ເມືອງໄຊພູທອງ ໄຂກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ VI

ກອງປະຊຸມໃຫຍ່ຜູ້ແທນອົງຄະນະພັກເມືອງໄຊພູທອງ ຄັ້ງທີ VI ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 21 ມັງກອນ 2025 ທີ່ສະໂມສອນຂອງເມືອງໄຊພູທອງ. ໂດຍການໃຫ້ກຽດເຂົ້າຮ່ວມເປັນປະທານ ຂອງສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ, ສະຫາຍ ບົວສອນ ມະຫາວົງ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍ ນາງ ດາວວອນ ໄຊສູລຽນ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໄຊພູທອງ, ມີຄະນະພັກນະຄອນໄກສອນ ພົມວິຫານ,ເຈົ້າເມືອງ-ຮອງເຈົ້າເມືອງ, ຫົວໜ້າພະແນກການ-ຮອງພະແນກການອ້ອມຂ້າງແຂວງ, ບັນດາສະຫາຍໃນຄະນະບໍລິຫານງານພັກເມືອງ ແລະ ຜູ້ແທນສົມບູນຈຳນວນ 167 ສະຫາຍ , ຍິງ 36 ສະຫາຍເຂົ້າຮ່ວມ ເຊິ່ງເປັນຕົວແທນໃຫ້ແກ່ສະມາຊິກພັກຈຳນວນ 1,534, ຍິງ 530 ສະຫາຍ ໃນທົ່ວເມືອງ

ສະຫາຍ ນາງ ດາວວອນ ໄຊສຸລຽນ ກຳມະການພັກແຂວງ ເລຂາຄະນະບໍລິຫານງານພັກເມືອງໄຊພູທອງ ໄດ້ກ່າວເປີດກອງປະຊຸມຢ່າງເປັນທາງການວ່າ: ຕະຫຼອດໄລຍະຍະ 5 ປີຜ່ານມາ ຄະນະບໍລິຫານງານພັກເມືອງໄຊພູທອງ ຊຸດທີ 5 ຂອງພວກເຮົາໄດ້ເອົາໃຈໃສ່ໃນການນໍາພາຊີ້ນໍາ ມະຫາຊົນ ແລະ ປະຊາຊົນພາຍໃນເມືອງສ້າງຂະບວນການໃນຫຼາຍດ້ານເປັນຕົ້ນແມ່ນ ຂະບວນການປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ, ຂະບວນການຜະລິດເປັນສິນຄ້າຂອງປະຊາຊົນ, ວຽກງານວັດທະນະທໍາ-ສັງຄົມ ແລະ ອື່ນໆ. ບັນຫາສໍາຄັນ ໃນນີ້ຍັງແມ່ນຂະບວນການຜັນຂະຫຍາຍວຽກງານສາມສ້າງ, ການຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ, ເພື່ອນໍາພາແກ້ໄຂຄວາມທຸກຍາກຂອງປະຊາຊົນ; ພ້ອມກັນນັ້ນ, ກໍ່ໄດ້ມີການຫ້າງຫາກະກຽມດ້ານເນື້ອໃນ ແລະ ບຸກຄະລາກອນ ເພື່ອດໍາເນີນກອງປະຊຸມໃຫຍ່ຂັ້ນຮາກຖານພັກ, ຂັ້ນອົງຄະນະພັກເມືອງ ດ້ວຍຄວາມຮັບຜິດຊອບອັນສູງສົ່ງ ແລະ ມີຜົນສໍາເລັດຕາມຄາດໝາຍທີ່ວາງໄວ້. ກອງປະຊຸມໃຫຍ່ອົງຄະນະພັກເມືອງໄຊພູທອງຄັ້ງນີ້ແມ່ນຈະໄດ້ສຸມໃສ່ຫຼາຍເນື້ອໃນທີ່ສໍາຄັນເປັນຕົ້ນແມ່ນ ຈະໄດ້ຮັບຟັງ ແລະ ປະກອບຄໍາເຫັນໃສ່ຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບັນຫາສໍາຄັນອື່ນໆອີກຈຳນວນໜຶ່ງ.
ຈາກນັ້ນສະຫາຍ ປອ ບົງສຸວັນ ມະນີວົງ ກຳມະການປະຈຳພັກເມືອງ ກໍ່ໄດ້ຜ່ານຮ່າງບົດລາຍງານການເມືອງທັງສອງພາກ ເຊິ່ງຕະຫຼອດໄລຍະ 5 ປີຜ່ານມາ ອົງຄະນະພັກເມືອງໄຊພູທອງ ແມ່ນຍຶດໝັ້ນໃນແນວທາງປ້ອງກັນຊາດ - ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ແລະ ຕິດພັນກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ດ້ວຍຮູບການຜັນຂະຫຍາຍໂຄສະນາເຂົ້າສູ່ລວງເລິກ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ໃຫ້ກາຍເປັນໜ້າທີ່ຄວາມຮັບຜິດຊອບຂອງທຸກພາກສ່ວນໃນສັງຄົມ ປັບປຸງລະບົບກົງຈັກການຈັດຕັ້ງນໍາພາ - ບັນຊາ ຂັ້ນຕ່າງໆຂອງສອງກໍາລັງ, ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ແລະ ຄວບຄຸມໄດ້ສະພາບການແຕ່ລະໄລຍະ, ໄດ້ເອົາໃຈໃສ່ປະຕິບັດ ໃນການຄຸ້ມຄອງການນໍາໃຊ້ເຮືອປະເພດຕ່າງໆຕາມລໍາແມ່ນໍ້າຂອງ, ສາມາດແກ້ໄຂໄດ້ປະກົດການຫຍໍ້ທໍ້ທີ່ເກີດຂຶ້ນໃນບໍລິເວນຊາຍແດນ ໃຫ້ມີຄວາມເປັນລະບຽບຮຽບຮ້ອຍໂດຍພື້ນຖານ; ພ້ອມນັ້ນກໍ່ໄດ້ຫັນກໍາລັງລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ໃນຈໍານວນ 8 ກຸ່ມບ້ານພາຍໃນເມືອງ; ເປີດຊຸດຝຶກອົບຮົມຫັດແອບບ້ານປ້ອມໝັ້ນ ກຸ່ມບ້ານສູ້ຮົບຕິດລ່ຽນໄດ້ 1 ກຸ່ມບ້ານ, ສ້າງ ແລະ ປະເມີນບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ ໄດ້ 41 ບ້ານ, ສ້າງ ແລະ ປະເມີນບ້ານບ້ານປອດຢາເສບຕິດໄດ້ 25 ບ້ານ, ສັງລວມແລ້ວທົ່ວເມືອງມີສະຖຽນລະພາບທາງດ້ານການເມືອງ ແລະ ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ. ດ້ານວຽກງານເສດຖະກິດໄດ້ນໍາໃຊ້ທ່າແຮງ ແລະ ກໍາລັງແຮງຂອງທຸກພາກສ່ວນເຂົ້າໃນການພັດທະນາເສດຖະກິດໃຫ້ຂະຫຍາຍຕົວຢ່າງຕໍ່ເນື່ອງ ໂດຍຖືເອົາການຜະລິດກະສິກໍາ ການປູກ - ການລ້ຽງເປັນຫຼັກ ແລະ ຖືເອົາການບໍລິການທ່ອງທ່ຽວ ເປັນການສ້າງລາຍຮັບກັບທີ່ ເຊິ່ງໄດ້ປະກອບສ່ວນແກ້ໄຂຄວາມທຸກຍາກຂອງພໍ່ແມ່ປະຊາຊົນ ເຖິງວ່າໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ-19 ແລະ ສະພາບຄວາມຫຍຸ້ງຍາກທາງດ້ານເສດຖະກິດ ການເງິນກໍ່ຕາມ ແຕ່ຄະນະພັກແຕ່ລະຂັ້ນກໍ່ໄດ້ສຸມໃສ່ສ້າງແຜນພັດທະນາເສດຖະກິດ ແລະ ແກ້ໄຂຄວາມທຸກຍາກຂອງປະຊາຊົນເປັນບູລິມະສິດຕົ້ນຕໍ ເຊິ່ງສາມາດເຮັດໃຫ້ເສດຖະກິດຂອງເມືອງມີທ່າຂະຫຍາຍຕົວ ແລະ ມີອັດຕາເຕີບໂຕສະເລ່ຍ 7.40 % ລວມຍອດມູນຄ່າຜະລິດຕະພັນພາຍໃນ ບັນລຸໄດ້ 1,595.05 ຕື້ກີບ, ສະເລ່ຍໃສ່ພົນລະເມືອງໄດ້ 37,01 ລ້ານກີບ/ຄົນ/ປີ ຫຼື ເທົ່າກັບ 1.682 ໂດລາສະຫາລັດ; ໂຄງປະກອບເສດຖະກິດມີການຫັນປ່ຽນຢ່າງຕັ້ງໜ້າ, ໂດຍສະເພາະແມ່ນຂະແໜງກະສິກໍາ ເພີ້ມຂຶ້ນ 7.31% ກວມເອົາ 75.49%, ຂະແໜງອຸດສາຫະກໍາ ເພີ້ມຂຶ້ນ 7.50% ກວມເອົາ 14.41%, ຂະແໜງບໍລິການ ເພີ້ມຂຶ້ນ 8.20% ກວມເອົາ 10.10% ຂອງ GDP ; ການຈັດເກັບລາຍຮັບເຂົ້າງົບປະມານຂອງລັດປະຕິບັດໄດ້ 19.589 ຕື້ກີບ ເທົ່າກັບ 118%, ມາຮອດປະຈຸບັນເມືອງສາມາດກຸ້ມຕົນເອງທາງດ້ານງົບປະມານ ແລະສາມາດດຸ່ນໃຫ້ແຂວງໃນແຕ່ລະປີ ປະມານໜຶ່ງຕື້ກວ່າກີບ, ປະຕິບັດລາຍຈ່າຍໄດ້ 15.785 ຕື້ກີບ ເທົ່າກັບ 95.43% ຂອງແຜນການ;
ຈາກນັ້ນພາຍໃນກອງປະຊຸມ ກໍ່ໄດ້ຮັບຟັງການຜ່ານບົດສະລຸບ ແຜນພັດທະນາເສດຖະກິດ-ສັງຄົມ ຄັ້ງທີ V (2020-2024) ແລະ ທິດທາງແຜນການ ຄັ້ງທີ VI (2025-2029) ຂອງເມືອງ ຈາກສະຫາຍ ເພີນ ທາມອນຕີ ກຳມະການພັກເມືອງ ຮອງເຈົ້າເມືອງໄຊພູທອງຕື່ມອີກ; ພ້ອມຮັບການປະກອບຄຳຄິດຄຳເຫັນຈາກຕາງໜ້າຂົງເຂດ ປກຊ-ປກສ, ເສດຖະກິດ, ຂົງເຂດພັກ-ພະນັກງານ, ຂົງເຂດວັດທະນະທຳ-ສັງຄົມ. ຜ່ານບົດລາຍງານການສ້າງບ້ານໃຫຍ່ ບ້ານມ່ວງໄຂ່ ໃຫ້ກາຍເປັນບ້ານຕົວແບບດ້ານການປູກ-ການລ້ຽງ; ຄອບຄົວຕົວແບບລາຍງານກ່ຽວກັບການປູກ-ການລ້ຽງ, ການປະກອບຄຳຄິດຄຳເຫັນຈາກເມືອງອ້ອມຂ້າງ ແລະ ດຳເນີນການປ່ອນບັດຂັດເລືອກເອົາຄະນະບໍລິຫານງານພັກເມືອງຊຸດ VI ຕື່ມອີກ ເຊິ່ງກອງປະຊຸມ ແມ່ນໄດ້ດຳເນີນໄປເປັນເວລາ 2 ວັນ ເລີ່ມແຕ່ວັນທີ 21-22 ມັງກອນ 2025 ຈຶ່ງສຳເລັດ.
ຂ່າວ - ພາບ: ວິລັດດາ ດວງຈັນທາ

แชร์