ຢຶດຖືອາຊີບປູກກາເຟ ເປັນສິນຄ້າພາຄອບຄົວພົ້ນທຸກ

ຄອບຄົວ ທ່ານ ໄຊພອນ ແສງອໍາໄພ ອາຍຸ 33 ປີ ບ້ານດາກມັນ ເມືອງດາກຈຶງ ແຂວງເຊກອງ ແມ່ນຄອບຄົວໜຶ່ງທີ່ຢຶດຖືອາຊີບການປູກກາເຟເປັນສິນຄ້າ ເຮັດໃຫ້ຄອບຄົວຫລຸດພົ້ນອອກຈາກຄວາມທຸກຍາກ, ຊີວິດການເປັນຢູ່ດີຂຶ້ນ ແລະເປັນຄອບຄົວຕົວແບບການປູກກາເຟເປັນສິນຄ້າສົ່ງອອກແບບຍືນຍົງຂອງເມືອງດາກຈຶງ.

ທ່ານ ໄຊພອນ ແສງອໍາໄພ ໄດ້ກ່າວເຖິງຜົນສໍາເລັດການປູກກາເຟເປັນສິນຄ້າ ໃນໂອກາດຂຶ້ນປະກອບຄໍາເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງດາກຈຶງ ເມື່ອບໍ່ດົນຜ່ານມາວ່າ: ໃນຄອບຄົວມີ 7 ຄົນ, ຍິງ 3 ຄົນ ແຮງງານຕົ້ນຕໍ 3 ຄົນ, ຍິງ 1 ຄົນ. ກ່ອນໜ້ານີ້ ກໍຄື ປີ 2017 ຄອບຄົວຕົນເອງ ແມ່ນຄອບຄົວໜຶ່ງທີ່ທຸກຍາກ ມີອາຊີບຖາງປ່າເຮັດໄຮ່ປູກເຂົ້າ, ປູກກາ ແລະ ລ້ຽງສັດ ແຕ່ເຮັດແບບປະຖົມປະຖານອາໄສທໍາມະຊາດເປັນສ່ວນໃຫຍ່, ຜົນຜະລິດບາງປີກໍ່ໄດ້ຫລາຍ ແລະ ບາງປີກໍ່ບໍ່ຫລາຍ, ເຂົ້າກິນບາງປີກໍ່ກຸ້ມກິນ ແລະ ບາງປີກໍ່ບໍ່ກຸ້ມກິນ, ຊີວິດການເປັນຢູ່ຂອງຄອບຄົວໃນຕອນັ້ນ ພົບຄວາມຫຍຸ້ງຍາກຫລາຍດ້ານ. ເມື່ອເປັນຄືແນວນັ້ນ, ຕົນເອງຈຶ່ງໄດ້ປຶກສາຫາລືກັບຄອບຄົວ ເພື່ອຫາແນວທາງພັດທະນາຊີວິດການເປັນຢູ່ ຂອງຄອບຄົວໃຫ້ດີຂຶ້ນ ແລະ ຕັດສິນໃຈເລືອກເອົາການປູກກາເຟກາຕີມໍເປັນສິນຄ້າ ເຊິ່ງເປັນກາເຟທີ່ປູກງ່າຍ, ບົວລະບັດຮັກສາງ່າຍ, ທົນແດດ-ທົນຝົນ ແລະ ເໝາະແກ່ອາກາດໜາວ, ພ້ອມທັງ ຕົນເອງກໍມັກໃນດ້ານນີ້ ຈຶ່ງໄດ້ຊອກຮູ້ຮໍ່າຮຽນ ແລະ ຖອດຖອນບົດຮຽນ ກ່ຽວກັບວິທີການປູກ-ການບົວລະບັດຮັກສາ ນໍາວາລະສານ-ໜັງສືພິມ, ບັນດາໂຄງການ ແລະ ຂະແໜງການຕ່າງໆ ຂອງພາກລັດ. ມາຮອດປີ 2020 ໄດ້ເລີ່ມລົງມືປູກໃນເນື້ອທີ່ 4,3 ເຮັກຕາ ໂດຍໄດ້ຮັບທຶນສະໜັບສະໜູນ ຈາກໂຄງການອີ່ພັດ ແລະ ໂຄງການແຄ໌. ໃນໄລຍະ 3 ປີທໍາອິດ ທີ່ກາເຟບໍ່ທັນໄດ້ຮັບຜົນຜະລິດ, ຕົນເອງ ແລະ ຄອບຄົວ ກໍໄດ້ບຸກເບີກເນື້ອທີ່ເຮັດນາປູກເຂົ້າ 0,4 ເຮັກຕາ ພ້ອມທັງລ້ຽງສັດ ປະເພດງົວ, ແບ້, ໝູ ແລະ ຮັບເຮັດວຽກກໍ່ສ້າງ (ເຮັດເຮືອນ) ໃຫ້ປະຊາຊົນພາຍໃນບ້ານ ແລະ ບ້ານໃກ້ຄຽງ ເພື່ອຫາລ້ຽງຄອບຄົວ. ຈົນມາຮອດປີ 2023-2024 ກາເຟໃຫ້ໝາກ, ເກັບກູ້ ແລະ ຂາຍໝາກກາເຟ (ໝາກແດງ) ສະເລ່ຍ 10 ໂຕນ/ປີ, ສາມາດສ້າງລາຍຮັບ 100 ລ້ານກວ່າກີບ/ປີ. ສະນັ້ນ, ຈຶ່ງສາມາດເວົ້າໄດ້ວ່າ ນັບແຕ່ຄອບຄົວຕົນເອງ ໄດ້ຫັນມາສຸມໃສ່ການປູກກາເຟເປັນສິນຄ້າ ເຮັດໃຫ້ຊີວິດການເປັນຢູ່ຂອງຄອບຄົວນັບມື້ດີຂຶ້ນເປັນກ້າວໆມາ. ປັດຈຸບັນ ສາມາດສ້າງເຮືອນຢູ່ເຄິ່ງຖາວອນໄດ້ 1 ຫລັງ, ມີພາຫະນະຮັບໃຊ້, ມີດິນປຸກສ້າງ ແລະ ມີເງິນໃຊ້ຈ່າຍໝູນວຽນໃນຄອບຄົວ ຈໍານວນໜຶ່ງ.

ທ່ານ ໄຊພອນ ແສງອໍາໄພ ກ່າວວ່າ: ອາຊີບການປູກກາເຟ ກໍຄືການຜະລິດກະສິກໍາເປັນສິນຄ້າ ແມ່ນອາຊີບໜຶ່ງທີ່ພັກ-ລັດຖະບານ ກໍຄືຄະນະພັກ, ອົງການປົກຄອງແຂວງເຊກອງ ເວົ້າລວມ, ເວົ້າສະເພາະເມືອງດາກຈຶງ ໃຫ້ການສະໜັບສະໜູນຊຸກຍູ້ສົ່ງເສີມ. ສະນັ້ນ, ເພື່ອສືບຕໍ່ຜັນຂະຫຍາຍແນວທາງດັ່ງກ່າວ ໃນຕໍ່ໜ້າ, ຕົນເອງ ແລະ ຄອບຄົວ ຈະສືບຕໍ່ເພີ່ມທະວີໃນການສຶກສາ, ຄົ້ນຄວ້າຮໍ່າຮຽນ ແລະ ຖອດຖອນບົດຮຽນ ນໍາບັນດາຂະແໜງການ ເພື່ອໃຫ້ໄດ້ເຕັກນິກອັນໃໝ່ ກ່ຽວກັບການປູກ ແລະ ການບົວລະບັດຮັກສາກາເຟ ເພື່ອຍົກສູງສະມັດຕະພາບຜົນຜະລິດສູງຂຶ້ນ ທາງດ້ານປະລິມານ ແລະ ຄຸນນະພາບ ຕອບສະໜອງຕາມຄວາມຕ້ອງການຂອງຕະຫລາດພາຍໃນ ແລະ ຕ່າງປະເທດ ໂດຍສອດຄ່ອງກັບມະຕິ 04 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ຢ່າງແຂງແຮງ.
ໂດຍ: ສ. ແກ້ວໄຊຍະວົງ

แชร์