ປູກອ້ອຍ ແລະກ້າເບ້ຍຢາງພາລາ ເຮັດໃຫ້ຄອບຄົວມີຢູ່ມີກິນ

ທ່ານ ຕົ້ນ ວິໄລສັກ ອາຍຸ 45ປີ ອາຊີບຊາວສວນ ຢູ່ບ້ານໂພນໄຮ ເມືອງເຊໂປນ ແຂວງສະຫວັນນະເຂດ ເປັນຄອບຄົວຕົວແບບ ໃນການປູກອ້ອຍ ແລະ ກ້າເບ້ຍຢາງພາລາ ເປັນສິນຄ້າ ສ້າງລາຍຮັບໃຫ້ແກ່ຄອບຄົວເຮັດໃຫ້ຊີວິດການເປັນຢູ່ນັບມື້ໄດ້ຮັບການພັດທະນາດີຂຶ້ນເລື້ອຍໆ.

ທ່ານ ຕົ້ນ ວິໄລສັກ ໃຫ້ສຳພາດຕໍ່ຜູ້ສື່ຂ່າວວ່າ: ພາຍໃນຄອບຄົວ ມີສະມາຊິກທັງໝົດ 9 ຄົນ, ຍິງ 3 ຄົນ; ໃນນັ້ນແຮງງານຫຼັກມີ 4 ຄົນ, ຍິງ 2 ຄົນ; ຜ່ານມາຕົນ ເອງໄດ້ຖືອາຊີບເຮັດນາປູກເຂົ້າເປັນຫຼັກ,ປູກຝັງ-ລ້ຽງສັດເປັນອາຊີບສຳຮອງ ໃນເບື້ອງຕົ້ນແມ່ນໄດ້ລ້ຽງງົວ 10 ແມ່, ແບ້ 10 ໂຕ, ຮອດປີ 2019 ສາມາດຂະຫຍາຍສັດລ້ຽງໄດ້ ງົວ 25 ໂຕ, ແບ້ 40 ໂຕ, ສາມາດເພີ່ມລາຍຮັບໃຫ້ຄອບຄົວ 100 ລ້ານກວ່າກີບ ມາຮອດປີ 2013 ໄດ້ປູກອ້ອຍໃນເນື້ອທີ່ 3 ຫາ 4 ເຮັກຕາ ພາຍຫຼັງ 9-10 ເດືອນ ກໍ່ສາມາດຕັດອ້ອຍຂາຍໄດ້ແລ້ວ ແລະສ້າງລາຍຮັບໃນໄລຍະດັ່ງກ່າວບໍ່ລຸດ 60 ລ້ານກີບຕໍ່ປີ ແຕ່ຖ້າທຽບໃສ່ທຶນຮອນ ແລະ ແຮງງານທີ່ໄດ້ລົງທຶນ ເຫັນວ່າຍັງບໍ່ທັນຕອບສະໜອງຜົນໄດ້ຮັບເທົ່າທີ່ຄວນ.

ໃນປີ 2020 ຍັງໄດ້ຮັບຜົນກະທົບຈາກການລະບາດພະຍາດໂຄວິດ-19 ອັນໄດ້ເຮັດໃຫ້ລາຍຮັບຫຼຸດລົງ ເນື່ອງຈາກເມືອງອ້ອມຂ້າງບໍ່ສາມາດມາຊື້ຜົນຜະລິດໄດ້; ຕໍ່ສະພາບດັ່ງກ່າວຕົນເອງຈຶ່ງມີແນວຄິດຫັນປ່ຽນໃໝ່ ຍ້ອນເຫັນໂອກາດ ແລະ ທ່າແຮງຂອງຄອບຄົວ ໂດຍສະເພາະເນື້ອທີ່ດິນຍັງເປົ່າວ່າງຫຼາຍ, ເຫັນໄດ້ເຖິງຂໍ້ມູນຂ່າວ-ສື່ສັງຄົມອອນລາຍ, ອິນເຕີເນັດ ແລະ ອື່ນໆ ທີ່ກ່ຽວກັບການປູກຝັງ-ລ້ຽງສັດ, ທີ່ສໍາຄັນໄດ້ໂອກາດໃນການປູກໄມ້ອຸດສະຫະກໍາ ທີ່ມີລາຄາສູງ ເປັນຕົ້ນຢາງພາລາ ບວກກັບຄວາມດຸໜັ່ນ, ຫ້າວຫັນ ແລະ ມັກຊອກຮູ້ວິທີການປູກຝັງ ທີ່ເປັນອາຊີບຕົ້ນຕໍຂອງຕົນ, ເຮັດໃຫ້ຕົນເອງມີແນວຄິດຢາກປູກຢາງພາລາ ເພື່ອເປັນສິນຄ້າສ້າງລາຍຮັບໃຫ້ຄອບຄົວ.

ແຕ່ຍ້ອນທຶນຮອນບໍ່ທັນພຽງພໍ, ຈຶ່ງໄດ້ເລີ່ມຈາກການກ້າເບ້ຍຢາງດ້ວຍຕົນເອງ ແບບລອງຜິດ, ລອງຖືກ, ດ້ວຍຄວາມຮັກໃນອາຊີບ ຈຶ່ງເຮັດຕົນເອງປະສົບຜົນສໍາເລັດໃນການກ້າເບ້ຍຢາງພາລາຂາຍເປັນສິນຄ້າ ເຊິ່ງສ້າງລາຍຮັບໃຫ້ຄອບຄົວ ໃນໄລຍະດັ່ງກ່າວໂດຍສະເລ່ຍປີລະ 400 ລ້ານກວ່າກີບ; ຈາກຜົນສໍາເລັດໃນການກ້າເບ້ຍຢາງຟາລາ, ຕົນເອງຈຶ່ງເລີ່ມປູກຢາງພາລາ ນັບແຕ່ປີ 2022 ເປັນຕົ້ນມາຈົນຮອດປະຈຸບັນ ມີເນື້ອທີ່ທັງໝົດ 4 ເຮັກຕາ, ຈໍານວນ 2 ພັນກວ່າຕົ້ນ, ຄາດວ່າໃນປີ 2025 ນີ້ ຄອບຄົວ ຈະມີລາຍຮັບຈາກການຂາຍເບ້ຍຢາງພາລາ ແລະ ອ້ອຍບໍ່ຕໍ່າກວ່າ 500 ລ້ານກີບ ແລະ ຄາດວ່າປີ 2029 ຈະມີລາຍຮັບຈາກການຂາຍ ນໍ້າຢາງ, ເບ້ຍຢາງ ແລະ ອ້ອຍ ລວມປະມານ 700 ລ້ານກີບຕໍ່ປີ; ຖ້າທຽບໃສ່ລາຍຈ່າຍໃນການດໍາລົງຊີວິດຂອງຄອບຄົວໃນປະຈຸບັນ ແລະ ລາຍຈ່າຍລົງທຶນເຂົ້າໃນການຜະລິດ, ຄອບຄົວທ່ານ ຕົ້ນ ວິໄລສັກ ຍັງມີເງິນເຫຼືອເກັບ 70 ລ້ານກີບຕໍ່ປີ ສາມາດສົ່ງລູກເຂົ້າຮຽນວິຊາຊີບໃນລະດັບຊັ້ນສູງ, ຊື້ລົດ, ເຮັດເຮືອນ, ປຸກຮ້ານຂາຍເຄື່ອງຍ່ອຍ ເພື່ອຍົກລະດັບຊີວິການເປັນຢູ່ພາຍໃນຄອບຄົວໃຫ້ດີຂຶ້ນເລື້ອຍໆ
ສັງລວມແລ້ວ, ທ່ານ ຕົ້ນ ວິໄລສັກ ໄດ້ເຮັດກະເສດແບບປະສົມປະສານ: ເຮັດນາ, ລ້ຽງປາ ໃນເນື້ອທີ່ 01 ເຮັກຕາ, ປູກອ້ອຍ 01 ເຮັກຕາ, ກ້າເບ້ຍ ແລະ ປູກຢາງພາລາອີກ 04 ເຮັກຕາ, ລວມທັງໝົດ 06 ເຮັກຕາ, ຖືວ່າຕົນເອງໄດ້ນໍາໃຊ້ຊັບພະຍາ ກອນທີ່ມີໃນປະຈຸບັນ ເຕັມຄວາມສາມາດບົ່ມຊ້ອນທີ່ມີ.


ຈາກຜົນສໍາເລັດທັງໝົດທີ່ກ່າວມານັ້ນ ກໍ່ຍ້ອນແນວທາງນະໂຍບາຍຂອງພັກ-ລັດ ໂດຍສະເພາະກໍ່ແມ່ນແນວທາງການສ້າງເສດຖະກິດເອກະລາດ ເປັນເຈົ້າຕົນເອງ ບວກກັບການເອົາໃຈໃສ່ອູ້ມຊູຊ່ວຍເຫຼືອຈາກຄະນະພັກ, ຄະນະນໍາຂອງເມືອງ ແລະ ອໍານາດການປົກຄອງບ້ານ ຈຶ່ງເຮັດໃຫ້ຄອບຄົວທ່ານ ຕົ້ນ ວິໄລສັກ ມີຊີວິດການເປັນຢູ່ທີ່ອຸດົມສົມບູນ ແລະ ກາຍເປັນຄອບຄົວຕົວແບບໜຶ່ງຂອງເມືອງ.

Cr: Media Laos

แชร์