ປູກທຸລຽນເປັນສິນຄ້າ ປີໜຶ່ງມີລາຍຮັບ ເກືອບ 4 ຕື້ກີບ

ອີງໃສ່ພື້ນຖານຂອງຄອບຄົວ ມີເນື້ອທີ່ດິນ, ບວກ​ກັບສະພາບອາກາດທີ່ເໝາະສົມ ແລະ ມີ​ໃຈມັກໃນການປູກຝັງ, ຄອບຄົວຂອງຂ້າພະເຈົ້າ ຈຶ່ງໄດ້ເຮັດອາຊີບປູກຝັງ-ລ້ຽງສັດມາແຕ່ໃດໆ.

ໃນເມື່ອກ່ອນການປູກຝັງເຮັດແບບປະປ່ອຍ, ຄິດອັນໃດອອກກະເຮັດອັນນັ້ນ, ໃຜເວົ້າວ່າປູກໝາກອັນນັ້ນໝາກອັນນີ້ດີ ກໍມາທົດລອງປູກສະລັບສັບຊ້ອນຢູ່ດິນຕອນດຽວກັນແບບບໍ່ເປັນລະບຽບ ເພື່ອເກັບກິນ,ຕ້ອນຍາດຕິພີ່ນ້ອງ, ເກັບຂາຍລ້ຽງຄອບຄົວສືບມື້ສືບວັນໄປ ເຮັດໃຫ້ລາຍຮັບໜ້ອຍຈຶ່ງເຮັດໃຫ້ຊິວິດການເປັນຢູ່ຂອງຄອບຄົວມີຄວາມຂາດເຂີນບໍ່ມີເງິນສະສົມໄວ້.

ເມື່ອເປັນແນວນັ້ນ, ຂ້າພະເຈົ້າພ້ອມດ້ວຍຄອບຄົວຊຶ່ງມີຈໍານວນພົນທັງໝົດ 4 ຄົນ ຍິງ 2 ຄົນ, ແຮງງານຕົ້ນຕໍ 2 ຄົນ ຍິງ 1 ຄົນ ຈຶ່ງຊອກຫາອາຊີບທີ່ຕົນເອງພໍມີຄວາມຮູ້ດ້ານການປູກຝັງ ຈຶ່ງຕັດສິນໃຈປູກທຸລຽນຂາຍຢ່າງຈິງຈັງ. ນີ້ຄື ຄໍາບອກເລົ່າຂອງ ທ່ານ ສົມຮັກ ສີບຸນເຮືອງ ບ້ານດົງໄລ່ ເມືອງບາຈຽງຈະເລີນສຸກ ແຂວງຈໍາປາສັກ.

ລາວເລົ່າຕໍ່ວ່າ: ເມື່ອເຫັນວ່າຕະຫຼາດມີຄວາມຕ້ອງການໝາກທຸລຽນຫຼາຍຂຶ້ນໃນປີ 2009 ຈຶ່ງຕັດສິນໃຈປູກທຸລຽນ ເລີ່ມຕົ້ນສັບຊ່າວເນື້ອທີ່ດິນ ຈໍານວນ 40 ເຮັກຕາ ປີທໍາອິດໄດ້ປູກຈຳນວນ 600 ຕົ້ນ, ຕາຍ 400 ຕົ້ນ ແລະ ປີ 2010 ກໍໄດ້ປູກທົດແທນ ແລະ ໄດ້ບົວລະບັດຮັກສາ ໂດຍປັດໃຈສໍາຄັນແມ່ນການວາງລະບົບນໍ້າເພື່ອຫົດໃນຍາມແລ້ງ ແລະ ໄດ້ນໍາໃຊ້ຝຸ່ນ ແລະ ຢາຂ້າສັດຕູພືດແບບປະສົມປະສານລະຫວ່າງຊີວະພາບ 30% ແລະ ເຄມີ 70% ການປູກທຸລຽນຊຸດທໍາອິດສ່ວນຫຼາຍເປັນພັນໝອນທອງ, ພັນພວງມະນີພຽງ 80 ຕົ້ນ, ພັນມູຊັງຄີງ 50 ຕົ້ນ ແລະ ພັນກ້ານຍາວຈຳນວນໜຶ່ງ, ຕໍ່ມາໃນປີ 2013 ກໍໄດ້ປູກເພີ່ມອີກລວມເປັນຈຳນວນ 861 ຕົ້ນ, ໃນເນື້ອທີ່ 5.2 ເຮັກຕາ, ປີ 2014 ເລີ່ມໄດ້ເກັບຜົນຜະລິດ ເອົາໄປຈໍາໜ່າຍໄດ້ເງິນ 35,000,000 ກີບ, ມາຮອດ ປີ 2015-2019 ເຫັນໝາກທຸລຽນອອກໝາກຫຼາຍຂຶ້ນສະເລ່ຍ ປີລະ 2 ເທົ່າໂຕ, ໃນປີ 2020 ຂາຍຜົນຜະລິດໄດ້ 25 ໂຕນ ເປັນເງິນ 880 ລ້ານກີບ ແລະຄ່ອຍໆເຮັດໃຫ້ຄອບຄົວຂອງຂ້າພະເຈົ້າມີລາຍຮັບດີຂຶ້ນເລື້ອຍໆ, ຮອດປີ 2022 ລາຍຮັບຈາກການຂາຍຜົນຜະລິດທັງໝົດປະມານ 46.3 ໂຕນ, ເປັນເງິນ 2.4 ຕື້ກີບ, ສະເລ່ຍໃສ່ແຮງງານເທົ່າ 600,000,000 ກີບ/ຄົນ/ປີ, ປີ 2023 ຂາຍຜົນຜະລິດໄດ້ 43 ໂຕນ, ເປັນເງິນ 3.8 ຕື້ກີບ.

ຜົນຜະລິດໝາກທຸລຽນໃນແຕ່ລະປີ ຂອງ ທ່ານ ສົມຮັກ ສີບຸນເຮືອງ ສາມາດສະໜອງສູ່ຕະຫຼາດພາຍໃນ ແລະ ຕ່າງແຂວງ ໂດຍມີແມ່ຄ້າມາຊື້ກັບສວນ ແລະ ນໍາສົ່ງຕາມການສັ່ງຈອງ ທາງອອນລາຍ ແລະ ສົ່ງຂາຍໂດຍຜ່ານບໍລິສັດຂົນສົ່ງມາຕະຫຼາດນະຄອນຫຼວງວຽງຈັນ ແລະ ຕະຫຼາດແຂວງສະຫວັນນະເຂດເປັນສ່ວນຫຼາຍ.
ໃນຕໍ່ໜ້າ ຄອບຄົວ ທ່ານ ສົມຮັກ ສີບຸນເຮືອງ ຈະເອົາໃຈໃສ່ບົວລະບັດສວນໝາກທຸລຽນຂອງຕົນໃຫ້ດີຂຶ້ນ ເພື່ອໃຫ້ໝາກທຸລຽນໜ່ວຍໃຫຍ່ສະໝໍ່າສະເໝີ, ເນື້ອນຸ້ມ, ມີນໍ້າໜັກ, ເອົາໃຈໃສ່ປັບປຸງການບໍລິການໃຫ້ທຽບທັນກັບຕ່າງປະເທດ ເພື່ອສົ່ງອອກໂດຍສະເພາະການຫຸ້ມຫໍ່ໃຫ້ມີສີສັນເພື່ອຢັ້ງຢືນເຖິງຕົ້ນກຳເນີດສິນຄ້າ; ຕອນທ້າຍລາວສະແດງຄວາມຂອບໃຈມາຍັງການນໍາພັກ ແລະ ລັດ ໂດຍສະເພາະ ອົງຄະນະພັກເມືອງ ທີ່ໄດ້ໃຫ້ທິດເຍືອງທາງ, ລົງມາຊຸກຍູ້ຊ່ວຍເຫຼືອ ແນະນໍາວິທີການຕ່າງໆເປັນປົກກະຕິ. ຊຶ່ງແນວທາງຂອງພັກ-ລັດຖືກຕ້ອງທີ່ສຸດ ຖ້າວ່າປະຊາຊົນພວກເຮົາເອົາໃຈໃສ່ໃນການປູກຝັງກາຍເປັນສິນຄ້າແນ່ນອນວ່າຈະເຮັດໃຫ້ຊີວິດການເປັນຢູ່ຈະຄ່ອຍໆດີຂຶ້ນ ທັງຈະສ້າງລາຍຮັບໃຫ້ກັບເມືອງ-ແຂວງ ແລະ ປະເທດຊາດອີກດ້ວຍ.

.
ໂດຍ: ວັນໄຊ ຕະວິນຍານ

แชร์