ສະພາຜູ້ວ່າການກອງທຶນສາກົນ ເພື່ອການພັດທະນາກະສິກໍາ ຫາລືຫຼາຍປະເດັນ

ໃນລະຫວ່າງວັນທີ 12-13 ກຸມພາ 2025, ທ່ານ ປອ. ນາງ ຈັນທະຄອນ ບົວລະພັນ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ແລະທ່ານ ພູວົງ ກິດຕະວົງ ຮອງລັດຖະມົນຕີ ກະຊວງການເງິນ ພ້ອມດ້ວຍຄະນະວິຊາການ ຂອງ 02 ກະຊວງ ໄດ້ເຂົ້າຮ່ວມກອງປະຊຸມຂອງສະພາຜູ້ວ່າການກອງທຶນສາກົນເພື່ອການພັດທະນາກະສິກໍາ (IFAD) ຄັ້ງທີ 48ຢູ່ນະຄອນຫຼວງໂຣມ, ປະເທດອີຕາລີ. ພາຍໃຕ້ຫົວຂໍ້ “ ການເລັ່ງລົງທຶນເລີ່ມຈາກຫຼັກໝາຍ ທີ 1 – Catalysing investment at the 1st mile” ເພື່ອເພີ່ມຄວາມສໍາຄັນການສະໜັບສະໜູນການພັດທະນາເຂດຊົນນະບົດທີ່ເປັນຈຸດເລີ່ມຕົ້ນຂອງການຜະລິດສິນຄ້າກະສິກຳໂດຍສະເພາະ ການສົ່ງເສີມຊາວກະສິກອນຂະໜາດນ້ອຍໃຫ້ສາມາດຜະລິດອາຫານໄດ້ຫຼາຍກວ່າເກົ່າ.

ບັນດາຜູ້ວ່າການ ໄດ້ປຶກສາຫາລື ຫຼາຍປະເດັນ ເຊັ່ນ: ການແລກປ່ຽນແນວຄວາມຄິດໃໝ່ ທີ່ເປັນນະວັດຕະກຳໃນການສ້າງການຮ່ວມມືທີ່ເປັນຜົນປະໂຫຍດ ຕໍ່ການຫຼຸດຜ່ອນຄວາມອຶດຫິວ ແລະ ຄວາມທຸກຍາກ; ຊ່ອງທາງການສະໜອງທຶນເພີ່ມເຂົ້າໃນການລົງທຶນພັດທະນາເຂດຊົນນະບົດ ແລະ ເພີ່ມຄວາມໝັ້ນຄົງທາງດ້ານສະບຽງອາຫານ; ຄວາມສຳຄັນທີ່ເປັນຈຸດປ່ຽນຂອງການລົງທຶນໃນລະບົບສະບຽງອາຫານເຂດຊົນນະບົດ ເພື່ອບັນລຸເປົ້າໝາຍການພັດທະນາແບບຍືນຍົງ; ການດຳເນີນວຽກງານຂອງ IFAD ໃນສະພາບການເຕີບໂຕທີ່ຫຼາກຫຼາຍ; ບັນດາສິ່ງທ້າທາຍຕໍ່ການພັດທະ ນາຂີດຄວາມສາມາດ ເພື່ອຈັດຕັ້ງປະຕິບັດແຜນງານການຫັນປ່ຽນ ການພັດທະນາເຂດຊົນນະບົດໃນບັນດາປະເທດສະມາຊິກ ແລະ ໝາກຜົນຂອງການນຳໃຊ້ທຶນທີ່ລະດົມໄດ້ຈາກການຄ່ຽນທຶນ ຄັ້ງທີ 12 (IFAD 12) ໄລຍະ ປີ 2022 – 2025; ການແລກປ່ຽນບົດຮຽນກ່ຽວກັບການຮ່ວມມືພາຍໃຕ້ ການຮ່ວມມືລະຫວ່າງບັນດາປະເທດກຳລັງພັດທະນາ ຫຼື South – South Cooperation ແລະ ການຮ່ວມມືສາມຝ່າຍ (ການຮ່ວມມືລະຫວ່າງປະເທດກໍາລັງພັດທະນາ ແລະ ປະເທດພັດທະນາ ລວມທັງ ອົງກອນຫຼາຍຝ່າຍ ເຊັ່ນ: ບັນດາສະຖາບັນສາກົນ ແລະ ອົງການຈັດຕັ້ງສາ ກົນ – Triangle Cooperation).

ທ່ານ ປອ. ນາງ ຈັນທະຄອນ ບົວລະພັນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ຂຶ້ນບັນຍາຍຮ່ວມໃນເວທີສົນທະນາແລກປ່ຽນ ພາຍໃຕ້ຫົວຂໍ້: ການເປີດຊ່ອງທາງການຮ່ວມມືແບບພັນທະມິດສາກົນ ເພື່ອແກ້ໄຂບັນຫາຄວາມອຶດຫິວ ແລະຄວາມທຸກຍາກ ‘Unlocking the Potential of the Global Alliance Against Hunger and Poverty’. ທ່ານໄດ້ໃຫ້ຮູ້ວ່າ: ພັນທະມິດສາກົນ ເພື່ອຕ້ານຄວາມອຶດຫິວ ແລະ ຄວາມທຸກຍາກ ແມ່ນການສະແດງເຖິງຄວາມມຸ່ງໝັ້ນລວມຂອງທຸກພາກສ່ວນ ທີ່ຈະຫຼຸດຜ່ອນ ແລະ ລຶບລ້າງ ບັນດາສິ່ງທ້າທາຍ ທີ່ຕິດພັນກັບຄວາມອຶດຫິວ ແລະ ຄວາມທຸກຍາກ. ໃນນັ້ນ, ແມ່ນຮຽກຮ້ອງໃຫ້ເພີ່ມທະວີ ການປະສານສົມ ທົບ, ການແກ້ໄຂບັນຫາທີ່ມີນະວັດຕະກໍາໃໝ່, ການສ້າງຄວາມເຂັ້ມແຂງ ແລະ ການສະໜັບສະໜູນດ້ານນະໂຍບາຍທີ່ເໝາະສົມ.
ຄະນະຜູ້ແທນ ສປປ ລາວ ໄດ້ພົບປະກັບ ທ່ານ ໂດນັລ ບຣາວ, ຮອງປະທານ IFAD ຊີ້ນໍາການບໍລິຫານ ແລະ ການດຳເນີນວຽກງານ. ທັງສອງຝ່າຍໄດ້ຕີລາຄາການຮ່ວມມືລະຫວ່າງ ສປປ ລາວ ແລະ IFAD ໃນໄລຍະ 47 ປີ ນັບແຕ່ປີ 1978 ຮອດປັດຈຸບັນ, ໂດຍໄດ້ສ້າງແຜນການຮ່ວມມື ແຕ່ລະໄລຍະ ເພື່ອສະໜັບສະໜູນ ການຈັດຕັ້ງປະຕິບັດຍຸດທະສາດການພັດທະນາຂະແໜງກະສິກໍາ ແລະ ຊົນນະບົດ. ປັດຈຸບັນແມ່ນກຳລັງກະກຽມຍຸດທະສາດການຮ່ວມມື ໄລຍະ ປີ 2026 – 2032 ຕ້ອງຮັບປະກັນ ໃຫ້ເຊື່ອມສານ ແລະ ສອດຄ່ອງກັບຍຸດທະສາດ ແລະ ນະໂຍບາຍ ການພັດທະນາ ຂອງ ສປປ ລາວ ໂດຍສະເພາະການພັດທະນາຂະແໜງກະສິກຳ ແລະ ຍຸດທະສາດ IFAD ປີ 2030 ແລະ ຈຸດປະສົງ ການຄ່ຽນທຶນຄັ້ງທີ 13 ຂອງ IFAD. ຝ່າຍລາວ ໄດ້ສະເໜີ IFAD ເພີ່ມການຊ່ວຍເຫຼືອ ສປປ ລາວ ໂດຍນຳເອົາບົດຮຽນ ແລະ ຜົນນງານ ພົ້ນເດັ່ນ ຂອງຕົນ ເຂົ້າມາຊ່ວຍພັດທະນາການປູກຝັງ ລ້ຽງສັດ ການຕະຫຼາດ ແລະ ການສ້າງລາຍໄດ້ໃຫ້ຊຸມຊົນເຂດຊົນນະບົດ ພ້ອມທັງ ການສ້າງລະບົບສະບຽງອາຫານ ເພື່ອຫຼຸດຜ່ອນໄພອຶດຫິວ ແລະ ຄວາມທຸກຍາກ.

ແຜນການຮ່ວມມືໃນໄລຍະໃໝ່ ຄວນມີຈຸດສຸມກວ່າເກົ່າ ຮັບປະກັນການອອກແບບ ແລະ ການຈັດຕັ້ງປະຕິບັດໂຄງການ ທີ່ມີຄຸນນະພາບ ແລະ ປະສິດທິຜົນ ຢ່າງທົ່ວເຖິງຫຼາຍຂຶ້ນ, ເພີ່ມທະວີການມີສ່ວນຮ່ວມຂອງຫຼາຍພາກສ່ວນ ໂດຍສະເພາະ ພາກເອ ກະຊົນ, ປະສານສົມທົບກັບບັນດາຜູ້ໃຫ້ທຶນອື່ນ ເພື່ອຂົນຂວາຍທຶນ ໃນຮູບແບບຕ່າງ ໆ ເຊັ່ນ: ການສະໜອງທຶນຮ່ວມ ແລະ ຈັດສັນທຶນຊ່ວຍເຫຼືອລ້າ ໃນອັດຕາສ່ວນທີ່ຈະປະກອບສ່ວນຫຼຸດພາລະການກູ້ຢືມ. ພ້ອມນີ້, ຄວນສຸມໃສ່ ການຄໍ້າປະກັນສະບຽງອາ ຫານ ແລະ ໂພຊະນາການ ໃນພື້ນທີ່ທຸກຍາກ ຢູ່ ສປປ ລາວ, ການພັດທະນາກະສິກຳ ເພື່ອເປັນສິນຄ້າ, ການປຸງແຕ່ງ ແລະ ການເພີ່ມມູນຄ່າ, ການເຂົ້າຫາແຫລ່ງທືນ ຂອງຊາວກະສິກອນ ແລະ ຜຸ້ປະກອບການ ແລະ ການພັດທະນາໂຄງລ່າງພື້ນຖານໃນເຂດຊົນນະບົດ ເຊັ່ນ: ຫົນທາງ, ຊົນລະປະທານ ແລະ ນໍ້າສະອາດ ເພື່ອຊຸກຍູ້ການຜະລິດ, ປັບປຸງວຽກໂພຊະນາການ ແລະ ການເຂົ້າເຖິງຕະຫລາດ. ການເສີມຂະຫຍາຍບົດບາດ ຫ້ອງການປະສານງານ IFAD ຢູ່ ສປປ ລາວ ຫຼື ໃຫ້ມີຫ້ອງການຜູ້ຕາງໜ້າ IFAD ເພື່ອໃຫ້ສາມາດປະສານກັບພາກສ່ວນທີ່ກ່ຽວຂ້ອງ ຂອງ ສປປ ລາວ ແລະ ສົມທົບກັບບັນດາຜູ້ໃຫ້ທຶນ ແລະ ຄູ່ຮ່ວມພັດທະນາ ທີີ່ເຄື່ອນໄຫວວຽກງານ ຢູ່ ສປປ ລາວ ໄດ້ຄ່ອງຕົວຂຶ້ນກວ່າເກົ່າ ໂດຍສະເພາະການຮ່ວມມື ຂອງ IFAD, FAO ແລະ WFP.

ຕໍ່ການສະເໜີທີ່ກ່າວມາ ທ່ານ ຮອງປະທານ ເຫັນດີຈະສືບຕໍ່ ແລະ ເພີ່ມທະວີການຊ່ວຍເຫຼືອໃນຂົງເຂດທີ່ກ່າວມາ ໂດຍຈະສົມທົບກັບພາກສ່ວນທີ່ກ່ຽວຂ້ອງເພື່ອປຶກສາຫາລື ແລະ ຄົ້ນຄວ້າຊ່ອງທາງທີ່ສາມາດປະຕິບັດ ໂດຍອີງໃສ່ການຈັດສັນທຶນຈາກ ການຄ່ຽນທຶນ ຄັ້ງທີ 13 (IFAD13), ເຊິ່ງ ໄດ້ເພີ່ມການຈັດສັນທຶນໃຫ້ ສປປ ລາວ 44 % ເມື່ອທຽບໃສ່ IFAD12. ສ່ວນການຂະຫຍາຍຫ້ອງການຜູ້ຕາງໜ້າ ຢູ່ ແຕ່ລະປະເທດສະມາຊິກ, IFAD ກໍາລັງປະເມີນການເຄື່ອນໄຫວວຽກງານຂອງແຕ່ລະຫ້ອງການ ເພື່ອຈັດສັນໃຫ້ແທດເໝາະ ແລະ ສົມຄູ່ກັບສະພາບວຽກງານໃນແຕ່ລະພາກພື້ນ.
ຂ່າວ: ກະຊວງກະສິກໍາ ແລະ ປ່າໄມ້

แชร์