ເປີດກິດຈະກຳວັດທະນະທຳບຸນກຸດຈີນ ເຂົ້າສູ່ປະເທດລາວ

 

    ພິທີເປີດກິດຈະກໍາວັດທະນະທໍາບຸນກຸດຈີນເຂົ້າສູ່ປະເທດລາວ ພາຍໃຕ້ຫົວຂໍ້ ດື່ມນໍ້າສາຍດຽວ ກົມກຽວດັ່ງຄອບຄົວດຽວກັນ ປີ 2025 ຈັດຂຶ້ນວັນທີ 15 ມັງກອນ 2025 ທີ່ນະຄອນຫຼວງວຽງຈັນ ມີທ່ານ ນາງ ວິລະວອນ ພັນທະວົງ ຮອງຫົວໜ້າຄະນະໂຄສະນາອົບຮົມສູນກາງພັກພັກ ທ່ານ ກ້າວ ອັ່ນມິງ ບັນນາທິການໃຫຍອົງການພາສາຕ່າງປະເທດແຫ່ງຊາດຈີນ ທ່ານ ນາງ ຟາງຫົງ ເອກອັກຄະລັດສະທູດ ສປ ຈີນ ປະຈໍາ ລາວ ທ່ານ ສະຫວັນຄອນ ຣາຊມົນຕີ ປະທານສະມາຄົມນັກຂ່າວແຫ່ງປະເທດລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫ່ຍໜັງສືພິມປະຊາຊົນ ກ່າວວ່າ ພື້ນອາຊີໃຕ້ ອາຊີຕາເວັນອອກສຽງໃຕ້ ແລະ ແຂວງຢຸນນານ ສປປ ຈີນ ມີຈຸດປະສົງຊຸກຍູ້ການເຊື່ອມໂຍງສື່ມວນຊົນ ແບ່ງປັນຄວາມຮູ້ ປະສົບການ ແລະ ການຮ່ວມມືດ້ານວິຊາຊີບ ການແລກປ່ຽນຂໍ້ມູນຂ່າວສານ ແລກປ່ຽນວັດທະນະທຳ ແລະ ການສຶກສາ ກໍຄືການຈັດງານວັດທະນະທໍາບຸນກຸດຈີນກ້າວເຂົ້າສູ່ປະເທດລາວ ພາຍໃຕ້ຫົວຂໍ້ “ດື່ມນໍ້າສາຍດຽວ ກົມກຽວດັ່ງຄອບຄົວດຽວກັນ ປີ 2025” ໃນຄັ້ງນີ້ເປັນຮູບການໜຶ່ງເພື່ອເຜີຍແຜ່ ສ້າງຄວາມຮັບຮູ້ ຄວາມເຂົ້າໃຈກ່ຽວກັບບຸນປີໃໝ່ປະຈໍາຊາດຂອງປະເທດຈີນ ທີ່ເປັນມູນເຊື້ອວັດທະນະທໍາອັນດີງາມມາແຕ່ດຶກດໍາບັນ ໃຫ້ກັບຄົນລາວ.

ສໍາລັບໜັງສືພິມປະຊາຊົນ ແລະ ໜັງສືພິມລາຍວັນຢຸນນານໃນໄລຍະຜ່ານມາ ໄດ້ມີການພົວພັນຮ່ວມມືກັນຢ່າງແໜ້ນແຟ້ນ ໃນການແລກປ່ຽນຂໍ້ມູນຂ່າວສານປະຈໍາອາທິດ ໂດຍສະເພາະດ້ານວັດທະນະທໍາ ການສຶກສາ ແລະ ການທ່ອງທ່ຽວສ່ອງແສງຄວາມເປັນຈິງຕໍ່ການສ້າງສາພັດທະນາຂອງແຕ່ລະປະເທດ ໝາກຜົນຂອງໂຄງການຮ່ວມມືລະຫວ່າງລາວ-ຈີນ ຜ່ານການຮ່ວມມືໄດ້ເຮັດໃຫ້ປະຊາຊົນທັງສອງປະເທດ ໄດ້ຮັບຮູ້ຂໍ້ມູນຂ່າວສານທີ່ຖືກຕ້ອງຕາມຄວາມເປັນຈິງ ໄດ້ສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ ປະຊາຊົນທຽວໄປມາຫາສູ່ກັນນັບມື້ນັບຫຼາຍຂຶ້ນໃນແຕ່ລະປີ ໜັງສືພິມປະຊາຊົນໄດ້ເຂົ້າຮ່ວມກອງປະຊຸມ ຈັດໂດຍສູນການສື່ສານສາກົນອາຊີໃຕ້ ແລະ ອາຊີຕາເວັນອອກສຽງໃຕ້  ແຂວງຢຸນນານ ໃນຫຼາຍຫົວຂໍ້ ເພື່ອແລກປ່ຽນບົດຮຽນ ປະສົບການແນໃສ່ການພັດທະນາສື່ມວນຊົນກ້າວໜ້າໄປພ້ອມກັນ ທັງໝົດນີ້ເປັນການສືບຕໍ່ເສີມຂະຫຍາຍແນວທາງຄູ່ຮ່ວມສະຕາກໍາ ລາວ-ຈີນ ຈີນ-ລາວ ທີ່ທ່ານ ສີຈີ້ນຟິງ ກໍານົດອອກໃຫ້ແຕກດອກອອກຜົນເປັນກ້າວໆ ພ້ອມກັນນັ້ນສື່ມວນຊົນກໍມີບົດບາດສໍາຄັນເປັນຢ່າງຍິ່ງໃນການຄົ້ນຄວ້າ ເກັບກໍາຂໍ້ມູນ ວິເຄາະວິໄຈບັນຫາຕ່າງໆເພື່ອໂຄສະນາເຜີຍແຜ່ສະພາບການຂອງໂລກໃຫ້ສັງຄົມໄດ້ຮັບຮູ້ ມີຄວາມເຂົ້າໃຈຕໍ່ເຫດການຕ່າງໆຢ່າງຖືກຕ້ອງເພື່ອສ້າງຄວາມເຂົ້າໃຈເຊິ່ງກັນ ແລະ ກັນ ໃນຍຸກປັດຈຸບັນສື່ມວນຊົນຍິ່ງມີການຂະຫຍາຍຕົວຢ່າງວ່ອງໄວ ໂດຍສະເພາະສື່ສັງຄົມອອນລາຍການນໍາໃຊ້ລະບົບເອໄອ ເຂົ້າມາມີບົດບາດ ໃນສັງຄົມເຮັດໃຫ້ມີຄວາມຫຍຸ້ງຍາກໃນການໄຈ້ແຍກຂໍ້ມູນ ແລະ ເຫດການຕ່າງໆວ່າແມ່ນເຫດການຕົວຈິງ ຫຼື ການປັ້ນແຕ່ງເລື່ອງຂຶ້ນມາເພື່ອລອກລວງສັງຄົມເຮັດໃຫ້ກຸ່ມຄົນບໍ່ດີ ນໍາໃຊ້ສື່ສັງຄົມອອນລາຍໃນທາງທີ່ບໍ່ຖືກຕ້ອງ ໃສ່ຮ້າຍປ້າຍສີ ບິດເບື່ອນ ຄວາມເປັນຈິງເຮັດໃຫ້ປະຊາຊົນຈໍານວນໜຶ່ງຫຼົງເຊື່ອ ສ້າງຄວາມແຕກແຍກພາຍໃນ ເຊິ່ງເປັນໄພອັນຕະລາຍຕໍ່ຄວາມໝັ້ນຄົງໃນໄລຍະຍາວ ຕໍ່ໜ້າສະພາບການດັ່ງກ່າວຈຶ່ງເປັນໜ້າທີ່ອັນໜັກໜ່ວງຂອງສື່ມວນຊົນ ທີ່ຈະຕ້ອງໄດ້ຮ່ວມກັນຄົ້ນຄວ້າຫາວິທີການແກ້ໄຂຢ່າງສົມເຫດສົມຜົນ ແລະ ທັນການ.

    ໜັງສືພິມປະຊາຊົນຍິນດີສະໜັບສະໜູນ ແລະ ສົ່ງເສີມສູນການສື່ສານສາກົນພາກພື້ນອາຊີໃຕ້ ແລະ ອາຊີຕາເວັນອອກສຽງໃຕ້ ແຂວງຢຸນນານ ສປປ ຈີນ ທີ່ຍາມໃດກໍມີຄວາມມຸ້ງໝາຍສ້າງສາຍພົວພັນອັນດີງາມໃນເຄື່ອຄາຍສື່ມວນຊົນ ເຮັດໃຫ້ສື່ມວນຊົນແຕ່ລະປະເທດເຜີຍແຜ່ການສ້າງສາພັດທະນາ ປະເທດຊາດຂອງຕົນໃຫ້ຊາວໂລກຮັບຮູ້ ປົກປ້ອງຄວາມເປັນຈິງ ສ້າງຄວາມເຂົ້າອົກເຂົ້າໃຈຢູ່ຮ່ວມກັນແບບສັນຕິຮ່ວມກັນ ເຜີຍແຜ່ສົ່ງເສີມດ້ານວັດທະນະທຳອັນດີງາມ ແລະ ສະເໜີສະເໜ່ຂອງຄວາມຫຼາກຫຼາຍ ຂອງປະເທດອາຊີໃຕ້ ແລະ ອາຊີຕາເວັນອອກສ່ຽງໃຕ້ໃຫ້ບັນລຸການພັດທະນາຮ່ວມກັນ ໃນໂອກາດປີໃໝ່ກຸດຈີນກໍາລັງມາຈະເຖິງ ຂໍໃຫ້ເປັນປີແຫ່ງຄວາມສຸກສົມຫວັງຂອງທຸກຄົນ ທຸກຄອບຄົວຂອງປະຊາຊົນຈີນ ເປັນປີແຫ່ງຄວາມເບັ່ງບານຂອງການຮ່ວມມືຕາມຄູຮ່ວມສະຕາກໍາ ລາວ-ຈີນ ສະບັບທີສອງ ແລະ ເປັນປີແຫ່ງຜົນສໍາເລັດໃນການເສີມສ້າງຄວາມສາມັກຄີ ການຮ່ວມມືຂອງເຄື່ອຄ່າຍສື່ມວນຊົນອາຊີໃຕ້ ແລະ ອາຊີຕາເວັນອອກສຽງໃຕ້ໃຫ້ຈົບງາມ.

    ໃນວັນດຽວກັນນີ້ກໍໄດ້ມີກອງປະຊຸມສົນທະນາເສັ້ນທາງແຫ່ງວັດທະນະທໍາ ລາວ-ຈີນ ແລະ ພິທີເປີດວາລະສານ ສະບັບພິເສດ ສະບັບເດືອນມັງກອນ 2025 ອີກດ້ວຍ.

แชร์