ການຜະລິດກະສິກໍາເປັນສິນຄ້າ ຢູ່ແຂວງອັດຕະປື ມີທ່າຂະຫຍາຍຕົວ

ໃນປີ 2024 ທີ່ຜ່ານມາແຂວງອັດຕະປື ກໍ່ຄືພະແນກກະສິກໍາ ແລະປ່າໄມ້ແຂວງໄດ້ຊຸກຍູ້ສົ່ງເສີມປະຊາຊົນ ແລະຜູ້ປະກອບການດ້ານກະສິກໍາສຸມໃສ່ການຜະລິດກະສິກໍາເປັນສິນຄ້າ, ໃນນີ້ດ້ານການປູກຝັງໄດ້ສຸມໃສ່ພຶດທີ່ເປັນບຸລິມະສິດຕາມທ່າແຮງຂອງແຂວງ ເປັນຕົ້ນ: ເຂົ້າ, ອ້ອຍ, ກາເຟ, ໄມ້ໃຫ້ໝາກ ແລະພືດທາດແປ້ງ, ສ່ວນການລ້ຽງສັດ ແລະການປະມົງ ໄດ້ຊຸກຍູ້ໃຫ້ລ້ຽງແບບເປັນກຸ່ມ, ແບບເປັນຟາມເຫັນວ່າມີທ່າອ່ຽງຂະຫຍາຍຕົວຫຼາຍຂຶ້ນ.

ທ່ານ ກົງໃຈ ສີດາວົງ ຫົວໜ້າພະແນກກະສິກໍາ ແລະ ປ່າໄມ້ແຂວງອັດຕະປື ລາຍງານໃນປະຊຸມສະຫຼຸບວຽກງານກະສິກໍາ ແລະ ປ່າໄມ້ ປະຈໍາປີ 2024 ເມື່ອບໍ່ດົນແລ້ວນີ້ໃຫ້ຮູ້ວ່າ: ປີທີ່ຜ່ານມາພະແນກກະສິກໍາ ແລະ ປ່າໄມ້ແຂວງອັດຕະປື ໄດ້ສຸ່ມໃສ່ຈັດຕັ້ງປະຕິບັດພາລະບົດບາດຂອງຕົນ ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມຂອງແຂວງ ຄັ້ງທີ IX ເປັນແຜນຍຸດທະສາດຂອງຂະແໜງກະສິກໍາ ແລະ ປ່າໄມ້ ໂດຍໄດ້ສຸມໃສ່ 4 ແຜນງານໃຫຍ່,ໃນນັ້ນແຜນງານຜະລິດເປັນສິນຄ້າແມ່ນໜຶ່ງໃນ 4 ແຜນງານທີ່ໄດ້ຮັບການຈັດຕັ້ງປະຕິບັດຢ່າງເຂັ້ມແຂງໂດຍກໍານົດເອົາການປູກຝັງ, ການລ້ຽງສັດ ແລະການປະມົງເພື່ອຜະລິດເປັນສິນຄ້າ, ເຊິ່ງການປູກຝັງໄດ້ສຸມໃສ່ພືດທີ່ເປັນບຸລິມະສິດຕາມທ່າແຮງຂອງແຂວງ ເປັນຕົ້ນ: ເຂົ້າ, ອ້ອຍ, ກາເຟ, ໄມ້ໃຫ້ໝາກ ແລະ ພືດທາດແປ້ງ, ປະຕິບັດໄດ້ 59,613 ເຮັກຕາ ເທົ່າກັບ 87.48% ຂອງແຜນການ,ຜົນຜະລິດໄດ້ 1,747,168 ໂຕນ ລື່ນແຜນ 5.6% ໃນນັ້ນ: ການປູກພືດສິນຄ້າທົ່ວໄປປະຕິບັດໄດ້ 1,232 ເຮັກຕາ ລື່ນແຜນ 7%, ຜົນຜະລິດ 2,375 ໂຕນ ລື່ນແຜນ 42%. ການປູກພືດສິນຄ້າແບບຈຸດສຸມ ປະຕິບັດໄດ້ 32,970 ເຮັກຕາ ເທົ່າກັບ 96%, ຜົນຜະລິດ 957,618 ໂຕນ ລື່ນແຜນ 20% ໃນນັ້ນ, ເດັ່ນກວ່າໝູ່ແມ່ນການປູກມັນຕົ້ນ, ກາເຟ, ອ້ອຍ ໃນຮູບແບບ 2+3 ແລະ ການປູກເຂົ້າ, ການປູກພືດຂອງບໍລິສັດ ປະຕິບັດໄດ້ 25,413 ເຮັກຕາ ເທົ່າກັບ 77%, ຜົນຜະລິດ 787,195 ໂຕນ ເທົ່າກັບ 91.44%.

ການລ້ຽງສັດ ແລະ ການປະມົງ: ມາຮອດປັດຈຸບັນ ການລ້ຽງສັດ ແລະ ສັດນໍ້າ ເປັນສິນຄ້າ ແບບເປັນກຸ່ມ, ແບບເປັນຟາມແມ່ນມີທ່າອ່ຽງຂະຫຍາຍຕົວຫຼາຍຂື້ນ ທົ່ວແຂວງມີຟາມລ້ຽງສັດ 10 ຟາມ, ໃນນີ້: ຟາມທີ່ໄດ້ມາດຖານ ຟາມງົວ 1 ຟາມ ແລະ ຟາມໝູ 1 ຟາມ ແລະ ອີກ 8 ຟາມ ແມ່ນເປັນຟາມຂະໜາດນ້ອຍຂອງຫົວໜ່ວຍຄອບຄົວ, ມີຈໍານວນຝູງສັດທັງໝົດ 25,979 ໂຕ, ໃນນີ້: ຟາມງົວ 4 ຟາມ ຈຳນວນງົວ 8,539 ໂຕ, ຟາມໝູ 5 ຟາມ ຈໍານວນໝູ 10,898 ໂຕ ແລະ ຟາມສັດປີກ 1 ຟາມ, ຈໍານວນສັດປີກ 6,542 ໂຕ.

ທ່ານ ກົງໃຈ ສີດາວົງ ຫົວໜ້າພະແນກກະສິກໍາ ແລະປ່າໄມ້ແຂວງອັດຕະປື ໄດ້ລາຍງານໃຫ້ຮູ້ຕື່ມວ່າ: ປີຜ່ານມາ ແຂວງອັດຕະປື ໄດ້ມີການການສະໜອງພາຍໃນ, ການສົ່ງອອກ, ການນໍາເຂົ້າ ຜະລິດຕະພັນກະສິກໍາ ແລະ ປ່າໄມ້ ເປັນຕົ້ນ ການສະໜອງພາຍໃນ ພືດທາດແປ້ງ ປະຕິບັດໄດ້ 791,139 ໂຕນ ແລະ ອ້ອຍ ປະຕິບັດໄດ້ 614,101 ໂຕນ, ການສະໜອງສັດປ້ອນໂຮງຂ້າສັດ ປະຕິບັດໄດ້ 10,419 ໂຕ, ໃນນັ້ນ: ຄວາຍ 1,260 ໂຕ, ງົວ 1,746 ໂຕ ແລະ ໝູ 7,413 ໂຕ, ສ່ວນການສົ່ງອອກພືດ ແລະ ຜະລິດຕະພັນພືດ ປະຕິບັດໄດ້ 119,572 ໂຕນ ມີມູນຄ່າ 31,623,184.04 ໂດລາ, ການສົ່ງອອກສັດ ປະຕິບັດໄດ້ 164 ໂຕ: ຄວາຍ 63 ໂຕ, ງົວ 101 ໂຕ ແລະ ໄດ້ສົ່ງອອກຜະລິດຕະພັນ ປາ-ສັດນ້ຳ ຈໍານວນ 18.5 ໂຕນ. (ຕົວເລກການສົ່ງອອກແມ່ນເປັນສັດລ້ຽງຂອງຫົວໜ່ວຍຄອບຄົວ, ສ່ວນຫົວໜ່ວຍລ້ຽງສັດເປັນຟາມ ແລະ ຜູ້ປະກອບການໂຮງງານຂ້າສັດແມ່ນບໍ່ໄດ້ມີການສົ່ງອອກ).
ຂ່າວ: ພອນປະເສີດ

แชร์