ທຫລ ຈັດສຳມະນາຫົວຂໍ້ “ເຄື່ອງມືປະເມີນຕົວຊີ້ວັດທາງດ້ານເສດຖະກິດມະຫາພາກ”

ໃນຕອນເຊົ້າວັນທີ 11 ມີນາ 2025, ທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງສຳມະນາວິຊາການ ແລະ ແລກປ່ຽນບົດຮຽນທາງດ້ານວິຊາການພາຍໃຕ້ຫົວຂໍ້: “ເຄື່ອງມືປະເມີນຕົວຊີ້ວັດທາງດ້ານເສດຖະກິດມະຫາພາກ” ໂດຍການເປັນປະທານຂອງ ທ່ານ ສຸລິສັກ ທຳນຸວົງ ຮອງຜູ້ວ່າການທະນາຄານແຫ່ງ ສປປ ລາວ, ພ້ອມດ້ວຍຄະນະກົມ, ຄະນະພະແນກ ແລະວິຊາການຈາກບັນດາກະຊວງທີ່ກ່ຽວຂ້ອງ ແລະບັນດາກົມພາຍໃນ ທຫລ ເຂົ້າຮ່ວມ.

ຈຸດປະສົງຂອງການຈັດສຳມະນາໃນຄັ້ງນີ້ແມ່ນເພື່ອສ້າງຂະບວນການວິຊາສະເພາະຂໍ່ານັບຮັບຕ້ອນສາມວັນປະຫວັດສາດສຳຄັນຂອງ ສປປ ລາວ ໃນປີ 2025 ກໍຄື ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະວັນເກີດປະທານ ໄກສອນ ພົມວິຫານ ຄົບຮອບ 105 ປີ ແລະທັງເປັນຂະບວນການວິຊາສະເພາະເພື່ອກະກຽມກອງປະຊຸມໃຫຍ່3 ຂັ້ນຂອງອົງຄະນະພັກ ທຫລ ເວົ້າລວມ,ເວົ້າສະເພາະແມ່ນໜ່ວຍພັກກົມນະໂຍບາຍເງິນຕາ. ພ້ອມນັ້ນ, ກໍເພື່ອເປັນການແລກປ່ຽນຄໍາຄິດ-ຄໍາເຫັນ ດ້ານວິຊາການຂອງຫຼາຍກະຊວງທີ່ຄຸ້ມຄອງເສດຖະກິດມະຫາພາກ.

ພາຍໃຕ້ຫົວຂໍ້ສຳມະນາ: “ເຄື່ອງມືປະເມີນຕົວຊີ້ວັດທາງດ້ານເສດຖະກິດມະຫາພາກ” ໄດ້ລົງເລິກ 3 ຫົວຂໍ້ຍ່ອຍຄື: 1) ດັດຊະນີຄ່າເງິນກີບ; 2) ສະຖິຕິເງິນຕາ-ການເງິນ (ປະລິມານເງິນ M3)ແລະ 3) ການພັດທະນາເຄື່ອງມືປະເມີນເສດຖະກິດມະຫາພາກ ເພື່ອຮັບໃຊ້ການຈັດຕັ້ງປະຕິບັດນະໂຍບາຍເງິນຕາ, ຊຶ່ງວຽກງານການຄົ້ນຄວ້າພັດທະນາເຄື່ອງມືປະເມີນຕົວຊີ້ວັດທາງດ້ານເສດຖະກິດມະຫາພາກເປັນວຽກງານໜຶ່ງທີ່ມີຄວາມສຳຄັນຫຼາຍໃນການກຳນົດທິດທາງນະໂຍບາຍ ແລະ ມາດຕະການມະຫາພາກ ໂດຍສະເພາະການຄົ້ນຄວ້າ-ປັບປຸງບັນດານະໂຍບາຍເງິນຕາ ແລະອັດຕາແລກປ່ຽນເພື່ອຮັກສາສະຖຽນລະພາບທາງດ້ານລາຄາໃຫ້ໝັ້ນທ່ຽງ ແລະປະກອບສ່ວນຊຸກຍູ້ການຂະຫຍາຍຕົວຂອງເສດຖະກິດໃຫ້ເຂັ້ມແຂງ ແລະຍື່ນຍົງ.

ກອງປະຊຸມໃນຄັ້ງນີ້ ຜູ້ເຂົ້າຮ່ວມໄດ້ເອົາໃຈໃສ່ຮັບຟັງ, ແລກປ່ຽນ ແລະປະກອບຄໍາເຫັນຢ່າງກົງໄປກົງມາເປັນຂະບວນການຟົດຟື້ນ ແລະປະສົບຜົນສຳເລັດຕາມລະດັບຄາດໝາຍ.

แชร์