ຊາວກະສິກອນກຸ່ມຜະລິດກະສິກຳປູກພຶດຜັກ ບ້ານນາຊ່າວ ສາມາດປູກຜັກເປັນສີນຄ້າຫຼາຍຂື້ນ

ຕອນແລງຂອງວັນທີ 12 ມີນາ 2025 ນີ້, ທ່ານ ລິນຄໍາ ດວງສະຫວັນ ລັດຖະມົມຕີກະຊວງກະສິກໍາ ແລະປ່າໄມ້ ພ້ອມດ້ວຍຄະນະໄດ້ຢ້ຽມຢາມກຸ່ມຜະລິດກະສິກຳປູກພຶດຜັກ ທີ່ບ້ານນາຊ່າວ ນະຄອນ ຫຼວງພະບາງ ແຂວງຫຼວງພະບາງ, ມີ ທ່ານ ສັນຍາ ຊຸມພົນພັກດີ ຮອງຫົວໜ້າພະແນກ ກະສິກຳ ແລະ ປ່າໄມ້, ພ້ອມດ້ວຍການນຳຂັ້ນແຂວງ, ຫ້ອງການກະສິກຳນະຄອນ ຫຼວງພະບາງ, ທິມງານປະສານງານໂຄງການຊົນລະກະເສດ ແລະການຜະລິດເປັນສິນຄ້າຂະໜາດນ້ອຍ ແລະກຸ່ມຜະລິດກະສິກຳປູກພຶດຜັກ ໃຫ້ການຕ້ອນຮັບ.

ທ່ານ ສົມດີ ສີປະເສີດ ຕາງໜ້າຊາວກະສິກອນກຸ່ມຜະລິດກະສິກໍາປູກພຶດຜັກ ບ້ານນາຊ່າວ ໄດ້ລາຍງານການຈັດຕັ້ງປະຕິບັດ ກິດຈະກຳຂອງໂຄງການຊົນລະກະເສດ ແລະການຜະຜິດເປັນສິນຄ້າຂະໜາດນ້ອຍ ທີ່ໃຫ້ທຶນຊ່ວຍເຫຼືອ ກຸ່ມຜະລິດກະສິກໍາ ບ້ານນາຊ່າວ ມີຈຳນວນ 40 ຄອບຄົວ, ເນຶ້ອທີ່ການຜະລິດ ຫຼາຍກວ່າ 27 ເຮັກຕາ, ໂຄງການໄດ້ສະໜອງທຶນ 259 ລ້ານ 5 ແສນກວ່າກີບ ແລະເຈະນ້ຳບາດານ ທີ່ໃຊ້ໄຟຟ້າໂຊລາແຊວ ແລະສະໜອງແນວພຶດຜັກຈໍານວນໜຶ່ງ, ໄລຍະຜ່ານມາສາມາດປູກພຶດຜັກຂາຍໄດ້ 10,700 ກິໂລ ລາຄາຂາຍສະເລ່ຍ 8,000 ກີບຕໍ່ກິໂລ ສາມາດສ້າງລາຍຮັບໄດ້ທັງໝົດ 85,600,000 ກີບ ຖ້າທຽບໃສ່ໃນເມື່ອກ່ອນ ທີ່ບໍ່ທັນມີໂຄງການເຂົ້າມາສະໜັບສະໜູນເຫັນວ່າ ການຜະລິດ ແລະຊີວິດການເປັນຢູ່ຂອງກຸ່ມຊາວສະສິກອນພໍແຕ່ກຸ້ມກິນ, ແຕ່ປັດຈຸບັນທຸກຄອບຄົວທີ່ເປັນສະມາຊິກກຸ່ມຜະລິດ ມີຊີວິດການເປັນຢູ່ດີຂຶ້ນກວ່າເກົ່າ ສະແດງໃຫ້ເຫັນຢ່າງຈະແຈ້ງ ມີບາງຄອບຄົວ ກາຍເປັນຄອບຕົວຕົວແບບໃນການປູກພຶດຜັກສາມາດສົ່ງເສີມລູກໄດ້ຮໍ່າຮຽນຈົບສາຍສາມັນ ແລະວິຊາຊີບ, ທັງມີເງີນແຮໄວ້ໃນຄອບຄົວ ເພື່ອໃຊ້ໃນຍາມຈຳເປັນ. ຕອນທ້າຍ ທ່ານ ລິນຄໍາ ດວງສະຫວັນ ໄດ້ມີຄໍາເຫັນຍ້ອງຍໍຊົມເຊີຍກຸ່ມຜະລິດກະສິກຳປູກພຶດຜັກ ບ້ານນາຊ່າວ ທີ່ຈັດຕັ້ງປະຕິບັດບັນດາກິດຈະກຳ ຕາມເປົ້າໝາຍຂອງໂຄງການໄດ້ດີ ພ້ອມທັງໃຫ້ສືບຕໍ່ ການປູກພຶດຜັກກາຍເປັນສິນຄ້າສົ່ງອອກສູ່ທ້ອງຕະຫຼາດນະຄອນຫຼວງພະບາງ ແລະຕ່າງແຂວງທັງໄດ້ກ່າວຂອບໃຈໂຄງການຊົນລະກະເສດ ແລະການຜະຜິດເປັນສິນຄ້າຂະໜາດນ້ອຍ ທີ່ໃຫ້ທຶນຊ່ວຍເຫຼືອ ເຮັດໃຫ້ຊາວກະສິກອນມີຊີວິດການເປັນຢູ່ທີ່ດີຂື້ນທັງມີວຽກເຮັດງານທຳທີ່ໝັ້ນຄົງ.
ຂ່າວ-ພາບ: ທະນູສີນ ອິດທິພົນ

แชร์