ເສດຖະກິດ ເມືອງກະລຶມ ຂະຫຍາຍຕົວສະເລ່ຍ 4,61% ຕໍ່ປີ

ໃນໄລຍະ 5 ປີ (2020-2024) ຜ່ານມາເສດຖະກິດເມືອງກະລຶມຂະຫຍາຍຕົວຢ່າງຕໍ່ເນື່ອງຕາມທິດມີຄຸນນະພາບ ແລະ ຍືນຍົງ ສະເລ່ຍໃນລະດັບ 4,61% ຕໍ່ປີ, ມາຮອດປີ 2024 ລວມຍອດຜະລິດຕະພັນພາຍໃນ (GDP) ບັນລຸ 184,69 ຕື້ກີບ, ສະເລ່ຍໃສ່ພົນລະເມືອງເທົ່າກັບ 9,2 ລ້ານກວ່າກີບ ຫລືປະມານ 241 ໂດລາສະຫະລັດ/ຄົນ/ປີ. ໃນນີ້, ຂະແໜງກະສິກໍາ-ປ່າໄມ້ ກວມເອົາ 36,91%, ຂະແໜງອຸດສາຫະກໍາ ກວມເອົາ 23,26% ແລະຂະແໜງການບໍລິການກວມເອົາ 39,81% ຂອງ GDP.

ສະຫາຍ ຄໍາປະເສີດ ດອຍບົວລະພາ ກໍາມະການພັກເມືອງ ຮອງເຈົ້າເມືອງກະລຶມລາຍງາຍໃຫ້ຮູ້ໃນກອງປະຊຸມໃຫຍ່ຜູ້ແທນອົງຄະນະພັກເມືອງກະລຶມ ຄັ້ງທີ X ໃນວັນທີ 6 ມີນານີ້ວ່າ: ໃນ 5 ປີຜ່ານມາ ເມືອງກະລຶມ ຍັງສືບຕໍ່ຮັກສາໄດ້ຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ,ເສດຖະກິດຂະຫຍາຍຕົວດີຂຶ້ນຢ່າງຕໍ່ເນື່ອງ ຕາມທິດໝັ້ນທ່ຽງ ແລະ ຍືນຍົງ, ບັນດາພັດທະນາພື້ນຖານໂຄງລ່າງໄດ້ຮັບການພັດທະນາ, ການຈັດຕັ້ງປະຕິບັດໂຄງການລົງທຶນຂອງລັດ,ເອກະຊົນພາຍໃນ ແລະ ຕ່າງປະເທດ, ການຜະລິດກະສິກໍາ (ປູກຝັງ-ລ້ຽງສັດ) ເພື່ອບໍລິໂພກພາຍໃນ ແລະ ຂາຍເປັນສິນຄ້າມີທ່າອ່ຽງຂະຫຍາຍຕົວ ສາມາດຜະລິດເຂົ້າໄດ້ 13,618 ໂຕນ ທຽບໃສ່ແຜນ 5 ປີ ເທົ່າກັບ 101,13%; ພືດສະບຽງອາຫານ 9,290,6 ໂຕນ ເທົ່າກັບ 36,43% ແລະ ການຜະລິດເປັນສິນຄ້າ 17,229 ໂຕນ ທຽບໃສ່ແຜນ 5 ປີ ເທົ່າກັບ 109,72%; ມູນຄ່າການສົ່ງອອກສິນຄ້າປະຕິບັດໄດ້ 8,95 ຕື້ກີບ ທຽບໃສ່ແຜນ 5 ປີ ເທົ່າກັບ 98%.

ພ້ອມກັນນີ້, ຂົງເຂດວັດທະນະທໍາ-ສັງຄົມ ຕິດພັນກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກຕາມທິດ 3 ສ້າງ ໄດ້ຮັບການປັບປຸງ ແລະພັດທະນາມີຄຸນນະພາບສູງຂຶ້ນ,ຊີວິດການເປັນຢູ່ຂອງປະຊາຊົນພາຍໃນເມືອງໄດ້ຮັບການຍົກລະດັບດີຂຶ້ນ,ຕາໜ່າງດ້ານການສຶກສາ, ສາທາລະນະສຸກ, ການພັດທະນາສີມືແຮງງານ, ການສ້າງຄອບຄົວ-ບ້ານວັດທະນະທໍາ, ບ້ານປ້ອມໝັ້ນ-ກຸ່ມບ້ານສູ້ຮົບຕິດລ່ຽນ, ບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ ແລະ ການສ້າງບ້ານໃຫຍ່ເປັນຕົວເມືອງຢູ່ຊົນນະບົດ ໄດ້ຮັບການປະຕິບັດຢ່າງກວ້າງຂວາງ ແລະ ເປັນຮູບປະທໍາຫລາຍຂຶ້ນ.

ສະຫາຍ ຄໍາປະເສີດ ດອຍບົວລະພາ ໃຫ້ຮູ້ຕື່ມວ່າ: ໃນ 5 ປີຕໍ່ໜ້າ 2025-2029 ເມືອງຈະສຸມໃສ່ປັບປຸງກົງຈັກການຈັດຕັ້ງ ແລະພັດທະນາການຄຸ້ມຄອງບໍລິຫານລັດໃຫ້ເຂັ້ມແຂງ ຕິດພັນກັບການພັດທະນາພື້ນຖານໂຄງລ່າງ, ຍູ້ແຮງການພັດທະນາເສດຖະກິດ-ສັງຄົມ ຕາມທິດສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່, ຮອດປີ 2029 ສູ້ຊົນເຮັດໃຫ້ເສດຖະກິດຂະຫຍາຍຕົວ 7% ຂຶ້ນໄປ, ມູນຄ່າ GDP ສະເລ່ຍໃສ່ພົນລະເມືອງໃຫ້ບັນລຸໄດ້ 11 ລ້ານກວ່າກີບ/ຄົນ/ປີ; ພັດທະນາຂະແໜງກະສິກໍາ, ຊຸກຍູ້ສົ່ງເສີມການຜະລິດໃຫ້ເປັນຂະບວນກວ້າງຂວາງ; ຍາດແຍ່ງດຶງດູດການລົງທຶນຈາກທຸກພາກສ່ວນເສດຖະກິດ, ພັດທະນາພື້ນຖານໂຄງລ່າງ ແລະແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫລຸດລົງເທື່ອລະກ້າວຕາມແຜນທີ່ວາງໄວ້.
ຂ່າວ-ພາບ: ສັນຍາ

แชร์