ເຈົ້າແຂວງຈໍາປາສັກ​ ແນະນໍາຜູ້ພັດທະນາຕາດເຍືອງ​ ສືບຕໍ່ເສີມຂະຫຍາຍມູນເຊື້ອ ພັດທະນາ​ການທ່ອງທ່ຽວ

ວັນທີ​ 15​ ກຸມພາ 2025, ທ່ານ​ ອາລຸນໄຊ ສູນນະລາດ​ ເຈົ້າແຂວງໆຈໍາປາສັກ​ ພ້ອມດ້ວຍ​ພັນລະຍາ​ ແລະ​ການນໍາ​ພະແນກການ​ກົມກອງ​ທີ່​ກ່ຽວຂ້ອງ​ແຂວງ​ ໄດ້ເຄື່ອນໄຫວຢ້ຽມຢາມແຫຼ່ງທ່ອງທ່ຽວທໍາມະຊານໍ້າຕົກຕາດເຍືອງ ຫຼັກ​ 40 ເມືອງປາກຊ່ອງ.​ ໃຫ້ກຽດ​ຕ້ອນຮັບ​ໂດຍ ທ່ານ​ນາງ​ ສອນທິດາ​ ອຸນາພົມ​ປະທານບໍລິສັດ ພັດທະນາແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງ.​

ໂອກາດນີ້,​ ທ່ານ​ ອາລຸນໄຊ​ ສູນນະລາດ​ ເຈົ້າແຂວງ​ຈໍາປາສັກ​ ໄດ້ແນະນໍາຜູ້ພັດທະນາແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງ​ສືບຕໍ່ເສີມຂະຫຍາຍມູນເຊື້ອ ພັດທະນາ​ການທ່ອງທ່ຽວ ປະຊາຊົນ​ມີສ່ວນຮ່ວມ​ແບບຍືນຍົງ​ ເພື່ອເຮັດໃຫ້ປະຊາຊົນມີລາຍຮັບແກ່ຄອບຄົວ.​ ນອກນີ້​ ໃຫ້ເອົາໃຈໃສ່ຊຸກຍູ້ສົ່ງເສີມກິດຈະກໍາຕ່າງໆຢູ່ໃນທ້ອງຖິ່ນ ເພື່ອປະກອບສ່ວນໃນການພັດທະນາຕາມທິດສີຂຽວ ແລະ​ຍືນຍົງຍືນຍົງທັງສ້າງຜົນປະໂຫຍດໃຫ້ແກ່ປະຊາຊົນພາຍໃນທ້ອງຖິ່ນ.​

ທ່ານ ນາງ ສອນທິດາ ອຸນາພົມ ປະທານບໍລິສັດ ພັດທະນາແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງ ໃຫ້ຮູ້ວ່າ: ຜ່ານມາ,​ ຜູ້ບໍລິຫານແຫຼ່ງທ່ອງທ່ຽວນໍ້າຕົກຕາດເຍືອງ​ ພ້ອມດ້ວຍ​ຄະນະພັກ​ -​ ອົງ​ການປົກຄອງບ້ານ​ ແລະ​ ພໍ່ແມ່​ປະຊາຊົນ​ກຸ່ມບ້ານຫຼັກ​ 40​ ໄດ້ສຸມທຸກກໍາລັງໃນການເສີມຂະຫຍາຍພັດທະນາການທ່ອງທ່ຽວ​ໂດຍການຮ່ວມມືແບບປະສົມປະສານ,​ ປະຊາຊົນມີສ່ວນຮ່ວມ; ການພັດທະນາ ແມ່ນເນັ້ນໜັກໃສ່ການອະນຸລັກ ແລະ ປົກປັກຮັກສາສິ່ງແວດລ້ອມ ໃຫ້ເປັນແຫຼ່ງທ່ອງທ່ຽວນໍ້າຕົກຕາດ ທີ່ມີທໍາມະຊາດສີຂຽວ, ສະອາດ, ບໍລິການດີ, ອາຫານປອດສານພິດ ໂດຍນໍາໃຊ້ວັດຖຸດິບ ແລະ ພືດຜັກ ພາຍໃນທ້ອງຖິ່ນ​ ໂດຍເຕົ້າລວມປະຊາຊົນ ແລ້ວຊຸກຍູ້ສົ່ງເສີມໃຫ້ປູກພືດຜັກປອດສານພິດ ເຊັ່ນ: ໝາກສະເວີ່, ຜັກອີ່ຄູ້, ໝາກຮຸ່ງ, ໝາກເລັ່ນ(ໝາກເຂືອສົ້ມ),ໝາກເຂືອຂົນ​ (ໝາກເຂືອເອິກ), ໜໍ່ໄມ້ ແລະອື່ນໆ​ ແລ້ວນໍາມາຂາຍໃຫ້ຮ້ານອາຫານຕາດເຍືອງ​ນໍາໃຊ້ເຂົ້າໃນການປຸງແຕ່ງເປັນອາຫານ​ ແລະ​ຊື້ໃນລາຄາທີ່ສູງກວ່າຕະຫຼາດເພື່ອໃຫ້ປະຊາຊົນມີລາຍຮັບແກ່ຄອບຄົວ.​ ນອກນີ້​ ຍັງໄດ້ຊຸກຍູ້ສົ່ງເສີມກິດຈະກໍາປຸງແຕ່ງອາຫານ,​ ຊາ,​ ກາເຟ ແລະ​ປຸງແຕ່ງພືດຜັກປອດສານພິດເຖິງວ່າຈະເປັນກິດຈະກໍານ້ອຍໆ ແຕ່ສາມາດປະກອບສ່ວນໃນການພັດທະນາແບບຍືນຍົງ ທັງສ້າງຜົນປະໂຫຍດໃຫ້ແກ່ປະຊາຊົນພາຍໃນທ້ອງຖິ່ນ.​

ໃນທີ່ຜ່ານມາ,​ ແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງໄດ້ຮັບລາງວັນ​ຜູ້ພັດທະນາແຫຼ່ງທ່ອງທ່ຽວດີເດັ່ນ ແລະ ຍືນຍົງຂອງ ສປປ ລາວ​ ປະຈຳປີ​ 2019; ລາງວັນ ນັກທຸລະກິດຍິງອາຊຽນດີເດັ່ນແຫ່ງ ສປປ ລາວ ປະຈຳປີ 2021 ປະເພດທຸລະກິດ​ຂະໜາດ​ນ້ອຍ​-​ຂະໜາດກາງ ລາງວັນ ດ້ານການຈ້າງງານດີເດັ່ນ​ ແລະ​ ລາງວັນການທ່ອງທ່ຽວແບບຍືນຍົງອາຊຽນ ປະຈຳປີ 2022; ລາງວັນມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມອາຊຽນ​ ປີ​ 2023.​ ນອກນີ້, ຍັງໄດ້ຮັບລາງວັນ​ຫ້ອງນໍ້າສາທາລະນະ​ ສະອາດອາຊຽນ​​ 3 ຄັ້ງ​ ຄື: ຄັ້ງທີ​ 1 ໄດ້ຮັບໃນສົກປີ 2019​ - 2021,​ ຄັ້ງທີ​ 2 ໄດ້ຮັບໃນສົກປີ 2022 - 2024,​ ຄັ້ງທີ​ 3 ປະຈໍາ​ສົກປີ​ 2025​ -​ 2027.

ແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງຖືເປັນໜຶ່ງໃນຫຼາຍແຫຼ່ງທ່ອງທ່ຽວທີ່ມີຊື່ສຽງຢູ່ໃນພາກໃຕ້ຂອງ ສປປ ລາວ​ ເວົ້າລວມ,​ ເວົ້າ​ສະເພາະ​ແມ່ນ​ແຂວງຈໍາປາສັກ, ແຕ່ລະປີ​ມີບັນດານັກທ່ຽວທັງພາຍໃນ ແລະຕ່າງເທດ ເຂົ້າມາທ່ອງທ່ຽວຊົມເປັນຈຳນວນຫຼວງຫຼາຍ ແລະ​ນັບມື້ເພີ່ມຂຶ້ນຢ່າງຕໍ່ເນື່ອງ.
ຂ່າວ​-ພາບ​: ທູນທອງໃຈ​

แชร์