ປີຜ່ານມາດ່ານສາກົນ ຂົວມິດຕະພາບ 3 ເກັບລາຍຮັບໄດ້ 819,057 ຕື້ກີບ

ດ່ານສາກົນ ຂົວມິດຕະພາບ 3 ແຂວງຄໍາມ່ວນ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານປະຈໍາປີ 2024 ແລະທິດທາງແຜນການເພື່ອຈັດຕັ້ງປະຕິບັດໃນປີ 2025 ຂອງຕົນຂຶ້ນໃນວັນທີ 12 ມີນານີ້ ທີ່ຫ້ອງປະຊຸມຂອງຕົນໂດຍການເຂົ້າຮ່ວມຂອງທ່ານ ສົມສະອາດ ອຸ່ນສີດາ ຮອງເຈົ້າແຂວງຄໍາມ່ວນ ມີບັນດາຕາງໜ້າພະແນກການທີ່ກ່ຽວຂ້ອງເຂົ້າຮ່ວມ.

ທ່ານ ພັອ ບຸນປະດິດ ວົງພູທອນ ຫົວໜ້າຄະນະຄຸ້ມຄອງດ່ານສາກົນ ຂົວມິດຕະພາບ 3 ໄດ້ກ່າວເປີດກອງປະຊຸມຢ່າງເປັນທາງການ. ຈາກນັ້ນ, ທ່ານ ສີສະຫວັນ ໂຄດຕະວົງ ຫົວໜ້າຫ້ອງການບໍລິຫານຄຸ້ມຄອງດ່ານສາກົນ ຂົວມິດຕະພາບ 3 ໄດ້ຜ່ານບົດສະຫຼຸບການເຄື່ອນໄຫວປະຕິບັດວຽກງານ ຂອງດ່ານສາກົນຂົວມິດຕະພາບ 3 ປະຈໍາປີ 2024 ແລະ ທິດທາງແຜນການປີ 2025, ຊຶ່ງໄດ້ຕີລາຄາຜົນການຈັດຕັ້ງປະຕິບັດວຽກງານ ໃນໄລຍະ 1 ປີຜ່ານມາ ເປັນຕົ້ນ: ດ້ານການເມືອງ-ແນວຄິດແມ່ນເອົາໃຈໃສ່ໃນການສຶກສາອົບຮົມດ້ານການເມືອງ-ແນວຄິດໃຫ້ແກ່ສະມາຊິກພັກ-ພະນັກງານທີ່ຢູ່ໃນຄວາມຮັບຜິດຊອບຂອງຕົນ ໂດຍໄດ້ນຳເອົາແນວທາງນະໂຍບາຍຂອງພັກ, ລະບຽບ, ກົດໝາຍທີ່ກ່ຽວຂ້ອງແຕ່ລະຂົງເຂດມາຜັນຂະຫຍາຍ ເຜີຍແຜ່ ພ້ອມກັນຈັດຕັ້ງປະຕິບັດຢ່າງເຂັ້ມງວດ.

ດ້ານວຽກງານວິຊາສະເພາະ ໄດ້ອອກວີຊາໃຫ້ນັກທ່ອງທ່ຽວປະຈຳປີ 2024 ຈໍານວນ 6,587 ຄົນ ຍິງ 1,042 ຄົນ, ລາຍຮັບທີ່ເກັບໄດ້ 138,720 ໂດລາ, ມູນຄ່າເປັນເງິນກີບ 3,033,528,960 ກີບ , ວຽກງານກວດຄົນເຂົ້າ-ອອກເມືອງໃນໄລຍະ 1 ປີຜ່ານມາ ໄດ້ຕິດຕາມ, ກວດກາ ຄຸ້ມຄອງຄົນເຂົ້າ-ອອກດ່ານມີຈຳນວນທັງໝົດ 414,366 ຄົນ ຍິງ 137,557 ຄົນ, ເດັກ 20,891 ຄົນ. ກວດກາພາຫະນະ ເຂົ້າ-ອອກ ທັງໝົດຈຳນວນ 378,871 ຄັນ.

ສໍາລັບວຽກງານພາສີແມ່ນເປັນຂະແໜງການໜຶ່ງທີ່ເຮັດໜ້າທີ່ຫຼັກໃນການຈັດເກັບລາຍຮັບເຂົ້າງົບປະມານ ຊຶ່ງປະກອບມີ: ດ່ານພາສີປະຈຳຂົວມິດຕະພາບ 3, ໜ່ວຍງານພາສີປະຈຳເຂດເສດຖະກິດ, ດ່ານທ້ອງຖິ່ນ ແລະ ດ່ານປະເພນີ ໄດ້ຮັບຕົວເລກຄາດໝາຍໃນການຈັດເກັບລາຍຮັບໃນປີ 2024 ຈຳນວນ 697,000 ຕື້ກີບ, ຜ່ານການຈັດຕັ້ງປະຕິບັດມາຮອດທ້າຍປີ 2024 ມີຈໍານວນທັງໝົດ 819,057 ຕື້ກີບ ເທົ່າກັບ 117.51% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ 149.39%, ເພີ່ມຂຶ້ນ 49.39% ເທົ່າກັບ 270,785 ຕື້ກີບ ແລະ ວຽກງານດ້ານອື່ນໆກໍມີຜົນສໍາເລັດ.

ໃນກອງປະຊຸມຄັ້ງນີ້ຕາງໜ້າບັນດາຂະແໜງການປິ່ນອ້ອມກໍໄດ້ມີການປະກອບຄໍາເຫັນໃສ່ບົດສະຫຼຸບປີ 2024 ແລະ ທິດທາງປີ 2025 ເຊິ່ງບັນດາທ່ານໄດ້ມີການຕີລາຄາວຽກງານຮອບດ້ານໃນໄລຍະຜ່ານມາເພື່ອເຮັດໃຫ້ການຈັດຕັ້ງປະຕິບັດວຽກງານໃນປີ 2025 ໄດ້ມີການຫັນປ່ຽນຢ່າງຕັ້ງໜ້າ ແລະ ໄດ້ຮັບໝາກຜົນດີກວ່າປີທີ່ຜ່ານມາ.

ຂ່າວ-ພາບ: ແດງສະຫວັດ ແສນພານິດ

แชร์