ປີທ່ອງທ່ຽວລາວ 2024 ມີນັກທ່ອງທ່ຽວເຂົ້າທ່ຽວ 4 ລ້ານກວ່າຄົນ ສ້າງລາຍຮັບໄດ້ 1 ຕື້ກວ່າໂດລາ

ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ສະຫລຸບການຈັດຕັ້ງປະຕິບັດປີທ່ອງທ່ຽວ ລາວປີ 2024 ໃນວັນທີ 5 ກຸມພາ 2025 ນີ້, ທີ່ຫໍວັດທະນະທໍາແຫ່ງຊາດ ໂດຍການເປັນປະທານຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ປະທານຄະນະກໍາມະການຊີ້ນຳລະດັບຊາດ ໃນການຈັດປີທ່ອງທ່ຽວລາວ 2024, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ມີຮອງເຈົ້າຄອງນະຄອນຫຼວງວຽງຈັນ, ບັນດາຮອງເຈົ້າແຂວງ ແລະ ພາກສ່ວນກ່ຽວຂ້ອງ.

ທ່ານ ກິແກ້ວ ໄຂຄໍາພິທູນ ໄດ້ກ່າວເປີດກອງປະຊູມ ໂດຍຍົກໃຫ້ເຫັນການຈັດຕັ້ງປະບັດບັນດາກິດຈະກໍາໃນປີທ່ອງທ່ຽວ 2024 ໃນຂອບເຂດທົ່ວປະເທດ ຊຶ່ງເຫັນວ່າທຸກກິດຈະກຳທີ່ກຳນົດໄວ້ໄດ້ດຳເນີນການໄປຕາມແຜນ ແລະ ພາຍໃຕ້ບັນຍາກາດເປັນຂະບວນການຟົດຟື້ນ ສາມາດກະຕຸ້ນ, ດຶງດູດນັກທ່ອງທ່ຽວພາຍໃນ ແລະ ນັກທ່ອງທ່ຽວຕ່າງປະເທດເຂົ້າມາທ່ຽວປະເທດເຮົາ, ສາມາດສ້າງລາຍຮັບທີ່ຕິດພັນການການທ່ອງຫຼາຍຂຶ້ນ. ພ້ອມກັນນີ້, ການເປີດປີທ່ອງທ່ຽວຍັງໄດ້ຟື້ນຟູ, ສົ່ງເສີມ, ອະນຸລັກ ແລະ ປົກປັກຮັກສາມໍຣະດົກທາງດ້ານທຳມະຊາດ, ປະຫວັດສາດ, ວັດທະນະທຳ, ຮີດຄອງປະເພນີອັນດີງາມຂອງຊາດລາວເຮົາ ໃຫ້ມີຄວາມຍືນຍົງຄົງຢູ່ກັບປະຊາຊົນລາວບັນດາເຜົ່າຕະຫຼອດໄປ; ຂະແໜງການທ່ອງທ່ຽວ ໄດ້ຮັບການຍົກລະດັບ ການພັດທະນາສູງຂຶ້ນອີກບາດກ້າວໜຶ່ງ ເພື່ອໃຫ້ສາມາດແຂ່ງຂັນກັບພາກພື້ນ ແລະ ສາກົນເທື່ອລະກ້າວ. ນອກຈາກນີ້ ຍັງເຮັດໃຫ້ຊື່ສຽງຂອງ ສປປ ລາວ ສູງຂຶ້ນໃນປະຊາຄົມໂລກ.

ສໍາລັບກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດປີທ່ອງທ່ຽວລາວ,ການຈັດຕັ້ງປະຕິບັດກິດຈະກຳການທ່ອງທ່ຽວຂອງທ້ອງຖິ່ນຈຳນວນໜຶ່ງ. ພ້ອມດຽວກັນນັ້ນ ຍັງໄດ້ຕີລາຄາຢ່າງກົງໄປກົງມາຕໍ່ໝາກຜົນທີ່ຍາດມາໄດ້, ບາງບັນຫາທີ່ສຳຄັນທີ່ຕ້ອງເສີມຂະຫຍາຍເພື່ອຍູ້ແຮງການທ່ອງທ່ຽວ ເພື່ອກຳນົດທິດທາງ, ວິທີການ, ມາດຕະການແກ້ໄຂບາງບັນຫາຈຳນວນໜຶ່ງທີ່ເປັນຈຸດອ່ອນ, ຂໍ້ຄົງຄ້າງ ເປັນຕົ້ນການວາງແຜນຈັດສັນທ່ອງທ່ຽວບໍ່ທັນລະອຽດຄົບຖ້ວນ ແລະແທດຕົວຈິງ, ກົນໄກການປະສານສົມທົບບໍ່ທັນໂລ່ງລ່ຽນວ່ອງໄວ, ການແກ້ໄຂບັນຫາທີ່ເກີດຂຶ້ນບໍ່ທັນການ; ການດຳເນີນກິດຈະກຳ ຍັງເຮັດບໍ່ທັນຮັກກຸມເທົ່າທີ່ຄວນ; ເກີດມີບັນຫາຢາເສບຕິດ, ປະກົດການຫຍໍ້ທໍ້ທາງສັງຄົມ, ບັນຫາອຸປະຕິເຫດຕາມທ້ອງຖະໜົນ, ບັນຫາໄພສັງຄົມ, ເກີດມີການສວຍໂອກາດຂອງເຈົ້າໜ້າທີ່ຂອງພາກລັດ ແລະ ຜູ້ປະກອບການຈຳນວນໜຶ່ງ ແລະ ບັນຫາອື່ນໆ ທີ່ກະທົບຕໍ່ຊີວິດ ແລະ ຊັບສິນຂອງນັກທ່ອງທ່ຽວ ຊຶ່ງກົດໜ່ວງການພັດທະນາຂະແໜງການທ່ອງທ່ຽວ ແລະ ເລັ່ງທວງໃຫ້ພາກສ່ວນກ່ຽວຂ້ອງຕ້ອງສຸມໃສ່ແກ້ໄຂຢ່າງທັນການ.

ຂະນະທີ່ທ່ານນາງ ສວນສະຫວັນ ວິຍະເກດ ກໍໄດ້ລາຍງານວ່າ: ປີທ່ອງທ່ຽວລາວ 2024 ໄດ້ຈັດຂຶ້ນພາຍໃຕ້ຄໍາຂວັນ “ທ່ອງທ່ຽວລາວປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ" ປະກອບມີ 79 ກິດຈະກຳ ແລະ ໄດ້ແບ່ງອອກເປັນ 2 ລະດັບ ຄື: ກິດຈະກຳລະດັບຊາດ ປະກອບມີ 14 ກິດຈະກຳ, ສາມາດຈັດຕັ້ງປະຕິບັດສໍາເລັດ 100% ແລະ ກິດຈະກຳລະດັບແຂວງປະກອບມີ 65 ກິດຈະກຳ ສາມາດ ຈັດຕັ້ງປະຕິບັດໄດ້ 98.5%. ນອກຈາກນີ້, ຍັງມີກິດຈະກຳອື່ນໆຕື່ມອີກຢູ່ທັງພາຍໃນ ແລະ ຕ່າງປະເທດ ເພື່ອເປັນການຊຸກຍູ້ ແລະ ສົ່ງເສີມ ການທ່ອງທ່ຽວລາວໃຫ້ມີຄວາມຟົດຟື້ນ. ຜ່ານການຈັດຕັ້ງປະຕິບັດປີທ່ອງທ່ຽວລາວ 2024 ຜ່ານມາ ມີນັກທ່ອງທ່ຽວຕ່າງປະເທດເຂົ້າມາທ່ອງທ່ຽວລາວ ທັງໝົດ 4,120,832 ຄົນ, ທຽບໃສ່ປີ 2023 ເພີ່ມຂຶ້ນ 7 ແສນກວ່າຄົນ (ປີ2023 ມີຈໍານວນ 3,417,629 ຄົນ) ສາມາດສ້າງລາຍຮັບໄດ້ເຖິງ 1.1 ຕື້ກວ່າໂດລາສາຫະລັດ, ໃນນັ້ນ ອັນດັບທີ່ມາທ່ອງທ່ຽວຫລາຍທີ່ສຸດ ຄື: 1 ແມ່ນປະເທດໄທ 1,215,553 ຄົນ, ຮອງລອງມາແມ່ນຫວຽດນາມ 1,054,204 ຄົນ, ຈີນ 1,048,034 ຄົນ ແລະ ສ,ເກົາຫຼີ 223,895 ຄົນ.

ຂ່າວ: ສາວລາວໃຕ້

แชร์