1 ປີຜ່ານມາ ແຂວງຄໍາມ່ວນ ມີອັນພົ້ນເດັ່ນໃນຫຼາຍດ້ານ

ຫວ່າງບໍ່ດົນມານີ້ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ໃຫ້ສໍາພາດຕໍ່ສື່ມວນຊົນ ກ່ຽວກັບຜົນງານການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາວ່າ : ແຂວງຄໍາມ່ວນແມ່ນອີງໃສ່ 3 ທ່າແຮງຫຼັກໃນການພັດທະນາເສດຖະກິດ-ສັງຄົມຂອງແຂວງຄື : ທ່າແຮງດ້ານກະສິກໍາ-ປ່າໄມ້; ທ່າແຮງດ້ານອຸດສາຫະກໍາ-ພະລັງງານ ແລະ ບໍ່ແຮ່; ທ່າແຮງດ້ານການບໍລິການທາງຜ່ານ ແລະ ການທ່ອງທ່ຽວ. ໃນປີ 2024 ແມ່ນນອນໃນສະພາບທີ່ປະເທດພວກເຮົາຍັງສືບຕໍ່ປະເຊີນກັບຄວາມຫຍຸ້ງຍາກຫຼາຍດ້ານ ໂດຍສະເພາະແມ່ນທາງດ້ານເສດຖະກິດ-ການເງິນ, ໄພເງິນເຟີ້, ເງິນກີບອ່ອນຄ່າ, ລາຄາສິນຄ້າຖີບຕົວສູງຂຶ້ນ ເຊິ່ງທັງໝົດເລົ່ານີ້ໄດ້ສົ່ງຜົນສະທ້ອນຕໍ່ການພັດທະນາເສດຖະກິດ-ສັງຄົມຂອງປະເທດ ກໍ່ຄືຂອງແຂວງຄໍາມ່ວນ ແລະ ກະທົບຕໍ່ຊີວິດການເປັນຢູ່ຂອງປະຊາຊົນ ແຕ່ດ້ວຍຄວາມເອົາໃຈໃສ່ ແລະ ພາຍໃຕ້ການນຳພາ-ຊີ້ນຳ ອົງຄະນະພັກແຂວງ ເຮັດໃຫ້ແຂວງຄໍາມ່ວນມີຫຼາຍດ້ານທີ່ພົ້ນເດັ່ນ ແລະ ມີຜົນສໍາເລັດຢູ່ໃນລະດັບທີ່ດີພໍສົມຄວນ, ດ້ານການເຕີບໂຕເສດຖະກິດຂອງແຂວງສືບຕໍ່ຂະຫຍາຍຕົວໃນລະດັບ 6.05%; ລວມຍອດຜະລິດຕະພັນ ບັນລຸໄດ້ 24,452 ຕື້ກີບ; ລາຍຮັບສະເລ່ຍຕໍ່ຫົວຄົນ 53 ລ້ານກີບ/ຄົນ ຫຼື ເທົ່າກັບ 2,469 ໂດລາສະຫະລັດ; ການຈັດຕັ້ງປະຕິບັດເກັບລາຍຮັບເຂົ້າງົບປະມານແມ່ນເກີນແຜນ 4 ປີຕໍ່ເນື່ອງ ແລະ ມີການເພີ່ມຂຶ້ນ, ສະເພາະປີ 2024 ແຂວງໄດ້ຮັບມອບໝາຍ ທັງລາຍຮັບສູນກາງ ແລະ ລາຍຮັບທ້ອງຖິ່ນ ມີທັງໝົດ 2,417 ຕື້ກີບ ແລະ ສູນກາງໄດ້ດັດແກ້ຕົວເລກ 6 ເດືອນທ້າຍປີຕື່ມ ມາເປັນ 2,434 ຕື້ກວ່າກີບ. ຜ່ານການຈັດຕັ້ງປະຕິບັດຈັດເກັບໄດ້ທັງໝົດ 4,145 ຕື້ກວ່າກີບ ເທົ່າກັບ 170,25% ຂອງແຜນການ ແລະ ໄດ້ດຸ່ນດ່ຽງໃຫ້ສູນກາງຕາມແຜນປີ 2024 ສຳເລັດ 100%.
ດ້ານລາຍຈ່າຍ ແມ່ນໄດ້ປະຕິບັດຕາມແຜນລາຍຈ່າຍຂອງລັດຖະບານມອບໃຫ້, ສິ່ງສໍາຄັນແມ່ນບໍ່ໄດ້ສ້າງໜີ້ ມີແຕ່ສຸມໃສ່ແກ້ໄຂໜີ້ສິນທີ່ຍັັງຄ້າງໃນຜ່ານມາ.
ດ້ານການພັດທະນາໃນຂົງເຂດພື້ນຖານໂຄງລ່າງໄດ້ປັບປຸງເສັ້ນທາງໃນຕົວເມືອງ, ເສັ້ນທາງລະຫວ່າງເມືອງຕໍ່ເມືອງ, ເສັ້ນທາງລະຫວ່າງບ້ານຕໍ່ບ້ານ, ປັບປຸງຄວາມສະອາດຈົບງາມໃນຕົວເມືອງເປັນຕົ້ນການຕິດຕັ້ງດອກໄຟຕາມເສັ້ນທາງຕ່າງໆ ໃຫ້ມີຄວາມສວຍງາມ, ສະຫວ່າງໃນຍາມຄໍ່າຄືນ, ສິ່ງສໍາຄັນການພັດທະນາເສດຖະກິດ-ສັງຄົມເປັນຕົ້ນແມ່ນການພັດທະນາພື້ນຖານໂຄງລ່າງ ພວກເຮົາໄດ້ລະດົມການປະກອບສ່ວນພາກທຸລະກິດ, ຜູ້ປະກອບການ ແລະ ລະດົມປະຊາຊົນໃຫ້ມີສ່ວນຮ່ວມ, ເຫັນໄດ້ວ່າເຂົາເຈົ້າກໍ່ໄດ້ມີຄວາມຕື່ນຕົວໃນການພັດທະນາບ້ານຊ່ອງຂອງຕົນ, ພັດທະນາສິ່ງສາທາລະນະປະໂຫຍດຕ່າງໆ ເຊັ່ນ : ປະກອບ ສ່ວນດ້ານງົບປະມານ ແລະ ເຫື່ອແຮງ ໃນການສ້າງເສັ້ນທາງເຂົ້າບ້ານເຊິ່ງມີບັນຍາກາດທີ່ດີ;
ສ່ວນການພັດທະນາດ້ານກະສິກໍາຕົ້ນຕໍ່ແມ່ນໄດ້ເລັ່ງໃສການຜະລິດເຂົ້າຕາມການມອບໝາຍຂອງລັດຖະບານໃຫ້ແຂວງຄໍາມ່ວນເປັນແຂວງຄໍ້າປະກັນສະບຽຽອາຫານ ໂດຍໄດ້ຊຸກຍູ້ປະຊາຊົນເລື່ອງການປູກການລ້ຽງຢ່າງເປັນຂະບວນ ແລະ ແຂງແຮງ ເພື່ອຜະລິດເຂົ້າເປັນສະບຽງອາຫານແລ້ວຍັງໄດ້ຜະລິດສົ່ງອອກຂາຍເປັນສິນຄ້າ, ນອກນັ້ນກໍ່ມີພືດ, ຜັກ, ຊີ້ນ, ປາ, ແມ່ນສາມາດກຸ້ມຕົນເອງ ແລະ ສົ່ງອອກໄປຂາຍຕ່າງແຂວງ ແລະ ຕ່າງປະເທດຈຳນວນໜຶ່ງ.
ອັນພົ້ນເດັ່ນການພັດທະນາຊົນນະບົດ ແລະ ລຶບລ້າງຄວາມທຸກຍາກ ນີ້ເປັນໜ້າທີ່ຍຸດທະສາດຂອງແຂວງໄດ້ສຸມໃສ່ທາງດ້ານທຶນຮອນ, ທາງດ້ານກໍາລັງເພື່ອແກ້ໄຂຄວາມທຸກຍາກຂອງປະຊາຊົນ, ຜ່ານການຈັດຕັ້ງປະຕິບັດຕົວຈິງພວກເຮົາສາມາດແກ້ໄຂໄດ້ຫຼາຍບັນຫາເປັນຕົ້ນແມ່ນໄດ້ລົງທຶນໃສ່ໃນການກໍ່ສ້າງພື້ນຖານໂຄງລ່າງ, ຖະໜົນຫົນທາງ, ຊົນລະປະທານ, ຝາຍນໍ້າລົ້ນ, ສ້າງໂຮງຮຽນ, ໂຮງໝໍ-ສຸກສາລາໃຫ້ ປະຊາຊົນໄດ້ເຂົ້າເຖິງການບໍລິການຂອງວຽກງານສາທາ, ພ້ອມກັນນັ້ນກໍ່ມີກອງທຶນຂອງບ້ານເພື່ອນໍາໃຊ້ເຂົ້າໃນການພັດທະນາບ້ານ, ນອກນັ້ນໄດ້ລະດົມພາກທຸລະກິດຊ່ວຍພັດທະນາແກ້ໄຂຄວາມທຸກຍາກຢູ່ບ້ານກະບູດຊຽງແຫວນ ເຫັນໄດ້ວ່າຊີວິດການເປັນຢູ່ຂອງປະຊາຊົນມີການຫັນປ່ຽນດີຂຶ້ນ, ທົ່ວແຂວງມີ 10 ເມືອງ, 570 ບ້ານ, 84,933 ຄອບຄົວ, ມີພົນລະເມືອງ 442,800 ຄົນ, ຍິງ 225,093 ຄົນ,ໃນນີ້ບ້ານທຸກຍາກຍັງເຫຼືອ 90 ບ້ານ, ມີຄອບຄົວທຸກຍາກປະມານ 11,553 ຄອບຄົວ, ປະຈຸບັນມີເມືອງພົ້ນທຸກທັງໝົດ 7 ເມືອງ, ເມືອງທຸກຍາກຍັງ 3 ເມືອງ, ສໍາລັບວຽກງານການພັດທະນາສັງຄົມໄດ້ສຸມໃສ່ພັດທະນາວຽກງານສຶກສາ ເຫັນວ່າສະພາບລວມວຽກງານສຶກສາມີທ່າອ່ຽງລຸດລົງບາງດ້ານ ເຊິ່ງທາງແຂວງໄດ້ມີຄວາມພະຍາຍາມສຸມໃສ່ນໍາພາປະຕິບັດຕົວຈິງ ປະຈຸບັນພວກເຮົາບັນລຸໄດ້ແລ້ວ 8 ຕົວຊີ້ວັດ, ໃນຈໍານວນ 15 ຕົວຊີ້ວັດຂະແໜງການສຶກສາ, ພວກເຮົາໄດ້ມີການປັບປຸງ, ສ້າງເງື່ອນໄຂອໍານວຍຄວາມສະດວກໃຫ້ບັນດາໂຮງຮຽນ, ສຸມທຶນຮອນເຂົ້າໃສ່ໃນການຮຽນ, ນໍາພາ-ຊີນໍາການຈັດຕັ້ງປະຕິບັດ ຜ່ານການປະເມີນຂະແໜງການກ່ຽວຂ້ອງມີການຫັນປ່ຽນດີຂຶ້ນ; ສໍາລັບວຽກງານສາທາໄດ້ເອົາໃຈໃສ່ໂຄສະນາວຽກງານໂພສະນາການ, ໂຄສະນາໃຫ້ປະຊາຊົນເຂົ້າເຖິງສາທາລະນະສຸກ, ໄດ້ເອົາໃຈໃສ່ຕ້ານພະຍາດຕາມລະດູການ ແລະ ອື່ນໆ ພ້ອມນັ້ນໄດ້ເອົາໃຈໃສ່ບໍາລຸງສ້າງພະນັກງານພາຍໃນໂຮງໝໍຕ່າງໆ ຢູ່ສຸກສາລາ, ໂຮງໝໍນ້ອຍ, ຕອບສະໜອງວັດຖຸອຸປະກອນ ແລະ ຢາປົວຈໍານວນໜຶ່ງ ທີ່ຈໍາເປັນ ສິ່ງສໍາຄັນ ແມ່ນໄດ້ຍາດແຍ່ງການລົງທຶນຂອງຕ່າງປະເທດຊ່ວຍເຫລືອກໍ່ສ້າງໂຮງໝໍສາກົນຄໍາມ່ວນ 150 ຕຽງ ແລະ ຈະເປີດການບໍລິການໃນຕໍ່ໜ້ານີ້, ອັນພົ້ນເດັ່ນແມ່ນການປະກາດແຂວງຄໍາມ່ວນເປັນແຂວງຢຸດຕິການຖ່າຍຊະຊາຍໃນຜ່ານມາ,
ສ່ວນວຽກງານປ້ອງກັນຊາດ-ປ້ອງກັນຄວາມສະຫງົບ ເຫັນໄດ້ວ່າແຂວງຄໍາມ່ວນມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍດີ ແຂວງໄດ້ເອົາໃຈໃສ່ການຕ້ານປະກົດການຫຍໍ້ທໍ້ຕ່າງໆ ໃນສັງຄົມ, ຫັນເອົາກຳລັງລົງກໍ່ສ້າງຮາກຖານການເມືອງ, ໂດຍສຸມໃສ່ໃນ 3 ເມືອງ ລຽບຕາມຊາຍແດນຄື : ຫິນບູນ, ທ່າແຂກ ແລະ ໜອງບົກ
ດ້ານການຫ້າງຫາກະກຽມການຈັດຕັ້ງປະຕິບັດກອງປະຊຸມໃຫຍ່ 3 ຂັ້ນຂອງພັກ : ພາຍຫຼັງໄດ້ມີຄໍາສັ່ງ ເລກທີ 211/ຄຈສພ, ຄໍາແນະນໍາເລກທີ 411/ຄລສພ ກ່ຽວກັບການກະກຽມຈັດຕັ້ງດໍາເນີນກອງປະຊຸມໃຫຍ່ ໄດ້ພ້ອມກັນຈັດຕັ້ງເຜີຍແຜ່, ເຊື່ອມຊຶມ ໃຫ້ພະນັກງານການນໍາຫຼັກແຫຼງໃນທົ່ວແຂວງ ໄດ້ພ້ອມກັນເຊື່ອມຊຶມເນື້ອໃນດັ່ງກ່າວ, ຈາກນັ້ນແຂວງກໍ່ໄດ້ຫັນເປັນນິຕິກຳຂອງແຂວງ ເປັນຕົ້ນຫັນມາເປັນຄໍາແນະນໍາຂອງແຂວງເລກທີ 14/ຄຈປຂ ວ່າດ້ວຍການກະກຽມ ດໍາເນີນກອງປະຊຸມໃຫຍ່ຂອງຮາກຖານພັກ, ອົງຄະນະພັກເມືອງ ຈາກນັ້ນ, ບັນດາເມືອງກໍ່ໄດ້ນໍາເອົາເນື້ອໃນດັ່ງກ່າວໄປເຜີຍແຜ່ເຊື່ອມຊຶມ, ທາງແຂວງກໍ່ໄດ້ມີການແຕ່ງຕັ້ງຄະນະຮັບຜິດຊອບໃນການລົງຊຸກຍູ້ກະກຽມດໍາເນີນກອງປະຊຸມໃຫຍ່ຂັ້ນຮາກຖານກໍ່ຄືຂັ້ນເມືອງ, ຜ່ານການຈັດຕັ້ງປະຕິບັດກ່ຽວກັບການດໍາເນີນກອງປະຊຸມໃຫຍ່, ສໍາລັບຮາກຖານພັກຢູ່ອ້ອມຂ້າງເມືອງໄດ້ເຮັດສໍາເລັດ 100%, ປະຈຸບັນພວມກ້າວສູ້ການກະກຽມດໍາເນີນກອງປະຊຸມໃຫຍ່ອົງຄະນະພັກເມືອງ ແລະ ໄດ້ສໍາເລັດການດຳເນີນກອງປະຊຸມໃຫຍ່ 1 ເມືອງ ຄື: ເມືອງໜອງບົກ ແລະ ຈະສຸມໃສ່ດໍາເນີນຢູ່ເມືອງອື່ນໆ ແລະ ຄາດຄະເນຕາມແຜນໃນ 10 ເມືອງ, ໃຫ້ສໍາເລັດໃນເດືອນ ມີນາ 2025. ຈາກນັ້ນຈະກ້າວເຂົ້າສູ່ການກະກຽມດໍາເນີນກອງປະຊຸມໃຫຍ່ອົງຄະນະພັກແຂວງຕາມຄໍາສັ່ງ, ຄໍາແນະນໍາຂອງຄະນະພັກຂັ້ນເທິງຕາມແຜນໃຫ້ສໍາເລັດໃນເດືອນກັນຍາ 2025. ກ່ຽວກັບການກະກຽມດຳເນີນກອງປະຊຸມໃຫຍ່ແມ່ນໄດ້ສຸມໃສ່ 3 ວຽກຕົ້ນຕໍຄື: ວຽກງານຂະບວນການ; ການກະກຽມດ້ານເນື້ອ ແລະ ດ້ານການກະກຽມບຸກຄະລາກອນ, ສະເພາະດ້ານວຽກງານຂະບວນການແມ່ນໄດ້ໂຄສະນາປະຊາສໍາພັນຊຸກຍູ້ໃຫ້ປະຊາຊົນໄດ້ມີຄວາມຮັບຮູ້ ແລະ ເຂົ້າໃຈ ເພື່ອໃຫ້ເຂົາເຈົ້າໄດ້ມີສ່ວນຮ່ວມປະກອບສ່ວນຕາມພາລະບົດບາດສິດໜ້າທີ່ຂອງເຂົາເຈົ້າ ແລະ ເພື່ອແນໃສ່ການກະກຽມດໍາເນີນກອງປະຊຸມໃຫຍ່ 3 ຂັ້ນກາຍເປັນປາງບຸນໃຫຍ່ຂອງພັກໃນທົ່ວສັງຄົມ
ດ້ານວຽກງານການຫັນເອົາອຸດສະຫະກໍາການທ່ອງທ່ຽວ 4.0 ເພື່ອສົ່ງເສີມການທ່ອງທ່ຽວຮັກສາໄດ້ຮີດຄອງປະເພນີວັດທະນະທໍາອັນດີງາມ : ແຂວງໄດ້ເອົາໃຈໃສ່ ແລະ ຖືເປັນວຽກບູລິມະສິດທີ່ສໍາຄັນ ຊຸກຍູ້ສົ່ງເສີມວຽກງານການທ່ອງທ່ຽວ ເລີ່ມຈາກການເປີດປີທ່ອງທ່ຽວລາວ 2024 ໃນຜ່ານມາ ໂດຍໄດ້ໂຄສະນາປະຊາສໍາພັນຜ່ານສື່ຕ່າງໆ ເພື່ອໃຫ້ຊາວໂລກໄດ້ຮັບຮູ້ວ່າແຂວງຄໍາມ່ວນມີຄວາມພ້ອມໃນການຮັບເອົານັກທ່ອງທ່ຽວທັງພາຍໃນ ແລະ ຕ່າງປະເທດ, ໃຫ້ທຸກມຸມໂລກມາທ່ຽວແຂວງຄໍາມ່ວນ, ພ້ອມນີ້ຍັງ ຈັດໃຫ້ມີຫຼາຍກິດຈະກຳປິ່ນອ້ອມໃນການເຄື່ອນໄຫວເປີດປີທ່ອງທ່ຽວ ແລະ ໃນຫວ່າງບໍ່ດົນມານີ້ແຂວງຄໍາມ່ວນໄດ້ເປີດງານ ເທດສະການອາຫານ ແລະ ວາງສະແດງຈໍາໜ່າຍສິນຄ້າ ພ້ອມກັນນັ້ນກໍ່ໄດ້ສົມທົບກັບແຂວງກວາງບິ່ງ ສສ ຫວຽດນາມ, ຈັງຫວັດນະຄອນພະນົມ ຈັດກອງປະຊຸມ 3 ແຂວງ ຫາລືເພື່ອສົ່ງເສີມການທ່ອງທ່ຽວ, ຊຸກຍູ້ສົ່ງເສີມຜູ້ປະກອບການຕ່າງໆ ໃນການປັບປຸງຄຸນນະພາບການບໍລິການ ໄດ້ມີການຫັນປ່ຽນດີຂຶ້ນຫຼາຍໂຮງແຮມເຮືອນພັກໄດ້ມີການຍົກລະດັບດີຂຶ້ນ. ທົ່ວແຂວງມີແຫຼ່ງທ່ອງທ່ຽວທັງໝົດ 210 ແຫ່ງ, ພັດທະນາ ແລະ ເປີດບໍລິການແລ້ວ 23 ແຫ່ງ. ໃນນີ້ມີແຫຼ່ງທ່ອງທ່ຽວທາງທໍາມະຊາດທີ່ລືຊື່ຄື : ຖໍ້າກອງລໍ, ພູຜາມ່ານ, ນໍ້າລອດເຊບັ້ງໄຟ, ທ່າຝຣັ່ງ-ວັງສີຄາມ, ຖໍ້ານາງແອ່ນ ແລະ ຖໍ້າພຣະໜອງປາຝາ, ປະຈຸບັນກຳລັງພັດທະນາ ແລະ ຈະເປີດໃຫ້ບໍລິການແມ່ນແຫຼ່ງທ່ອງທ່ຽວຂຸນກອງແລງ ເຊິ່ງເປັນແຫ່ງໜຶ່ງທີ່ນັກທ່ອງທ່ຽວໃຫ້ຄວາມສົນໃຈຢາກມາທ່ຽວຊົມ. ສະເພາະປີ 2024 ໄດ້ມີນັກທ່ອງທ່ຽວເຂົ້າມາທ່ຽວແຂວງຄໍາມ່ວນເກີນແຜນ, ຄາດໝາຍໄວ້ປະມານ 500,000 ຄົນ, ຜ່ານການຈັດຕັ້ງປະຕິບັດຕົວຈິງມີນັກທ່ອງທ່ຽວເຂົ້າມາ 852,080 ຄົນ, ສ້າງລາຍຮັບສໍາພັດໄດ້ 1,012 ຕື້ກວ່າກີບ, ພ້ອມນັ້ນ ກໍ່ໄດ້ມີການປັບປຸງປະຕິສັງຂອນ ແຫຼ່ງທ່ອງທ່ຽວທາງດ້ານວັດທະນະທໍາເປັນຕົ້ນແມ່ນວັດພຣະທາດສີໂຄດຕະບອງ ພວກເຮົາພວມກຳລັງດໍາເນີນການປັບປຸງ ເພື່ອໃຫ້ທ່ວງທັນກັບ ບຸນນະມັດສະການພຣະທາດສີໂຄດຕະບອງ ລະຫວ່າງກາງເດືອນກຸມພາ ທີ່ຈະມາເຖິງນີ້.
ທ່ານ ເຈົ້າແຂວງຄໍາມ່ວນ ຍັງໃຫ້ຮູ້ຕື່ມອີກ ກ່ຽວກັບແຜນການໃນຕໍ່ໜ້າແຂວງຄໍາມ່ວນຈະໄດ້ສືບຕໍ່ຜັນຂະຫຍາຍມະຕິກອງປະຊຸມສະພາປະຊາຊົນແຂວງເທື່ອທີ 8 ທີ່ຫາກໍ່ສໍາເລັດນີ້; ບັນດາຄາດໝາຍທີ່ກໍານົດໄວ້ໃນແຜນພັດທະນາເສດຖະກິດ-ສັງຄົມ, ແຜນງານຕ່າງໆ; ສືບຕໍ່ສຶກສາອົບຮົມປຸກລະດົມໃຫ້ປະຊາຊົນໄດ້ມີສ່ວນຮ່ວມຢ່າແຂງແຮງຕື່ມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດເປັນຕົ້ນແມ່ນ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ. ຄຽງຄູ່ກັນນັ້ນ ຈະໄດ້ເອົາໃຈໃສ່ວຽກງານປ້ອງກັນຊາດ, ປ້ອງກັນຄວາມສະຫງົບ ເພື່ອຮັບປະກັນໃຫ້ແຂວງຄໍາມ່ວນສືບຕໍ່ມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ, ສ້າງເງື່ອນໄຂທີ່ດີໃຫ້ປະຊາຊົນໃນການທໍາມາຄ້າຂາຍ ແລະ ສິ່ງສໍາຄັນ ພວກເຮົາຈະໄດ້ສືບຕໍ່ເອົາໃຈໃສ່ໃນການຜັນຂະຫຍາຍມະຕິ 04/ກມສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ເປັນຕົ້ນແມ່ນຊຸກຍູ້ການຜະລິດ, ການປູກ-ການລ້ຽງ ເພື່ອລຸດຜ່ອນ ຫລື ວ່າທົດແທນການນໍາເຂົ້າ ໂຄສະນາປະຊາສໍາພັນໃຫ້ປະຊາຊົນນໍາໃຊ້ຜະລິດຕະພັນພາຍໃນໃຫ້ຫຼາຍຂຶ້ນ, ກ້າວໃສ່ການຈໍາກັດນໍາເຂົ້າສິນຄ້າທີ່ບໍ່ຈໍາເປັນ, ເພື່ອພ້ອມພາກັນສ້າງສາພັດທະນາແຂວງຄໍາມ່ວນໃຫ້ມີຄວາມເຕີບໃຫຍ່ເຂັ້ມແຂງ; ເປົ້າໜາຍຫຼັກແມ່ນສຸມໃສ່ແກ້ໄຂຄວາມທຸກຍາກຂອງປະຊາຊົນ ຖືເອົາຜົນປະໂຫດຍລວມຂອງປະຊາຊົນເປັນໂຕຕັ້ງ, ຖືເອົາປະຊາຊົນເປັນເປົ້າໝາຍ; ສ້າງເງື່ອນໄຂຕ່າງໆ ໃຫ້ປະຊາຊົນໄດ້ທໍາມາຫາກິນຢ່າງສະດວກສະບາຍ.

แชร์