ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22 ມີນາ 1955-22 ມີນາ 2025) ສະຫາຍ ສີເວີນ ສິງຫາລາດ ຄະນະປະຈໍາພັກເມືອງ ຮອງເຈົ້າເມືອງກະລຶມ ໄດ້ສະແດງຄວາມຮູ້ສຶກຕໍ່ວັນດັ່ງກ່າວວ່າ: ຂ້າພະເຈົ້າໃນນາມສະມາຊິກພັກຜູ້ໜຶ່ງເຫັນວ່າ ວັນສ້າງຕັ້ງພັກປະຊາຊົນປະຕິວັດລາວ ວັນທີ 22 ມີນາ ເປັນວັນທີ່ມີຄວາມໝາຍສໍາຄັນທາງປະຫວັດສາດຂອງຊາດ ແລະ ເປັນວັນແຫ່ງໄຊຊະນະຂອງປວງຊົນລາວບັນດາເຜົ່າ. ພັກປະຊາຊົນ ປະຕິວັດລາວ ນັບແຕ່ມື້ສ້າງຕັ້ງກໍໄດ້ເອົາໃຈໃສ່ປັບປຸງ-ກໍ່ສ້າງຕົນເອງໃຫ້ມີຄວາມເຂັ້ມແຂງ ແລະນໍາພາປະຊາຊົນລາວບັນດາເຜົ່າປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ພັດທະນາປະເທດຊາດກ້າວຂຶ້ນສັງຄົມນິຍົມ.

 

ສະຫາຍ ສີເວີນ ສິງຫາລາດ ກ່າວວ່າ: ໃນໄລຍະຜ່ານມາ, ຄະນະບໍລິຫານງານພັກເມືອງກະລຶມ ໄດ້ສຸມໃສ່ນໍາພາປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຂອງປະຊາຊົນ ເປັນວຽກງານໜຶ່ງ ທີ່ສໍາຄັນໃນການພັດທະນາເສດຖະກິດ-ສັງຄົມ, ໂດຍໄດ້ຂຸດຄົ້ນ-ນໍາໃຊ້ທ່າແຮງບົ່ມຊ້ອນພາຍໃນເມືອງ ແລະ ສຸມທຶນຮອນຈໍານວນໜຶ່ງ ເຂົ້າໃນການພັດທະນາພື້ນຖານໂຄງລ່າງ, ປັບປຸງ-ກໍ່ສ້າງເສັ້ນທາງ, ໂຮງຮຽນ, ໂຮງໝໍນ້ອຍ (ສຸກສາລາ), ນໍ້າລິນ, ລະບົບຊົນລະປະທານ, ບຸກເບີກເນື້ອທີ່ທໍາການຜະລິດ, ຈັດສັນເຕົ້າໂຮມບ້ານນ້ອຍ ເຂົ້າເປັນບ້ານໃຫຍ່ ແລະ ຈັດສັນອາຊີບຄົງທີ່ໃຫ້ປະຊາຊົນ, ອັນໄດ້ເຮັດໃຫ້ຊົນນະບົດມີໂສມໜ້າໃໝ່, ປະຊາຊົນມີຄຸນນະພາບຊີວິດດີຂຶ້ນກວ່າເກົ່າ; ວຽກງານປ້ອງກັນຊາດ-ປ້ອງກັນຄວາມສະຫງົບໄດ້ຮັບການປັບປຸງນັບມື້ເຕີບໃຫຍ່ເຂັ້ມແຂງ; ຂະບວນການຜະລິດກະສິກໍາ ເພື່ອການບໍລິໂພກພາຍໃນ ແລະ ຂາຍເປັນສິນຄ້າເລີ່ມມີໜໍ່ແໜງ, ຫລາຍຄອບຄົວ ກາຍເປັນຄອບຄົວຕົວແບບ, ຄອບຄົວພັດທະນາ; ຫລາຍເຂດຈຸດສຸມ-ກຸ່ມບ້ານເຂດທຸລະກັນດານ ໄດ້ຮັບການພັດທະນາ ແລະ ມີການປ່ຽນແປງດີຂຶ້ນ; ບາງບ້ານໄດ້ຫລຸດພົ້ນອອກຈາກຄວາມທຸກຍາກ, ກາຍເປັນບ້ານພັດທະນາ ແລະ ປະກົດມີໜໍ່ແໜງຈະກາຍເປັນຕົວເມືອງນ້ອຍໃນຊົນນະບົດ.

ທົ່ວເມືອງກະລຶມ ປະກອບມີ 52 ບ້ານ 4,072 ຄອບຄົວ ທຽບໃສ່ມາດຖານໃໝ່ (ດໍາລັດ 348) ມີບ້ານພົ້ນທຸກ 5 ບ້ານ ກວມເອົາ 9,61%, ຄອບຄົວພົ້ນທຸກ 1,000 ຄອບຄົວ ກວມເອົາ 24,55%; ມີບ້ານພັດທະນາ 4 ບ້ານ ກວມເອົາ 7,69%, ຄອບຄົວພັດທະນາ 686 ຄອບຄົວ ກວມເອົາ 16,84%; ສ້າງບ້ານໃຫຍ່ໃຫ້ເປັນຕົວເມືອງນ້ອຍຈໍານວນ 1 ບ້ານ ກວມເອົາ 1,92%; ສ້າງບ້ານແບບຢ່າງປະຕິບັດກົດໝາຍໄດ້ 33 ບ້ານ ກວມເອົາ 63,46%; ສ້າງບ້ານສາມັກຄີປອງດອງໄດ້ 38 ບ້ານ ກວມເອົາ 73,07%, ຄອບຄົວສາມັກຄີປອງດອງ 2.373 ຄອບຄົວ ກວມເອົາ 56,27%; ສ້າງບ້ານວັດທະນະທໍາໄດ້ 36 ບ້ານ ກວມເອົາ 69,23% ແລະ ສ້າງຄອບຄົວວັດທະນະທໍາ 2.128 ຄອບຄົວ ກວມເອົາ 52,25%.

ສະຫາຍ ສີເວີນ ສິງຫາລາດ ຕາງໜ້າຄະນະບໍລິຫານງານພັກ-ອົງການປົກຄອງເມືອງກະລຶມ ຍັງໄດ້ຖືເອົາໂອກາດນີ້ ສະ ແດງຄວາມຮູ້ບຸນຄຸນ ແລະ ອວຍພອນໄຊອັນປະເສີດໃຫ້ການນຳພັກ-ລັດທຸກຂັ້ນ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ ແລະ ສືບຕໍ່ນໍາພາ-ຊີ້ນໍາພັດທະນາປະເທດຊາດ ເວົ້າລວມ ກໍຄື ເມືອງກະລຶມ ແຂວງເຊກອງ ເວົ້າສະເພາະ ໃຫ້ຮັ່ງມີເຂັ້ມແຂງ ແລະ ກ້າວຂຶ້ນສູ່ຈຸດໝາຍສັງຄົມນິຍົມ.
.
ໂດຍ: ສັນຍາ ແກ້ວໄຊຍະວົງ