ເສດຖະກິດເມືອງຊຳໃຕ້ ຂະຫຍາຍຕົວຢູ່ໃນລະດັບ 3,92 % ຕໍ່ປີ

ທ່ານ ຈິດທະວີ ຕົງຫວ່າງ ຄະນະປະຈຳພັກເມືອງ, ຮອງເຈົ້າເມືອງຊຳໃຕ້ ລາຍງານຕໍ່ກອງປະຊຸມໃຫຍ່ອົງຄະນະພັກເມືອງຊຳໃຕ້ ຄັ້ງທີ XII ທີ່ໄຂຂຶ້ນໃນຕອນເຊົ້າຂອງວັນທີ 4 ມີນາ 2025 ນີ້ ໃຫ້ຮູ້ວ່າ: ໃນໄລຍະ 5 ປີຜ່ານມາ (2020-2024) ເມືອງຊຳໃຕ້ ແຂວງຫົວພັນ ໄດ້ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງຕາມ 6 ເປົ້າໝາຍຄື: ການພັດທະນາເສດຖະກິດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ; ການພັດທະນາຊັບພະຍາກອນມະນຸດມີຄຸນນະພາບສູງຂຶ້ນ ສາມາດຕອບສະໜອງຄວາມຕ້ອງການຂອງການພັດທະນາ,ມີຄວາມສາມາດຄົ້ນຄວ້າ ແລະ ນຳໃຊ້ວິທະຍາສາດ-ເຕັກໂນໂລຊີ ເພື່ອຍົກສູງປະສິດທິພາບ ແລະ ສ້າງມູນຄ່າເພີ່ມການຜະລິດ ແລະ ການບໍລິການ; ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ ໄດ້ຮັບການຍົກລະດັບໃຫ້ດີຂຶ້ນເທື່ອລະກ້າວ; ປົກປັກຮັກສາສິ່ງແວດລ້ອມໃຫ້ມີຄວາມສົມດຸນ ແລະ ຫຼຸດຜ່ອນຄວາມສ່ຽງຈາກໄພພິບັດຕ່າງໆ; ການຄຸ້ມຄອງ-ບໍລິຫານລັດມີປະສິດທິພາບ, ສັງຄົມມີຄວາມສະເໝີພາບຍຸຕິທຳແລະໄດ້ຮັບການປົກປ້ອງຕາມທິດການປົກຄອງດ້ວຍກົດໝາຍທີ່ສັກສິດ - ເຂັ້ມງວດ ແລະ ການສ້າງໂຄງລ່າງພື້ນຖານທີ່ມີຄວາມເຂັ້ມແຂງ, ນໍາໃຊ້ທ່າແຮງ, ກາລະໂອກາດທີ່ຕັ້ງ, ເຂົ້າຮ່ວມຂະບວນການຮ່ວມມື ແລະ ການເຊື່ອມໂຍງກັບພາກພື້ນ ແລະ ສາກົນຢ່າງເປັນເຈົ້າການ.

ຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເຫັນວ່າ: ລວມຍອດລາຍຮັບຜະລິດຕະພັນພາຍໃນ(GDP)ບັນລຸ 1,617 ຕື້ກວ່າກີບ, ທຽບໃສ່ແຜນປະຕິບັດໄດ້ 93,87%, ໃນນີ້: ປີ 2024 ລາຍຮັບສະເລ່ຍບັນລຸ 8,5 ລ້ານກີບຕໍ່ຄົນຕໍ່ປີ ດ້ວຍອັດຕາການຂະຫຍາຍຕົວ 3,92%, ໂຄງປະກອບເສດຖະກິດມີການຫັນປ່ຽນດັ່ງນີ້: ຂະແໜງກະສິກຳ ແລະ ປ່າໄມ້ ກວມເອົາ 74,79 % ຂອງGDP, ຂະແໜງອຸດສາຫະກໍາກວມເອົາ 12 % ຂອງ GDP ແລະ ຂະແໜງບໍລິການກວມເອົາ 13,21% ຂອງ GDP. ໃນນີ້, ຂະແໜງກະສິກໍາ ແລະ ປ່າໄມ້: ທົ່ວເມືອງມີເນື້ອທີ່ປູກຝັງ 6,621 ເຮັກຕາ, ເກັບກ່ຽວຜົນຜະລິດລວມໄດ້ 159,446 ໂຕນ, ທຽບໃສ່ແຜນປະຕິບັດໄດ້ 91,08%, ໃນນັ້ນ ມີເນື້ອທີ່ປຸກເຂົ້າ 3,237 ເຮັກຕາ ເກັບກ່ຽວຜົນຜະລິດໄດ້ 65,770 ໂຕນ, ທຽບໃສ່ແຜນປະຕິບັດໄດ້ 89%, ມີເນື້ອທີ່ປູກພືດທັງໝົດ 3,384 ເຮັກຕາ, ເກັບກ່ຽວຜົນຜະລິດລວມໄດ້ 93,675 ໂຕນ, ທຽບໃສ່ແຜນປະຕິບັດໄດ້ 92,39%. ສິ່ງທີ່ພົ້ນເດັ່ນແມ່ນການປູກກາເຟຂອງປະຊາຊົນບ້ານນາຫຼ້າ, ບ້ານຜາເຜີ້ງ, ບ້ານນາສີຄໍາໄຊ, ບ້ານຖໍ້າຈົກ ແລະ ບ້ານນາຮຽງ ສາມາດສ້າງລາຍຮັບໄດ້ 3,4 ຕື້ກີບ. ການລ້ຽງສັດ: ມີງົວ 33,379 ໂຕ, ທຽບໃສ່ແຜນລື່ນຄາດໝາຍ 23%, ຄວາຍ 12,890 ໂຕ, ທຽບໃສ່ແຜນລື່ນຄາດໝາຍ 56%, ມີແບ້ 5,601 ໂຕ, ທຽບໃສ່ແຜນລື່ນຄາດໝາຍ 130,59%, ມີໝູ 20,222 ໂຕ, ທຽບໃສ່ແຜນປະຕິບັດໄດ້ 46,38%, ສັດປີກ 217,202 ໂຕ, ທຽບໃສ່ແຜນປະຕິບັດໄດ້ 56,23%. ວຽກງານອຸດສາຫະກຳ: ການຜະລິດອຸດສາຫະກໍາປຸງແຕ່ງ ແລະ ຫັດຖະກຳບັນລຸ 52,2 ຕື້ກີບ, ທຽບໃສ່ແຜນປະຕິບັດໄດ້ 65,71%, ໃນນີ້: ອຸດສາຫະກໍາບັນລຸ 10,4 ຕື້ກີບ, ຫັດຖະກໍາບັນລຸ 41,7 ຕື້ກີບ, ມູນຄ່າສົ່ງອອກສິນຄ້າບັນລຸ 20,1 ຕື້ກີບ, ທຽບໃສ່ແຜນປະຕິບັດໄດ້ 40,18%, ມູນຄ່ານໍາເຂົ້າສິນຄ້າບັນລຸ 7,1 ຕື້ກິບ, ທຽບໃສ່ແຜນປະຕິບັດໄດ້ 19,32%.
ນອກຈາກນີ້, ຄະນະພັກ, ອຳນາດການປົກຄອງເມືອງ ຍັງໄດ້ຊຸກຍູ້, ຕິດຕາມການຈັດຕັ້ງປະຕິບັດການກໍ່ສ້າງເຂື່ອນໄຟຟ້າເຊັ່ນ: ນໍ້າຊໍາ 1A ມາຮອດປະຈຸບັນສໍາເລັດ 97,5%, ການກໍ່ສ້າງເຂື່ອນໄຟຟ້ານໍ້າຊໍາ 3 ສໍາເລັດ 100% ແລະ ກຳລັງກໍ່ສ້າງເຂື່ອນໄຟຟ້ານໍ້າຊຳ 3A; ການຜະລິດແຮ່ເຫຼັກໄດ້ 75 ພັນໂຕນ, ແຮ່ຫາຍາກໄດ້ 1,640 ໂຕນ, ຫີນມະໂບໄດ້ 360 ແມັດກ້ອນ ແລະ ຫີນກໍ່ສ້າງໄດ້ 2,700 ແມັດກ້ອນ, ທຽບໃສ່ແຜນປະຕິບັດໄດ້ 68.18%; ມູນຄ່າເກັບຊື້ສິນຄ້າບັນລຸ 105 ຕື້ກີບ, ທຽບໃສ່ແຜນລື່ນຄາດໝາຍ 92,6 ຕື້ກີບ, ມູນຄ່າຈໍລະຈອນສິນຄ້າຂາຍຍ່ອຍບັນລຸ 307,3 ຕື້ກີບ, ທຽບໃສ່ແຜນປະຕິບັດໄດ້ 56,26%, ມູນຄ່າຂາຍຍົກບັນລຸ 176,3 ຕື້ກີບ, ທຽບໃສ່ແຜນປະຕິບັດໄດ້ 69,72%; ວຽກງານນໍ້າປະປາ ຜະລິດນໍ້າໄດ້ 1,126,158 ແມັດກ້ອນ, ທຽບໃສ່ແຜນປະຕິບັດໄດ້ 99,64%,ຈໍາໜ່າຍນ້ຳໄດ້ 782,808 ແມັດກ້ອນ, ທຽບໃສ່ແຜນປະຕິບັດໄດ້ 75,93%; ບໍລິການດ້ານການທ່ອງທ່ຽວ ມີນັກທ່ອງທ່ຽວເຂົ້າມາເມືອງຊຳໃຕ້ 8.398 ເທື່ອຄົນ, ທຽບໃສ່ແຜນປະຕິບັດໄດ້ 52,48%, ສາມາດສ້າງລາຍຮັບໄດ້ 1,67 ຕື້ກີບ; ບໍລິການຂົນສົ່ງໂດຍສານທາງບົກ ປະຕິບັດໄດ້ 28,075 ເທື່ອຄົນ, ທຽບໃສ່ແຜນປະຕິບັດໄດ້ 39,48% ສ້າງລາຍຮັບໄດ້ 3,2 ຕື້ກີບ.
ພ້ອມນີ້, ເມືອງຊຳໃຕ້ ສາມາດເກັບລາຍຮັບເຂົ້າງົບປະມານໄດ້ 16 ຕື້ກີບ (ບໍ່ລວມບ້ວງຂອງແຂວງດຸ່ນດຽງໃຫ້), ທຽບໃສ່ແຜນລື່ນຄາດໝາຍ 46,94%, ລາຍຈ່າຍງົບປະມານປະຕິບັດໄດ້ 154,8 ຕື້ກີບ, ທຽບໃສ່ແຜນປະຕິບັດໄດ້ 79,72%, ຂາດດູນງົບປະມານ 138,7 ຕື້ກີບ, ສະເລ່ຍໃນແຕ່ລະປີຍັງ ຂາດດູນ 27,7 ຕື້ກີບ. ທົ່ວເມືອງມີການລົງທຶນຂອງລັດ 60 ໂຄງການ ມີມູນຄ່າທັງໝົດ 621,7 ຕື້ກີບ, ທຽບໃສ່ແຜນປະຕິບັດ ໄດ້ລື່ນຄາດໝາຍ 488,2 ຕື້ກີບ, ທຶນຊ່ວຍເຫຼືອທາງການເພື່ອການພັດທະນາ (ODA): ມີ 13 ໂຄງການ ເປັນມູນຄ່າ 61,8 ຕື້ກີບ ທຽບໃສແຜນປະຕິບັດໄດ້ 16,31%; ການລົງທຶນຂອງເອກະຊົນພາຍໃນ ແລະ ຕ່າງປະເທດ: ມີ 50 ໂຄງການ ເປັນມູນຄ່າ 520,9 ລ້ານໂລດາ, ທຽບໃສ່ແຜນລື່ນຄາດໝາຍ 432,8 ລ້ານໂລດາ. ວຽກງານທະນາຄານ: ທັງ 3 ທະນາຄານລະດົມເງິນຝາກໄດ້ 159,7 ຕື້ກີບ, ທຽບໃສ່ແຜນລື່ນຄາດໝາຍ 6,71%, ປ່ອຍສີນເຊື່ອໄດ້ 82,2 ຕື້ກີບ, ທຽບໃສ່ແຜນປະຕິບັດໄດ້ 62,30%.
ສຳລັບທິດທາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2025-2029). ທ່ານ ຈິດທະວີ ຕົງຫວ່າງ ຄະນະປະຈຳພັກເມືອງ, ຮອງເຈົ້າເມືອງຊຳໃຕ້ ກ່າວວ່າ: ເປັນແຜນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XII ຂອງອົງຄະນະພັກເມືອງ ແລະ ວິໄສທັດຮອດ 2030 ຂອງແຂວງ ໂດຍເລັ່ງໃສ່ 3 ທ່າແຮງຄື: ທ່າແຮງດ້ານການປູກຝັງ-ລ້ຽງສັດ, ທ່າແຮງດ້ານຫັດຖະກໍາຕ່ຳຫູກ-ທໍ່ໄໝ ແລະ ທ່າແຮງດ້ານການບໍລິການ - ການທ່ອງທ່ຽວ. ໂດຍຈະສູ້ຊົນໃຫ້ລວມຍອດລາຍຮັບຜະລິດຕະພັນພາຍໃນ ໃຫ້ບັນລຸ 2,024 ຕື້ກີບ, ຮອດປີ 2029 ລາຍຮັບສະເລ່ຍຕໍ່ຄົນໃຫ້ບັນລຸ 10 ລ້ານກີບຕໍ່ຄົນຕໍ່ປີ ດ້ວຍອັດຕາການຂະຫຍາຍຕົວ 3,86% ໂຄງປະກອບເສດຖະກິດມີການຫັນ ປ່ຽນເປັນຕົ້ນ: ຂະແໜງກະສິກຳ ແລະ ປ່າໄມ້ກວມເອົາ 72,48% ຂອງ GDP, ຂະແໜງອຸດສາຫະກໍາກວມເອົາ 13,23% ຂອງ GDP, ຂະແໜງບໍລິການກວມເອົາ 14,29% ຂອງ GDP.

ຂ່າວ-ພາບ: ໄອແກ້ວ

แชร์