ເຊກອງ ສະຫລຸບວຽກງານຄຸ້ມຄອງເງິນຕາຕ່າງປະເທດ ປະຈໍາປີ 2024

ທະນາຄານແຫ່ງ ສປປ ລາວ ສາຂາພາກໃຕ້ ແຂວງຈໍາປາສັກ ຮ່ວມກັບອົງການປົກຄອງແຂວງເຊກອງ ຈັດກອງປະຊຸມສະຫລຸບຕີລາຄາວຽກງານຄຸ້ມຄອງເງິນຕາຕ່າງປະເທດ ປະຈໍາປີ 2024 ແລະ ທິດທາງແຜນການ ປະຈໍາປີ 2025 ໃນວັນທີ 20 ກຸມພາ 2025 ທີ່ຫ້ອງປະຊຸມ ທຄຕລ ສາຂາເຊກອງ, ໂດຍມີທ່ານ ໄຊລືຊາ ຜຸຍຍະວົງ ຫົວໜ້າທະນາຄານແຫ່ງ ສປປ ລາວ ສາຂາພາກໃຕ້ ແຂວງຈໍາປາສັກ, ທ່ານ ໂພໄຊ ພິມມະສອນ ຮອງຫົວໜ້າຫ້ອງວ່າການແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ອຸແກ້ວ ສີພັນດອນ ຫົວໜ້າພະແນກເສດຖະກິດ ແລະ ຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ ສາຂາພາກໃຕ້ ໃຫ້ຮູ້ວ່າ: ອົງການປົກຄອງແຂວງເຊກອງ ແລະ ທະນາຄານແຫ່ງ ສປປ ລາວ ສາຂາພາກໃຕ້ ໄດ້ເອົາໃຈໃສ່ຄຸ້ມຄອງເງິນຕາຕ່າງປະເທດ ແລະ ອັດຕາແລກປ່ຽນເງິນຕາໃຫ້ຫັນເຂົ້າສູ່ລະບຽບຫລັກການ ເພື່ອປະກອບສ່ວນຮັກສາສະຖຽນລະພາບເງິນຕາ ຂອງຊາດໃຫ້ໝັ້ນທ່ຽງ, ສ້າງເງື່ອນໄຂເອື້ອອຳນວຍຕໍ່ການພັດທະນາເສດຖະກິດ-ສັງຄົມ. ໃນປີ 2024 ຜ່ານມາ, ຢູ່ແຂວງເຊກອງ ອັດຕາແລກປ່ຽນທະນາຄານທຸລະກິດ ເງິນກີບທຽບເງິນໂດລາສະຫະລັດ ອ່ອນຄ່າ 16.10% ທຽບໃສ່ປີຜ່ານມາ ໂດຍອັດຕາແລກປ່ຽນເໜັງຕີງສະເລ່ຍຢູ່ ໃນລະດັບ 21,462.52 ກີບ/ໂດລາສະຫະລັດ; ອັດຕາແລກປ່ຽນທະນາຄານທຸລະກິດ ເງິນກີບທຽບເງິນບາດ ອ່ອນຄ່າ 19.33% ທຽບໃສ່ປີຜ່ານມາ ໂດຍອັດຕາແລກປ່ຽນກີບເໜັງຕີງສະເລ່ຍຢູ່ ໃນລະດັບ 650.35 ກີບ/ບາດ; ການເກັບຊື້ ແລະ ຂາຍເງິນຕາຕ່າງປະເທດ, ການເກັບຊື້-ຂາຍເງິນໂດລາສະຫາລັດ ລະບົບທະນາຄານທຸລະກິດໃນແຂວງ ເກັບຊື້ເງິນໂດລາສະຫະລັດໄດ້ 0.80 ລ້ານໂດລາສະຫະລັດ ເພີ່ມຂຶ້ນ 149.95% ທຽບໃສ່ປີຜ່ານມາ, ລະບົບທະນາຄານທຸລະກິດໃນແຂວງ ຂາຍເງິນໂດລາສະຫະລັດໄດ້ 0.28 ລ້ານໂດລາສະຫະລັດ ຫລຸດລົງ 61.89% ທຽບໃສ່ປີຜ່ານມາ; ການເກັບຊື້-ຂາຍເງິນບາດໄທ ລະບົບທະນາຄານທຸລະກິດໃນແຂວງ ເກັບຊື້ເງິນບາດໄດ້ 2.24 ລ້ານບາດ ເພີ່ມຂຶ້ນ 43.75% ທຽບໃສ່ປີຜ່ານມາ, ລະບົບທະນາຄານທຸລະກິດໃນແຂວງ ຂາຍເງິນບາດໄດ້ 0.56 ລ້ານບາດ ຫລຸດລົງ 85.29% ທຽບໃສ່ປີຜ່ານມາ; ການຄຸ້ມຄອງກະແສເງິນຕາຕ່າງປະເທດ, ການຄຸ້ມຄອງກະແສເງິນລົງທຶນຈາກຕ່າງປະເທດ, ການຊໍາລະສະສາງເງິນຕາຜ່ານລະບົບທະນາຄານ ແລະ ການໂອນເງິນເຂົ້າ-ອອກ ຜ່ານລະບົບທະນາຄານທຸລະກິດໃນແຂວງ ມີມູນຄ່າທັງໝົດທຽບເທົ່າ 15.51 ລ້ານໂດລາສະຫະ ລັດ ເພີ່ມຂຶ້ນ 90.18% ທຽບໃສ່ປີຜ່ານມາ. ໃນນີ້, ການໂອນເງິນອອກ ມີມູນຄ່າທັງໝົດທຽບເທົ່າ 0.58 ລ້ານໂດລາສະຫະລັດ ເພີ່ມຂຶ້ນ 74.57% ແລະ ການໂອນເງິນເຂົ້າ ມີມູນຄ່າທັງໝົດທຽບເທົ່າ 14.93 ລ້ານໂດລາສະຫະລັດ ທຽບ ໃສ່ປີ 2023 ເພີ່ມຂຶ້ນ 90.84%.

ທ່ານ ອຸແກ້ວ ສີພັນດອນ ໃຫ້ຮູ້ຕື່ມວ່າ: ລະບົບສະຖາບັນການເງິນຢູ່ໃນແຂວງເຊກອງ ປະກອບມີ ທະນາຄານທຸລະກິດ ທັງໝົດ 6 ແຫ່ງ. ໃນນີ້, ທະນາຄານລັດ 1 ແຫ່ງ, ທະນາຄານຮ່ວມທຶນ 2 ແຫ່ງ ແລະ ທະນາຄານເອກະຊົນ 3 ແຫ່ງ, ຊຶ່ງໃນປີ 2024 ສາມາດລະດົມເງິນຝາກໄດ້ 1,868.57 ຕື້ກີບ ທຽບໃສ່ແຜນປີເທົ່າກັບ 99.46% ທຽບໃສ່ປີ 2023 ເພີ່ມຂຶ້ນ 29.30% ແລະ ສະໜອງສິນເຊື່ອໃຫ້ສັງຄົມໄດ້ 1,069.95 ຕື້ກີບ ທຽບໃສ່ແຜນປີເທົ່າກັບ 157.12% ທຽບໃສ່ປີ 2023 ເພີ່ມຂຶ້ນ 96.39% ໂດຍສິນເຊື່ອສ່ວນໃຫຍ່ ແມ່ນສະໜອງໃຫ້ຂະແໜງກໍ່ສ້າງ ກວມເອົາ 75.08%, ຂະແໜງກະສິກໍາ-ປ່າໄມ້ ກວມເອົາ 10.11%, ຂະແໜງການຄ້າ ກວມເອົາ 7.69%, ຂະແໜງບໍລິການ ກວມເອົາ 2.10% ແລະ ຂະແໜງອື່ນໆ ກວມເອົາ 4.28% ຂອງສິນເຊື່ອທັງໝົດ.
.

ຂ່າວ-ພາບ: ສັນຍາ

แชร์