ປູກຜັກກະລໍ່າປີ ເປັນອາຊີບເສີມ ເຮັດໃຫ້ຊີວິດການເປັນຢູ່ດີຂຶ້ນ

ຄົນເຮົາບໍ່ວ່າຈະຢູ່ໃນຕົວເມືອງ ຫລືຊົນນະບົດ, ແຕ່ຖ້າມີຄວາມດຸໝັ່ນ, ອົດທົນ ແລະເຮັດໃນສິ່ງທີ່ຖືກຕ້ອງຕາມລະບຽບກົດໝາຍກໍຈະນໍາພາຄອບຄົວກ້າວໄປສູ່ຄວາມສໍາເລັດ. ດັ່ງຄອບຄົວທ່ານ ແສງອາທິດ ຈັນທະບຸນເຮືອງ ອາຊີບພະນັກງານ (ຄູສອນ) ຢູ່ບ້ານຈະແຣະ ເມືອງກະລຶມ ແຂວງເຊກອງ ທີ່ໃຊ້ເວລາຫວ່າງຫລັງເລີກຈາກການສິດສອນມາປູກຜັກກະລໍ່າປີເປັນອາຊີບເສີມ ສາມາດສ້າງລາຍຮັບເພີ່ມເຮັດໃຫ້ຄອບຄົວພັດທະນາດີຂຶ້ນ.

ທ່ານ ແສງອາທິດ ຈັນທະບຸນເຮືອງ ໄດ້ກ່າວເຖິງຜົນສໍາເລັດການພັດທະນາເສດຖະກິດຄອບຄົວ ໃນໂອກາດຂຶ້ນປະກອບຄໍາເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງກະລຶມ ເມື່ອບໍ່ດົນຜ່ານມາວ່າ: ໃນຄອບຄົວມີ 4 ຄົນ, ແຮງງານຫລັກ 3 ຄົນ. ໃນເມື່ອກ່ອນ ຊີວິດການເປັນຢູ່ຂອງຄອບຄົວຂາດໆເຂີນໆ, ຄ່າໃຊ້ຈ່າຍຕ່າງໆພາຍໃນຄອບຄົວບໍ່ພຽງພໍຍ້ອນອາໄສແຕ່ເງິນເດືອນ ແລະ ໃນແຕ່ລະປີອຶດເຂົ້າ (ເຂົ້າກໍ່ບໍ່ກຸ້ມກິນ). ຍ້ອນແນວນັ້ນ, ຈຶ່ງໄດ້ປຶກສາຫາລືກັບຄອບຄົວ ອີງໃສ່ທ່າແຮງທີ່ມີຢູ່ຂອງຄອບຄົວ ແລະ ອີງໃສ່ແນວທາງຂອງພັກ, ແຜນນະໂຍບາຍຂອງລັດ ໂດຍສະເພາະມະຕິກອງປະຊຸມໃຫຍ່ຜູ້ແທນອົງຄະນະພັກເມືອງກະລຶມ ຄັ້ງທີ IX ວາງອອກ; ມາຮອດປີ 2020 ຄອບຄົວຂ້າພະເຈົ້າ ຈຶ່ງຕັດສິນໃຈຢຸດເຊົາເຮັດໄຮ່ ຫັນມາເຮັດນາປູກເຂົ້າ ແລະ ເຫັນໄດ້ວ່າ ຜົນໄດ້ຮັບດີສົມຄວນ, ຄອບຄົວມີເຂົ້າກຸ້ມກິນ, ແຕ່ຍັງບໍ່ທັນເປັນການສ້າງລາຍຮັບເພີ່ມໃຫ້ແກ່ຄອບຄົວ. ຫລັງຈາກນັ້ນ, ຈຶ່ງໄດ້ຫາເຮັດອາຊີບເສີມ (ປູກຜັກກະລໍ່າປີ) ໃນເບື້ອງຕົ້ນໄດ້ທົດລອງປູກພຽງແຕ່ 1 ພັນເບ້ຍ ເຊິ່ງຜ່ານໄປ 3 ເດືອນປາຍ ກໍສາມາດເກັບກູ້ຜົນຜະລິດ ແລະ ຂາຍ ສາມາດສ້າງລາຍຮັບໄດ້ 10 ລ້ານກີບ, ເມື່ອເຫັນວ່າ ການປູກຜັກກະລໍ່າປີໄດ້ຮັບຜົນດີ, ຈຶ່ງໄດ້ປະສານສົມທົບກັບຂະແໜງການກ່ຽວຂ້ອງ ໄດ້ສຶກສາຄົ້ນຄວ້າ ແລະ ຮຽນຮູ້ເຕັກນິກການປູກ, ການບົວລະບັດຮັກສາ ຈາກວິຊາການຂະແໜງກະສິກໍາ-ປ່າໄມ້ເມືອງ ພ້ອມທັງລົງທຶນຂະຫຍາຍເນື້ອທີ່ປູກ, ຈັດຊື້ແນວພັນ ແລະປັບປຸງລະບົບທໍ່ນໍ້າ ເພື່ອໃຫ້ໄດ້ຜົນຜະລິດທີ່ດີມີຄຸນນະພາບ. ໃນປີ 2023 ຜ່ານມາຄອບຄົວຂອງຂ້າພະເຈົ້າມີລາຍຮັບຈາກການຂາຍຜັກກະລໍ່າປີ 15 ລ້ານກີບ, ລາຍຮັບຈາກການຂາຍສິ້ນຊົນເຜົ່າ-ສັດລ້ຽງ ບວກກັບການປະຢັດ ແລະສະສົມລາຍໄດ້ຈາກເງິນເດືອນເຮັດໃຫ້ຊີວິດການເປັນຢູ່ພັດທະນາດີຂຶ້ນ, ມີເຮືອນຢູ່ແບບຖາວອນ ແລະ ມີພາຫະນະຮັບໃຊ້ໃນການໄປ-ມາຢ່າງສະດວກສະບາຍ.

ທ່ານ ແສງອາທິດ ຈັນທະບຸນເຮືອງ ໄດ້ກ່າວຕື່ມວ່າ: ປັດໄຈພື້ນຖານ ທີ່ເຮັດໃຫ້ການພັດທະນາເສດຖະກິດຄອບຄົວຂອງຂ້າພະເຈົ້າດີຂຶ້ນແມ່ນຍ້ອນມີແນວທາງອັນຖືກຕ້ອງຂອງພັກ-ລັດຖະບານ ກໍຄື ການນໍາພາ-ຊີ້ນໍາຢ່າງໃກ້ຊິດຕິດແທດຂອງຄະນະພັກ-ອົງການປົກຄອງແຂວງເຊກອງ ໂດຍສະເພາະແມ່ນຄະນະພັກ-ອົງການປົກຄອງເມືອງກະລຶມ ແລະຍ້ອນຄວາມສາມັກຄີພາຍໃນຄອບຄົວ, ດຸໝັ່ນ, ກ້າຄິດ, ກ້າເຮັດ ແລະກ້າຮັບຜິດຊອບ. ອັນສໍາຄັນແມ່ນກ້າທີ່ຈະປ່ຽນແປງຈາກອັນເກົ່າໄປສູ່ອັນໃໝ່ ຈຶ່ງຈະເຮັດໃຫ້ຊີວິດຂອງຄອບຄົວພັດທະນາດີຂຶ້ນ.
.
ໂດຍ: ສັນຍາ ແກ້ວໄຊຍະວົງ

แชร์