັກ ພ້ອມຄະນະໄດ້ຕ້ອນຮັບທ່ານ ຫວຽນ ມິງ ເຕິມ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ພ້ອມດ້ວຍຄະນະໂອກາດມາເຄື່ອນໄຫວເຮັດວຽກທີ່ແຂວງຈໍາປາສັກ.

ໃນໂອກາດນີ້, ທ່ານ ອາລຸນໄຊ ສູນນະລາດ ກໍ່ໄດ້ສະແດງຄວາມຍິນດີຕ້ອນຮັບ ແລະຊົມເຊີຍພ້ອມທັງເຊື່ອໝັ້ນວ່າດ້ວຍບົດຮຽນ ແລະປະສົບການຂອງສະຫາຍເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ ຄົນໃໝ່ຈະສາມາດປະຕິບັດ ໜ້າທີ່ການທູດ ຢູ່ ສປປ ລາວ ໃຫ້ໄດ້ຮັບຜົນສໍາເລັດຢ່າງຈົບງາມຕາມທີ່ພັກ-ລັດ ມອບໝາຍໃຫ້ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ສອງປະເທດ ລາວ-ຫວຽດນາມ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ.

ໂອກາດດຽວກັນນີ້, ທ່ານ ຫວຽນ ມິງ ເຕິມ ໄດ້ສະແດງຄວາມຂອບໃຈຕໍ່ການຕ້ອນຮັບຂອງທ່ານເຈົ້າແຂວງພ້ອມຄະນະ, ພ້ອມໃຫ້ຄໍາໝັ້ນສັນຍາວ່າຈະສືບຕໍ່ສ້າງທຸກບັນດາເງື່ອນໄຂການຮ່ວມມືກັບຝ່າຍລາວ ບັນດາພະແນການກ່ຽວຂ້ອງເພື່ອຮັກສາສະຖຽນລະພາບ ສາຍພົວພັນທາງການເມືອງອັນເປັນເສົາຄໍ້າຄວາມສາມັກຄີເພື່ອສັນຕິພາບ ແລະ ການຮ່ວມມື ຂອງສອງປະເທດ ລາວ - ຫວຽດນາມ ໃນພາກພື້ນ ແລະສາກົນ.

ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືຂອງສອງປະເທດ ລາວ-ຫວຽດນາມ ໃນຕະຫຼອດໄລຍະຜ່ານມາ ຊຶ່ງສືບຕໍ່ມີຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ, ມີການພົບປະ ແລະ ແລກປ່ຽນຄະນະຜູ້ແທນຂັ້ນທ້ອງຖິ່ນ ຢ່າງເປັນປົກກະຕິ, ການຮ່ວມມືດ້ານປ້ອງກັນ ຊາດ-ປ້ອງກັນຄວາມສະຫງົບ ມີຄວາມແໜ້ນແຟ້ນ ແລະ ການຮ່ວມມືດ້ານເສດຖະກິດ-ການຄ້າ-ການລົງທຶນ ມີທ່າຂະຫຍາຍຕົວຢ່າງຕັ້ງໜ້າ. ພ້ອມນັ້ນ, ສອງຝ່າຍກໍຈະສືບຕໍ່ຊຸກຍູ້ການຈັດຕັ້ງປະຕິບັດບັນດາໂຄງການຮ່ວມ ມືສອງຝ່າຍໃຫ້ເປັນຮູບປະທໍາໂດຍໄວໂດຍສະເພາະໂຄງການທີ່ມີລັກສະນະຍຸດທະສາດເພື່ອແນໃສ່ການເຊື່ອມໂຍງພື້ນຖານເສດຖະກິດຂອງສອງປະເທດ.

ເຊິ່ງການເຄື່ອນໄຫວໃນຄັ້ງນີ້, ທ່ານ ເອກອັກຄະລັດຖະທູດ ພ້ອມຄະນະກໍ່ໄດ້ຮ່ວມເຮັດວຽກກັບ ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ ພ້ອມບັນດາພະແນກການກ່ຽວຂອງແຂວງເພື່ອປຶກສາຫາລືກ່ຽວກັບວຽກງານການຄ້າການລົງທຶນ, ໂອກາດ ແລະສິ່ງທ້າທາຍ ໃນການດຶງດູດການລົງທຶນຂອງແຂວງຜ່ານການນໍາສະເໜີຂອງພະແນກແຜນການ ແລະການລົງທຶນກ່ຽວກັບຈຸດພິເສດທີ່ຕັ້ງຍຸດທະສາດ, ນະໂຍບາຍສົ່ງເສີມການລົງທຶນຂອງລັດຖະບານ, ກາລະໂອກາດການລົງທຶນ, 4 ທ່າແຮງຕົ້ນຕໍໃນການລົງທຶນຂອງແຂວງກໍ່ຄືການຜະລິດກະສິກໍາ, ການບໍລິການ, ການທ່ອງທ່ຽວ, ການບໍລິການການຄ້າການລົງທຶນ ແລະ ອຸດສະຫະກໍາປຸ່ງແຕ່ງ; ໂຄງການຮຽກບັນຊີໃນ 4 ຕົວເມືອງ ແລະນະຄອນປາກເຊ, ແຜນພັດທະນາເສດຖະກິດສັງຄົມ 5 ປີຄັ້ງທີ VIII ແລະ ທິດທາງ 5 ປີ ຄັ້ງທີ IX 2021-2025 ຂອງແຂວງ; ພ້ອມຮັບຟັງຄໍາເຫັນການຕີລາຄາການດໍາເນີນທຸລະກິດ,ການເຄື່ອນໄຫວຂອງວິສະຫະກິດຫວຽດນາມທີ່ເຄື່ອນໄຫວຢູ່ໃນແຂວງຈໍາປາສັກ, ເຊິ່ງທັງສອງຝ່າຍຕົກລົງເຫັນດີ, ຕໍ່ການສະເໜີຂອງກອງປະຊຸມໃຫ້ປະສານສົມທົບກັນເພື່ອດໍາເນີນການປະຕິບັດຢ່າງເປັນຮູບປະທໍາໂດຍສະເພາະແມ່ນຂົງເຂດການປຸ່ງແຕ່ງກະສິກໍາ, ການທ່ອງທ່ຽວ, ອຸດສະຫະກໍາ, ການສ້າງເຂດອຸດສະຫະກໍາ ລາວ-ຫວຽດນາມ ເພື່ອຮັບປະກັນຜົນປະໂຫຍດຂອງການລົງທຶນຂອງສອງຝ່າຍ.

แชร์