ສື່ມວນຊົນລົງຢ້ຽມຢາມ ບໍລິສັດ ພູເບ້ຍມາຍນິງ ໂຄງຂຸດຄົ້ນ-ປຸງແຕ່ງເງີນ-ຄໍາ ເເລະ ທອງ

ໃນລະຫວ່າງວັນທີ 12-14 ກຸມພາ 2025 ບໍລິສັດພູເບ້ຍມາຍນິງ ຈໍາກັດ ໄດ້ນໍາພາສື່ມວນຊົນລາວ 8 ສໍາໜັກ ມີສະຖານີ ໂທລະພາບແຫ່ງຊາດ, ສະຖານີ ວິທະຍຸກະຈາຍສຽງແຫ່ງຊາດ, ໜັງສືພິມປະເທດລາວ, ໜັງສືພິມ KPL, ໜັງສືພິມ ປະຊາຊົນ, ໜັງສືພິມ ວຽງຈັນໃໝ່, ໜັງສືພິມ ເສດຖະກິດ-ສັງຄົມ ແລະ ໜັງສືພິມ ວຽງຈັນທາຍ ລົງຢ້ຽມຢາມໂຄງການຂຸດຄົ້ນ-ປຸງແຕ່ງເງີນ-ຄໍາ ເເລະ ທອງຂອງບໍລິສັດພູເບ້ຍມາຍນິງ ຈຳກັດ ທີ່ບ້ານ ຫ້ວຍຊາຍ ເມືອງລ່ອງແຈ້ງ ແລະ ພູຄໍາ ເມືອງອານຸວົງ ແຂວງໄຊສົມບູນ ນໍາໂດຍ ທ່ານ ແກ້ວເລີດສະໄໝ ທໍາມະລັງສີ ທີ່ປຶກສາລະດັບສູງຝ່າຍພົວພັນສື່ສານຂອງບໍລິສັດພູເບ້ຍມາຍນິງ ຈຳກັດ.

ໂອກາດດຽວກັນ, ທ່ານ ແກ້ວເລີດສະໄໝ ທໍາມະລັງສີ ໃຫ້ສໍາພາດວ່າ: ການຢ້ຽມຢາມໂຄງການຄັ້ງນີ້ເພື່ອໃຫ້ສື່ມວນຊົນເຫັນໄດ້ເຖິງການປະຕິບັດໜ້າທີ່ວຽກງານທີ່ໄດ້ມາດຕະຖານສາກົນຂອງບໍລິສັດ ພູເບ້ຍມາຍນິງ ຈຳກັດ ມີຄວາມຮັບຜິດຊອບຕໍ່ສິ່ງແວດລ້ອມ, ປະຊາຊົນກໍຄືຊຸມຊົນ, ຕິດຕາມການຈັດຕັ້ງປະຕິບັດວຽກງານຕ່າງໆຂອງບໍລິສັດ ເປັນຕົ້ນຂັ້ນຕອນການຂຸດຄົ້ນ, ການຜະລິດ, ການປຸງແຕ່ງ ການປົກປັກຮັກສາສິ່ງແວດລ້ອມເຊິ່ງເປັນຫົວໃຈສໍາຄັນຂອງບໍລິສັດ ພ້ອມດຽວກັນນີ້ໃຫ້ບັນດາສື່ມວນຊົນໄດ້ຮັບຮູ້ເຖິງການເອົາໃຈໃສ່ຂອງບໍລິສັດດ້ານການຮັກສາຄວາມປອດໄພເພາະບໍລິສັດ ພູເບ້ຍມາຍນິງ ຈຳກັດຖືສໍາຄັນຕໍ່ວຽກງານດັ່ງກ່າວເປັນອັນດັບທໍາອິດ ພະນັກງານທຸກຄົນເວລາກັບເມືອເຮືອນຕ້ອງມີຄວາມປອດໄພ, ເຖິງຜູ້ຮັບເໝົາ ແລະ ປະຊາຊົນບັນດາເຜົ່າທີ່ດໍາລົງຊີວິດຢູ່ອ້ອມຂ້າງຕື່ມອີກ.

ຊຶ່ງບໍລິສັດ ພູເບ້ຍ ມາຍນິ້ງ ມີພະນັກ ງານຫຼາຍກວ່າ 3.000 ຄົນ ກວມ 93% ແມ່ນແຮງງານລາວ ສ່ວນຫຼາຍແມ່ນປະຊາຊົນເຂດທ້ອງຖິ່ນທີ່ຢູ່ໃກ້ຄຽງຂອງໂຄງການ ເເລະ ພະນັກງານຕ່າງປະເທດອີກຈໍານວນຫນື່ງ, ຕະຫຼອດໄລຍະຫຼາຍກວ່າ 10 ປີຜ່ານມາ ບໍລິສັດ ໄດ້ຮ່ວມມືກັບວິທະຍາໄລເຕັກນິກລາວ-ເຢຍລະມັນ ເພື່ອຈັດຕັ້ງປະຕິບັດໂຄງການສ້າງສີມືແຮງງານ ໃນ 5 ວິຊາ ຄື:  ກົນຈັກໜັກ, ສ້ອມແປງ ແລະ ບໍາລຸງຮັກສາ, ໄຟຟ້າ, ໄຟຟ້າລົດຍົນ ແລະ ເຊື່ອມຈອດ ຫລັງຈາກຮຽນຈົບກໍສາມາດສອບເສັງເພື່ອເຂົ້າເຮັດວຽກນໍາບໍລິສັດ ພູເບ້ຍ ມາຍນິ້ງ ຕາມຕໍາແໜ່ງງານ ແລະ ຈໍານວນທີ່ບໍລິສັດຕ້ອງການ, ຄຽງຄູ່ກັນນີ້ ບໍລິສັດຍັງໄດ້ສ້າງໂອກາດໃຫ້ຊຸມຊົນທ້ອງຖິ່ນ ນັບແຕ່ການຈ້າງງານຈົນເຖິງການກໍ່ສ້າງພື້ນຖານໂຄງລ່າງຕ່າງໆ ໂດຍໄດ້ຈັດສັນງົບປະມາຈໍານວນຫນຶ່ງ ເຂົ້າໃນໂຄງການທຶນພັດທະນາຊຸມຊົນ, ນັບແຕ່ປີ 2002-2022 ໄດ້ຈັດຕັ້ງປະຕິບັດໄດ້ 436 ໂຄງການ, ໂດຍສຸມໃສ່ 6 ຂະແໜງການສໍາຄັນ ຄື: ກະສິກໍາ, ສຶກສາ, ສາທາລະນະສຸກ, ໂຄງລ່າງພື້ນຖານ, ການພັດທະນາທຸລະກິດທ້ອງຖິ່ນ ແລະ ການເຂົ້າເຖີງການເເຫລ່ງທຶນ, ບໍລິສັດ ພູເບ້ຍ ມາຍນິ່ງ ຈໍາກັດ ມີໂຄງການຂຸດຄົ້ນ 2 ໂຮງງານໃນເຂດສໍາປະທານແຂວງໄຊສົມບູນ ຄື: ໂຄງການຂຸດຄົ້ນ- ປຸງແຕ່ງທອງ-ຄໍາພູຄໍາ ແລະ ໂຄງການ ຂຸດຄົ້ນ-ປຸງແຕ່ງຄໍາ-ເງິນ ບ້ານ ຫ້ວຍຊາຍ ເມືອງລ່ອງເເຈ້ງ ເເຂວງໄຊສົມບູນ  ໃນນີ້ ສຳລັບໂຮງງານປຸງແຕ່ງຄໍາ-ເງິນຢູ່ບ້ານຫ້ວຍຊາຍມີອາຍຸການສໍາປະທານຮອດປີ 2035 ແລະ ໂຮງງານປຸງແຕ່ງທອງ-ຄໍາ ພູຄໍາ ເມືອງອານຸວົງ ອາຍຸການສໍາປະທານຮອດໄຕມາດທໍາອິດຂອງປີເເມ່ນສາມາດຈັດຕັ້ງປະຕິບັດຮອດປີ 2026. ໃນການຢ້ຽມຢາມໂຄງການຄັ້ງນີ້ ສື່ມວນຊົນຍັງໄດ້ໄປເບີ່ງໂຄງການກະເສດ ການປູກຝັງ ປັບປຸງຊີວິດການເປັນຢູ່ຂອງປະຊາຊົນໂດຍສະເພາະ ກຸ່ມປູກຜັກ,ໂຮງຮຽນມັດທະຍົມຕອນຕົ້ນ ບ້ານ ນໍ້າໂມ້ ທີ່ນອນໃນການສະໜັບສະໜູນຂອງບໍລິສັດພູເບ້ຍມາຍນິງ ຈຳກັດຕື່ມອີກ.

แชร์