ເຄແອນບີເຟີນີເຈີ ຖືສຳຄັນພັດທະນາສີມືແຮງງານໃນໂຮງງານ

  ເຄແອນບີເຟີນິເຈີ ແມ່ນອີກໂຮງງານໜຶ່ງທີ່ມີຄວາມເອົາໃຈໃສ່ຕໍ່ການພັດທະນາສືມີແຮງງານພາຍໃນໂຮງງານເພື່ອໃຫ້ສິນຄ້າທີ່ຜະລິດອອກມາຮັບໃຊ້ສັງຄົມມີຄວາມສວຍງາມຮັກສາໄດ້ເອກະລັກໃນແບບລາວໆທີ່ສຳຄັນຄືສາມາດແຂັ່ງຂັນໄດ້ກັບຕະຫຼາດພາຍໃນ ແລະຕ່າງປະເທດ.

  ທ່ານ ກອງມາລາ ພົມມະໄລ ເຈົ້າຂອງໂຮງງານໃຫ້ສຳພາດຕໍ່ກັບທີມຂ່າວເນື່ອງໃນໂອກາດວັນກຳມະກອນສາກົນທີ 1 ພຶດສະພາຮູ້ວ່າ: ໂຮງງານເຄແອນບີເຟີນິເຈີໄດ້ຮັບການສ້າງຕັ້ງຂຶ້ນມາແລ້ວ 30 ກວ່າປີທີ່ບ້ານໂສກປ່າຫຼວງ ເມືອງສີສັດຕະນາກນະຄອນຫຼວງວຽງຈັນ ຊຶ່ງນັບແຕ່ມື້ສ້າງຕັ້ງໂຮງງານຮອດປະຈຸບັນ ແມ່ນໄດ້ເອົາໃຈໃສ່ຕໍ່ການປະຕິບັດຕາມແນວທາງນະໂຍບາຍຂອງພັກ-ລັດວາງອອກແຕ່ລະໄລຍະ ແລະການໃຊ້ແຮງງານກໍຄືຄົນລາວທັງໝົດທີ່ປະກອບສ່ວນສຳຄັນໃນການຊ່ວຍໃຫ້ເຂົາເຈົ້າມີວຽກເຮັດງານທຳເປັນປະຈຳຫຼຸດຜ່ອນໄພວ່າງງານ,ຊ່ວຍແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນແນໃສ່ເພື່ອໃຫ້ເຂົາເຈົ້າຫຼຸດພົ້ນຈາກຄວາມທຸກຍາກເທື່ອລະກ້າວສິ່ງສຳຄັນແມ່ນເຮັດໃຫ້ແຮງງງານເຫລົ່ານັ້ນມີສີມືຊ່າງເຟີນິເຈີຕິດໂຕໃນເວລາອອກໄປປະກອບອາຊີບເປັ ນຂອງຕົວເອງ.

  ພ້ອມດຽວກັນນັ້ນໂຮງງານກໍໄດ້ຖືສຳຄັນໃນພັດທະນາສືມືຂອງແຮງງານເປັນປະຈຳໂດຍມີການຈັດຝຶກອົບຮົມຂຶ້ນທີ່ໂຮງງານ, ເຂົ້າຮ່ວມອົບຮົມທີ່ພາກສ່ວນລັດຈັດຂຶ້ນນອກນັ້ນຍັງມີການແລກປ່ຽນກັບບັນດາໂຮງງານເຟີນິເຈີອື່ນໆ ເພື່ອໃຫ້ສິນຄ້າເຟີນິເຈີຂອງໂຮງງານທີ່ຜະລິດອອກມາໃຫ້ມີຄວາມສວຍງາມຮັກສາໄດ້ເອກະລັກແບບລາວໆທີ່ສຳຄັນຄືສາມາດແຂ່ງຂັນໄດ້ກັບຕະຫຼາດພາຍໃນ ແລະຕ່າງປະເທດ.

 ນອກຈາກການພັດທະນາສີມືແຮງງານແລ້ວ ທ່ານ ກອງມາລາ ພົມມະໄລ ກ່າວຕື່ມ: ໂຮງງານເຄແອນບີເຟີນິເຈີຍັງໃຫ້ຄວາມສຳຄັນໃນເລື່ອງນະໂຍບາຍທີ່ດີເຮັດໃຫ້ແຮງງານຫຼາຍຄົນເຮັດວຽກນຳ 10-20 ກວ່າປີກໍມີໂດຍສະເພາະແມ່ນເລື່ອງເງິນເດືອນໃນຈຳນວນກຳມະກອນ ແລະນາຍຊ່າງທັງໝົດ 80 ກວ່າຄົນ ແມ່ນໂຮງງານໃຫ້ຕໍ່ສຸດບໍ່ຫຼຸດ 1,6 ລ້ານກີບ ແລະສູງສຸດ 5 ລ້ານກີບ ນອກນັ້ນພະນັກງານຍັງສາມາດເບີກຈ່າຍເງິນເດືອນກ່ອນລ່ວງໜ້າໄດ້ອີກຫາກມີຄວາມຈຳເປັນທີ່ຈະຕ້ອງໄດ້ໃຊ້ຈ່າຍ.

ເນື່ອງໃນໂອກາດວັນກຳມະກອນສາກົນໃນປີນີ້ກໍຂໍຝາກເຖິງຜູ້ອອກແຮງງານໃນທຸກສາຂາອາຊີບໃຫ້ສືບຕໍ່ປະຕິບັດວຽກງານຕົນຢ່າງຕັ້ງໜ້າໂດຍສະເພາະແມ່ ນຕ້ອງພັດທະນາສືມື ແລະຄວາມຮູ້ຂອງຕົນຢ່າງຕໍ່ເນື່ອງເພື່ອມາໝູນໃຊ້ໃຫ້ເກີດປະໂຫຍດສູງຕໍ່ວຽກງານທີ່ຕົນກຳລັງດຳເນີນຢູ່ອັນຈະມີຜົນຕໍ່ວຽກງານມີຄວາມສຳເລັດທຸລະກິດກໍຈະມີຄວາມຈະເລີນກ້າວໜ້າໄປເລື້ອຍໆໃນອະນາຄົດ ທ່ານ ກອງມາລາ ພົມມະໄລ ກ່າວ.

ພາບຂ່າວ: ນສພ ເສດຖະກິດ-ສັງຄົມ

แชร์