ໄຂກອງປະຊຸມໃຫຍ່ຜູ້ແທນອົງຄະນະພັກເມືອງໄຊເສດຖາ

ກອງປະຊຸມໃຫຍ່ຜູ້ແທນອົງຄະນະພັກເມືອງໄຊເສດຖາ, ນະຄອນຫລວງວຽງຈັນ (ນວ) ຄັ້ງທີ VIII ຈັດຂຶ້ນວັນທີ 3-4 ມີນາ 2025 ຢູ່ສູນການຮ່ວມມືສາກົນ ແລະ ເຝີກອົບ ຮົມ (ICTC) ພາຍໃຕ້ຄໍາຂວັນ “ຍົກສູງບົດບາດການນໍາພາຂອງພັກໃຫ້ໜັກແໜ້ນ ເຂັ້ມແຂງຮອບດ້ານ ຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ຕິດພັນກັບການປະຕິບັດນະໂຍບາຍ 6 ສ ໃຫ້ປະກົດຜົນເປັນຈິງ” ໂດຍເປັນປະທານຂອງ ສະຫາຍ ນາງ ວິໄລວອນ ຈັນທະລາຕີ ເລຂາພັກເມືອງ, ເຈົ້າເມືອງໄຊເສດຖາ. ໂດຍມີ ສະຫາຍ ອານຸພາບ ຕຸນາລົມ ເລຂາທິການສູນກາງພັກ, ເລຂາຄະນະພັກ, ປະທານສະພາປະຊາຊົນ ນະຄອນຫລວງວຽງຈັນ(ນວ), ມີຄະນະຈັດຕັ້ງນະຄອນຫລວງວຽງ ຈັນ, ຜູ້ແທນສົມບູນ ແລະ ແຂກທີ່ຖືກເຊີນເຂົ້າຮ່ວມ.

ໂອກາດນີ້, ສະຫາຍ ນາງ ວິໄລວອນ ຈັນທະລາຕີ ໄດ້ຜ່ານຮ່າງລາຍງານການເມືອງທັງສອງພາກ ໂດຍໄດ້ຕີລາຄາໝາກຜົນແຫ່ງການຈັດຕັ້ງປະຕິບັດສະຕິກອງປະຊຸມໃຫຍ່ ຄັ້ງທີ VII ຂອງ ອົງຄະນະພັກເມືອງໄຊເສດຖາ ແຕ່ລະດ້ານໃນ 5 ປີຜ່ານເປັນຕົ້ນການພັດທະນາເສດຖະກິດ-ສັງຄົມ ຕິດພັນກັບການປະຕິບັດວາລະແຫ່ງຊາດ ເຖິງວ່າໄລຍະຜ່ານມາເມືອງໄຊເສດຖາ ຈະຜະເຊີນໜ້າກັບຄວາມຫຍຸ້ງຍາກ ເປັນຕົ້ນ ການລະບາດຂອງພະຍາດໂຄວິດ 19, ບັນຫາໄພເງິນເຟີ້ ແລະ ຄ່າຄອງຊີບເພີ່ມສູງ ຂຶ້ນ, ແຕ່ພາຍໃຕ້ການນຳພາ-ຊີ້ນຳຂອງ ອົງຄະນະພັກເມືອງໄຊເສດຖາ ກໍຄື ອົງການປົກຄອງ ນວ ເຮັດໃຫ້ເສດຖະກິດໂດຍລວມຂອງເມືອງ ຍັງສາມາດປະຄັບຄອງຕົວຢູ່ໃນສະພາບໝັ້ນທ່ຽງ ແລະ ຂະຫຍາຍຕົວຢ່າງຕໍ່ເນື່ອງ ສະເລ່ຍ ໃນ 5 ປີ 7,81%, ລວມຍອດຜະລິດຕະພັນພາຍໃນບັນລຸ 6.284,98 ຕື້ກີບເທົ່າກັບ 94,78% ຂອງແຜນການ, ລວມຍອດຜະລິດຕະພັນສະເລ່ຍຕໍ່ຫົວຄົນບັນລຸໄດ້ 50,58 ລ້ານກີບຕໍ່ຄົນຕໍ່ປີ ຫລື ເທົ່າກັບ 2.229 ໂດລາຕໍ່ຄົນຕໍ່ປີ; ການສ້າງພື້ນຖານເສດຖະກິດເປັນເຈົ້າຕົນເອງໂດຍການມີສ່ວນຮ່ວມຂອງທົ່ວສັງຄົມໂຄງປະກອບເສດຖະກິດພາຍໃນໄດ້ປ່ຽນແປງໄປຕາມກົນໄກເສດຖະກິດຕະຫລາດ; ໄດ້ຕັ້ງໜ້າຊຸກຍູ້ການຄຸ້ມຄອງພື້ນຖານລາຍຮັບຕາມຫລັກການລວມສູນງົບປະມານ ແລະ ຫັນການຈັດເກັບງົບປະມານຕາມທິດ 3 ສ້າງ, ປັບປຸງການເງິນຂັ້ນບ້ານໃຫ້ເຂັ້ມແຂງ, ສາມາດປະຕິບັດພາລະບົດບາດຢ່າງມີປະສິດທິ ຜົນ ສາມາດຂຸດຄົ້ນຈັດເກັບລາຍຮັບທັງໝົດ 412,02 ຕື້ກີບ ທຽບໃສ່ກອງປະຊຸມໃຫຍ່ຜ່ານມາ ເພີ່ມຂື້ນ 162,65 ຕື້ກີບ ແລະ ທຽບໃສ່ແຜນການ 5 ປີ ຄັ້ງທີ VII ປະຕິບັດໄດ້ 110,16%.

ກອງປະຊຸມຄັ້ງນີ້, ຍັງໄດ້ຮັບຟັງການຜ່ານຮ່າງລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຜ່ານມາ (2020-2024) ແລະ ແຜນພັດທະນາເສດຖະກິດ-ສັງຄົມ 5 ປີຕໍ່ໜ້າ(2025-2029), ຮັບຟັງການປະກອບຄໍາເຫັນໃສ່ບົດລາຍງານການເມືອງ ຈາກພາກສ່ວນຕ່າງໆ ເປັນຕົ້ນ ການນໍາພາປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ການນໍາພາພັດທະນາພື້ນຖານໂຄງລ່າງໂດຍການມີສ່ວນຮ່ວມຂອງປະຊາຊົນ, ການສ້າງຊັບພະຍາກອນມະນຸດທີ່ມີຄຸນນະພາບ ແລະ ການຊຸກຍູ້ສົ່ງເສີມຜະລິດຕະພັນປອດສານຜິດຂອງຄອບຄົວຕົວແບບ. ພ້ອມນີ້, ຍັງໄດ້ຜ່ານບົດສຳຫລວດນໍາພາລວມ, ຜ່ານມາດຖານເງື່ອນໄຂຂອງພະນັກງານຜູ້ລົງສະໝັກເລືອກຕັ້ງ ແລະໄດ້ດຳເນີນການປ່ອນບັດເລືອກຕັ້ງ ເອົາຄະນະບໍລິຫານງານພັກເມືອງໄຊເສດຖາ ຊຸດທີ VIII ແລະ ໃນຕອນທ້າຍກອງປະຊຸມ, ຍັງໄດ້ຮັບຟັງການໂອ້ລົມຂອງສະຫາຍ ເລຂາຄະນະບໍລິຫານງານພັກ ນວ ເພື່ອໃຫ້ທິດຊີ້ນໍາແກ່ຄະນະພັກຊຸດໃໝ່ຕື່ມອີກ.

ຂ່າວ: ວຽງຈັນໃໝ່ ພາບ: ເກດສະໜາ

แชร์