ປີ 2024 ບໍລິສັດ ລັດວິສາຫະກິດ ຫວຍພັດທະນາ ສ້າງລາຍຮັບໄດ້ 819.28 ຕື້ກວ່າກີບ

ໃນວັນທີ 4 ມີນາ 2025, ທ່ານ ພູວົງ ກິດຕະວົງ ຮອງລັດຖະມົນຕີ ກະຊວງການເງິນ ພ້ອມດ້ວຍຄະນະໄດ້ເຄື່ອນໄຫວເຮັດວຽກ ແລະຢ້ຽມຢາມບໍລິສັດລັດວິສາຫະກິດ ຫວຍພັດທະນາ, ມີທ່ານຫົວໜ້າຫ້ອງການກະຊວງ ແລະບັນດາກົມກ່ຽວຂ້ອງເຂົ້າຮ່ວມ.

ທ່ານ ຄໍາເຜັ້ນ ບຸບຜາວົງ ຜູ້ອໍານວຍການ ບໍລິສັດ ລັດວິສາຫະກິດ ຫວຍພັດທະນາ ໄດ້ລາຍງານຜົນການດໍາເນີນທຸລະກິດ ຫວຍພັດທະນາ ປະຈໍາປີ 2024 ແລະ ທິດທາງແຜນການ ປີ 2025 ໂດຍສະເພາະດ້ານລາຍຮັບ ໄດ້ຈາກການເກັບຄ່າມອບເຫມົາ ໃນອັດຕາ 3% ຂອງມູນຄ່າຮັບໄປຈໍາໜ່າຍທັງຫມົດ ເປັນແຕ່ລະງວດ, ເຊິ່ງພາຍໃນປີ 2024 ມີການຈໍາຫນ່າຍທັງໝົດ 254 ງວດ, ໃນນັ້ນ ເລກ 1-6ໂຕ, ຫວຍນາມສັດ ແລະ ສະຫຼາກພັດທະນາ 5/45 ຈໍານວນ 151 ງວດ ແລະ ຫວຍລາສີ ຈໍານວນ 103 ງວດ. ສາມາດສ້າງລາຍຮັບລວມໄດ້ທັງຫມົດ 819.28 ຕື້ກວ່າກີບ ເທົ່າກັບ 119.42% ຂອງແຜນການປີ, ທຽບໃສ່ໄລຍະດຽວກັນປີ 2023 ເພີ່ມຂຶ້ນໂດຍສະເລ່ຍ 26.61%; ການຄຸ້ມຄອງລາຍຈ່າຍ ແມ່ນໄດ້ຈັດຕັ້ງປະຕິບັດຕາມລະບຽບການຢ່າງຮັດກຸມ ເພື່ອແນໃສ່ເຮັດໃຫ້ສົມດູນກັບລາຍຮັບຂອງບໍລິສັດ, ເຊິ່ງພາຍໃນປີ 2024 ສາມາດປະຕິບັດໄດ້ທັງຫມົດ 256.40 ຕື້ກວ່າກີບເທົ່າກັບ 31.30% ຂອງລາຍຮັບລວມ ຫລື ເທົ່າກັບ 114.17% ຂອງແຜນການປີ, ທຽບໃສ່ໄລຍະດຽວກັນປີ 2023 ເພີ່ມຂຶ້ນໂດຍສະເລ່ຍ 31.90%; (ລາຍຈ່າຍສີ້ນເປືອງບໍລິຫານ ຈໍານວນ 49.85 ຕື້ກວ່າກີບ ແລະ ອາກອນມູນຄ່າເພີ່ມ ຈໍານວນ 65.67 ຕື້ກວ່າກີບ); ກໍາໄລລວມສຸດທິສາມາດປະຕິບັດໄດ້ 562.87 ຕື້ກວ່າກີບ ເທົ່າກັບ 68.70% ຂອງລາຍຮັບລວມ ຫລືເທົ່າກັບ 121.97% ຂອງແຜນການປີ, ທຽບໃສ່ປີ 2023 ເພີ່ມຂຶ້ນໂດຍສະເລ່ຍ 24.34%; ພັນທະງົບປະມານໃຫ້ລັດ ສາມາດປະຕິບັດໄດ້ 564.55 ຕື້ກວ່າກີບ ເທົ່າກັບ 130.61% ຂອງແຜນການປີ, ທຽບໃສ່ປີ 2023 ເພີ່ມຂຶ້ນໂດຍສະເລ່ຍ 25.45%. ປັດຈຸບັນ ບໍລິສັດ ມີທຶນຈົດທະບຽນ 86,075,039,699 ກີບ (ຕາມໃບທະບຽນວິສາຫະກິດ ເລກທີ 2382/ຈທວ, ລົງວັນທີ 03 ກໍລະກົດ 2024). ທຶນທັງຫມົດຂອງບໍລິສັດມູນຄ່າ 1,031,963,833,221.63 ກີບ.

ສໍາລັບທິດທາງແຜນວຽກຈຸດສຸມ ປີ 2025 ຈະສູ້ຊົນປະຕິບັດການຈັດເກັບລາຍຮັບ ໃຫ້ໄດ້ຢ່າງຫນ້ອຍ 797.80 ຕື້ກວ່າກີບ, ທຽບໃສ່ແຜນປີ 2024 ເພີ່ມຂຶ້ນໂດຍ ສະເລ່ຍ 16.29% ຂອງແຜນການ; ສູ້ຊົນສ້າງຜົນກໍາໄລ ໃຫ້ໄດ້ຢ່າງຫນ້ອຍ 661.85 ຕື້ກວ່າກີບ, ທຽບໃສ່ແຜນປີ 2004 ເພີ່ມຂຶ້ນໂດຍສະເລ່ຍ 14.74% ຂອງແຜນການ; ສູ້ຊົນປະຕິບັດພັນທະງົບປະມານ ໃຫ້ໄດ້ຢ່າງໜ້ອຍ 504.34 ຕື້ກວ່າກີບ, ທຽບໃສ່ແຜນປີ 2024 ເພີ່ມຂຶ້ນໂດຍສະເລ່ຍ 16.68% ຂອງແຜນການ. ນອກຈາກນີ້, ບໍລິສັດຍັງຈະຫັນເປັນທັນສະໄຫມ ໂດຍສືບຕໍ່ຈັດຕັ້ງຜັນຂະຫຍາຍຕາມທິດຊີ້ນໍາຂອງຂັ້ນເທິງ ໂດຍການມີສ່ວນຮ່ວມໃນການຄຸ້ມຄອງ ແລະ ນໍາໃຊ້ລະບົບ LOTLINK ເຂົ້າໃນການຊື້-ຂາຍຫວຍ ໃຫ້ສາມາດນໍາໃຊ້ໄດ້ຢ່າງເປັນປົກກະຕິ; ຊຸກຍູ້ບັນດາບໍລິສັດຕົວແທນຈໍາຫນ່າຍ ທີ່ຍັງບໍ່ທັນຫັນໄປນໍາໃຊ້ລະບົບ LOTLINK ເພື່ອປະຕິບັດເປັນມາດຖານດຽວກັນ; ສືບຕໍ່ຄົ້ນຄວ້າ ແລະ ພັດທະນາບັນດາລະບົບໂປຣແກຣມ ທີ່ຈໍາເປັນ ເພື່ອເປັນເຄື່ອງມືອໍານວຍຄວາມສະດວກວຽກງານ ພາຍໃນບໍລິສັດ; ຄົ້ນຄວ້າການຈໍາໜ່າຍຫວຍພັດທະນາ ຜ່ານແອັບໂທລະສັບມືຖື ດ້ວຍທຶນຂອງບໍລິສັດເອງ.

ໂອກາດນີ້, ທ່ານ ພູວົງ ກິດຕະວົງ ໄດ້ເອກະພາບຕໍ່ບົດລາຍງານດັ່ງກ່າວ ແລະສະແດງຄວາມຊົມເຊີຍຕໍ່ຜົນສໍາເລັດຂອງບໍລິສັດລັດ ວິສາຫະກິດ ຫວຍພັດທະນາ ທີ່ສາມາດຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານ ໄດ້ລື່ນແຜນ. ພ້ອມກັນນັ້ນ, ທ່ານຮອງລັດຖະມົນຕີ ໄດ້ເນັ້ນໃຫ້ບໍລິສັດ ເພີ່ມທະວີວຽກງານການເມືອງແນວຄິດ ໃຫ້ສະມາຊິກພັກ ມີຄວາມອຸ່ນອ່ຽນ ທຸ່ນທ່ຽງກວ່າເກົ່າ, ມີຄວາມເຊື່ອໝັ້ນຕໍ່ການຊີ້ນໍາໆພາຂອງຄະນະພັກ-ຄະນະນໍາ, ມີຄວາມຮັບຜິດຊອບສູງ ຕໍ່ທີ່ການເມືອງທີ່ຂັ້ນເທິງມອບໝາຍໃຫ້ສໍາເລັດ, ສ້າງຄວາມສາມັກຄີ ຕໍ່ສູ້ກັບຄວາມຫຍຸ້ງຍາກ ໂດຍສະເພາະການແກ້ໄຂບັນຫາເສດຖະກິດ, ການສະກັດກັ້ນການຄ້າຂາຍຫວຍເຖື່ອນ, ພ້ອມກັນນັ້ນ ຕ້ອງມີການຕິດຕາມກວດກາວຽກງານ ໃນທຸກຂັ້ນຕອນ ທຸກຂົງເຂດ ໃຫ້ມີຄວາມປົ່ງໃສ ສາມາດກວດສອບໄດ້.

ການໄປຢ້ຽມຢາມບໍລິສັດຄັ້ງນີ້, ບັນດາກົມ, ຫ້ອງການ ແລະບໍລິສັດຍັງໄດ້ແລກປ່ຽນຄໍາຄິດຄໍາເຫັນຕໍ່ບັນດາຂໍ້ຄົງຄ້າງ ແລະສະເໜີທິດທາງ, ວິທີການແກ້ໄຂນໍາອີກດ້ວຍ.

ຂ່າວ: ກະຊວງການເງິນ

แชร์