ບໍລິສັດ ພູເບ້ຍ ມາຍນິງ ສະຫຼອງຄວາມເຕີບໂຕ ແລະຜົນສໍາເລັດໃນປີ 2024

ຕະຫຼອດໄລຍະ 12 ເດືອນຜ່ານມາ, ບໍລິສັດ ພູເບ້ຍ ມາຍນິງ ສະຫຼອງຜົນສໍາເລັດໃນການດໍາເນີນງານຫຼາຍຢ່າງ ແລະ ແຜນລິເລີ້ມແບບຍຸດທະສາດທີ່ເຮັດໃຫ້ໂຄງການພັດທະນາຕ່າງໆມີຄວາມກ້າວໜ້າ ຢູ່ໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ ແລະ ໂຄງການຂຸດຄົ້ນ-ປຸງແຕ່ງ ຄໍາ-ເງິນ ບ້ານຫ້ວຍຊາຍ.

ບໍລິສັດ ພູເບ້ຍ ມາຍນິງ ເຊິ່ງເປັນສ່ວນສໍາຄັນຂອງບໍລິສັດ ແພນອອສ໌ ຊຶ່ງເປັນບໍລິສັດໃນເຄື່ອຂອງກຸ່ມບໍລິສັດ ກວ່າງດົງ ຣາຍຊິງ ໂຮລດິງ (GDRH) ສືບຕໍ່ມີປະລິມານການຜະລິດທີ່ເຂັ້ມແຂງ ຊຶ່ງເຮັດໃຫ້ລື່ນຄາດໝາຍທີ່ວາງແຜນໄວ້ສໍາລັບປີດັ່ງກ່າວ. ໂຄງການພູຄໍາ ສາມາດຜະລິດແຮ່ທອງເຂັ້ມຂຸ້ນຈໍານວນ 36,290 ໂຕນ, ຄໍາ 45,740 ອອນ ແລະ ເງິນ 225,469 ອອນ. ການຜະລິດຢູ່ໂຄງການບ້ານຫ້ວຍຊາຍ ກໍ່ບັນລຸການຜະລິດຄໍາ 76,827 ອອນ ແລະ ເງິນ 663,447 ອອນ. ບໍລິສັດມີຄວາມພາກພູມໃຈລາຍງານໃຫ້ຊາບກ່ຽວກັບຜົນການປະຕິບັດງານດ້ານຄວາມປອດໄພຢ່າງໂດດເດັ່ນໃນປີ 2024 ເຊິ່ງມີອັດຕາຄວາມຖີ່ການບາດເຈັບທີ່ສາມາດບັນທຶກໄດ້ທັງໝົດຕໍ່າທີ່ສຸດ ນັບແຕ່ພວກເຮົາໄດ້ເລີ້ມດໍາເນີນງານໃນເດືອນມັງກອນ 2008.

ບໍລິສັດ ພູເບ້ຍ ມາຍນິງ ແລະ ລັດຖະບານແຫ່ງສປປ ລາວ ສໍາເລັດສັນຍາຮ່ວມມືສະບັບໃໝ່ໃນການເຊັນການດັດແກ້ສັນຍາວ່າດ້ວຍການສໍາຫຼວດ ແລະ ຜະລິດແຮ່ທາດ (MEPA) ຄັ້ງທີ 4. ການດັດແກ້ສັນຍາ MEPA ຄັ້ງທີ 4 ນີ້ ໄດ້ຕົກລົງເຫັນດີເພີ້ມງົບປະມານຂອງແຜນງານພັດທະນາຊຸມຊົນ ແລະ ປັບປຸງຊີວິດການເປັນຢູ່ຍືນຍົງປະຈໍາປີຂອງບໍລິສັດ ຈາກ US$380,000 ເປັນ US$750,000. ທຶນດັ່ງກ່າວຈະຈັດຕັ້ງປະຕິບັດຫຼາຍໂຄງການຕື່ມອີກ ຊຶ່ງຕິດພັນກັບພື້ນຖານໂຄງລ່າງ, ສາທາລະນະສຸກ, ການສຶກສາ, ການພັດທະນາດ້ານກະສິກໍາ, ການພັດທະນາທຸລະກິດຂະໜາດນ້ອຍ ແລະ ການເງິນຈຸລະພາກຢູ່ແຂວງໄຊສົມບູນ.

ນອກຈາກນັ້ນ, ປີ 2024 ຍັງໃຫ້ໂອກາດສ້າງແຜນລິເລີ້ມແບບຍຸດທະສາດໃໝ່ ຜ່ານການຈັດຕັ້ງປະຕິບັດປັດສະຍາການເຮັດທຸລະກິດແບບ FAITH: ການສຸມໃສ່, ການປະຕິບັດ, ນະວັດຕະກໍາ, ເຕັກໂນໂລຊີ ແລະ ການເອົາຄົນເປັນທີ່ຕັ້ງ. ທ່ານ ລີ້ວ ຢົງຈົງ, ປະທານບໍລິສັດ GDRH, ຢັ້ງຢືນການລົງທຶນຢ່າງຕໍ່ເນື່ອງ ແລະ ໂອກາດຕ່າງໆຂອງລັດວິສາຫະກິດຈີນໃນລາວ ຈະສືບຕໍ່ສ້າງຜົນປະໂຫຍດທີ່ດີ ແລະ ປະກອບສ່ວນຊ່ວຍເຫຼືອລັດຖະບານແຫ່ງ ສປປ ລາວ.

ບໍລິສັດ ພູເບ້ຍ ມາຍນິງ ມີຄວາມຍິນດີທີ່ໄດ້ຮັບໃບຢັ້ງຢືນປະເພດດີເດັ່ນ ‘A’ ຈາກກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ. ລາງວັນນີ້ຮັບຮູ້ຄວາມເປັນເລີດໃນການຕິດຕາມກວດກາ ແລະ ຄຸ້ມຄອງສິ່ງແວດດລ້ອມຂອງບໍລິສັດ ພູເບ້ຍ ມາຍນິງ ຢູ່ໂຄງການຂອງບໍລິສັດໃນແຂວງໄຊສົມບູນ.

ນອກຈາກນັ້ນ, ບໍລິສັດກໍ່ຍັງສືບຕໍ່ໄດ້ຮັບໃບຍ້ອງຍໍຜົນງານດີເດັ່ນໃນ ‘ການປະຕິບັດພັນທະສ່ວຍສາອາກອນ’ ຈາກກະຊວງການເງິນ ເປັນເວລາສາມປີຕິດຕໍ່ກັນ. ບໍລິສັດ ພູເບ້ຍ ມາຍນິງ ໄດ້ຮັບໃບຍ້ອງຍໍປະເພດ ‘A’ ສໍາລັບການຊໍາລະພັນທະອາກອນເປັນປົກກະຕິ ແລະທັນເວລາ, ຊື່ງສືບຕໍ່ສະໜອງບົດລາຍງານການທົບທວນ ແລະ ການພັດທະນາແບບຍືນຍົງປະຈໍາປີ, ໂດຍຜ່ານການກວດສອບຂອງລັດຖະບານໂດຍບໍ່ມີໜີ້ສິນຄົງຄ້າງ ແລະ ບໍ່ມີການປັບໄໝສໍາລັບການຊໍາລະພັນທະອາກອນລ້າຊ້າ.

ປີດັ່ງກ່າວຍັງເຮັດໃຫ້ໂຄງການພັດທະນາຕ່າງໆມີຄວາມກ້າວໜ້າຢູ່ໂຄງການຂອງບໍລິສັດ. ບໍ່ຂຸດຄົ້ນປັດຈຸບັນຢູ່ໂຄງການພູຄໍາ ແມ່ນຢູ່ໃນສະຖານະທີ່ດີທີ່ຈະສືບຕໍ່ຂະຫຍາຍອາຍຸຂອງບໍ່ຂຸດຄົ້ນເພີ້ມຕື່ມ, ໃນຂະນະທີ່ບໍລິສັດສືບຕໍ່ທົບທວນຂໍ້ມູນການຊີເຈາະສໍາຫຼວດ. ໂຄງການພາກຂະຫຍາຍຢູ່ບ້ານຫ້ວຍຊາຍ ແລະ ທ່າແຮງໃນການຂຸດຄົ້ນໃຕ້ດິນ ໄດ້ໃຫ້ຄວາມໝັ້ນໃຈວ່າຈະສາມາດຂະຫຍາຍອາຍຸຂອງບໍ່ຂຸດຄົ້ນປັດຈຸບັນອອກໄປຕື່ມອີກທົດສະວັດ.

ຜູ້ອໍານວຍການ ແລະ ປະທານບໍລິຫານຂອງບໍລິສັດ ແພນອອສ໌, ທ່ານ ດາລິງ ເຊັງ ໃຫ້ຮູ້ກ່ຽວກັບປີ 2025 ເປັນປີທີ່ໜ້າຕື່ນເຕັ້ນໃນຕໍ່ໜ້າ. ທ່ານ ດາລິງ ເຊັງ ກ່າວວ່າ ປີ 2024 ໄດ້ນໍາເອົາໂອກາດໃໝ່ຕ່າງໆມາໃຫ້ບໍລິສັດ ພູເບ້ຍ ມາຍນິງ ເພື່ອເຮັດວຽກກັບລັດຖະບານແຫ່ງສປປ ລາວ ໃນໂຄງການພັດທະນາຕ່າງໆ ທີ່ໄດ້ເຮັດໃຫ້ມີການຂະຫຍາຍອາຍຸຂອງບໍ່ຂຸດຄົ້ນປັດຈຸບັນຕື່ມອີກຢູ່ທັງໂຄງການພູຄໍາ ແລະ ໂຄງການບ້ານຫ້ວຍຊາຍ.

“ຜູ້ຖືຮຸ້ນຂອງພວກເຮົາ, ກວ່າງດົງ ຣາຍຊິງ ໂຮລດິງ ກຼຸບ ມີຄວາມໝັ້ນໃຈວ່າພວກເຮົາສາມາດບັນລຸເປົ້າໝາຍທັງໝົດຂອງພວກເຮົາ ສໍາລັບປີ 2025 ເນື່ອງຈາກພວກເຮົາປະຕິບັດຕາມຫຼັກການ FAITH ຜ່ານຄວາມເປັນເລີດໃນຄວາມເປັນຜູ້ນໍາ, ປະສິດທິພາບ ແລະ ການອອກແບບດ້ານການຈັດຕັ້ງ, ; ຄວາມສາມາດໃນການສ້າງນະວັດຕະກໍາ, ຄວາມມຸ້ງໝັ້ນຕໍ່ຄວາມຫຼາກຫຼາຍ, ການລວມເຂົ້າກັນ ແລະ ຄວາມເປັນເຈົ້າຂອງ; ແລະ ທີ່ສໍາຄັນ ດ້ວຍຄວາມສາມາດຂອງພວກເຮົາໃນການສ້າງແຮງຈູງໃຈ ແລະ ຮັກສາຄວາມຮູ້ຄວາມສາມາດທີ່ໂດດເດັ່ນ.”

ປະທານບໍລິສັດ ພູເບ້ຍ ມາຍນິງ, ທ່ານຈັນເພັງ ບຸນນະຜົນ ໃຫ້ຮູ້ຕື່ມອີກວ່າ: ຂ້າພະເຈົ້າຂໍສະແດງຄວາມຂອບໃຈມາຍັງພະນັກງານຂອງພວກເຮົາທີ່ເຮັດວຽກ ‘ນອກເໜືອໜ້າທີ່ຮັບຜິດຊອບ’ ຊຶ່ງໄດ້ສ້າງ, ດໍາເນີນງານ ແລະ ຮັກສາໂຄງການລະດັບໂລກຂອງພວກເຮົາຢູ່ລາວ. ໃນປີ 2025 ພວກເຮົາລໍຖ້າເຫັນປີແຫ່ງຄວາມສໍາເລັດ ແລະ ຄວາມເຕີບໂຕອີກປີໜຶ່ງສໍາລັບຜູ້ຖືຮຸ້ນຂອງພວກເຮົາ, ລັດຖະບານແຫ່ງສປປ ລາວ ແລະ ບັນດາຊຸມຊົນທ້ອງຖິ່ນ,

แชร์