ລາວ-ຍີ່ປຸ່ນ ລົງນາມເອກະສານແລກປ່ຽນ ໂຄງການຊ່ວຍເຫຼືອຈາກລັດຖະບານຍີ່ປຸ່ນ ມູນຄ່າ 1,707 ລ້ານ ເຢນ

ໃນຕອນບ່າຍຂອງວັນທີ 6 ມີນາ 2025 ທີ່ກະຊວງການຕ່າງປະເທດ, ໄດ້ຈັດພິທີລົງນາມເອກະສານແລກປ່ຽນ ໂຄງການຊ່ວຍເຫຼືອລ້າຈາກລັດຖະບານຍີ່ປຸ່ນ, ເຊິ່ງເປັນໂຄງການພັດທະນາເສດຖະກິດ ແລະ ສັງຄົມ ເພື່ອສະໜອງອຸປະກອນ ແລະ ກົນຈັກຕ່າງໆ ສໍາລັບບູລະນະ ແລະ ສ້ອມແປງຂົວ ໃນ ສປປ ລາວ ທີ່ໄດ້ຮັບຜົນກະທົບຈາກໄພພິບັດທໍາມະຊາດ ມູນຄ່າ 1,707 ລ້ານ ເຢນ ຫຼື ປະມານ 11,3 ລ້ານໂດລາສະຫະລັດ, ຕາງໜ້າລັດຖະບານລາວ ຮ່ວມລົງນາມໂດຍ ທ່ານ ພົງສະຫວັນ ສີສຸລາດ, ຮອງລັດຖະມົນຕີ ກະຊວງການຕ່າງປະເທດ ແລະ ຕາງໜ້າລັດຖະບານຍີ່ປຸ່ນ ລົງນາມໂດຍ ທ່ານ ໂຄອິຊຶມິ ຊຶໂຕະມຸ (KOIZUMI Tsutomu), ເອກອັກຄະລັດຖະທູດ ແຫ່ງ ຍີ່ປຸ່ນ ປະຈໍາ ສປປ ລາວ ໂດຍມີພາກສ່ວນກຽວຂ້ອງສອງຝ່າຍ ເຂົ້າຮ່ວມເປັນສັກຂີພິຍານ.

ໂຄງການຊ່ວຍເຫຼືອດັ່ງກ່າວ, ເປັນການຕອບສະໜອງຕາມຄວາມຮຽກຮ້ອງຕ້ອງການຂອງຝ່າຍລາວ ໃນການຈັດຕັ້ງປະຕິບັດເປົ້າໝາຍໃນການຫັນຈາກປະເທດບໍ່ມີຊາຍແດນຕິດກັບທະເລ ກາຍເປັນການເຊື່ອມໂຍງ-ເຊື່ອມຈອດ ສປປ ລາວ ອອກສູ່ພາກພື້ນ ແລະ ສາກົນ, ໂດຍສະເພາະ ເພື່ອປັບປຸງ, ຟື້ນຟູ ແລະ ຍົກລະດັບຄຸນນະພາບ ຂົວແຫ່ງຕ່າງໆ ພາຍໃນ ສປປ ລາວ ທີ່ເປ່ເພ ເນື່ອງຈາກໄດ້ຮັບຜົນກະທົບຈາກໄພພິບັດທໍາມະຊາດທີ່ເກີດຂຶ້ນ ເປັນຕົ້ນແມ່ນ ແຜ່ນດິນໄຫວ, ພາຍຸ ແລະ ນໍ້າຖ້ວມ ເຊິ່ງເຮັດໃຫ້ພື້ນຖານໂຄງລ່າງຂອງບັນດາຕົວເມືອງ ແລະ ການຄົມມະນາຄົມຂົນສົ່ງເປ່ເພເສຍຫາຍ.

ໃນໄລຍະຜ່ານມາ, ລັດຖະບານຍີ່ປຸ່ນໄດ້ໃຫ້ຄວາມສໍາຄັນ, ເອົາໃຈໃສ່ ແລະ ໃຫ້ການສະໜັບສະໜູນ ວຽກງານກໍ່ສ້າງພື້ນຖານໂຄງລ່າງຂອງ ສປປ ລາວ, ໂດຍສະເພາະ ຂົວຂ້າມນໍ້າຂອງ ແຫ່ງທີ II, ຂົວປາກເຊ, ໂຄງການປັບປຸງເສັ້ນທາງເລກ 9, ເສັ້ນທາງເລກ 1 ນະຄອນຫຼວງວຽງຈັນ ແລະ ໂຄງການອື່ນໆອີກຫຼາຍໂຄງການ.

ສະນັ້ນ, ການຊ່ວຍເຫຼືອຂອງລັດຖະບານ ແລະ ປະຊາຊົນຍີ່ປຸ່ນ ໃນຄັ້ງນີ້ ຈຶ່ງມີຄວາມໝາຍສໍາຄັນທີ່ສຸດ ໃນການຊ່ວຍສະໜອງເຄື່ອງກົນຈັກທີ່ທັນສະໄໝ ໃຫ້ແກ່ ລັດຖະບານລາວ ເພື່ອຍົກລະດັບຄຸນນະພາບ ແລະ ປະສິດທິພາບຂອງວຽກງານບູລະນະສ້ອມແປງຂົວທາງ ໃຫ້ມີຄວາມສະດວກ, ວ່ອງໄວ, ມີປະສິດທິພາບ ແລະ ເປັນມິດຕໍ່ສິ່ງແວດລ້ອມຍິ່ງຂຶ້ນ. ພ້ອມນີ້, ໂຄງການດັ່ງກ່າວ ຍັງປະກອບສ່ວນສໍາຄັນເຂົ້າໃນການຍົກລະດັບເສັ້ນທາງຫຼວງແຫ່ງຊາດ ໃຫ້ສາມາດຮອງຮັບການໄປມາຫາສູ່, ການບໍລິການຂົນສົ່ງສິນຄ້າ ແລະ ການບໍລິການທ່ອງທ່ຽວກັບປະເທດເພື່ອນບ້ານໃກ້ຄຽງ ກໍ່ຄືໃນພາກພື້ນ, ພ້ອມທັງ ເປັນການປະກອບສ່ວນອັນສໍາຄັນເຂົ້າໃນການພັດທະນາດ້ານເສດຖະກິດ ແລະ ສັງຄົມ ຂອງ ສປປ ລາວ ໂດຍສະເພາະແມ່ນ ປະຊາຊົນຢູ່ເຂດຫ່າງໄກສອກຫຼີກ ໃຫ້ມີຊີວິດການເປັນຢູ່ທີ່ດີຂຶ້ນ.

แชร์