ເຈົ້າແຂວງຈຳປາສັກ ຊຸກຍູ້ການຕໍ່າຫູກ-​ມັດໝີ່ ຢູ່ບ້ານ​ປະທຸມພອນ​

ທ່ານ​ ອາລຸນໄຊ ສູນນະລາດ ເຈົ້າແຂວງໆຈຳປາສັກ​ ພ້ອມ​ຄະນະນໍາ​ຈາກພະແນກການທີ່ກ່ຽວຂ້ອງຂອງແຂວງ​ ເຄື່ອນໄຫວຢ້ຽມຢາມ ແລະ ຊຸກຍູ້ຄອບຄົວຕໍ່າຫູກ-ມັດໝີ່​ ຢູ່ບ້ານ​ປະທຸມພອນ​ ເມືອງ​ປະທຸມພອນ​ ແຂວງຈຳປາສັກ ໃນວັນທີ 27 ກຸມພາ​ 2025 ໂດຍມີທ່ານ​ ວຽງສະໄໝ ສີລິພອນພັນ ເຈົ້າເມືອງປະທຸມພອນເຂົ້າຮ່ວມ.

ໂອກາດນີ້,​ ທ່ານ ນາງ​ ນວນສະຫວັນ​ ຄອບຄົວທີ່ຕໍ່າຫູກ​-ມັດໝີ່​ ໄດ້ຍົກໃຫ້ເຫັນປະຫວັດຄວາມເປັນມາ​ ຂອງການຕໍ່າຫູກ-ມັດໝີ່​ ຢູ່ບ້ານ​ປະທຸມພອນ​ ທີ່ເປັນອາຊີບດັ້ງເດີມຂອງປະຊາຊົນບ້ານປະທຸມພອນ ແລະ​ ມີມາແຕ່ດົນນານແລ້ວ, ເມື່ອກ່ອນ ພາຍຫລັງສໍາເລັດການເກັບກ່ຽວເຂົ້ານາປີ​ແລ້ວ ປະຊາຊົນບ້ານເພຍໄຟ ກໍຕໍ່າຫູກທຸກຄອບຄົວ ເນື່ອງຈາກ​ບໍ່ໄດ້ໄປເຮັດວຽກຢູ່ບ່ອນອື່ນ,​ ແຕ່ກ່ອນແມ່ນຂຶ້ນຊື່ລືນາມ​ ແລະ​ ເອີ້ນວ່າ ສິ້ນໄໝ ເພຍໄຟ.​ ນອກນີ້​, ຍັງມີການປູກມອນ​-ລ້ຽງໝ້ອນ ຕື່ມອີກ.​ ປັດຈຸບັນນີ້ ການຕໍ່າຫູກ-ມັດໝີ່​ ຂອງປະຊາຊົນບ້ານປະທຸມພອນ ແມ່ນມີຄວາມຫຍຸ້ງຍາກ,​ ເຖິງແມ່ນວ່າສິ້ນໝີ່ທີ່ຕໍ່າຢູ່ປະທຸມພອນ​ ລາຄາ​ດີ, ມີຄຸນນະພາບ,​ ມີຕະຫລາດ​ຮອງຮັບ​ ແຕ່​ການຈັດຕັ້ງ​ປະຕິບັດ​ຕົວຈິງ​ ມີຄວາມຂໍ້ຫຍຸ້ງຍາກ​ຫລາຍຢ່າງ ເນື່ອງຈາກ​ການຕໍ່າຫູກ-ມັດໝີ່​ ເປັນວຽກທີ່ລະອຽດອ່ອນ,​ ພິຖີພິຖັນ,​ ຕ້ອງມີຄວາມຂະຫຍັນອົດທົນ ແລະ​ ໃຊ້ເວລາດົນ,​ ການຖ່າຍທອດບົດຮຽນໃຫ້ກັນ ແມ່ນຖ່າຍທອດຈາກຮຸ່ນນີ້ ໄປສູ່ຮຸ່ນອື່ນ ແລະ​ ຖ່າຍທອດດ້ວຍການບອກກ່າວ​ ບໍ່ມີຕໍາລາສິດສອນ,​ ຍ້ອນແນວນັ້ນ,​ ຖ້າບໍ່ມີ​ພອນສະຫວັນ​ ແລະ​ ບໍ່ມີຄວາມມັກຮັກດ້ານນີ້ ຈະບໍ່ສາມາດເຮັດໄດ້, ເຊິ່ງສິ່ງດັ່ງກ່າວນີ້ ເຮັດໃຫ້ການຕໍ່າຫູກ-ມັດໝີ່​ ຢູ່ບ້ານ​ປະທຸມພອນ​ ຂາດແຮງງານ,​ ຈໍານວນກີ່ທີ່ຕໍ່າຫູກ​ ກໍຫລຸດໜ້ອຍຖອຍລົງ. ໃນປີ​ 2024​ ມີ​ຜູ້ຕໍ່າຫູກ 8​ ກີ່,​ ປີ​ 2025​ ຍັງເຫລືອພຽງ 5 ກີ່,​ ກີ່​ໜຶ່ງ​ ຕໍ່າສິ້ນໄໝແຕ່ລະງວດ ລົງທຶນ​ 18 ລ້ານກວ່າກີບ,​ ຜະລິດ​ສິ້ນ​ໄໝ​ໄດ້ 20​ ກວ່າຜືນ,​ ຂາຍຜືນລະ 1,8​ ລ້ານກີບ​, ໄລຍະເວລາໃນການຜະລິດ ໃຊ້ເວລາເປັນເດືອນ​ ຈຶ່ງສາມາດຕໍ່າໄດ້ 1 ຜືນ.​ ນອກນີ້,​ ວັດຖຸ​ດິບ​ ໂດຍສະເພາະ​ ໝີ່ທີ່ນໍາມາມັດ ແລະ​ ຕໍ່າຢູ່ບ້ານປະທຸມພອນໃນປັດຈຸບັນ ແມ່ນນໍາມາຈາກບ່ອນອື່ນ​ ເຮັດໃຫ້ຕົ້ນທຶນສູງຂຶ້ນຕື່ມອີກ.

ໂອກາດນີ້, ທ່ານ​ ອາລຸນໄຊ ສູນນະລາດ ໄດ້ມີຄໍາເຫັນແນະນໍາ​ ເນັ້ນໃຫ້ສືບຕໍ່ຮັກສາອາຊີບຫັດຖະກໍາຕໍ່າແຜ່ນທີ່ເປັນມູນເຊື້ອຂອງພໍ່ແມ່ປະຊາຊົນໃນທ້ອງຖິ່ນ ໃຫ້ແຜ່ຂະຫຍາຍກວ້າງອອກ ໂດຍມອບໃຫ້ສົມກັນ ລະຫວ່າງ​ ພະແນກ​ຖະແຫລງ​ຂ່າວ,​ ວັດທະນະທຳ​ ແລະ​ ທ່ອງທ່ຽວ​ແຂວງ​, ພະແນກອຸດສາຫະກໍາ​ ແລະ​ ການຄ້າ​ແຂວງ,​ ສ​ະຫະພັນແມ່ຍິງແຂວງ,​ ຄະນະພັກ​-ອົງການປົກຄອງເມືອງ,​ ສະມາຄົມ​ຫັດຖະກໍາ​ແຂວງ​ ແລະ​ ຂະແໜງການທີ່ກ່ຽວຂ້ອງ ເພື່ອຊອກຊ່ອງທາງໃນການຂະຫຍາຍພື້ນຖານການຜະລິດ​ ກໍຄືການຕໍ່າຫູກ-ມັດໝີ່​ ຂອງປະຊາຊົນບ້ານປະທຸມພອນ ໃຫ້ກວ້າງອອກ​​ ຕິດພັນກັບການສ້າງວຽກເຮັດງານທໍາ ແລະ​ ການທ່ອງທ່ຽວ ເພື່ອສ້າງລາຍຮັບແກ່ຄອບຄົວ​ ແລະ​ ຖ້າມີເງື່ອນໄຂ​ເປັນໄປໄດ້ ກໍສ້າງຕັ້ງເປັນກຸ່ມການຜະລິດ​ ເພື່ອສາມາດເຂົ້າເຖິງແຫລ່ງທຶນ ຂະໜາດນ້ອຍ ແລະ ຂະໜາດກາງຕ່າງໆ. ພ້ອມນີ້,​ ທ່ານ​ ອາລຸນໄຊ​ ສູນນະລາດ​ ຍັງໄດ້ຢືນຢັນວ່າ ຈະພະຍາຍາມຊ່ວຍຊອກແຫລ່ງທຶນມາສະໜັບສະໜູນຄອບຄົວປະຊາຊົນທີ່ຕໍ່າຫູກ​-ມັດໝີ່​ ຢູ່ບ້ານ​ປະທຸມພອນ​ ຕື່ມອີກ.

ຂ່າວ​-ພາບ​: ທູນທອງໃຈ

• 28/02/2025