ເສດຖະກິດເມືອງໝື່ນ ຂະຫຍາຍຕົວສະເລ່ຍ 5,7% ຕໍ່ປີ

ພາຍໃຕ້ການຊີ້ນຳ-ນຳພາຂອງ ອົງຄະນະພັກເມືອງໝື່ນ ຕະຫຼອດໄລຍະ 5 ປີຜ່ານມາ ເຮັດໃຫ້ເມືອງໝື່ນມີສະຖຽນລະພາບ, ມີຄວາມໝັ້ນທ່ຽງທາງດ້ານການເມືອງ ສັງຄົມມີຄວາມສະຫງົບສຸກລວມທັງການພັດທະນາເສດຖະກິດຂອງເມືອງກໍ່ມີການຂະຫຍາຍຕົວຢ່າງຕໍ່ເນື່ອງໝັ້ນທ່ຽງດ້ວຍຈັງຫວະການຂະຫຍາຍຕົວສະເລ່ຍ 5,7% ຕໍ່ປີ, ລວມຍອດຜະລິດຕະພັນພາຍໃນ ບັນລຸ 1,175 ຕື້ກວ່າກີບ, ສະເລ່ຍລາຍໄດ້ຕໍ່ຄົນຕໍ່ປີບັນລຸໄດ້ 25 ລ້ານກວ່າກີບ, ຊຶ່ງຂໍ້ມູນດັ່ງກ່າວໄດ້ຖືກລາຍງານຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງໝື່ນຄັ້ງທີ IV ໃນວັນທີ 18-19 ກຸມພາ 2025ນີ້, ໂດຍມີ ສະຫາຍ ພູທະນູເພັດ ໄຊສົມບັດ ຮອງເລຂາພັກແຂວງ ຮອງເຈົ້າແຂວງວຽງຈັນ, ສະຫາຍ ສອນໄຊ ຫຼວງອາໄພ ເລຂາພັກເມືອງ ເຈົ້າເມືອງໆໝື່ນ , ມີບັນດາສະຫາຍແຂກຖືກເຊີນ ພ້ອມດ້ວຍຜູ້ແທນສົມບູນເຂົ້າຮ່ວມ 108 ສະຫາຍ.

ສະຫາຍ ມິດສາຄອນ ອິນຖະປັດຖາ ຮອງເລຂາພັກເມືອງໝື່ນໄດ້ຜ່ານຮ່າງລາຍງານການເມືອງຂອງອົງຄະນະພັກເມືອງຕໍ່ກອງປະຊຸມຄັ້ງນີ້ວ່າ: ຕະຫຼອດໄລຍະ 5 ປີຜ່ານມາ ເມືອງໝື່ນ ໄດ້ມີສະຖຽນລະພາບດ້ານການເມືອງ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ສັງຄົມມີຄວາມສະຫງົບເປັນລະບຽບຮຽບຮ້ອຍດີ ສະແດງອອກຄື: ດ້ານເສດຖະກິດມີການຂະຫຍາຍຕົວ ສະເລ່ຍ 5,7% ຕໍ່ປີ, ລາຍໄດ້ສະເລ່ຍຕໍ່ຄົນຕໍ່ປີເທົ່າກັບ 25 ລ້ານກວ່າກີບ, ເອົາໃຈໃສ່ພັດທະນາຕາມເເລວເສດຖະກິດ 443 ຂອງແຂວງວາງອອກໂດຍໄດ້ສຸມໃສ່ການຜະລິດກະສິກຳຕາມກົດໄກເສດຖະກິດການຕະຫຼາດຫັນກະສິກຳແບບທຳມະຊາດໄປສູ່ທັນສະໄໝເທື່ອລະກ້າວໂດຍການນຳໃຊ້ເຕັກນິກວິທະສາດເຂົ້າມາຊ່ວຍໃນການຜະລິດກະສິກຳໃຫ້ຫຼາຍຂຶ້ນເຊິ່ງສາມາດຜະລິດເຂົ້າໄດ້ 21,000 ກວ່າໂຕນ, ສະເລ່ຍເຂົ້າກິນໄດ້ 445 ກິໂລຕໍ່ຄົນຕໍ່ປີ, ການລ້ຽງສັດມີການຂະຫຍາຍຕົວ 3%ຕໍ່ປີ ສາມາດສະໜອງ ຊີ້ນປາ ແລະ ໄຂ່ ໄດ້ 51,000 ກວ່າກິໂລ, ສົ່ງເສີມໃຫ້ມີການປັບປຸງຜົນຜະລິດກະສິກຳ ສ້າງມູນຄ່າເພີ່ມເປັນສິນຄ້າສົ່ງອອກຕ່າງປະເທດ ເດັ່ນກວ່າໝູ່ແມ່ນ: ການປູກມັນຕົ້ນ ຢາງພາລາ ສາລີແຂງ ແລະ ໝາກເດືອຍ,ຊຸກຍູ້ສົ່ງເສີມເພື່ອອຳນວຍຄວາມສະດວກໃຫ້ແກ່ການດຳເນີນທຸລະກິດ,ການບໍລິການ ແລະ ການຄ້າຊາຍແດນຜ່ານດ່ານບ້ານວັງສາມາດສົ່ງສິນຄ້າອອກ 73,000 ກວ່າໂຕນ ມູນຄ່າ 34 ພັນຕື້ກວ່າກີບ, ສົ່ງເສີມສິນຄ້າຫັດຖະກຳຈັກການທີ່ເປັນມູນເຊື້ອທີ່ໄດ້ຮັບກາໝາຍສິນຄ້າໂອດ໋ອບ ຄື: ເຫຼົ້າໄຫບ້ານປາກຈັນ; ມາຮອດປະຈຸບັນ ປະຊາຊົນຢູ່ບັນດາ ບ້ານ ແລະ ຄອບຄົວ ໃນທົ່ວເມືອງ ສາມາດຊົມໃຊ້ໄຟຟ້າແລ້ວກວມເອົາ 100%.

ດ້ານວັດທະນະທໍາ-ສັງຄົມ: ສູມໃສ່ການພັດທະນາຊັບພະຍາກອນມະນຸດໃຫ້ມີຄຸນະພາບສູງເທື່ອລະກ້າວ, ປັບປຸງຄຸນນະພາບການສຶກສາຕາມ 3 ລັກສະນະ 5 ຫຼັກມູນ, ຊຸກຍູ້ການສຶກສາກ່ອນໄວຮຽນແລະຊັ້ນປະຖົມ-ມັດທະຍົມໄດ້ຮັບການຂະຫຍາຍຕົວທັງດ້ານປະລິມານແລະຄຸນນະພາບ ເຮັດໃຫ້ບັນຫາອັດຕາການປະລະການຮຽນມີທ່າອ່ຽງດີຂຶ້ນສ້າງໄດ້ນັກຮຽນເກັ່ງຕິດອັນດັບປະເທດ 2 ນ້ອງ ແລະອັນດັບແຂວງ 10 ນ້ອງ; ປັບປຸງພື້ນຖານໂຄງລ່າງສາທາລະນະສຸກເພື່ອຮອງຮັບການໃຊ້ບໍລິການຂອງປະຊາຊົນ, ເອົາໃຈໃສ່ຂະຫຍາຍຕາໜ່າງການບໍລິການປິ່ນປົວໄປສູ່ກ່ມບ້ານໃຫ້ຫຼາຍຂຶ້ນ ຊຸກຍູ້ດ້ານໂພຊະນາການເຊື່ອມສານ-ກວດສຸຂະພາບ ແມຍິງຖືພາ ແມ່ຫລັງຄອດ ແລະເດັກນ້ອຍໃນເກນອາຍຸເຮັດໃຫ້ອັດຕາການຕາຂອງແມ່ແລະເດັກຫຼຸດລົງ; ສຸມໃສ່ວຽກງານພັດທະນາຊົນນະບົດ ແລະແກ້ໄຂຄວາມທຸກໂດຍເລັ່ງໃສ່ແກ້ໄຂບັນຫາປາກທ້ອງຂອງພໍ່ແມ່ປະຊາຊົນສາມາດລົບລ້າງຄວາມທຸກຍາກໄດ້ ທັງໝົດ 25 ຄອບຄົວ ຍັງເລືອກ 35 ຄອບຄົວ.

ຂ່າວ: ແຂວງວຽງຈັນໂພສ໌

แชร์