ຫາລືການຄຸ້ມຄອງ, ເກັບຊື້, ປຸງແຕ່ງ ແລະ ສົ່ງອອກມັນຕົ້ນ

ກອງປະຊຸມສໍາມະນາ ກ່ຽວກັບການຄຸ້ມຄອງ, ການເກັບຊື້, ການປຸງແຕ່ງ ແລະການສົ່ງອອກມັນຕົ້ນໄດ້ຈັດຂຶ້ນໃນວັນທີ 6 ມີນາ 2025 ນີ້ ຢູ່ນະຄອນປາກເຊ​ ແຂວງຈຳປາສັກ​ ໂດຍການເປັນປະທານ​ຂອງທ່ານ ສະເຫຼີມ​ໄຊ​ ກົມມະສິດ ຮອງນາຍົກລັດຖະມົນຕີແຫ່ງ ສປປ​ ລາວ, ບັນດາທ່ານລັດຖະມົນຕີກະຊວງກະສິກໍາ ແລະ​ ປ່າໄມ້, ກະຊວງ​ອຸດສາຫະກຳ​ ແລະ​ ການຄ້າ​, ທ່ານເຈົ້າແຂວງ​ຈໍາປາສັກ​, ຮອງລັດຖະມົນຕີກະຊວງທີ່ກ່ຽວຂ້ອງ, ຮອງເຈົ້າແຂວງ​ຈໍາປາສັກ,​ ບັນດາທ່ານ ຫົວໜ້າ​ - ຮອງຫົວໜ້າ ຫ້ອງການ, ກົມ, ສະຖາບັນ ແລະ ບັນດາພະແນກການທີ່ກ່ຽວຂ້ອງ ທັງສູນກາງ ແລະທ້ອງຖິ່ນ,​ ສະພາການຄ້າ​ ແລະ​ ອຸດສາຫະກຳ,​ ສະມາຄົມ​ມັນຕົ້ນ, ນັກທຸລະກິດ​ -​ ຜູ້ປະກອບການທີ່ກ່ຽວຂ້ອງເຂົ້າຮ່ວມ.​

ໂອກາດກ່າວເປີດ​ກອງປະຊຸມ,​ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແຫ່ງ​ ສປປ​ ລາວ​ ຕາງໜ້າໃຫ້ລັດຖະບານ ກໍຄືຕາງໜ້າໃຫ້ແກ່ຄະນະອໍານວຍຄວາມສະດວກດ້ານການຄ້າ ແລະ ການຂົນສົ່ງ ຂັ້ນສູນກາງ​ ມີຄໍາເຫັນວ່າ: ກອງປະຊຸມຂອງພວກເຮົາໃນນີ້ ເປີດຂຶ້ນໃນສະພາບທີ່ເຄັ່ງຮ້ອນ ແລະ ປະເທດເຮົາ ກໍຍັງພົບກັບຄວາມຫຍຸ້ງຍາກທາງດ້ານເສດຖະກິດ​ - ການເງິນ ເຊິ່ງໄດ້ສົ່ງຜົນກະທົບໂດຍກົງ ແລະ ເປັນສິ່ງທ້າທາຍ ຕໍ່ການຜະລິດ, ຕໍ່ຄວາມໝັ້ນຄົງດ້ານສະບຽງອາຫານຂອງຊາດ ແລະ ການຜະລິດເປັນສິນຄ້າ ເວົ້າລວມ, ເວົ້າສະເພາະແມ່ນການຄຸ້ມຄອງ, ການປຸງແຕ່ງ, ການເກັບຊື້ ແລະ ການສົ່ງອອກ ມັນຕົ້ນ ໃນປະເທດເຮົາ,​ ກອງປະຊຸມໃນຄັ້ງນີ້ ສຸດທີ່ມີຄວາມໝາຍສໍາຄັນຫຼາຍ, ພວກເຮົາຈະໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດ ການຄຸ້ມຄອງການຜະລິດມັນຕົ້ນ, ການເກັບຊື້, ການປຸງແຕ່ງ ຕະຫຼອດຮອດການສົ່ງອອກ ແລະ ມາດຕະການແກ້ໄຂ, ການຄຸ້ມຄອງໂຮງງານປຸງແຕ່ງມັນຕົ້ນ, ການຄົ້ນຄວ້າການຍົກສະມັດຕະພາບມັນຕົ້ນ, ການຄຸ້ມຄອງລາຄາ ແລະ ການສົ່ງອອກມັນຕົ້ນ ໃນໄລຍະຜ່ານມາ ແລະ ແຜນການຕໍ່ໜ້າ. ຈາກນັ້ນ ພວກເຮົາຈະໄດ້ພ້ອມກັນຄົ້ນຄວ້າ ປະກອບຄໍາເຫັນປຶກສາຫາລືກັນ ກ່ຽວກັບ ບັນດາຫົວຂໍ້ດັ່ງກ່າວ ໂດຍສະເພາະ ການຜະລິດ, ການປຸງແຕ່ງ, ການສົ່ງອອກມັນຕົ້ນ ເຊິ່ງ ເຫັນໄດ້ວ່າ​ ນັບແຕ່ປີ 2021​ ເປັນຕົ້ນມາ,​ ການຜະລິດມັນຕົ້ນແມ່ນມີການຂະຫຍາຍຕົວຢ່າງກວ້າງຂວາງ ແລະ ໄວວາ, ບັນດາໂຮງງານປຸງແຕ່ງແປ້ງມັນຕົ້ນ ກໍໄດ້ເພີ່ມຂຶ້ນ, ມູນຄ່າການສົ່ງອອກມັນຕົ້ນ ກໍມີການເພີ່ມຂື້ນສູງ ທັງໃນຮູບແບບແປ້ງມັນຕົ້ນ, ມັນຕົ້ນແຫ້ງ ແລະ ມັນຕົ້ນດິບ.

ທ່ານຮອງນາຍົກລັດຖະມົນຕີ ກ່າວຕື່ມອີກວ່າ: ໂດຍລວມແລ້ວ ສະພາບການຜະລິດ ແລະ ສົ່ງອອກ ມັນຕົ້ນ ມີທັງດ້ານດີທີ່ເປັນທ່າແຮງ ແລະ ມີທັງບັນຫາຂໍ້ຫຍຸ້ງຍາກທີ່ເປັນສິ່ງທ້າທາຍ ທີ່ພວກເຮົາຈະຕ້ອງໄດ້ຮ່ວມກັນຄົ້ນຄວ້າປຶກສາຫາລື ເພື່ອເສີມຂະຫຍາຍດ້ານດີທີ່ເປັນທ່າແຮງ ແລະ ແກ້ໄຂບັນຫາຂໍ້ຫຍຸ້ງຍາກທີ່ເປັນສິ່ງທ້າທາຍ ໃຫ້ຕົກໄປເທື່ອລະກ້າວ, ຂ້າພະເຈົ້າ ຂໍຮຽກຮ້ອງໃຫ້ບັນດາຜູ້ແທນກອງປະຊຸມທຸກໆທ່ານ ໂດຍສະເພາະບັນດາຂະແໜງການທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ຕ້ອງໄດ້ ວິເຄາະ ວິໄຈ ຖອດຖອນແລກປ່ຽນ ບົດຮຽນ ຜົນສໍາເລັດທີ່ຜ່ານມາ ແລະ ຍົກໃຫ້ເຫັນ ບັນຫາທີ່ພົບພໍ້, ພ້ອມທັງ ນໍາສະເໜີວິທີການແກ້ໄຂບັນຫາໃນຕໍ່ໜ້າ ໃຫ້ຊັດເຈນ ແລະ ສອດຄ່ອງກັບການສະພາບຕົວຈິງ ໃນປັດຈຸບັນ ເພື່ອຮັບປະກັນ ໃຫ້ການຊຸກຍູ້ສົ່ງເສີມການຜະລິດ ແລະ ສົ່ງອອກ ມັນຕົ້ນ ມີຄວາມຍືນຍົງ.

ຕໍ່ມາ, ທ່ານ ປອ.ລິນຄໍາ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄມ້ ກໍໄດ້ນໍາສະເໜີນະໂຍບາຍການຊຸກຍູ້, ສົ່ງເສີມການຜະລິດ, ປຸງແຕ່ງ ແລະ ການສົ່ງອອກມັນຕົ້ນ.​ ພ້ອມນີ້​ ທ່ານ ມະໄລທອງ ກົມມະສິດ​ລັດຖະມົນຕີກະຊວງອຸດສາຫະກຳ ແລະ ການຄ້າ ກໍໄດ້ປະກອບຄໍາເຫັນກ່ຽວກັບການຄຸ້ມຄອງ ແລະ ພັດທະນາອຸດສາຫະກຳມັນຕົ້ນ; ທ່ານ ສົມບູນ ເຮືອງວົງສາ​ ຮອງເຈົ້າແຂວງຈຳປາສັກ ກໍໄດ້ລາຍງານກ່ຽວກັບການແກ້ໄຂບັນຫາຝຸ່ນລະອອງຈາກການຄ່ຽນຖ່າຍມັນຕົ້ນ; ການນໍາກົມທີ່ກ່ຽວຂ້ອງຂອງກະຊວງກະສິກຳ ແລະ ປ່າໄມ້​ ໄດ້ລາຍງານກ່ຽວກັບການຄຸ້ມຄອງໂຮງງານແປ້ງ,​ ການສົ່ງອອກມັນຕົ້ນ ແລະ ການເຈລະຈາສົ່ງອອກມັນຕົ້ນ,​ ລະບົບຕິດຕາມການນໍາເຂົ້າ​ - ສົ່ງອອກ ສິນຄ້າກະສິກຳ.​

ຈາກນັ້ນ,​ ພາກລັດ ແລະ ທຸລະກິດທີ່ກ່ຽວຂ້ອງທີ່ເຂົ້ານ່ວມກອງປະຊຸມ ກໍໄດ້ປະກອບຄໍາເຫັນປຶກສາຫາລືການຄົ້ນຄວ້າກ່ຽວກັບແນວພັນ ແລະ ເຕັກນິກການປູກ ມັນຕົ້ນ ເພື່ອຄວາມຍືນຍົງ,​ ຄົ້ນຄວ້າການປ່ຽນແປງລາຄາມັນຕົ້ນລາວ ລະດຸເກັບກ່ຽວປີ 2024.​ ນອກນັ້ນ,​ ຜູ້ປະກອບການ​ ກໍໄດ້ມີຄໍາເຫັນກ່ຽວກັບວຽກງານການປູກ, ການເກັບຊື້, ການປຸງແຕ່ງ ແລະ ການສົ່ງ ອອກມັນຕົ້ນ,​ ວຽກງານສົ່ງເສີມໂຮງງານແປ້ງມັນຕົ້ນ​ ພ້ອມ​ທັງສະເໜີທິດທາງໃນການຫຼຸດຜ່ອນຂັ້ນຕອນໃນການສົ່ງອອກ ສິນຄ້າກະສິກຳ.​ ໃນວັນດຽວກັນ ກໍມີກອງປະຊຸມວິສາມັນຄະນະກໍາມະການອໍານວຍຄວາມ ສະດວກທາງດ້ານການຄ້າ ແລະ ການຂົນສົ່ງ ເພື່ອປຶກສາຫາລືແກ້ໄຂບັນຫາການສົ່ງອອກສິນຄ້າ ກະສິກຳ​ ຕື່ມອີກ.

ຂ່າວ​-ພາບ​: ທູນທອງໃຈ​ 

• 06/03/2025