ປະທານອົງການກວດກາແຫ່ງລັດ ຢ້ຽມຢາມໂຄງການກໍ່ສ້າງຂົວມິດຕະພາບລາວ-ໄທ ແຫ່ງທີ 5

ວັນທີ 14 ກຸມພາ 2025 ຜ່ານມາ ທ່ານ ຄຳພັນ ພົມມະທັດ ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງພ້ອມດ້ວຍຄະນະນຳແຂວງບໍລິຄຳໄຊ ລົງຢ້ຽມຢາມໂຄງການກໍ່ສ້າງຂົວມິດຕະພາບລາວ-ໄທ ແຫ່ງທີ 5 ລະຫວ່າງ ແຂວງບໍລິຄຳໄຊ ກັບ ແຂວງບຶງການ ຣາຊະອານາຈັກໄທ ໂດຍມີທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງຂົວຂ້າມນໍ້າຂອງ ລາວ-ໄທແຫ່ງທີ 5 ໃຫ້ການຕ້ອນຮັບ.

ໂອກາດນີ້, ທ່ານ ໄລທອງ ພົມມະວົງ ໄດ້ລາຍງານຄວາມເປັນມາ ແລະຄວາມຄືບໜ້າຂອງໂຄງການດັ່ງກ່າວວ່າ: ໂຄງການກໍ່ສ້າງຂົວຂ້າມນໍ້າຂອງມິດຕະພາບ ລາວ-ໄທ ແຫ່ງທີ 5 (ບໍລິຄຳໄຊ-ບຶງການ) ໄດ້ເລີ່ມມີການສຶກສາຄວາມເປັນໄປໄດ້, ສໍາຫ]ວດ, ອອກແບບ ແຕ່ປີ 2014 ແລະ ໄດ້ອອກແບບລະອຽດສໍາເລັດ ໃນປີ 2016 ໂດຍໄດ້ຮັບການຊ່ວຍເຫລືອລ້າຈາກອົງການ NEDA ປະເທດໄທ, ແຕ່ຍ້ອນມີການສະເໜີໃຫ້ມີການປັບປຸງຮູບແບບ ຂອງເສົາຄຶງສາຍກາບກາງນໍ້າເປັນ 3 ໄລຍະ ຄື: ຮູບແຄນຄູ່, ຮູບດອກຈັນ ແລະກັບມາເປັນຮູບແຄນອີກເທື່ອໜຶ່ງ ແລະໄດ້ຖືກຮອງຮັບຈາກລັດຖະບານ 2 ຝ່າຍໃນປີ 2018, ໂຄງການດັ່ງກ່າວໄດ້ຮັບເງິນກູ້ຢືມດອກເບ້ຍຜ່ອນຜັນຈາກອົງການ NEDA ປະເທດໄທ, ໃນມູນຄ່າທັງໝົດ 1.380 ລ້ານກວ່າບາດ, ການກໍ່ສ້າງໂຄງການ ຕາມສັນຍາທີ 1 (Package 2B) ມີການກໍ່ສ້າງຂົວກາງນໍ້າ ລວມທັງທາງເຂົ້າຫົວຂົວ, ຕາມແຜນການ ຮອດທ້າຍເດືອນມັງກອນ 2025 ຈະປະຕິບັດໃຫ້ສໍາເລັດ 97,52%, ແຕ່ການປະຕິບັດໄດ້ຕົວຈິງ ເຮັດໄດ້ພຽງ 95,76% ໂດຍອີງຕາມແຜນດັດແກ້ໃໝ່ ທີ່ໄດ້ສະເໜີຂໍຕໍ່ສັນຍາຮອດວັນທີ 31 ມີນາ 2025 ໃຫ້ສໍາເລັດວຽກທີ່ໄດ້ສັນຍານໍາກັນ, ສ່ວນວຽກອື່ນໆແມ່ນຈະໄດ້ກວດກາຄືນ ເພື່ອສືບຕໍ່ເຮັດສັນຍາ ແລະ ປະຕິບັດໃຫ້ສໍາເລັດໃນລາຍລະອຽດຂອງວຽກຕ່າງໆທີ່ຍັງຄ້າງ, ຄາດວ່າຈະໄດ້ເປີດນຳໃຊ້ຢ່າງເປັນທາງການໃນວັນທີ 19 ທັນວາ 2025.

ໂອກາດນີ້,ທ່ານ ຄຳພັນ ພົມມະທັດ ກໍໄດ້ສະແດງຄວາມຊົມເຊີຍຕໍ່ໂຄງການ ແລະຄະນະພັກ, ຄະນະນຳແຂວງບໍລິຄຳໄຊທີ່ສາມາດຈັດຕັ້ງປະຕິບັດຕາມແຜນ. ພ້ອມນີ້, ທ່ານກໍໄດ້ເຈາະຈີ້ມຕື່ມບາງບັນຫາເປັນຕົ້ນແມ່ນການຈັດສັນການບໍລິການຍົກຍໍຄ່ຽນຖ່າຍສິນຄ້າ, ຄວາມອາດສາມາດໃນການຂົນສົ່ງສິນຄ້າກໍຄືໂດຍສານ ແລະອື່ນໆ.
ຈາກນັ້ນ, ທ່ານ ສຸວັນນີ ໄຊຊະນະ ປະທານສະພາປະຊາຊົນ ແລະທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ກໍໄດ້ຜັດປ່ຽນກັນລາຍງານຕື່ມຕໍ່ກັບຄຳຖາມເຈາະຈີ້ມ ແລະໄດ້ພ້ອມກັນລົງເບິ່ງເຂດກໍ່ສ້າງຕົວຈິງຕື່ມອີກ.

แชร์