ອາຊຽນ ຫາລືຍົກລະດັບພັດທະນາເສດຖະກິດພາກພື້ນສາກົນ

ກອງປະຊຸມລັດຖະມົນຕີເສດຖະກິດອາຊຽນ ແບບວົງແຄບ ຄັ້ງທີ 31 ຈັດຂຶ້ນທີ່ ເມືອງຈໍຮໍ, ເດຊາຣູ, ປະເທດມາເລເຊຍ ສາຫາລືກ່ຽວກັບການເຈລະຈາເພື່ອຍົກລະດັບສັນຍາການຄ້າດ້ານສິນຄ້າອາຊຽນ ພັດທະນາເສດຖະກິດໃນພາກພື້ນ ແລະສາກົນ.

ກອງປະຊຸມດັ່ງກ່າວ ຈັດຂຶ້ນພາຍໃຕ້ການເປັນປະທານກອງປະຊຸມຂອງມາເລເຊຍ ໃນຖານະເປັນປະເທດເຈົ້າພາບ ແລະ ປະທານອາຊຽນ ປີ 2025 ພ້ອມມີ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະການຄ້າ, ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ ແລະບັນດາລັດຖະມົນຕີຈາກບັນດາປະເທດສະມາຊິກອາຊຽນເຂົ້າຮ່ວມ.

ຕາມການລາຍງານຂອງ ກົມເຈລະຈາການຄ້າ ແລະຮ່ວມມືເສດຖະກິດສາກົນ, ກະຊວງອຸດສາຫະກໍາ ແລະການຄ້າ, ບັນດາລັດຖະມົນຕີເສດຖະກິດ ອາຊຽນ ໄດ້ຮັບຮອງເອົາ 2 ແຜນວຽກບຸລິມະສິດດ້ານເສດຖະກິດທີ່ຍັງຄ້າງສຳລັບປີ 2024, ຍັງໄດ້ມີການຮັບຮອງເອົາ 9 ແຜນວຽກບູລິມະສິດດ້ານເສດຖະກິດອາຊຽນ (Priority of Economic Deliverables) ຊື່ງຢູ່ພາຍໃຕ້ການຊີ້ນໍາຂອງລັດຖະມົນຕີເສດຖະກິດອາຊຽນໃນໄລະຍະການເປັນປະທານອາຊຽນຂອງມາ ເລເຊຍ ປີ 2025.

ກອງປະຊຸມຍັງໄດ້ປຶກສາຫາລື ກ່ຽວກັບການເຈລະຈາເພື່ອຍົກລະດັບສັນຍາການຄ້າດ້ານສິນຄ້າອາຊຽນ ເຊີ່ງປະຈຸບັນສາມາດສຳເລັດການເຈລະຈາໄດ້ 89%, ຄາດວ່າຈະໃຫ້ສາມາດສະຫຼຸບການເຈລະຈາເນື້ອໃນສັນຍາໄດ້ ໃນທ້າຍປີ 2025 ນີ້;

ກອງປະຊຸມ ໄດ້ປຶກສາຫາລື ກ່ຽວກັບສະພາບການພັດທະນາເສດຖະກິດໃນພາກພື້ນ ແລະສາກົນລວມທັງສະພາບຄວາມເຄັ່ງຮ້ອນທາງດ້ານພູມມິສາດການເມືອງ ໂດຍສະເພາະ ການຮັບມືກັບນະໂຍບາຍການຄ້າ ແລະ ພາສີ ຂອງ ສ. ອາເມລິກາ ພາຍໃຕ້ການນໍາພາຂອງລັດຖະບານຂອງປະທານາທິບໍດີ ໂດນັລ ທຣັມ ທີ່ໄດ້ສົ່ງຜົນກະທົບຕໍ່ພາກພຶ້ນອາຊຽນ ກໍຄືໃນໂລກໂດຍລວມ ແລະ ການກະກຽມຮັບເອົາ ຕິມໍແລ້ດເຕ້ ເຂົ້າເປັນສະມາຊິກຂອງອາຊຽນ.

ນອກຈາກນັ້ນ, ບັນດາລັດຖະມົນຕີເສດຖະກິດອາຊຽນຍັງໄດ້ປຶກສາຫາລືກ່ຽວກັບການຮ່ວມມືດ້ານເສດຖະກິດກັບພາຍນອກໂດຍສະເພາະການຮ່ວມມືການຄ້າໃນຂົງເຂດໃໝ່ກັບກຸ່ມອ່າວອາຣັບ (the Gulf Cooperation Council) ເຊີ່ງມີປະເທດສະມາຊິກທັງໝົດ 6 ປະເທດຄື: ບາເຣນ, ຄູເວດ, ໂອມານ, ກາຕາ, ຊາອຸດິ ອາຣາບີ ແລະ ສະຫະລັດອາຣັບ ເພື່ອແນໃສ່ການກະກຽມໃຫ້ແກ່ກອງປະຊຸມສຸດຍອດອາຊຽນ, ສປ ຈີນ ແລະ ອ່າວອາຣັບ ທີ່ຈະຈັດຂື້ນໃນໄລຍະກອງປະຊຸມສຸດຍອດອາຊຽນ ຄັ້ງທີ 46 ໃນເດືອນ ພຶດສະພາ 2025 ທີ່ມາເລເຊຍ ທີ່ຈະມາເຖິງນີ້.

ໃນໂອກາດນີ້, ທ່ານ ມະໄລທອງ ກົມມະສິດ, ຍັງໄດ້ມີການພົບປະສອງຝ່າຍກັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຄ້າສິງກະໂປ ແລະ ທ່ານ ລັດຖະມົນຕີກະຊວງການລົງທຶນ, ການຄ້າ ແລະ ອຸດສາຫະກຳ ມາເລເຊຍ ເພື່ອປຶກສາຫາລືກ່ຽວກັບການເພີ່ມທະວີການຮ່ວມມືສອງຝ່າຍ ໂດຍສະເພາະໂຄງການສາຍສົ່ງໄຟຟ້າອາຊຽນ, ພະລັງງານສະອາດ, ຕະຫຼາດກາກບອນ, ການສົ່ງເສີມຍົກລະດັບຂີດຄວາມສາມາດໃຫ້ພະນັກງານ, ກໍຄືການສະໜັບສະໜູນ ບັນດາແຜນວຽກບູລິມະສິດຂອງ ມາເລເຊຍ ໃນຖານະເປັນປະທານອາຊຽນ ປີ 2025 ໃຫ້ສາມາດສໍາເລັດໄດ້ຕາມຄາດໝາຍ.

แชร์