ເຕັກນິກການປູກຖົ່ວຂຽວ

 ຖົ່ວຂຽວເປັນພືດທີ່ມີອາຍຸສັ້ນໃຊ້ນ້ຳນ້ອຍກວ່າພືດໄຮ່ຫຼາຍຊະນິດໂດຍສາມາດປູກແທນເຂົ້າໃນລະດູນາປີໄດ້ດີ, ປະຈຸບັນແນວພັນທີ່ແນະນຳສຳລັບການກະເສດມີຫຼາຍແນວພັນຄວນເລືອກໃຊ້ແນວພັນໃຫ້ເໝາະສົມກັບສະພາບການປູກໃນແຕ່ລະດູ ແລະ ແຕ່ລະທ້ອງຖິ່ນ, ຖົ່ວຂຽວສາມາດປູກໃສ່ນາກ່ອນປູກເຂົ້ານາແຊງ, ຊຶ່ງເປັນຝຸ່ນພືດຂຽວທີ່ເພີ່ມຜົນຜະລິດເຂົ້າຂຶ້ນ 20%, ຖົ່ວຂຽວສາມາດຕຶງທາດໄນໂຕເຈນປະມານ 70-80 ກິໂລຕໍ່ເຮັກຕາ ແລະຍັງປັບປຸງດິນໃຫ້ມີຄວາມອຸດົມສົມບູນ, ປັບໂຄງສ້າງດິນໃຫ້ຜຸຜຸ່ຍດີ, ຖ້າປູກຖົ່ວຂຽວໃນເດືອນ 10 ຫຼັງເກັບກ່ຽວເຂົ້າ ແລະເກັບກ່ຽວສາລີແລ້ວຍັງສາມາດຕັດວົງຈອນຊີວິດຂອງ ແມງໄມ້ສັດຕູພືດ ແລະຫຼຸດຜ່ອນການລະບາດຂອງສັດຕູພືດໃນນາເຂົ້າໃນລະດູຜະລິດຕໍ່ໄປອີກ,ຖົ່ວຂຽວຍັງເປັນພືດເສດຖະກິດທີ່ສາມາດສ້າງລາຍຮັບເສີມແກ່ຊາວກະສິກອນໄດ້ດີ ແລະຕົ້ນທຶນການຜະລິດກໍ່ຕ່ຳ.

  ການກຽມແນວພັນໃຫ້ພຽງພໍກັບເນື້ອທີ່ປູກ, ຄວນທົດສອບເບິ່ງຄວາມງອກຂອງເມັດພັນ ແລະ ເມັດພັນທີ່ຈະນຳມາປູກຄວນມີຄວາມງອກບໍ່ຫຼຸດ 80%, ພື້ນທີ່ບໍ່ເຄີຍປູກພືດຕະກຸນຖົ່ວຂຽວມາກ່ອນຖ້າມີຄວນນຳໃຊ້ເຊື້ອໄຣໂຊບຽມໃນອັດຕາ 500 ກຣາມຕໍ່ເຮັກຕາ, ເອົາໄຣໂຊບຽມຈຳນວນ 500 ກຣາມປະສົມນ້ຳ 200 ເຊເຊ ແລ້ວ ຄົນກັນກັບເມັດຖົ່ວຂຽວ 20 ກິໂລ, ພາຍຫຼັງປະສົມເຊື້ອໄຣບຽມແລ້ວ ໃຫ້ເອົາເມັດພັນປະສົມກັບຢາ (chlorpyriphos) 100 ມິລີລິດ ແລະຢາ (carbendazim) 50 ກຣາມປະສົມກັບເມັດພັນ 20 ກິໂລ ກ່ອນນຳໄປປູກເພື່ອປ້ອງກັນມົດ, ປວກ ແລະພະຍາດທີ່ມີໃນດິນ.

  ໂດຍທົ່ວໄປແລ້ວລະດູການປູກຖົ່ວຂຽວສາມາດແບ່ງອອກເປັນ 3 ລະດູຄື: ລະດູແລ້ງເດືອນ 10-11 ໃນເຂດມີນ້ຳຊົນລະປະທານ, ສ່ວນລະດູຝົນແມ່ນທ້າຍເດືອນ 5-7 ໃນເຂດເນີນສູງ ແລະເຂດທົ່ງພຽງບ່ອນບໍ່ມີນ້ຳຖ້ວມຂັງ, ສຳລັບລະດູຝົນກາງເດືອນ 8 ຫາຕົ້ນເດືອນ 9 ໃນເຂດເນີນສູງພາຍຫຼັງເກັບກູ້ສາລີ ຫຼືກ່ອນການເກັບກ່ຽວເຂົ້າໄຮ່ເພາະໃນຊ່ວງນີ້ຈະບໍ່ຈຳເປັນຕ້ອງການໃຫ້ນ້ຳ.

  ການປູກຖົ່ວຂຽວດິນຕ້ອງມີຄວາມຊຸ່ມປະມານ 80% ແລະການປູກຖົ່ວຂຽວໂດຍທົ່ວໄປຈະມີ 4 ວິທີຄືການປູກດ້ວຍການຫວ່ານເມື່ອໄຖ ແລະຄາດດິນແລ້ວຫວ່ານເມັດຖົ່ວໃຫ້ສະເໝີແລ້ວໄຖດິນກົບອີກຄັ້ງໜຶ່ງເພື່ອຮັກສາຄວາມຊຸ່ມໃນດິນ, ໃຊ້ເມັດພັນ 25-30 ກິໂລຕໍ່ເຮັກຕາ, ວິທີທີສອງປູກເປັນແຖວໃຊ້ແບບສັກເປັນຂຸມ ຫຼື ໂຮຍເມັດເປັນແຖວກໍໄດ້ໄລຍະຫ່າງລະຫວ່າງແຖວ 50 ຊັງຕີແມັດ, ໄລຍະຫ່າງລະຫວ່າງຕົ້ນ 20 ຊັງຕີແມັດ, ຢອດ 2-3 ເມັດຕໍ່ຂຸມ, ປູກເລິກ 2-3 ຊັງຕີແມັດ, ໃຊ້ເມັດພັນ 20 ກິໂລຕໍ່ເຮັກຕາ, ວິທີທີ່ສາມປູກດ້ວຍເຄື່ອງຈັກຢອດເມັດ, ຖ້າຫາກຊາວກະສິກອນມີເຄື່ອງຈັກຢອດເມັດ ແລະລົດໄຖນາສາມາດນຳໃຊ້ປູກຖົ່ວຂຽວໂດຍການປັບໃຫ້ຢູ່ໃນອັດຕາ 20 ກິໂລຕໍ່ເຮັກຕາ ແລະ ວິທີສຸດທ້າຍແມ່ນການປູກດ້ວຍອຸປະກອນຢອດເມັດເພາະຖົ່ວຂຽວສາ ມາດປູກໂດຍການນຳໃຊ້ອຸປະກອນການຢອດເມັດໂດຍກົງຊຶ່ງບໍ່ຈຳເປັນຕ້ອງໄດ້ໄຖ ແລະຄາດດິນໃຊ້ໄດ້ທັງໃນເຂດເນີນສູງ ແລະໃນເຂດທົ່ງນາ.

  ການກຳຈັດວັດສະພືດຄວນເຮັດ 1-2 ຄັ້ງ ເມື່ອຖົ່ວຂຽວມີອາຍຸປະມານ 20 ວັນ ແລະ 30 ວັນ ຫຼັງຈາກແຕກງອກໂດຍໃຊ້ຈັກ ຫຼື ເຄື່ອງມືເສຍຫຍ້າທີ່ມີໃນທ້ອງຖິ່ນ, ການໃຊ້ເຟືອງປົກຄຸມພາຍຫຼັງປູກເປັນການຄວບຄຸມວັດສະພືດ ແລະ ທັງຮັກສາຄວາມຊຸ່ມໃນດິນ.

  ຝຸ່ນເຄມີທີ່ໃຊ້ກັບຖົ່ວຂຽວຄວນເປັນສູດ NPK 15:15:15 ອັດຕາ 150 ກິໂລຕໍ່ເຮັກຕາ, ສ່ວນໄລຍະຂອງການໃສ່ຝຸ່ນ ແມ່ນຂຶ້ນກັບວິທີການປູກການແບບຍົກຮ່ອງໃຫ້ ໃສ່ຝຸ່ນຮອງພື້ນໃນເວລາຄາດ, ຖ້າປູກແບບບໍ່ໄດ້ໄຖດິນຄວນໃສ່ຝຸ່ນພາຍຫຼັງປູກໄດ້ 20 ວັນ ແລະຫຼັງຈາກເສຍຫຍ້າ, ຝຸ່ນຄວນໃສ່ຫ່າງຈາກຕົ້ນຖົ່ວ 5 ຊັງຕີແມັດ,ຖ້າປູກແບບຫວ່ານເມັດຈະໃສ່ຝຸ່ນໂດຍການຫວ່ານ ແລະຫວ່ານເມັດຖົ່ວຫຼັງການໄຖພວນດິນແລ້ວໄຖພວນດິນກົບຝຸ່ນອີກຄັ້ງໜຶ່ງ, ໃນກໍລະນີຊາວກະສິກອນມີເຄື່ອງຈັກຢອດເມັດພັນຫຼືອຸປະກອນຢອດເມັດຝຸ່ນສາມາດໃສ່ພ້ອມກັນກັບເວລາຢອດເມັດ, ຝຸ່ນຈະບໍ່ໄດ້ປະສົມກັບເມັດພັນເພາະມັນມີຊ່ອງໃສ່ເມັດ ແລະໃສ່ຝຸ່ນແຍກກັນແຕ່ຄວນປັບໃຫ້ຝຸ່ນຫ່າງຈາກເມັດ 3 ຊັງຕີແມັດ ແລະຢູ່ເລີກກວ່າເມັດ 2,5 ຊັງຕີ.

  ຕະຫຼອດລະດູການປູກຖົ່ວຂຽວຄວນໃຫ້ນ້ຳຢ່າງໜ້ອຍ 4 ຄັ້ງ ໂດຍສະເພາະຖ້າປູກຖົ່ວຂຽວໃນລະດູແລ້ງຄື: ໃສ່ຄັ້ງທຳອິດພາຍຫຼັງປູກໄດ້ 15 ວັນ, ຄັ້ງທີສອງໃສ່ເມື່ອປູກໄດ້ 25 ວັນ, ຄັ້ງທີສາມໃສ່ ພາຍຫຼັງປູກໄດ້ 40 ວັນ ແລະຄັ້ງສຸດທ້າຍແມ່ນປູກໄດ້ 50 ວັນ, ຊຶ່ງການໃຫ້ນ້ຳໃນແຕ່ລະຄັ້ງຄວນໃຫ້ດີນມີຄວາມຊຸ່ມພຽງພໍແຕ່ຄວນລະວັງບໍ່ໃຫ້ມີນ້ຳຂັງເພາະຈະມີຜົນກະທົບຕໍ່ການຈະເລີນເຕີບໂຕຂອງຕົ້ນຖົ່ວຂຽວ.

  ເນື່ອງຈາກຖົ່ວຂຽວເປັນພືດທີ່ມີການສຸກແກ່ນຂອງຝັກ ແລະ ເມັດບໍ່ພ້ອມກັນ, ສະນັ້ນຜູ້ປູກຈະຕ້ອງເກັບເອົາແຕ່ຝັກທີ່ແກ່ທີ່ມີສີດຳ, ອາຍຸການເກັບກ່ຽວຈຶ່ງຂຶ້ນຢູ່ກັບແນວພັນ ແລະສະພາບແວດລ້ອມເພື່ອຫຼຸດຜ່ອນຕົ້ນທຶນໃນການເກັບກ່ຽວຈຶ່ງຄວນເກັບກ່ຽວ 3 ຄັ້ງ ຄື: ຄັ້ງທຳອິດເມື່ອອາຍຸຖົ່ວຂຽວໄດ້ 55 ວັນ , ຄັ້ງທີສອງເມື່ອຖົ່ວຂຽວໄດ້ 60-65 ວັນ, ຖ້າຫາກຍັງມີຝັກສີຂຽວຢູ່ກໍເກັບຄັ້ງທີສາມເມື່ອໄດ້ ອາຍຸ 75 ວັນ, ບໍ່ຄວນໃຊ້ກ່ຽວຕັດຕົ້ນຖົ່ວພຽງແຕ່ໃຊ້ມີດເດັດເອົາຝັກທີ່ສຸກແກ່ເທົ່ານັ້ນ, ພາຍຫຼັງເກັບກ່ຽວຖົ່ວຂຽວແລ້ວຄວນໄຖກົບຕົ້ນຖົ່ວແລ້ວເອົານ້ຳເຂົ້າເຊ່ໄວ້ເພື່ອໃຫ້ໃບ, ລຳຕົ້ນ ແລະ ສິ່ງເສດເຫຼືອພືດເນົ່າເປື່ອຍກາຍເປັນຝຸ່ນ.      

 ໂດຍ: ປັອກ 

แชร์