ພື້ນຖານໂຄງລ່າງດ້ານເສດຖະກິດ ເມືອງປາກອູ ໄດ້ຮັບການພັດທະນາດີຂຶ້ນ

ແຫລ່ງຂ່າວຈາກແຂວງຫລວງພະບາງ ໃຫ້ຮູ້ວ່າ: ຜົນສໍາເລັດທີ່ພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 5 ປີຜ່ານມາ (2020-2024) ເຫັນວ່າ ພື້ນຖານໂຄງລ່າງທາງດ້ານເສດຖະກິດ, ວັດທະນະທໍາ-ສັງຄົມ ຂອງເມືອງປາກອູ ແຂວງຫລວງພະບາງ ໄດ້ຮັບການພັດທະນາ, ການບໍລິການ-ການຂົນສົ່ງ ມີຄວາມສະດວກ, ວ່ອງໄວ, ຊີວິດການເປັນຢູ່ຂອງປະຊາຊົນຫລາຍບ້ານ, ຫລາຍຄອບຄົວໄດ້ຮັບການຍົກລະດັບດີຂຶ້ນກວ່າເກົ່າ, ບັນດາຄາດໝາຍ ແລະ ຕົວຊີ້ວັດແຕ່ລະດ້ານ ຂອງຫລາຍຂະແໜງການ ບັນລຸຜົນສໍາເລັດຕາມຄາດໝາຍ ແລະ ລື່ນຄາດໝາຍ, ກົງຈັກການຈັດຕັ້ງຂອງສໍານັກງານ, ຫ້ອງການໄດ້ຮັບການປັບປຸງ ໄປຕາມທິດກະທັດຫັດ, ມີຄຸນະພາບ ຊຶ່ງສາມາດຈັດຕັ້ງປະຕິບັດ ບົດບາດ ໜ້າທີ່ຄວາມຮັບຜິດຊອບຂອງຕົນໄດ້ຢ່າງຕັ້ງໜ້າ ແລະ ມີຜົນສໍາເລັດ.

ສະຫາຍ ສີມອນ ສະເຫລີມສັກ ກຳມະການປະຈຳພັກເມືອງ ຮອງເຈົ້າເມືອງປາກອູ ໄດ້ລາຍງານຕໍ່ກອງປະຊຸມໃຫຍ່ ຜູ້ແທນອົງຄະນະພັກເມືອງປາກອູ ຄັ້ງທີ IX ໃນວັນທີ 27 ກຸມພາ 2025 ນີ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຜ່ານມາຂອງເມືອງປາກອູ ໄດ້ດຳເນີນຕາມ 6 ເປົ້າໝາຍ ຄື: ເສດຖະກິດເຕີບໂຕຢ່າງມີຄຸນນະພາບ, ໝັ້ນທ່ຽງ ແລະ ຍືນຍົງ, ຊັບພະຍາກອນມະນຸດມີຄຸນນະພາບສູງຂຶ້ນສາມາດຕອບສະໜອງຄວາມຕ້ອງການຂອງການພັດທະນາ, ມີຄວາມສາມາດຄົ້ນຄວ້າ ແລະ ນໍາໃຊ້ວິທະຍາສາດ ເຕັກໂນໂລຊີ ເພື່ອຍົກສູງປະສິດທິພາບ ແລະ ສ້າງມູນຄ່າເພີ່ມການຜະລິດ ແລະ ການບໍລິການ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ ໄດ້ຮັບການຍົກລະດັບໃຫ້ດີຂຶ້ນເທື່ອລະກ້າວ, ປົກປັກຮັກສາສິ່ງແວດລ້ອມໃຫ້ມີຄວາມສົມດູນ, ກຽມພ້ອມຮັບມື ແລະ ໂຕ້ຕອບຄວາມສ່ຽງຈາກໄພພິບັດທໍາມະຊາດ, ການຮ່ວມມືເຊື່ອມໂຍງເຊື່ອມຈອດພາຍໃນເມືອງກັບພາກພື້ນ-ສາກົນໃຫ້ມີຄວາມເຂັ້ມແຂງ ແລະ ທັນສະໄໝ, ການຄຸ້ມຄອງ-ບໍລິຫານລັດມີປະສິດທິພາບ ແລະສັງຄົມ ໄດ້ຮັບການປົກປ້ອງຢ່າງມີຄວາມສັກສິດ ຕາມທິດການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ.

ສະເພາະເປົ້າໝາຍທີ 1 ເຫັນວ່າ ເສດຖະກິດຂອງເມືອງ ຂະຫຍາຍຕົວໃນລະດັບສະເລ່ຍ 3,61% ຕໍ່ປີ ທຽບໃສ່ແຜນການປະຕິບັດໄດ້ 112,46%, ລວມຍອດມູນຄ່າຜົນຜະລິດພາຍໃນ 5 ປີ ຜ່ານມາ ບັນລຸ 624 ຕື້ກວ່າກີບຕໍ່ປີ, ສະເລ່ຍໃສ່ຫົວຄົນໄດ້ 22 ລ້ານກວ່າກີບ ຕໍ່ຄົນຕໍ່ປີ.

แชร์