ໜ່ວຍບໍລິການຜ່ານປະຕູດຽວ ເມືອງຫຼວງນໍ້າທາ ເກັບລາຍຮັບໄດ້ 350 ລ້ານກວ່າກີບ

ທ້າຍເດືອນ ກຸມພາ 2025 ຢູ່ທີ່ສະໂມສອນເມືອງຫຼວງນໍ້າທາ ແຂວງຫຼວງນໍ້າທາ ໄດ້ສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານການບໍລິການຜ່ານປະຕູດຽວປະຈຳປີ 2024ໂດຍການເປັນປະທານຂອງ ທ່ານ ບຸນຄົງ ພິມມະສອນ ເລຂາພັກເມືອງ ເຈົ້າເມືອງຫຼວງນໍ້າທາ, ມີກໍາມະການປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຮອງຫົວໜ້າຫ້ອງການ, ຄະນະພັກຮາກຖານກຸ່ມບ້ານ, ນາຍບ້ານ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ສີຈັນ ລໍທອງໂຫຼຍ ກໍາມະການປະຈໍາພັກເມືອງ ຫົວໜ້າຫ້ອງວ່າການເມືອງຫຼວງນໍ້າທາ ທັງເປັນຫົວໜ້າໜ່ວຍບໍລິການຜ່ານປະຕູດຽວ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານບໍລິການຜ່ານປະຕູດຽວ ປະຈໍາປີ 2024 ໃນໄລຍະໜຶ່ງປີຜ່ານມາ ໜ່ວຍບໍລິການຜ່ານປະຕູດຽວ ເມືອງຫຼວງນໍ້າທາ ໄດ້ເອົາໃຈໃສ່ເຄື່ອນໄຫວຕາມພາລະບົດບາດສິດ ແລະ ໜ້າທີ່ຂອງຕົນມີພະນັກງານປະຈໍາການ 12 ທ່ານ, ຍິງ 5 ທ່ານ ມີຈໍານວນ 10 ຫ້ອງການ ແລະ 31 ໜ້າວຽກ ໂດຍມີປະຊາຊົນ, ຫົວໜ່ວຍວິສາຫະກິດ ແລະ ນິຕິບຸກຄົນມາໃຊ້ບໍລິການຈໍານວນ 480 ສະບັບ ແລະ ໄດ້ເກັບຄ່າທໍານຽມ, ແບບພິມຄ່າບໍລິການ ລວມທັງໝົດ 354 ລ້ານກວ່າກີບ ໃນນັ້ນ, ເກັບຄ່າທໍານຽມໄດ້ 248 ລ້ານກວ່າກີບ, ສ່ວນຄ່າບໍລິການ ແລະແບບພິມໄດ້ຫັກ 25% ໃຫ້ໜ່ວຍບໍລິການຜ່ານປະຕູດຽວເປັນເງິນ 88 ລ້ານກວ່າກີບ ທິດທາງແຜນການປີ 2025 ຈະໄດ້ສືບຕໍ່ຈັດຕັ້ງປະຕິບັດວຽກງານບໍລິການຜ່ານປະຕູດຽວຕາມພາລະບົດບາດ ແລະ ບໍລິການຮັບໃຊ້ປະຊາຊົນ, ນັກທຸລະກິດທີ່ມາໃຊ້ບໍລິການໃຫ້ມີຄວາມຄ່ອງຕົວຕາມການກໍານົດເວລາມາຮັບເອກະສານ, ສືບຕໍ່ໂຄສະນາປະຊາສຳພັນໃຫ້ປະຊາຊົນ, ນັກທຸລະກິດທັງພາຍໃນ ແລະ ຕ່າງປະເທດທີ່ດໍາເດີນທຸລະກິດຢູ່ເມືອງຫຼວງນໍ້າທາຮັບຮູ້ພາລະບົດບາດຂອງໜ່ວຍບໍລິການຜ່ານປະຕູດຽວ ແລະ ມາໃຊ້ບໍລິການໃຫ້ຫຼາຍຂື້ນ.

ກອງປະຊຸມ ໄດ້ປະກອບຄໍາຄິດຄໍາເຫັນໃສ່ບົດສະຫຼຸບານຈັດຕັ້ງປະຕິບັດວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ກ່ຽວກັບ ການເກັບຄ່າທໍານຽມ ແລະ ຄ່າບໍລິການຕ່າງໆຂອງບັນດາຂະແໜງການທີ່ກ່ຽວຂ້ອງ ເພື່ອບໍລິການຮັບໃຊ້ສັງຄົມໃຫ້ມີຄວາມວ່ອງໄວ, ໂປ່ງໃສ, ຍຸດຕິທໍາ, ສາມາດກວດສອບໄດ້ ແລະ ພ້ອມກັນແກ້ໄຂບັນຫາຂໍ້ຄົງຄ້າງໃນໄລຍະຜ່ານມາໃຫ້ດີຂຶ້ນກວ່າເກົ່າ.
ຂ່າວ: ເມືອງຫຼວງນໍ້າທາ.

แชร์