ກອງພັນໃຫຍ່ 643 ເຜີຍແຜ່ຜົນສໍາເລັດກອງປະຊຸມໃຫຍ່ ສະພາແຫ່ງຊາດ ຊຸດທີ 9

ໃນວັນທີ 26 ກຸມພາ 2025 ທີ່ຜ່ານມານີ້ ສະພາປະຊາຊົນ ແຂວງຊຽງຂວາງ ນໍາໂດຍ ທ່ານ ປອ ຄຳແສນ ສີສະວົງ ສະມາຊິກສະພາ ແຫ່ງຊາດ ປະຈຳເຂດເລືອກຕັ້ງຊຸດທີ 9 ແລະ ທ່ານສອນເພັດ ລາພະທອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງແປກ ພ້ອມທີມງານ ໄດ້ລົງເຜີຍແຜ່ຜົນສໍາເລັດກອງປະຊຸມໃຫຍ່ ສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 9 ແລະສະພາປະຊາຊົນ ແຂວງຊຽງຂວາງ ຊຸດທີ 2 ຢູ່ທີ່ສະໂມສອນກອງພັນໃຫຍ່ 643 ມີບັນດາ ສະຫາຍ ຄະນະພັກ-ຄະນະບັນຊາກອງພັນໃຫຍ່, ພະແນກການ, ກອງພັນນ້ອຍ,ກອງຮ້ອຍເອກະລາດ ຕະຫລອດຮອດພະນັກງານ ຫລັກແຫລ່ງທົ່ວກົມກອງ ເຂົ້າຮ່ວມ.

ໂອກາດນີ້, ສະຫາຍ ພັນໂທ ບຸນມີ ດວງມະນີຈັນ ເລຂາຄະນະພັກ ຫົວໜ້າການເມືອງ ກອງພັນໃຫຍ່ 643 ໄດ້ລາຍງານສະພາບ ແລະ ຈຸດພິເສດຂອງກົມກອງ ໂດຍຫຍໍ້ໃນການຈັດຕັ້ງປະຕິບັດໜ້າທີ່ ວຽກງານວິຊາສະເພາະຕົວຈິງ, ຈາກນັ້ນ ຄະນະຮັບຜິດຊອບກໍໄດ້ຜັດປ່ຽນ ກັນຜ່ານຜົນສໍາເລັດກອງປະຊຸມໃຫຍ່ ສະໄໝສາມັນ ເທື່ອທີ 8 ຂອງສະພາ ແຫ່ງຊາດ ຊຸດທີ 9 ແລະສະພາປະຊາຊົນແຂວງຊຽງຂວາງ ຊຸດທີ 2 .ກອງປະຊຸມດັ່ງກ່າວ ໄດ້ພິຈາລະນາຮັບຮອງເອົາບັນຫາສໍາຄັນພື້ນຖານ ຂອງປະເທດຊາດ ໄດ້ອອກເປັນມະຕິກອງປະຊຸມ ເປັນຕົ້ນ ຮັບຮອງເອົາ ການສະເໜີດັດແກ້ງົບປະມານແຫ່ງລັດ, ການຈັດຕັ້ງປະຕິບັດແຜນ ພັດທະນາເສດຖະກິດສັງຄົມແຫ່ງຊາດ, ວາງທິດທາງແຜນການ ພັດທະນາເສດຖະກິດສັງຄົມແຫ່ງຊາດ, ແຜນການລົງທຶນຂອງລັດ, ການສະຫລຸບຂາດຕົວ, ການຈັດຕັ້ງປະຕິບັດແຜນພັດທະນາ ແລະ ທິດທາງແຜນການງົບປະມານແຫ່ງລັດ, ການຈັດຕັ້ງປະຕິບັດວຽກງານ 3 ສ້າງ, ການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ ແລະ ຍຸດທະສາດການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ, ການປະເມີນກົດໝາຍຂົງເຂດວັດທະນະທໍາ, ວິໄສທັດຮອດປີ 2040 ແລະ ຍຸດທະສາດການຄຸ້ມຄອງການພັດທະນາ ທີ່ດິນກະສິກໍາ, ການເຄື່ອນໄຫວວຽກກງານຂອງສະພາແຫ່ງຊາດ ແລະ ປັບປຸງກົດໝາຍ ແລະ ອື່ນໆ. ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນ ແຂວງຊຽງຂວາງຊຸດທີ 2 ເຊິ່ງໄດ້ຍົກໃຫ້ເຫັນຜົນ ຂໍ້ຄົງຄ້າງ ແລະ ທິດທາງແຜນການ ແລະມາດຕະການຈັດຕັ້ງປະຕິບັດເປັນຕົ້ນຂົງເຂດພັດທະນາເສດຖະກິດສັງຄົມ, ຂົງເຂດວຽກງານ ວັດທະນະທໍາສັງຄົມ ແລະ ບັນດາເຜົ່າ ແລະ ບັນດາຄາດໝາຍຕ່າງໆ ທີ່ຈະຕ້ອງໄດ້ສູ້ຊົນ. ພ້ອມນີ້ ໃນທີ່ປະຊຸມຍັງໄດ້ປະກອບຄໍາຄິດຄໍາເຫັນ ຕັ້ງຄໍາຖາມເຈາະຈີ້ມສົນທະນາເຊິ່ງກັນ ແລະ ກັນຢ່າງກົງໄປກົງມາ ເປັນການແລກປ່ຽນບົດຮຽນ ສະເໜີບັນຫາ ແລະ ຊອກຫາວິທີແກ້ໄຂ ຮ່ວມກັນ, ທັງນີ້ເພື່ອເປັນການຮັບປະກັນໃນການຈັດຕັ້ງປະຕິບັດ ພາລະບົດບາດ ສິດ ແລະ ໜ້າທີ່ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງຕາມທີ່ໄດ້ກຳນົດໄວ້ໃນກົດໝາຍ ໃນການໂຄສະນາເຜີຍແຜ່ປຸກລະດົມໃຫ້ບັນດາພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ເວົ້າລວມ ເວົ້າສະເພາະກໍ່ຄື ພະນັກງານ-ນັກຮົບຢູ່ກອງພັນໃຫຍ່ 643ໄດ້ເຊື່ອມຊຶມ ແລະເຂົ້າໃຈໃນການປະຕິບັດແນວທາງນະໂຍບາຍ, ລັດຖະທຳມະນູນ, ກົດໝາຍ, ມະຕິກອງປະຊຸມສະພາແຫ່ງຊາດ ແລະກອງປະຊຸມສະພາແຂວງ,ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດເຂົ້າຮ່ວມການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ໃນຖານະເປັນຕົວແທນແຫ່ງສິດ ແລະຜົນປະໂຫຍດຂອງປະຊາຊົນບັນດາເຜົ່າ ໃຫ້ເລິກເຊິ່ງ ແລະກວ້າງຂວາງ.
ພາບ-ຂ່າວ: ຄຳໝັ້ນ ຄົງວິໄລ ກອງພັນໃຫຍ່ 643

แชร์