ວັນສ້າງຕັ້ງພັກ ປປ ລາວ ເປັນວັນທີ່ມີຄວາມໝາຍສຳຄັນທາງປະຫວັດສາດຂອງຊາດ

ເນື່ອງໃນໂອກາດວັນສ້າງຕັ້ງພັກ ປະຊາຊົນ ປະຕິວັດລາວ (ພັກ ປປ ລາວ) ຄົບຮອບ 70 ປີ (22 ມີນາ 1955-22 ມີນາ 2025), ທ່ານ ສີໄຄ້ ລຽງສະຫວັດ ຮອງຫົວໜ້າພະແນກການເງິນແຂວງເຊກອງ ໄດ້ສະແດງທັດສະນະຕໍ່ວັນດັ່ງກ່າວ ກັບນັກຂ່າວແຂວງ ໃນວັນທີ 4 ມີນາ 2025 ນີ້ ວ່າ: ວັນສ້າງຕັ້ງພັກ ປປ ລາວ ເປັນວັນທີ່ມີຄວາມໝາຍສໍາຄັນທາງປະຫວັດ ສາດຂອງຊາດ, ແມ່ນວັນແຫ່ງໄຊຊະນະຂອງປວງຊົນລາວບັນດາເຜົ່າ. ຂ້າພະເຈົ້າໃນນາມ ທີ່ເປັນສະມາຊິກພັກຜູ້ໜຶ່ງມີຄວາມດີໃຈ ແລະ ພາກພູມໃຈທີ່ສຸດ ທີ່ເຫັນໄດ້ພາຍໃຕ້ການນຳພາ-ຊີ້ນໍາ ຂອງພັກຕະຫລອດ 70 ປີຜ່ານມາ ເຮັດໃຫ້ປະເທດຊາດ, ບ້ານເມືອງມີຄວາມສະຫງົບ ແລະ ໄດ້ຮັບການພັດທະນາຂຶ້ນເລື້ອຍໆຢ່າງບໍ່ຢຸດຢັ້ງ.

ທ່ານ ສີໄຄ້ ລຽງສະຫວັດ ກ່າວຕື່ມວ່າ: ພັກ ປປ ລາວ ແມ່ນກອງນໍາໜ້າທີ່ມີການຈັດຕັ້ງ ການເມືອງສູງສຸດຂອງຊົນຊັ້ນກໍາມະກອນ ແລະ ຂອງລະບອບປະຊາທິປະໄຕປະຊາຊົນລາວ, ເປັນຕົວແທນທີ່ຈົ່ງຮັກພັກດີຢ່າງສະເໝີຕົ້ນສະເໝີປາຍ ຕໍ່ສິດ ແລະ ຜົນປະໂຫຍດ ຂອງຊົນຊັ້ນກໍາມະກອນ-ຊາວຜູ້ອອກແຮງງານລາວບັນດາເຜົ່າ. ພັກ ປປ ລາວ ໄດ້ຮັບການສ້າງຕັ້ງຂຶ້ນ ໃນວັນທີ 22 ມີນາ 1955 ທີ່ບ້ານນາແມວ ເມືອງວຽງໄຊ ແຂວງຫົວພັນ ໂດຍແມ່ນປະທານ ໄກສອນ ພົມວິຫານ ເປັນຫລັກແຫລ່ງນໍາພາກໍ່ຕັ້ງ, ຖະນຸບໍາລຸງ, ຝຶກຝົນຫລໍ່ຫລອມ, ກໍ່ສ້າງ ແລະ ປັບປຸງໃຫ້ເຕີບໃຫຍ່ເຂັ້ມແຂງ. ພັກ ປປ ລາວ ໄດ້ກໍາເນີດເກີດຂຶ້ນຈາກຊົນຊັ້ນກຳມະກອນ ແລະ ຊາວຜູ້ອອກແຮງງານ ໂດຍປະຊາຊົນ ແລະ ເພື່ອຜົນປະໂຫຍດ ຂອງປະຊາຊົນຢ່າງແທ້ຈິງ ໂດຍສະເພາະອີງໃສ່ການຫັນປ່ຽນໃໝ່ໃຫ້ແທດເໝາະກັບຄວາມເປັນຈິງ ໃນແຕ່ລະໄລຍະຂອງພັກ; ຄະນະພັກ-ຄະນະນໍາພະແນກການເງິນແຂວງເຊກອງ ກໍໄດ້ຫັນເອົາແນວທາງນະໂຍບາຍ ຂອງພັກ ມາເປັນແບບແຜນ, ແຜນງານ, ໂຄງການ ແລະ ແຜນການ ຕິດພັນກັບການເຄື່ອນໄຫວວຽກງານວິຊາສະເພາະ ຂອງຂະແໜງການຕົນ ເພື່ອນຳພາສະມາຊິກພັກ, ພະນັກງານ-ລັດຖະກອນ ຈັດຕັ້ງປະຕິບັດໃຫ້ໄດ້ທົ່ວເຖິງ ແລະ ປະກົດຜົນເປັນຈິງ.

ສຳລັບພະແນກການເງິນແຂວງເຊກອງ ໃນໄລຍະ 1 ປີ (2024) ຜ່ານມາ, ສາມາດປະຕິບັດວຽກງານ ຂອງຕົນຮັບຜິດຊອບໄດ້ສຳເລັດຜົນ ເປັນຕົ້ນ, ການຈັດເກັບລາຍຮັບ ແລະ ຄຸ້ມຄອງລາຍຈ່າຍງົບປະມານ, ການຈັດຕັ້ງປະຕິບັດດໍາລັດ 599/ລບ, 0393/ກງ ແລະ ການຄຸ້ມຄອງແຮ່ທາດ ນັບມື້ມີປະສິດທິພາບ ແລະ ປະສິດທິຜົນສູງ. ອັນພົ້ນເດັ່ນ ແມ່ນການເກັບລາຍຮັບເຂົ້າງົບປະມານ ສາມາດປະຕິບັດໄດ້ 632,48 ຕື້ກີບ ທຽບໃສ່ແຜນປີເທົ່າກັບ 211,56% ທຽບໃສ່ປີ 2023 ເພີ່ມຂຶ້ນ 110,24% ແລະ ລາຍຈ່າຍງົບປະມານປະຕິບັດໄດ້ 451,63 ຕື້ກີບ ທຽບໃສ່ແຜນປີເທົ່າກັບ 99,28% ທຽບໃສ່ປີ 2023 ເພີ່ມຂຶ້ນ 6,39% ປະກອບສ່ວນເຂົ້າໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ກໍຄື ຊ່ວຍລັດຖະບານແກ້ໄຂບັນຫາເຄັ່ງຮ້ອນ. ສໍາລັບທິດທາງໃນປີ 2025 ຈະສືບນໍາພາ-ຊີ້ນໍາການຈັດຕັ້ງປະຕິບັດແຜນງົບປະມານແຫ່ງລັດ ໃຫ້ບັນລຸຕາມຄາດໝາຍແຜນການ ແລະ ແຜນພັດທະນາເສດຖະກິດ-ສັງຄົມ ຂອງແຂວງໃຫ້ປະກົດຜົນເປັນຈິງ ໂດຍກ້າວຂຶ້ນເປັນແຂວງກຸ້ມຕົນເອງ ດ້ານການເງິນ.

ໃນໂອກາດວັນສ້າງຕັ້ງພັກ ປປ ລາວ ຄົບຮອບ 70 ປີ, ທ່ານ ສີໄຄ້ ລຽງສະຫວັດ ຍັງໄດ້ຄວາມຂອບໃຈ, ຮູ້ບຸນຄຸນ ແລະ ອວຍພອນໄຊອັນປະເສີດໃຫ້ການນຳພັກ-ລັດທຸກຂັ້ນ ຈົ່ງມີສຸຂະພາບເຂັ້ມແຂງ, ພະລານາໄມສົມບູນ, ສືບຕໍ່ນໍາພາ-ຊີ້ນໍາພັດທະນາປະເທດຊາດ ໃຫ້ຮັ່ງມີເຂັ້ມແຂງ ແລະກ້າວຂຶ້ນສັງຄົມນິຍົມ.
ພັກປະຊາຊົນ ປະຕິວັດລາວ ທີ່ມີກຽດສະຫງ່າ ໝັ້ນຍືນ !
.
ໂດຍ: ສັນຍາ ແກ້ວໄຊຍະວົງ

แชร์