ປະທານປະເທດ ໂອ້ລົມ ສມປຊ ໂດຍເນັ້ນບາງວຽກງານສຳຄັນ

ພິທີສະເຫລີມສະຫລອງ ວັນສ້າງຕັ້ງສະຖາບັນການເມືອງ ແລະການປົກຄອງແຫ່ງຊາດ (ສມປຊ) ຄົບຮອບ 30 ປີ (27 ກຸມພາ 1995-27 ກຸມພາ 2025) ຈັດຂຶ້ນໃນ ວັນທີ 27 ກຸມພາ 2025 ໃຫ້ກຽດເຂົ້າຮ່ວມໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ, ມີບັນດາການນໍາພັກ-ລັດ, ອະດີດການນໍາພັກ-ລັດ, ພະນັກງານ, ຄູ-ອາຈານແລະ ນັກສຶກສາຂອງ ສມປຊ ເຂົ້າຮ່ວມ.

ໃນພິທີ, ສະຫາຍ ພູວົງ ອຸ່ນຄໍາແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ ໄດ້ຜ່ານບົດສັນລະເສີນມູນເຊື້ອ 30 ປີ ແຫ່ງການເຕີບໃຫຍ່ ແລະ ຂະຫຍາຍຕົວ ຂອງ ສມປຊ ຊຶ່ງໄດ້ໃຫ້ຮູ້ເຖິງການກຳເນີດ ແລະ ເຕີບໃຫຍ່ໃນແຕ່ລະໄລຍະ, ພ້ອມທັງໃຫ້ຮູ້ບາງຜົນງານ 30 ປີ ໃນການເຄື່ອນໄຫວປະຕິບັດໜ້າທີ່ວຽກງານ ກໍມີຫລາຍອັນພົ້ນເດັ່ນ ທັງດ້ານການເມືອງ-ແນວຄິດ, ການພັດທະນາກົງຈັກການຈັດຕັ້ງ ແລະ ພະນັກງານ, ການຈັດຕັ້ງປະຕິບັດແຜນພັດທະນາຫລັກສູດການຮຽນ-ການສອນ ຊຶ່ງນັບແຕ່ປີ 1995 ມາເຖິງປັດຈຸບັນ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ສ້າງ ແລະ ປັບປຸງຫລັກສູດໃຫ້ສອດຄ່ອງກັບເງື່ອນໄຂຕົວຈິງໃນແຕ່ລະໄລຍະ. ນອກນີ້, ສມປຊ ກໍໄດ້ປັບປຸງຫລັກສູດ ແລະ ສ້າງກົນໄກເຄື່ອນໄຫວປະສານກັບໂຮງຮຽນການເມືອງ ແລະ ການປົກຄອງແຂວງທົ່ວປະເທດ ດໍາເນີນການຮຽນ-ການສອນໃນລະບົບຝຶກອົບຮົມ, ລະບົບບຳລຸງ, ລະບົບກໍ່ສ້າງຊັ້ນຕົ້ນ, ຊັ້ນກາງ, ຊັ້ນສູງຕ່າງໆ; ປະສານສົມທົບກັບບັນດາກະຊວງ ແລະ ອົງການຈັດຕັ້ງພັກ-ລັດ ໄດ້ເອົາ ໃຈໃສ່ຍົກລະດັບທາງດ້ານທິດສະດີມາກ-ເລນິນ, ແນວຄິດປະທານ ໄກສອນ ພົມວິຫານ ແລະ ແນວ ທາງ ການເມືອງຂອງພັກ ໃຫ້ພະນັກງານ ສະມາຊິກພັກຂອງບັນດາກະຊວງອົງການ ໄດ້ຈໍານວນຫຼາຍສົມຄວນ.

ໂອກາດນີ້, ສະຫາຍ ທອງລຸນ ສີສຸລິດ ໄດ້ຕາງໜ້າສູນກາງພັກ ສະແດງຊົມເຊີຍ ຕໍ່ຜົນສຳເລັດ ຂອງ ສມປຊ ທີ່ຍາດມາໄດ້ຕະຫລອດໄລຍະຜ່ານມາ, ພ້ອມທັງໄດ້ເນັ້ນບາງວຽກງານສຳຄັນ ເຊັ່ນ: ປ່ຽນ ແປງໃໝ່ຢ່າງເລິກເຊິ່ງຮອບດ້ານວຽກງານກໍ່ສ້າງ, ບໍາລຸງ ພະນັກງານ ຕາມທິດນໍາທີ່ວ່າ “ເອົາຜູ້ຮຽນເປັນ ໃຈກາງ, ໂຮງຮຽນເປັນພື້ນຖານ, ຄູ-ອາຈານເປັນແຮງພັກດັນ” ຊຶ່ງຕ້ອງເດັດດ່ຽວແກ້ໄຂສະພາບການຄ້ານຮຽນ, ບໍ່ຢາກຮຽນທິດສະດີ, ຮຽນແບບຜິວເຜີນ, ພໍແຕ່ແລ້ວ, ໃຫ້ຄວາມສໍາຄັນວຽກງານສຶກສາອົບຮົມດ້ານການເມືອງແນວຄິດ, ຍົກລະດັບຄຸນສົມບັດສິນທໍາປະຕິວັດ, ອຸດົມການ, ລະດັບ, ຄວາມສາມາດການນໍາພາ-ຄຸ້ມຄອງ ໃຫ້ແກ່ຜູ້ຮຽນ, ເອົາທິດສະດີຕິດພັນກັບພຶດຕິກຳ, ການບໍາລຸງ, ກໍ່ສ້າງພະ ນັກງານຢູ່ສະຖາບັນ ຕ້ອງຕິດພັນກັບການພັດທະນາຊັບພະຍາກອນມະນຸດຄຸນນະພາບສູງ, ສ້າງໃຫ້ໄດ້ແຫລ່ງພະນັກງານການນໍາພາ, ຄຸ້ມຄອງທີ່ມີຄວາມຮູ້ຄວາມສາມາດ; ສືບຕໍ່ປ່ຽນແປງໃໝ່ຢ່າງແຂງແຮງ ວຽກງານຄົ້ນຄວ້າວິທະຍສາດ, ປະສານສົມທົບຢ່າງສະໜິດແໜ້ນ ລະຫວ່າງຄົ້ນຄວ້າທິດສະດີ ແລະ ສະຫລຸບພຶດຕິກຳ. ທິດສະດີມີບົດບາດສໍາຄັນທີ່ສຸດ ຕໍ່ກັບການພັດທະນາໃນຍຸກສະໄໝໃໝ່ ຊຶ່ງຕ້ອງຮັບຮູ້ເປົ້າໝາຍ, ຄວາມຮຽກຮ້ອງຕ້ອງການສູງສຸດ ຂອງການຄົ້ນຄວ້າວິທະຍາສາດ, ຄົ້ນຄວ້າທິດສະດີ ທີ່ສະຖາບັນຕ້ອງບັນລຸ ແມ່ນປັບປຸງບັນດາສະຖາບັນ, ໂຮງຮຽນການເມືອງ-ການປົກຄອງ ໃຫ້ມີຈຸດສຸມທາງດ້ານການຄົ້ນຄວ້າ, ວິໄຈ ເພື່ອໃຫ້ສາມາດນໍາເຂົ້າສູ່ການນຳໃຊ້ ຢ່າງມີປະສິດທິພາບ, ປະສິດທິຜົນ ຢ່າງແທ້ຈິງ ແລະ ທັນຍຸກທັນສະໄໝ; ຕ້ອງເດັດດ່ຽວສ້າງສະຖາບັນໃຫ້ກາຍເປັນຕົວແບບໃນວຽກງານສ້າງຕັ້ງພັກ, ເປັນຕົວແບບໃນການຮັກສາລະບຽບວິໄນຂອງໂຮງຮຽນ, ລະບຽບວິໄນໃນການຮຽນ “ສອນດີສອນເກັ່ງ, ນັກຮຽນເກັ່ງວິໄນດີ”, ສ້າງໃຫ້ສະຖາບັນກາຍເປັນບ່ອນ “ບົ່ມເຜາະອຸດົມການອັນດີງາມຂອງນັກກອມມູນິດ, ເປັນເບົ້າຫລອມເຫລັກກ້າຂອງພັກ”. ສໍາລັບບັນດາສະຫາຍນັກສຶກສາ ທີ່ມາຮຽນຢູ່ສະຖາບັນ ຕ້ອງເຊື່ອມຊຶມ ແລະ ໜ້າທີ່ການເມືອງຂອງພວກສະຫາຍ, ພວກສະຫາຍຕ້ອງຮັບຮູ້ໄດ້ ເຖິງຄວາມຮັບຜິດຊອບ ແລະ ໜ້າທີ່ ຂອງຕົນເອງ ຕໍ່ພັກ, ຕໍ່ລັດ ແລະ ປະຊາຊົນ; ຮູ້ໄດ້ຄວາມຮຽກຮ້ອງຕ້ອງການໃນການຈັດຕັ້ງປະຕິບັດເປົ້າໝາຍຍຸດທະສາດ, ການກໍ່ສ້າງພັກ ໃຫ້ປອດໃສເຂັ້ມແຂງ ໜັກແໜ້ນ, ສ້າງໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີປະຊາທິປະໄຕ, ສີວິ ໄລ ແລະ ຍຸຕິທໍາ, ຊີວິດການເປັນຢູ່ຂອງປະຊາຊົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ.

ຂໍ້ມູນ: ສຸກສະຫວັນ
ພາບ: ສມປຊ

แชร์