ຍົກຄວາມຮູ້ ວຽກງານມົນລະພິດທາງອາກາດ ແລະຜົນກະທົບຕໍ່ສຸຂະພາບ

ກະຊວງສາທາລະນະສຸກ ຮ່ວມກັບ ກະຊວງຊັບພະຍາກອນທຳມະຊາດ ແລະສິ່ງແວດລ້ອມ ໄດ້ຈັດກອງປະຊຸມໃຫ້ຂໍ້ມູນຂ່າວສານກ່ຽວກັບມົນລະພິດທາງອາກາດ ແລະ ຜົນກະທົບຕໍ່ສຸຂະພາບໃຫ້ແກ່ສື່ມວນຊົນ ເພື່ອສ້າງຈິດສໍານຶກແກ່ປະຊາຊົນໃນການຫຼຸດຜ່ອນແຫຼ່ງກໍາເນີດຂອງມົນລະພິດ ແລະ ເພື່ອສົ່ງເສີມສຸຂະພາບຂອງກຸ່ມທີ່ບອບບາງ ຂຶ້ນໃນວັນທີ 28 ກຸມພາຜ່ານມາ ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານນາງ ວຽງຂັນ ພິໄຊ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ,ທ່ານ ອຸລາພອນ ອ່ອງແກ້ວ ຮອງຫົວໜ້າສະຖາບັນຄົ້ນຄວ້າຊັບພະຍາກອນທໍາມະຊາດ ແລະສິ່ງແວດລ້ອມກະຊວງຊັບພະຍາກອນ ທໍາມະຊາດ ແລະ ສິ່ງແວດລ້ອມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ວຽງຂັນ ພິໄຊ ໄດ້ກ່າວວ່າ: ມົນລະພິດທາງອາກາດແມ່ນໜຶ່ງໃນຄວາມສ່ຽງດ້ານສິ່ງແວດລ້ອມທີ່ໃຫຍ່ທີ່ສຸດຕໍ່ສຸຂະພາບຂອງຄົນເຮົາ. ປັດຈຸບັນ, ສະພາບມົນລະພິດທາງອາກາດແມ່ນເລີ່ມຮ້າຍແຮງຂຶ້ນຊຶ່ງຄາດວ່າຈະສົ່ງຜົນກະທົບຕໍ່ສຸຂະພາບຂອງເຮົາຫຼາຍສົມຄວນ. ສະນັ້ນຈຶ່ງມີຄວາມຈໍາເປັນສໍາລັບທຸກຄົນໂດຍສະເພາະກຸ່ມທີ່ມີຄວາມສ່ຽງສູງຕ້ອງເຂົ້າໃຈເຖິງອັນຕະລາຍຈາກມົນລະພິດທາງອາກາດ ແລະ ປະຕິບັດມາດຕະການຕ່າງໆເພື່ອປ້ອງກັນຕົນເອງຈາກມົນລະພິດທາງອາກາດ ຊຶ່ງຜູ້ທີ່ມີຄວາມສ່ຽງສູງ ໂດຍສະເພາະ ເດັກນ້ອຍ, ຜູ້ສູງອາຍຸ, ແມ່ຍິງຖືພາ ແລະ ຜູ້ທີ່ມີພະຍາດລະບົບຫາຍໃຈ ເຊັ່ນ: ພະຍາດຫືດ ຫຼືຄົນທີ່ມີພະຍາດປະຈຳຕົວ ຈຳເປັນຕ້ອງໄດ້ລະມັດລະວັງເປັນພິເສດ ແລະ ຕິດຕາມຄ່າມາດຕະຖານມົນລະພິດທາງອາກາດເປັນປະຈຳ.

ທ່ານ ອຸລາພອນ ອ່ອງແກ້ວ ໄດ້ກ່າວວ່າ: ສິ່ງສໍາຄັນທີ່ສຸດທີ່ທຸກຄົນສາມາດປະຕິບັດໄດ້ແມ່ນການຫຼຸດຜ່ອນການສ້າງແຫຼ່ງກຳເນີດມົນລະພິດທາງອາກາດ ສໍາລັບຊາວກະສິກອນ ກໍຕ້ອງຫຼີກລ່ຽງການຈູດເຜົາສິ່ງເສດເຫຼືອທາງການກະເສດ ແລະ ພື້ນທີ່ກະສິກຳ ໂດຍຫັນເອົາສິ່ງເສດເຫຼືອມາກໍາຈັດດ້ວຍການເຮັດຝຸ່ນຊີວະພາບ. ສໍາລັບຜູ້ທີ່ອາໄສຢູ່ໃນຕົວເມືອງ ກໍຕ້ອງງົດການຈູດຂີ້ເຫຍື້ອຄົວເຮືອນ, ນອກນີ້ທາງຫົວໜ່ວຍທຸລະກິດ ກໍຕ້ອງຫຼຸດຜ່ອນປະລິມານສິ່ງເສດເຫຼືອທາງອຸດສາຫະກຳ ແລະ ຂີ້ເຫຍື້ອຊົມໃຊ້ທົ່ວໄປໃຫ້ໜ້ອຍລົງໂດຍຜ່ານການຈັດຕັ້ງປະຕິບັດວິທີການ 3R ຄື: ຫຼຸດຜ່ອນການນໍາໃຊ້ (Reduce), ນໍາໃຊ້ວັດສະດຸຄືນໃໝ່ (Reuse) ແລະ ໝູນໃຊ້ (Recycle), ການຫຼຸດຜ່ອນແຫຼ່ງກຳເນີດມົນລະພິດທາງອາກາດແມ່ນເປັນບາດກ້າວທີ່ສໍາຄັນທີ່ສຸດເພື່ອຮັກສາສຸຂະພາບ, ຍົກລະດັບຄຸນນະພາບສິ່ງແວດລ້ອມ ແລະ ການປ່ຽນແປງດິນຟ້າອາກາດ, ນອກຈາກນີ້, ສິ່ງທີ່ສໍາຄັນແມ່ນປະຊາຊົນຕ້ອງມີຄວາມເຂົ້າໃຈ ແລະ ຕິດຕາມຄ່າລະດັບມົນລະພິດທາງອາກາດໃນພື້ນທີ່ທີ່ຕົນອາໄສຢູ່ ເພື່ອປັບປ່ຽນພຶດຕິກຳ ຫຼື ປະຕິບັດຕາມມາດຕະການປ້ອງກັນຕ່າງໆຕາມຄວາມເໝາະສົມ.

ທຸກຄົນເຂົ້າໄປຕິດຕາມຄ່າມາດຕະຖານຄຸນນະພາບອາກາດທີ່ເຟສບຸກຂອງກະຊວງຊັບພະຍາກອນທຳມະຊາດ ແລະສິ່ງແວດລ້ອມ ທີ່: https://www.facebook.com/share/1Lail7TCR7/ແລະhttps://www.facebook.com/share/1BXAJy6qmw/ ຫຼື ໜ່ວຍປະຕິບັດງານຕິດຕາມໝອກຄວັນ/AirLaos. ເພື່ອຊ່ວຍໃຫ້ປະຊາຊົນປ້ອງກັນຕົນເອງຈາກມົນລະພິດທາງອາກາດໄດ້ດີຂຶ້ນ, ກະຊວງສາທາລະນະສຸກ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ໃຫ້ຄໍາແນະນໍາກ່ຽວກັບ ວິທີການປ້ອງກັນມົນລະພິດທາງອາກາດໃນແຕ່ລະລະດັບ ຊຶ່ງລວມທັງການໃສ່ຜ້າອັດປາກ-ດັງ, ການໃຊ້ເຄື່ອງຟອກອາກາດ, ການຫຼຸດຜ່ອນການສໍາຜັດກັບມົນລະພິດທາງອາກາດ, ຫຼີກລ່ຽງພື້ນທີ່ສ່ຽງ, ກິດຈະກຳທີ່ເປັນແຫຼ່ງຂອງມົນລະພິດ ແລະວິທີອື່ນໆ.

แชร์