ໃນໄລຍະ 5 ປີຜ່ານມາການພັດທະນາເສດຖະກິດຂອງເມືອງຄູນຄໍາມີການຂະຫຍາຍຕົວສະເລັ່ຍຢູ່ໃນລະດັບ 4,6 %

ສະຫາຍ ວັນນະຫົງ ທໍາມະວົງສາ ຄະນະປະຈໍາພັກເມືອງຄູນຄໍາໄດ້ກ່າວຕໍ່ກອງປະຊຸມໃຫຍ່ຄັ້ງທີ III ຜູ້ແທນອົງຄະນະພັກເມືອງຄູນຄໍາໃນວັນທີ 04 ກຸມພາ 2025 ເຊິ່ງສະຫາຍໄດ້ກ່າວວ່າ : ເມືອງຄູນຄໍາຕັ້ງຢູ່ຫ່າງຈາກເທສະບານແຂວງຄໍາມ່ວນ ໄປທາງທິດຕາເວັນອອກສ່ຽງເໜືອ 150 Km ,ປະກອບມີ 22 ບ້ານ, ມີ 4 ເຂດພັດທະນາ, ມີ 5.071 ຫລັງຄາເຮືອນ, ມີ 5.618 ຄອບຄົວ, ມີປະຊາກອນ 25.729 ຄົນ, ຍິງ 12.917 ຄົນ, ປະກອບມີ 2 ຊົນເຜົ່າຄື: ເຜົ່າລາວກວມເອົາ 82,53% ແລະ ເຜົ່າໄຕກວມເອົາ 17,46% ຄວາມໜາແໜ້ນຂອງປະຊາກອນແມ່ນ 25 ຄົນ/ກິໂລຕາແມັດ, ອັດຕາການເຕີບໂຕຂອງພົນລະເມືອງ 2,07% / ປີ. ພ້ອມນັ້ນແມ່ນໄດ້ກໍານົດເອົາທ່າແຮງທີ່ເປັນພື້ນຖານໃນການພັດທະນາເສດຖະກິດ-ສັງຄົມຂອງເມືອງມີ 03 ທ່າແຮງຄື: ທ່າແຮງທາງດ້ານການຜະລິດກະສິກໍາ, ອຸດສາຫະກຳ ແລະ ການບໍລິການ-ການທ່ອງທ່ຽວ.

ໄລຍະຂອງການດໍາເນີນກອງປະຊຸມໃນພາກເຊົ້າແມ່ນໄດ້ມີການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຄັ້ງທີ II ແຕ່ປີ 2020-2024 ເຊິ່ງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 5 ປີຜ່ານມາ ເມືອງຄູນຄໍາໄດ້ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງຄໍາມ່ວນ ແລະ ມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກເມືອງຄູນຄໍາ ກໍ່ຄືການຈັດຕັ້ງຜັນຂະຫຍາຍທິດທາງ, ຄາດໝາຍສູ້ຊົນແຜນພັດທະນາເສດຖະກິດ-ສັງຄົມຂອງເມືອງ ເພື່ອເຮັດໃຫ້ການຜະລິດມີການຂະຫຍາຍຕົວຢ່າງຕໍ່ເນື່ອງ, ການລົງທຶນຂອງເອກະຊົນ ແລະ ປະຊາຊົນ ໄດ້ມີການເພີ່ມຂຶ້ນໃນແຕ່ລະປີ, ການຄຸ້ມຄອງງົບປະມານໄດ້ຫັນເຂົ້າສູ່ລະບຽບ, ກົດໝາຍ ເຊິ່ງໄດ້ເຮັດໃຫ້ເສດຖະກິດມີທ່າຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ສັງຄົມມີຄວາມສະຫງົບ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເທື່ອລະກ້າວ.

ໄປຄຽງຄູ່ກັບການຈັດຕັ້ງປະຕິບັດ ຍັງມີຂໍ້ສະດວກ ແລະ ສິ່ງທ້າທາຍໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງ ຍັງພົບກັບບັນຫາຫຍຸ້ງຍາກຫຼາຍດ້ານເປັນຕົ້ນ: ການປ່ຽນແປງຂອງສະພາບເສດຖະກິດລວມຂອງໂລກ, ພາກພື້ນ ກໍ່ຄືພາຍໃນປະເທດຂອງພວກເຮົາ, ຜົນກະທົບຈາກໄພທໍາມະຊາດ ນໍ້າຖ້ວມໜັກໃນຮອບ 10 ປີ ແລະ ການລະບາດຂອງພະຍາດໂຄວິດ 19 ເຊິ່ງເປັນຕົ້ນເຫດໃຫ້ແກ່ການຜະລິດ ແລະ ການສະໜອງທາງດ້ານງົບປະມານເຂົ້າໃນການຊຸກຍູ້ສົ່ງເສີມການພັດທະນາເສດຖະກິດ-ສັງຄົມຂອງເມືອງໃນໄລຍະປະຈຸບັນ.

ສໍາລັບຂໍ້ສະດວກເມືອງຄູນຄໍາເປັນເມືອງທີ່ອ້ອມຮອບດ້ວຍພູຜາສະລັບຊັບຊ້ອນ ມີເນື້ອທີ່ດິນອຸດົມສົມບູນເໝາະແກ່ການຜະລິດກະສິກໍາ, ມີແມ່ນໍ້າຫີນບູນ-ນໍ້າໄຮໄຫຼຜ່ານຕະຫຼອດປີ ເຊິ່ງເໝາະແກ່ການຜະລິດພະລັງງານໄຟຟ້າ, ມີແຮ່ເຫຼັກ ແລະ ມີແຫຼ່ງທ່ອງທ່ຽວທາງດ້ານປະຫວັດສາດ, ວັດທະນະທຳ ແລະ ທໍາມະຊາດ, ມີລະບົບຊົນລະປະທານ, ມີຖະໜົນຫົນທາງທຽວໄດ້ຕະຫຼອດປີ, ມີລະບົບໄຟຟ້າທົ່ວເຖິງທຸກບ້ານ, ປະຊາຊົນມີມູນເຊື້ອດຸໝັ່ນຂະຫຍັນພຽນ, ມີຫົວຄິດປະດິດສ້າງຮູ້ນຳໃຊ້ເຄື່ອງມືທີ່ທັນສະໄໝເຂົ້າໃສ່ການຜະລິດ.

ສໍາລັບສິ່ງທ້າທາຍ ແລະຂໍ້ຫຍຸ້ງຍາກຜ່ານການຈັດຕັ້ງປະຕິບັດຕາມຕົວຊີ້ວັດຂອງແຜນພັດທະນາເສດຖະກິດ-ສັງຄົມ ໃນໄລຍະແຕ່ປີ 2020 - 2024 ພວກເຮົາໄດ້ພົບກັບບັນຫາສິ່ງທ້າທາຍ, ຂໍ້ຫຍຸ້ງຍາກເຊິ່ງໄດ້ປະເຊີນກັບສະພາບເສດຖະກິດທີ່ຜັນແປ, ເປັນຕົ້ນແມ່ນ: ການປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ສະກຸນເງິນກີບອ່ອນຄ່າ, ການເພີ່ມຂຶ້ນຂອງລາຄານ້ຳມັນ ແລະ ສິນຄ້າອຸປະໂພກ-ບໍລິໂພກ, ໄພທໍາມະຊາດເກີດຂຶ້ນຕໍ່ເນື່ອງ, ການແຜ່ລະບາດຂອງພະຍາດໂຄວິດ 19 ໄດ້ສົ່ງຜົນກະທົບໃສ່ການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມຂອງເມືອງ ເຮັດໃຫ້ພົບກັບຄວາມຫຍຸ້ງຍາກ ຖ້າທຽບໃສ່ສະໄໝຜ່ານມາ. ພ້ອມນັ້ນຍັງໄດ້ຕີລາຄາການຈັດຕັ້ງປະຕິບັດວຽກງານຕາມ 6 ເປົ້າໝາຍ, 20 ແຜນວຽກຈຸດສຸມເປັນຕົ້ນແມ່ນເຮັດໃຫ້ເສດຖະກິດມະຫາພາກຂະຫຍາຍຕົວຢ່າງຕໍ່ເນື່ອງ, ມີຄວາມເຂັ້ມແຂງ ແລະ ໜັ້ນທ່ຽງ ; ຊັບພະຍາກອນມະນຸດມີຄຸນນະພາບ ແລະ ນໍາໃຊ້ເຕັກໂນໂລຊີທີ່ທັນສະໄຫມ ; ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການຍົກລະດັບດີຂຶ້ນ ; ການຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມໃຫ້ຍືນຍົງ, ຫຼຸດຜ່ອນຄວາມສ່ຽງຈາກໄພພິບັດທຳມະຊາດ ; ການຄຸ້ມຄອງ ແລະ ບໍລິຫານລັດມີປະສິດທິພາບ, ການເມືອງມີສະຖຽນລະພາບ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ; ການສ້າງພື້ນຖານໂຄງລ່າງທີ່ມີຄວາມເຂັ້ມແຂງ ແລະ ສົ່ງເສີມການຮ່ວມມື.

ສະຫາຍ ວັນນະຫົງ ທໍາມະວົງສາໄດ້ກ່າວຕື່ມວ່າ : ສໍາລັບທິດທາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ III ປີ 2025-2029 ຂອງເມືອງຄູນຄໍາແມ່ນສືບຕໍ່ຜັນຂະຫຍາຍວິໄສທັດພັດທະນາຂອງເມືອງຄູນຄຳເຖິງປີ 2030 ແລະ ຍຸດທະສາດການພັດທະນາເຖິງປີ 2029 ໃນນັ້ນໄດ້ກຳນົດວິໄສທັດຂອງເມືອງຄື: “ສ້າງເມືອງຄູນຄໍາໃຫ້ເປັນແຫຼ່ງພະລັງງານໄຟຟ້າ,ພັດທະນາກະສິກໍາເປັນສິນຄ້າ,ຄຸ້ມຄອງປ່າໄມ້ໃຫ້ຍືນຍົງ,ສົ່ງເສີມການທ່ອງທ່ຽວທໍາມະຊາດ ແລະວັດທະນະທໍາແບບອະນຸຮັກ” ສູ້ຊົນແກ້ໄຂຄວາມຫຍຸ້ງຍາກທາງດ້ານເສດຖະກິດເພື່ອເຮັດໃຫ້ການດໍາລົງຊີວິດຂອງປະຊາຊົນກັບຄືນສູ່ສະພາບປົກກະຕິ,ຮັບປະກັນບໍ່ໃຫ້ສະພາບເສດຖະກິດຕົກໃນສະພາບວິກິດການ ແລະ ຄາດຄະເນເສດຖະກິດຂະຫຍາຍຕົວໃນລະດັບ 5,7% ຂື້ນໄປ.

ໂດຍ: ແດງສະຫວັດ ແສນພານິດ

แชร์